LESSON
7 AUGUST
10-16
JESUH
LEH HUHNA KISAMTE
Sabbath Nitak:
Tu Kaal Sung Sim
Ding: Lk. 1: 46 – 55; 4: 16 – 21; 7: 18 – 23; Matt. 12:
15 – 21; 21: 12 – 16; Mk. 11: 15 – 19; Isa. 53: 3-6.
KAMNGAH:
“Topa Kha Siangtho in keima tungah a om hi. Bang hang hiam cihleh mizawngte
tungah lungdamna thu a tangko dingin, Amah in sathau hong nilhzo hi. Lungsim
kitamkhamte a damsak ding, a kiman mite a kikhahkhiatna thu a hilh ding,
mittawte khua a musak ding, netcipna a thuakte a suaktasak ding leh Topa hong
san hun hong tungta hi, cih thu a tangko dingin Amah in kei a hong sawlzo hi,”
a ci hi (Luke 4: 18, 19).
Jesuh in leitungah mihingin a hong
pianna thu tampi om a, tuate lak panin mihing in Pasian in kua hi, cih i muhtel
nading kihel hi. A thute, a hong kipiaknate, a nunzia, mi nautangte lakah a
hong omzia cihte tungtawnin Pasian hong musak hi. Ama nunzia in nuntak
kikhelsak hi. Messiah a hong nunzia ding, Thuciam Lui kamsangte, ama nu Mary hi
taleh a sep ding a thuhilhna sungah Jesuh mahmah in zong genkhol uh hi (Lk.
4).
Tua banah Matthew, Mark, Luke leh John
in zong Thuciam Lui kamsangte kammalte zangin Jesuh nasep ding pulaak uh hi. Kamsangte genkholh
bang mahin Jesuh in cimawhte leh nengniam thuakte hehpih hi.
Ahi zongin biakna makaite in Jesuh in
amaute do gawp dingin ngaihsun uh hi. Tua hangin hehpihna nei lo, thu maan
lo-in Jesuh kolbulhin singlamteh tung khailum uh hi.Jesuh sihna tungtawnin
Pasian in thu maan lohna, mawhna siatna mu hi. Jesuh in sihna zo-in nungta kik
a, mawhneite adingin hoihna, nunna leh hotkhiatna hong ngahsak hi.
SUNDAY August 11
Mary La
A thupiang ngaihsun in: Mary in
vantungmi Gabriel tung panin thu ngah hi. Gabriel in Mary tungah Jesuh pianna
nu, Sangpen Pa Tapa pianna na hi ding hi, ci hi. Mary in kuama tungah pulaak
nai lo-in amah sangin uham zaw a sanggam nu Elizabeth kiangah va hawh hi. Tua
laitakin Elizabeth in zong naupaai ding kilamen hi.Kha Siangtho makaihna tawh Elizabeth
in Mary in a pulaakma-in Mary gen ding thute theikhol hi. A nihun Pasian hoihna
leh a kamciamte hangin nuamna tawh kidim uh hi.
Lk. 1: 46 – 55 sim in. Mary nuam
nading thute leh Vanglian Pasian in ama ading a sep ngaihsun in. Bang hangin
Pasian biakna leh phatna sungah mimal hi taleh mipi kihel ding kisam hiam?
____________________________________________________________________ ___________________________________________________________
Mary la in Hebrew kamsangte gelh ahih
kei leh Late sungah kihel dingin kilawm hi. Mary in Pasian tungah lungdamin
nuamna tawh kidim hi. A nuntakna Pasian nasepna teltakin mu hi. Tua banah a
mite ading leh mi khempeuh adingin Pasian hong geelsak hotkhiatna mu thei hi.
Mary in Pasian vangliatna, phattaak cing ahihna banah hehpihna tawh kidim,
nengniam nawlkhin thuakte, mizawngte a hehpih Pasian hi, ci-in pulaak hi. Vantungmi in Mary in naupaai ding lungdamna
thu pulaakin Mary in la a sakma-in vantungmi in hih bangin pulaak hi: “Gam ukte
a kumpi tokhom panin khiasuk a, a kinengniamte a lamsang hi. A gilkial mite na
hoih tampi guan a, mihaute ahihleh a hawmpi-in a paikhiasak hi” (Lk. 4: 52, 53).
Jesuh in mihingin a hong suah a kipan,
Amah in ukpa (Lk. 1:43) ahihna kilang
pah hi. Ahi zongin ama Gam in leitung tawh kibang lo hi. Jesuh pulaak Pasian
gam in hih leitung tawh kilangdo gam hi ding hi. Hih leitung vangliatna,
hauhnate in Jesuh hong hilh Pasian gam sungah a neu pen hi ding a, a
zawngkhalte hatna tawh kidim ding uh a, a kinengcipte suakta ding uh hi
Pawlpi
in Pasian gam kilangsak ding ahihleh, Mary gen bangin pawlpi in leitungah
bangzah kilamdanna a piangsak hiam? Khrih itna a ngah mihau, uliante
tungah thuman lo lampi tawh hi lo-in,
mite etteh thamcingin pawlpi in Pasian gam
a pulaak ding hiam?
MONDAY August
12
Jesuh Nasep A Pulaak
Thu
Jesuh in a masa pen a thuhilhna-ah a
sim Lai Siangtho Isaiah 61:1,2 a sim, a
tuahkhak a simziau hi lo hi. Tua ni-a sim dingin kigeel maw, ahih keileh Jesuh
in a teelkhiat maw, cih pen a lamdang thu hi lo hi. Lai Siangtho siksanin a
thuhilhte (Lk. 4: 16- 21), tuni-in Lai Siangtho tangtunna thu na za uh hi, ci-in
Luke in Jesuh nasep kipatna ciamteh hi. Jesuh in na khempeuh kilamdangsak Mary
la siksanin thuhilh a, a nasep tangzai semsem hi. Jesuh leh Luke in hotkhiatna
thu a genkik uh ciangin, Jesuh nunzia, a nasepte a pulaak khol Isaiah genkholh thute pulaak uh
hi. Hih thute mah tua-ma kum 30 lai-in Mary in pulaak khin hi. Mizawngte,
gimthuakte, a kinengniamte mitsuanin lungdamna kihilh hi. Jesuh in mi cimawh,
gentheite tungah lungdamna thu pulaakin
Ama thu kigenkhoI Isaiah thute mah siksan hi. Jesuh in in a sepna khempeuh leh
a mungtup in mite huhna upna thu tonkhawmsak hi. Jesuh in cimawhte huhna leh
upna thu khentuam lo hi. Jesuh leh a nungzuite in cimawh genthei-te a huh uh
ciangin upna thu zong lamsangsak hi.
Lk. 4: 16-21 leh 7:18 – 23 enkak in.
Bang hangin tua bangin Jesuh in dawngkik hi ding hiam? Koi bangin Jesuh in
Messiah ahihna leh Pasian ahihna na dawngkik ding hiam? ___________________________________________________________ ___________________________________________________________
Jesuh in a nungzuite a sawlkhiatin
cimawh genthei-te huh dingin thupia hi. A pai-na mun khempeuh ah “
Vantunggam hong nai ta hi,” ( Matt.
10:7) ci-in thupuakin a sawlteh cinate damsakin, misite thosakin, phaak neite
damsakin, dawi vei-te damsak dingin thupia hi. Man ngen lo-in a ngah mah bangun
man ngen lo-in piakhia dingin kisawl hi (Matt. 10:8). Nungzuite in Jesuh min tawh a sepna khempeuh uh in
Jesuh thuhilhna leh Ama gam kilangh dingin kisawl hi. Amaute in Jesuh tawh nasemkhawm ding leh a mangthang mite, mi nunniam pente leh
nawlkhin thuakte lamsang ding uh hi.
Koi bangin cimawh, genthei-te huhna
leh vantungmi thumte thupuak in tonkhawm hiam?
Bang hangin thuman tangko-nate ah huhna kisam mite huhin thuman tangko
ding i hiam?
TUESDAY August 13
Jesuh In Damsak Hi
Lungdamna Thubu Matthew pan John
sungah Jesuh nalamdangte kigelh hi. Tuate lak panin cina damsak nalamdang tam
pen hi. Isaiah genkholh bangin Jesuh in mittaw-te khuamuhna pia-in, kumzawn
natnate a kipan cina khempeuh damsak hi (Mk. 5: 24 – 34;Jn. 5: 1-15). Ahi
zongin hihte sangin a thupi zaw-in khebai-te lampai-sakin, paaknatna damsak hi.
A kam tawh thupia-in damsak bek hi lo-in tua bang mite kihlo-in a khut tawh
lawngin damsak hi. Dawivei-te damsakin a si-te nunna guankik hi.
Tua bangin nalamdang a bawl ciangin mi
tampi in zui-in Amah a langpangte leh a um lo-te in um ding uh hi, ci-in i
ngaihsun hi. Ahi zongin tua bang hi lo hi. Jesuh in tua bangin damna ngahte in
kuama kiangah pulaak lo dingin khaam hi. Damna ngahte in Jesuh sawl bang
manglo-in, a damna uh pulaak kawikawi uh
hi. Jesuh in nalamdang a bawl ciangin tua nate sangin a thupi zaw,
thuthuk zaw hilhnopna tawh a bawl a hi hi. Jesuh deihna bulpi in mite in
hotkhiatna a ngah nading uh ahi hi. Ahi zongin Jesuh in mite hehpih ahih manin
tua bangin nalamdang bawl hi. Gentehna-in mi 5000 anvakna-ah, Jesuh in mi honpi a muh ciangin amaute hehpih
ahih manin cinate damsak hi (Matt. 14:14). Jesuh in gimthuakte gimna thuakpih
hi. Ama kiang a zuante khempeuh huhin, a nunna uh domsang hi.
Matt. 12: 15 – 21 sung a Isaiah
genkholh thu sim in. Koi bangin Isaiah leh Matthew in mi tampi in damna ngahna
sangin a thupi zaw Jesuh nasep pulaak uh hiam?
____________________________________________________________________ ___________________________________________________________
“Jesuh bawl nalamdang khempeuh in
Jesuh in Pasian hi, cih pulaak hi. Jesuh nasep khempeuh in kamsangte genkholh
Messiah nasep ding kamsangte genkholhna bangin tangtung hi. Ahi zongin Pharisee-te
in Jesuh nasep hoihte hangin heh uh hi. Jew makaite in gim thuakte hehpihna nei
lo uh hi. Amaute huaihamna, angsung zonna hangin gim thuakte Jesuh in
suakta-sak hi. Tua hi-in Jesuh bawl nalamdangte in biakna makaite tungah
thuhilhna suak hi.” Ellen G. White, The Desire of Ages, 406.
Jesuh in hehpihna leh thu maanna tawh
kidim ahih manin cinate damsak hi. Ahi zongin natna damna ciang bek deihna hi
lo hi. Tua bangin a bawl nalamdangte deihna bulpi in mite in tawntung nunna
sung a lut theih ding uh deihna hi. (Jn.
17:3).
WEDNESDAY
August 14
Biakbuk Siansuahna
Matthew pan John sunga kigelh Jesuh
nasepte i sim ciangin Jesuh migitna hong lunggulhsak semsem hi. Cinate a
damsakna, naupangte a itna, a mangthangte zonna, Pasian gam thu-te in i lungsim
hong lawng hi. Hih bang thute hangin Jesuh in biakna makaite langah a
gamhtatna, a ngongtatnate i muh ciangin a gamtat lamdang i sa hi.
Matt. 21: 12 – 16; Mk. 11: 15 – 19;
Lk. 19: 45 – 48; Jn. 2: 13 – 17 sim in. Lungdamna Thu gelh Matthew, Mark, Luke
leh John in a thupi mahmah bang thu pulaak ciat uh hiam?
__________________________________________________________________ ___________________________________________________________
Mathew, Mark, Luke leh John in biakinn
suansuahna thu a pulaak uh, lamdangsak ding hi lo hi. Hih thu in sepna,
deihsakna leh mite muhin gamtatna kihel hi. Biakna makaite in tua bangin
biakinn a zatzia uh hangin Jesuh lunghimawh hi.
Jesuh in meihal biakna dingin kizang ganhingte zang nawn lo-in
biakpiakna maan taktak kilaih ding thu pulaak khol hi. Jesuh in meihal
biakpiakna manphatna bei ding hi ta-in, tuate limciin, leitung mawhna,
mawhneite aitangin a hong sihna pulaak
hi. Hih thu in Hebrew kamsangte nasep tawh kituak mahmah hi. Gospel gelhte in zong Isaiah, Jeremiah, Late siksanin Jesuh
nasep pulaak uh hi.
Mite
in Jesuh in kamsang ahihna theitel uh hi (Matt. 21:11). Jesuh in biakinn
huang sung a vanzuak, sumkhekte hawlkhia-in, mihonpi tungah thuhilh a, Ama
damsak mi tampi zong thungai-in hong pai uh hi. Ama thuhilhna a ngai mite in
lametna nei-in, Ama lawn mite in damna tawh kidim uh hi.
Biakna makaite in zong Jesuh in
kamsang hi, cih theitel uh hi. Ahi zongin amau adingin lauhuai dinmun hong tun
ding hi; a nuntak khuasakzia uh kisusia ding hi, cih thei ahih manun, amau ma-a
kamsangte tungah a bawl bangun, tu-in zong Jesuh thah ding vaihawm uh hi.
Jesuh hunlai-a mite bangin tu-in zong
biakinn niinsakin, vanlei, vanzuakna mun a hi lo dingin koi bangin nungta ding
na hiam? Koi bangin tua bang lauhuai-na tawh kipelh ding na hiam? Bang thu-te
in lauhuai hiam?
THURSDAY August 15
Khrih Singlamteh
Pasian in na khempeuh mu-in mizawngte
thuumna za-in a kinengniamte a hehpih Pasian hi. Pasian in Jesuh sungah leitung
gitlohna, nengniamna, thu maan lo nasepna a thuak Pasian hi. Jesuh in hoihna
tawh kidimin a nuntakna, a nasep khempeuh in itna, hehpihna tawh kidim hi
taleh, muhdahna, hazatna leh thu maan lohna hangin sihna thuak hi.
Siatna, gitlohna, nengniamna tawh
kidim mawhna vangliatna hangin Gethsemane huan sung panin gimna tawh a thunget
a kipan mat le hen, bawlsiatna, thusitna, zahko-na, singlamteh tung kikilhna
leh sihna hong thuak hi. Ama siantho-na, dikna, hoihna hangin Jesuh in gimna
lianpi hong thuak hi: “Amah kiniamkhiat tawm zaw a, nasem lim a hong puazaw hi.
Mihing bangin amah hong kibawl a, mihing teekteek mah a hong sun hi. Amah hong
kiniamkhiat tawm a, singlamteh tung nangawnah sih ding a ut hi” (Phil. 2:7, 8).
Hotkhiatna tangthu in ei adingin Jesuh hong kipiakna deihhuai-na hong mu-sak
hi. Ahi zongin Ama thuakna, a maan lo-in gimna a hong thuak mangngilh ding hi
lo hi.
Isa. 53: 3-6 sim in. Mawhnei mihingin
a hong nungta Jesuh in mawhneite adingin a hong thuakna bang hong hilh hiam?
Koi bangin eite thuak ding khempeuh a hong thuakna hong mu theisak hiam? ___________________________________________________________ ___________________________________________________________
Pasian in mawhna, thu maan lo-in Jesuh
gimthuaknate thei hi. Khialhna nei lo mi khat in thahna a thuak ciangin hehna
piang hi. Pasian hehna lianzaw ding hi. Pasian in mihingin hong piangin,
mawhna, siatna tawh kidim mihingte tawh hong nungta hi. A hong hehpihna, a hong
itna, a cihtakna muanlah ding hi lo hi. “Eite’ neih Siampi Lianpen pa in i
ginat lohna-ah eite mah bangin zia-etna khempeuh a thuak hi a, ahi zongin
mawhna bawl lo hi” (Heb. 4: 15). Pasian zia le tong hong kilangh hi.
Koi bangin singlamteh tung pan hong
kilaak hotkhiat lungdamna thu i sungah hong teeng thei ding hiam? Topa ading
sepna khat peuhpeuh, a diakdiakin cimawh genthei-te huhna hi taleh tua bang nasepnate siksan dingin,
Jesuh in eite tangding bek hi lo, cimawh genthei-te adingin zong a hong sihna
thu bulphuh ding kisam hiam?
FRIDAY August
16
Ngaihsutbeh Ding:
Ellen G. White, ‘ In the Footsteps of the Master,” 117 – 124, in Welfare
Ministry; “ Days of Ministry,” 29 – 50
in the Ministry of Healing; The Temple Cleansed Again,” 589 – 600; “ In
Pilate’s Judgment Hall,” 7223 – 740 in the Desire of Ages.
Thukham palsat khempeuh in Pasian
thukhenna thuak ding hi, cih pen Lai Siangtho in kitel takin hong hilh hi.
Pasian in hehpihna tawh kidim ahih manin mawhneite thu hong khen lo ding hi,
ci-in zuau gente in singlamteh tungah Khrih hong sihna ngaihsun uh hen. Mawh
nei lo Pasian Tapa hong sihna in mawhna thaman in sihna hi, cih hong hilh hi.
Pasian thukham a palsat khempeuh in a thaman ngah hamtang ding hi. Khrih in
mawhnei lo, mihingte adingin mimawh hong suak hi. Thukham palsatte mawhna hong
pua hi. A Pa maitang hong laih a, lungsim kitamin a nuntakna hong pia hi.
Mawhneite a hong tatkhiatna dingin hong
si hi. Tua simloh mawhneite a hong tat nading lampi dang om lo hi. Khrih hong
sihna a nialte in ama mawhna, thukham a palsatna thaman thuak ding uh hi.”
Ellen G. White, The Great Controvery, 539, 540.
KIKUP DING DOTNATE
1. A tung a Ellen G. White laigelh ngaihsun
kik in. Khrih in a thuak ding a kilawmlo pi, mawhna thaman sihna hong thuak hi.
Bang hangin hih thu phawk tawntung ding thupi hiam?
2. Leitung ki-ukzia kipuahphatna tungtawnin
Vantung Gam hong piang dingin Jesuh in pulaak ngei lo hi. Nenniam thuakte
suahtakna a ngah nadingun thauvui thautang ahih kei leh leitung thuneihna tawh
kipelh lo hi. Gimna khat a bei nadingin gimna khat mah zat kul hi. Kinenniamna thuakte
suahtaak nadingin, Khristian thu-umte in leitung makai, thuneite tawh mapang
khawm ding hi mah taleh, tua bang thuneihna in khat ii gentheihna a suah khak
loh nading kidawp kul hi lo hiam?
3. Mawhneite a hong kihotkhiat nadingin
pello a kul hamtang a piang thute ngaihsun in. Thu maan tawh kidim Jesuh in thu
maan lo mite adingin hong si hi. Bang hangin ei adingin a lian mahmah Jesuh
hong sihna in ama sungah mi thak hong suaksak hiam?
TOMLAKNA:
Lungdamna Thubu-te in Thuciam Lui sung kamsangte genkholh thute, Jesuh sungah a
tangtunna hong hilh hi. Messiah in mizawngte adingin lungdamna thu, nengniam
thuakte adingin suahtakna, a damlote adingin damna hi. Ahi zongin a hong sihna
in thu maan lo-in a hong thuakna in mawhna tungah zawhna hi. Ei adingin a hong
sihna hangin, mawhmai-na leh tawntung nunna ngah ihih manin Ama tungah i
lungdam hi.
