LESSON
6 AUGUST
3-9
PIANGSAKPA
BIA
Sabbath Nitak
Tu Kaal Sung Sim
Ding: Late 115: 1-8; 101: 1; Thkna. 10: 17 – 22; Isa. 1: 10-17; 58; Mk. 12: 38 – 40
KAMNGAH:
“Kei’ deih antanna hih bang ahi hi: gitlohna khaute phelin, hakkol savun khaute
phel a, a kinengniam mite khahkhia-in thuman lohna hakkol khempeuh suktan ding
ahi hi. Na an uh a gilkialte tawh nekhawm unla, inn nei lo a zawngte na innsung
uhah paipihin, tangguakin a om mite puan silhsakin, na mipihte uh kiang panin
bu lo ding hi lo na hi uh hiam? (Isaiah 58: 6,7).
Thuciam Lui kamsangte gelh thute in
nengniamthuakte leh a zawngte thuak a lunghimawhnate uh pulaak hi. Amaute gei-a
om namdangte nunzia in Pasian leh kamsangte hehna lianpi piangsak hi (Amos 1,2
). Thupha tampi ngah Pasian mite mahmah in siatna a bawl uh ciangin kamsangte
leh Pasian hehna suaksak hi. A taktakin Pasian mite in Ama thukham nei-in Ama
makaihna tawh a beisa thu-te ngaihsun uh hileh Pasian deihna bangin nungta ding
uh hi. Ahi zongin tua bangin nungta lo uh hi.
Tua bang thute hangin kamsangte in dahna tawh kidim uh hi.
Kamsangte in thuman thutak leh thuman
lo thute a pulaak uh ciangin biakpiakna siksanin pulaak uh hi. Biakpiakna i cih
in biakinn sung a biaknate bek hi lo hi. Biakpiakna i cih in, Pasian in
mihingte nopna ding a lunghimawh mah bangin, nengniam thuakte khahkhia-in,
nawlkhin thuakte a hehpih mah bangin, eite zong tua bangin nuntakna in Ama deih
biakpiakna man ahi hi.
SUNDAY August
4
Milim Biakna Leh
Nengniamna
Pasian in Egypt gam panin Israelte a
hotkhiat khit a sawtlo-in Sinai mualah Israelte tawh kimu hi. Tua munah Thukham
Sawmte pia hi. Thukhawm Sawmte khat leh nihna in milim biak ding, pasian dang
bia lo dingin hong hilh hi (Pai. 20:2-6). Israelte in zong Topa thupiak zui-in
ama tanu, tapa hi dingin kiciam uh hi (Pai. 24:1-13).
Moses in mual tungah vakahto-in kaal 6
sung phial va om hi. Tua hun sungin Moses in bang tuak hi ding hiam, ci-in mipi
in lamdangsa hi. Mipi thuzawhna lel ahih manin Aaron in kham tawh kibawl
bawnglim khat bawlsakin, mipi in bia hi. Bawnglim mai-ah gualnopna tawh an le
tui dawnin amau ut bangin gamta uh hi (Pai. 32:6). Mipi in Pasian taisanin
milim bia uh ahih manin Topa leh Moses heh hi. Moses in Pasian kiang
mawhthuumsak ahih manin mipi in amau thuak ding gimna tawh kipelh uh hi (Pai.
32: 30-34).
Pasian mite in milim biakna sung tung
pahpah uh hi. Israelte leh Judahte tangthu sungah milim biakna lut zel hi. A
kumpite un milim bia dingin mipi makaih uh hi. Tua bangin Pasian tungah cihtak
lohna hangin Ama kiang ciah kik dingin kamsangte in hilh tawntung uh hi. Tua
bangin Pasian kiang va zuanin, kipuah kikhelna sungah amaute laka om mizawngte,
tasamte huhin panpih ding zong kihel hi.
Late 115: 1-8 sim in.
Laigelhpa in bang thulian mahmah hong hilh hiam?
________________________________________________________________
________________________________________________________________
Mihing in a biak bangbang, a ngaihsut
bangbangin tawh kisuun semsem hi. Pasian mite in a thuman Pasian nusia-in
namdang pasiante a biak uh ciangin amaute sungah thumanna, mi hehpih om nawn lo
uh hi. Minam pasian bia dingin a khentat uh ciangin amau ngaihsutnate in siatna
manawh pah a, mi tawh a kizopna uh zong kisia hi. A nungta Pasian tungah citak paisuak uh hileh
amaute lakah genthei, tasam om lo ding hi.
Mihing in a biak bangbang tawh kisuun
semsem hi, cih thu ngaihsun in. Koi
bangin hih thu kimu thei hiam?
MONDAY August 5
I Biakna Siksan Thute
Lai Siangtho sungah Pasian mite in
Pasian bia dingin hong kisawl hi. Bang hang hiam cihleh tua bangin i biak ding
siksan thu tampi om hi. Pasian bia dingin hong kihilh hi. Bang hang hiam cihleh
Amah in Pasian hi; na khempeuh piangsak hi; hoihna, hehpihna, vangliatna,
siangtho-na khempeuh tawh kidim hi. Mawhneite hong honkhia-in a hong kamciamte
hangin Amah bia-in a min phatnopna hong guan hi.
Thkna. 10: 17 – 22; Late 101: 1; 146:
5-10; Isa. 5: 16; 61: 11 sim in Pasian bia-in a min hong phat nuamsak thute in
bang thute hiam? ___________________________________________________________ ___________________________________________________________
Pasian
bia-in a min hong phatsak nuam thute in Pasian mite adingin a theih ngei loh uh
thute hi lo hi. Israelte in Egypt gam saltanna pan suahtakna a ngahcil, a
nuamna hangun Topa bia-in a min phat uh hi. Egypt panin a suahtak khit uh San
Tuipi kantanin, amau tuahkhak thute hangin Moses leh Miriam in mihonpi makaihin
Topa phat uh hi (Pai. 15).
Pasian’ thu maanna leh a hehpihnate
hangin saltanna pan a suahtak uh a mangngilh loh ding uh kisam hi. Amaute in
tua thute pulaak kikik ding uh a, khangsawnte hilh ding uh hi. Pasian thu
maanna leh ama nasepte hangin Amah bia uh hi. Thkna. 10: 17 -22 sung a thute
gen kikkik uh hi.
Khatna-ah Pasian’ thu maanna in Amah
mah a hong kipulaakna hi-in, a thu maanna in Ama zia le tong hi. “Pasian in
siatna bawl hi, cih pen ngaihsut theih hi lo hi; Vanglian Pasian in thu maan
panin lampial lo hi (Job 34: 12). Pasian in thu maan hi; thu maan deih hi. Ama
thu maanna hangin Amah bia-in a min i phat hi.
Nihna-ah Pasian thu maanna in a mite
aitangin a sep khempeuh pulaak a, mizawngte leh nengniam thuakte a hutna pulaak
hi. Pasian’ thu maanna i cih in ama zia le tong a hong hilhna bek hi lo hi. Ama
thu maanna in cimawh, genthei-te’ kiko-na a za Pasian hi, leitung thu maanlohnate
thu maan tawh nasem hi, cih hong hilh hi (Job 34: 28). A tawpkhakna-ah a nunung
pen Pasian’ thukhenna leh leitung a hong bawlphat hun ciangin leitung in
Pasian’ thu maanna tawh kidim ding hi.
Nidang
Israelte in Topa phat uh ahihleh, Khrih a hong sih khit eite in bangzahin Amah
phat zaw ding hi lo i hiam?
TUESDAY August
6
Biakna Sungah Mi
Nengniamte
Israelte leh Judahte in nuamtakin a
nuntak hun sungun, namdangte tawh kihelhzau-in milim biakna tawh kidim uh hi
taleh, biakbukah Pasian bia dingin biakbuk hong zuan uh hi. Ahi zongin
kamsangte in siatna nusia-in tua bang biaknate kicing lo hi, ci-in hilh uh hi.
Hanciamin Pasian bia uh hi mah taleh, tumging tuamtuamte a kipan Pasian phatna
late in mizawngte leh nengniam thuakte honkhia thei lo hi.
Amos in ama hun a mite nunzia hih
bangin pulaak hi: “mizawngte nengniamin, cimawh genthei-te bawlsia uh hi” (Amos
8:4). Tua bangin a gamtatna uh hangin a
biakna uh nusia-in thu maan lo-in nasepna, vanzuakna, vanlei-nate nusia-in, “a
cimawhte khedap kaih bu khatin lei-a, mizawngte ngun tawh lei uh hi (Amos 8:6).
Isa. 1: 10- 17; Amos 5: 21- 24; Micah
6: 6-8 sim in. Pasian in amah a bia-te
tungah bang thu pulaak hiam?
___________________________________________________________
________________________________________________________________
Kamsangte tungtawnin Pasian in
Israelte kamkhuah tawh thu hilh hi. Amaute biakna in thu maan lo, siatna tawh
kidimin, namdangte bangin kinengniamna, siatna nusia dingin hilh hi. Amos 5: 21
– 24 sungah ‘heh’ ‘nawlkhin’ cihte kimu hi. Hih
in amaute biakpiakna kihhuai-zia pulaak kammal hi. Amaute biakpiakna in
namsia hi. Meihal biakna, a tumgingte uh in kimanna nei lo a mawkna taktak hi.
Micah 6 sungah a uanglua, a khengval
vanzuakna zangin, cimawh genthei-te hehpih lo, tuapi mah tawh Pasian bia uh hi.
Kamsangte in amaute meihal biakpiaknate hih bangin zahpihna tawh pulaak uh hi:
“Tuutal tulkhat, sathau gunpite tawh tulsawm tawh Topa lungkim ding ahi hiam?
Amaute khialhna hangin a ta upa pente uh piakna hangin Pasian maipha leh
mawhmai-na ngah dingin kingahsun uh hi (Amos 6:7, 8). A tawpna-ah Topa deih
biakpiakna taktakin,“Thutangin gamtatna, lainatna it-in, kiniamkhiatin Pasian
tawh kalsuan khopna hi”(Micah 6:8), ci hi.
Cimawh, gentheite panpih lo-in
biakpiakna, biakna thuzuihzia kipuahphat ding a kin mi na hi hiam? Tua bang
gamtatna panin na nunzia ding na thei hiam?
WEDNESDAY August
7
Biakpiakna Lampi
Kamsangte in biakpiakna leh thu maanna
kizopzia a pulaakte lak pan khat in nengniam thuakte hehpihin honkhia a, a
zawngte huh ding uh hi. Tua in biakna maan hi pah hi. Isaiah 58 in hih thu hong
hilh hi.
Isa. 58 sim in. Pasian leh a mite kizopna-ah a masa lamin
bang kisam hiam?
___________________________________________________________
___________________________________________________________
I gensa om bangin hih mite in biakna
makai, biakna tawh kidim mite hi. Amaute in Pasian maipha zong uh hi. Ahi
zongin Pasian mu lo uh hi. Tua ahih manin Pasian in amaute biakpiakzia kheln, a
nunzia uh kikhel dingin hilh hi. Topa deih biakpiakna in “a thutang lo
kinengniamna khau-te sut ding leh hakkol khaute phel ding, a kinengniamte khah
ding leh hakkol peuhmah suktan ding hi” (Isa. 58: 6). Gilkialte an pia-in, lup nading nei lote omna
pia ding leh huhna kisamte huh ding uh hi. Biakpiakzia ding thuhilhnate sungah
hih thute kihel lo hi taleh, Pasian in tua bangin gamtatzia in Ama deih biakpiakna
hi, ci-in hilh hi. Tua bangin gamtatnate in meihal biakna sangin hoih zaw hi.
Tua hi-in biakpiakna in lungsim tawh
kisai hi banah kimlepaam ah cimawh, genthei-te huhna zong kihel hi. “Biakna
maan taktak in mawhna vangik sung kidiahte kaikhia-in, nengniamnate, gitlohnate
hemkhia-in, thutanna, suahtakna, khat le khat kilemna tawh nuntakna hi.” The
SDA Bible Commentary, vol. 4., 306.
Isa. 58: 8-12 sungah kipuahphatna
hangin Pasian in a mite tungah a piak thupha-te kimu hi. Amaute in huaihamna,
angsung theihnate hemkhia-in a nuntak uh ciangin Pasian maipha mu uh a, Pasian
in amaute tawh nungta-in, amaute tungtawnin damna leh thupha hong luang hi.
Isa. 58 in biakpiakna sung nopsakna
leh Sabbath tawlngak kizopna pulaak hi. Sabbath tawlngakna leh hotkhiat nasepna
kizopzia i pulaak mah bangin, Pasian tawh kizopna hoih, Ama thupha-te i ngah
nading lampi hong hilh hi. Hih tawh kisai-in Ellen G. White in hih bangin
genbeh hi: “Sabbath ni a tawlnga mite in hehpihna nei-in, thupha bawlding uh
hi.” Welfare Ministry, 12.
THURSDAY August 8
Hehpihna Leh Cihtakna
Biakna makaite in ‘mawhneite’ ci-in
amau nawlkhinte tawh Jesuh in anne khawm a muh uh ciangin tua bangin a gamtat
mawhsak uh hi. Jesuh in Hosea gen bangin, Pasian in biakpiakna sangin hehpihna,
thu maanna ka deih zaw hi, cih thupiak in bang pulaak hiam cih a tel dingun gen
hi (Matt. 9:13; Hosea 6:6).
Jesuh in hehpihna, mi huhna tawh kidim
hi. Mi tawh a kizopzia, natna a damsakna a kipan thu gentehna tawh a hilhte
khempeuh in, hehpihna nei-in thutanna tawh nuntakna in Pasian deihna biakna hi,
ci-in hilh hi. Biakna makaite in Jesuh mawhsiat uh hi; Jesuh thuhilhna thuak
biakna makaite mah hi. Isaiah hunlai biakna makaite mah bangin Pasian tawh
kizopna biakpiakna thukhente zuihna hi, ci-in ngaihsun uh a, cimawh, mizawngte
don lo uh hi.
Pasian a biakna uh tawh kizui-in
nungta lo uh hi; a gamtat un a biakna uh zui lo hi. Jesuh in tua bang
gamtatnate kineihna hi, ci-in a diklohnate uh hilh hi.
Mk. 12: 38 – 40 sim in. Amaute in
“meigongte inn netum uh hi” cih thu in bang pulaak hiam? Bang hangin amaute in
a lian zaw mawhna thuak ding ahihna uh koi bangin hilhcian ding na hiam?
__________________________________________________________________ ___________________________________________________________
Jesuh in thuhilhna tuamtuam nei a,
tuate lak pan biakna makaite khuahtakin thuhilhna Matt. 23 sungah kigelh hi.
Amaute biakpiakna in tasam, genthei-te ading thupha ahi sangsikin, cimawh,
genthei-te gimna piangsak zawsop uh hi. Tua bang mite huh lo, kin lo, awlmawh
lohna hangin, amaute in kuama lut theih loh dingin vantungkong khaktan uh hi,
ci-in Jesuh in pulaak hi (Matt. 23: 13). Jesuh in tua bangin thu a hilhteh kum
zatampi hunlai-a kamsangte hilh thute pulaak kik hi-in, Pasian bia kici hi napi
thu maanin gamta lo, thu maan lo-in metna bek ngaihsun uh hi. “No kineihsiam
thukham siate leh Pharisee-te, gimna na thuak ding uh hi. Bang hang hiam cihleh
lengmasel, samong sapateh leh cumminte sawm a khat na piak uh hangin thukham
sunga a thupi zaw ahi maantak a thukhenna, hehpihna leh upnate na thudon kei uh
hi. A dangte thudon lo tuanlo-in hih nate na hih veve ding uh ahi hi” (Matt.
23:23), ci hi. Jesuh in biakpiakna thusim lo hi lo-in, thu maan lo, hehpihna
nei lo biakpiakna in a mawkna hi.
Koi
bangin thuman ka nei hi; thuman ka thei hi, ci-in lungkimna pelh thei ding na
hiam?
FRIDAY August 9
Ngaihsutbeh Ding:
Ellen G. White, ‘Isaiah 58, A Divine Prescription,” 29 – 34, in Welfare Ministry;
“Woes on the Pharisees,” 610- 620, in the Desire of Ages.
“Pasian zia le tong nei nunna in manpha
hi, ci-in kamsangte in kum zatampi mapekin Israelte tungah pulaak khin hi.
Jehovah nasem kamsangte in tua bangin biakna tawh lungkimin hehpihna nei lo nunzia
a pelh dingun khang khat khit khang mite tungah hilh tawntung uh hi.” Ellen G.
White, Prophets and Kings, 326, 327.
Pasian in, “Ka mite tungah Isaiah 58
hilh in, ci’n Ellen G. White tungah
kipulaak tawntung hi. Isaiah 58 limtakin sim in. Tua thute i n pawlpi, thu-umte
hong khanglo sak ding, hong nungta-sak ding thu hi. Piakkhiatna, thupha bawlna
tawh hotkhiatna thu pulaak ding kisam hi. Huh kisam mi khat huh in. Gilkialte
an pia in. Tua hileh Khrih nasepna sungah nang zong a kihel na hi hi. A siangtho
Topa nasep in hehpihna tawh kidim nasepna hi; mi khempeuh in hih nasepna sungah
kihel dingin hanthawn in.” Ellen G. White, Welfare Ministry, 29.
KIKUP DING DOTNATE
1. Thu maanin gamta-a, itna nei-in mi
hehpihna in biakpiakna hi, cih thu na
ngaihsun ngei hiam? Koi bangin hih thu in mi tawh kizopzia hong puahpha ding
hiam? Koi bangin biakpiakna tawh kisai na muhzia hong khel hiam?
2. Koi bangin mimal hi taleh, pawlpi in hi
taleh, “thukham sangin a thupi zaw” itna, hehpihna nawlkhin kha zel i hiam?
(Matt. 23:23). Na nuntakna sungah “thosi
thovai-te hemkhia napi, singluang valhsuk” (Matt. 23: 24) in na om ngei hiam?
3. Bang hangin kineihkhemna in mawhna hiam?
A hoih a gamta-in a hong kimuh ding hanciamna in thu hoih hi lo hiam?
4. Kamsangte tungtawnin Pasian in mizawng,
cimawhte a deihsakna thu in leitung na muhzia hong khel hiam? Kamsangte bangin
mu thei za thei hi lecin kikhelna bang na mu diam?
TOMLAKNA:
Kamsangte in Pasian bia, biakna makaite’ siatna hangin thu hilh tawntung uh hi.
Kamsangte leh Jesuh in thu maanna nei lo biakpiakna in kineihna hi, ci-in hong
hilh hi. A maan Pasian biakna in kinengniamna langpanin, mizawngte huhin, huhna
kisamte panpih hi.
