LESSON 4 July 20 -26 PAUNAK LEH LATE SUNG A HEHPIHNA LEH THU MAANNA

LESSON 4    July 20 -26

PAUNAK LEH LATE SUNG A HEHPIHNA LEH THU MAANNA

Sabbath Nitak

Tu Kaal Sung Sim Ding: Late 9: 7-9, 13 – 20; 82; 101; 145; Pau. 10:4; 13: 23, 25; 30: 7-9.

KAMNGAH: “A ginalo mite leh pa a nei lo mite tungah thu maan unla, a thuakte leh a cimawhte’ thu a manin khen un. A ginalo mite leh a cimawh mite hon unla, migilote’ khutsung panin amaute honkhia un,” a ci hi (Late 82: 3,4).

          Late leh Paunak Lai Siangtho in biakpiakna tawh kipawl thu tuamtuam leh biakpiak hun a pulaak banah nisim nunzia ding thu tampi hong hilh hi. Paunak in innkuan sung hi taleh nasep khuasakna tuamtuam ading banah gam sung kimakaihzia ding pilna, ciimna thute hong hilh hi. Late in ahihleh Topa min phatna a kipan lungkham khuisatna hangin gimnate pulaak hi.  I upna in nisim kalsuanzia, nunzia hong khel kul hi. Bang hang hiam cihleh Pasian in i nunzia hong en tawntung hi.

          Leitungah thumanlohna in mihing susia hi. Thuman thutak dingin Topa’n a hong hilh mah bangin thumaan lohna nial dingin zong hong hilh phapha hi. Topa in lamet bei mi adingin lametna hi. Thu maanna leh hehpihna tawh kisai Paunak leh Late hong hilh thute i gen ding a, cimawh genthei, nengniam thuak mi, nawlkhin thuak mi khat huh dingin hong hilh hi.

SUNDAY           JULY 21

LATE: Nengniam Thuakte adingin Lametna LATE

          Pasian in gimthuakte, lungkhamte mu-in, amaute kiko-na aw za hi. Late sungah a Pasian muangte in thu maan lohna a thuakna hangun Topa a kohna thute kigelh hi. Late sungah gitlohna, thu maan lohnate in Pasian hoihna, hehpihna, a vangliatna khupnelh bangin gimthuak mite hamsatnate kipulaak hi. Ahi zongin Topa hoihna, hehpihna leh a migitna hangin Amah phatna kimu veve hi. Thu maan mite in gimthuak taleh amau upna bei lo hi. Lametna nei tawntung uh hi. Siatna zo-in a zekai luatma-in Topa in amaute a hotkhiat mengmeng dingin lamen uh hi. Late laigelhpa in gimna a thuak uh hangin amau upna in tua gimnate, hamsatnate, thuahsiatnate kantansak zo hi, ci-in pulaak hi.

          Late 9: 7-9, 13-20 sim in. Late laigelhpa David gimthuak na ngaihsun hiam? Ama thuakna leh Pasian hoihna a upna enkak in. Koi bangin hamsatna lianpi hangin Topa muanlahna na hemkhia hiam?

___________________________________________________________________          ___________________________________________________________

          Late buppi sungah gimthuakte kiko-na hangin Topa hoihna sungah kamciamte, Ama sungah lametna leh Pasian thukhen hun hong tung ding ahihna thu hong hilh hi.  Tulaitakin siatna in gualzo taleh Topa in gitlohna, thu maan lo mite tungah thu a khen hun hong tung ding hi. Tua hun ciangin migilote in gim thuak ding uh a, amaute bawlsiat, nengniam mite in suahtakna, tawldamna ngah ding uh hi.

          C.S Lewis in Late a sim ciangin gitlohnate hangin Pasian thukhenna a ngakna thu pulaak hi. Mi tampi in Pasian thukhenna kihtaak ngaihsut uh siktanin C.S Lewis in Jew mite’ ngaihsutna siksanin hih bangin pulaak hi: “Amaute neihsa khempeuh kisuhna thuak mi tul tampite in a tawpkhakna-ah amaute in hamphatna khempeuh ngah ding uh hi. Amaute in thukhenna kihtak ngaihsut lo uh hi. Amaute thuak gimnate a telzawh loh uh hangin Topa in za dingin lamen uh hi. Topa Pasian in thukhen dingin a hong pai ciangin Topa in amaute thu khensak ding hi.” C.S. Lewis, Reflections on the Psalms (New York: Harcourt, Brace and Company, 1958), 11.

          Late in nengniam thuak, gimthuak, lungkia mi khempeuh adingin lametna pulaak hi.  Bang thu siksanin thukhenna in kihtak ding hi lo-in thupha hi zaw hiam?

MONDAY                July 22

“Topa Aw, Thukhen In”

          Late 82 sim in. Bang thu na nuntakpih ding hiam?

________________________________________________________          ___________________________________________________

          Pasian in Israel mite in limtakin a nuntak khuasak theih nading, amaute kalsuanzia ding thukhun, thukham pia hi mah taleh, Pasian’ thupiak panin amaute in lampial uh hi. Amaute kimlepaam a om mite bangin nungta ahih manun kinengniamna, thu maanlona tawh kidim uh hi. Makaite leh thukhente in amau huaihamna tawh kidim uh hi; golhguk tawh nasem uh hi. Thukhenna om lo ahih manin gammite, mizawngte genthei-in bawlsiat thuak uh hi.

          Late 82 in tua bang thute hangin Topa tungah kiko-na, thungetna hi.  Pasian in Thukhen Pa hi-in, makaite a kipan mi khempeuh tungah thukhen ding hi, ci-in hong hilh hi. Late 82 in Pasian in thukhen dingin a koih thukhen makaite tungah thukhenna pulaak hi” Ellen G. White, Prophets and Kings, 198. Amaute in Pasian sawltakte hi-in Amah tawh   nasem khawm ding mite hi. Leitung thukhente in Pasian thumaan, thutakna siksanin thu a khen ding uh hi. Thuman lo-in thukhente in Topa thukhenna thuak ding hi. Leitungah thumaan, thutak lohna hangin Pasian in leitung thukhenna dingin Late laphuakpa in genkholhi (Late 82:8).

          A dangte mah bangin Late 82 in nengniamna thuak mite, bawlsiat thuak mite kihonkhiat nading thu gen hi. Pasian in na khempeuh, minam khempeuh tungah a Sangpen Thukhen Pa, a Lianpen Uk Pa hi, ci-in pulaak hi. Amah sangin a lian zaw thukhen, ukna nei   kuamah om lo hi. Kuamah in gimthuakte’ kahna aw a za kei zongin, kuamah in cimawh genthei mite a huh kei zongin, amaute in a thuak uh gimnate panin suahtakna lungmuang takin lamen uh hi.

          Khat veivei ciangin thumaan lohna hangin gimna i thuak hi. Tua hi mah taleh khat veivei ciangin huaihamna hangin thumaan lo-in i gamta kha zel hi. Tua hi-in thumaan lohna tawh nasemte, thumaan lohna hangin gim thuakte adingin Late 82 in manpha hi. Gim thuak mite ading hi taleh mite gim a pia-te ading hi taleh Late 82 thuman hong hilh hi.

          Pasian in thutak thumaan lo thukhente tungah thukhen ding hi. Ama tapa tanu bangin limtakin a nungta dingin hong deih hi (Late 82:6). Tua hi-in thumaan lo-in nasem, migilote in a kikhel uhleh amaute adingin lamet om lai hi.

TUESDAY              July 23

Kumpipa’ Kamciamte

         

          Late 101 sim in.  Makaite adingin kigelh hi mah taleh na nuntakpih dingthu bangna mu hiam?          ___________________________________________________          ___________________________________________________

          Late 101in makaite tungah kipia thu hi. David in Israel kumpi a sep kipatcilin a gelh hi kha ding hi. Kumpi dingin a kiciamna hi thei ding hi. David in Saul adingin a galkapna hi taleh Saul kiang panin a galtai-in a om sungin a tuahkhak thute in kumpi khat in lamkhialleh a innkuan sung, a gam sung kisia ding hi, cih thu mu hi. Tua hi-in David in kumpi dangte tawh kibang lo dingin khentat hi.

          Kumpi, gam makai i hi kei zongin kimlepaam mite tungah huzaap nei, masuan i nei ciat hi. Nasep silbawlna, khua sung, innkuan, pawlpi sungah masuan i nei ciat hi. Ellen G. White in makaihna tawh kisai hih bangin gen hi: “Late 101 sung a David kiciamna in innkuan ciat adingin kiciamna hi hen” ci hi (Counsels to Parents, Teachers, and Students, 119).

          Hun hoih hun pha i neih paisan lo-in thumaan thutak tawh kalsuanin mainawt ding thupi mahmah hi. Koimun koimun hi taleh, i sepna khempeuhah, David in thumaan thutak tawh a mite a makaih mah bangin, eite zong thumaan thutak tawh nungta lehang mite adingin thupha i hi ding hi.

          Topa hehpihna leh thutannate hangin David in Pasian zahtakin (Late 101: 1), a nasepna khempeuh Pasian a zahtakna bulphuh hi. A nuntakna leh a sepna khempeuhah hehpihna nei-in thumaan thutang dingin hanciam hi. Tua bangin a gamtat nadingin siatna, golhguknekna, thumaan lohna khempeuh a pelh kul hi. Makai, uliante in hih bang siatnate thuak hamtang uh hi. A hoih nate a sep zawh nadingin amah a makaih dingin David in mi muanhuai-te, makaite koih hi. David in amah tawh nasem mite hi taleh, ama adingin nasemte hi taleh, ama ukna khempeuh in hehpihna leh thumaanna nei dingin hanciam hi.

          Ulian, makai, mi’thudot khat i hi kei zongin na nunzia in hehpihna leh thumaan thutak tawh na kim na paam a huzaap mi na hi hiam? Koi banginna huzaap hiam?

WEDNESDAY                    July 24

Topa Tawh Tonkhawm

          Late a tawpna lam laigual paizia in phatna awging ngaih semsem tawh lasakna bangin kigelh hi. Late 145 panin Late 150 kikal a patnate-ah “Topa phat un” cih kammal tawh kipan hi. Late 146 in Pasian in genthei cimawh mite a ompihna hangin a tuam vilvelin Ama minphatna la hi.

          Late 146 sim in. Bang hong hilh hiam? A diakdiakin aneu 5-9 sungah Pasian in bang hong hilh hiam?

___________________________________________________________________          ___________________________________________________________

          Pasian in hih leitung Piangsak Pa ahih manin Pasian in tatsat lo-in a mite’ kitangsapna a pia, leitung thukhen pa, thupha pia pa, suahtasak pa, damsak pa, huh pa, hong huu pa hi, cih hong hilh hi. Pasian in i nuntakna hi taleh kimlepaam ah a sep, Ama deihna hong hilh hi. Khat veivei ciangin Pasian in hong sawl ahih manin, ci-in cimawhte huh ding kilawm hi, ci-in i ngaihsun hi. Pasian in cimawhte huhin, Amah tawh nasem khawm dingin hong sam hi, ci-in Late 146 in pulaak hi. Cimawh genthei-te huhin, nengniam thuakte i panpih ciangin, damsakna tawh kisai na i sep ciangin Pasian tawh nasemkhawm, Ama deihna bangin nasem i hi hi. Late 146 in hong hilh bangin Pasian tawh nasepkhopna-ah tua sangin a lian zaw hamphatna om ding hiam?

          Tua bangin i sep ciangin eite mahmah in zong hamphatna i ngah hi. Khristian thu-um tampi in Pasian mu dingin zong tek  uh a, Amah tawh kinai nuam uh hi. Ahi zongin Late 146: 7-9  a kipan Lai Siangtho in, Pasian sepna-ah i va kihelna in Pasian i muhna hi, ci-in hong hilh hi. Tua hi-in Late 146 in a hong gen mah banginPasian in cimawh genthei mite lamsangin, cinate damsakin, kinengniamte khahkhia ahihleh eite in zong tua bangin nasem dingte i hi hi. Khrih in cimawh genthei mite, gim thuak mite tawh nungta khawm dingin hih leitungah mihingin hong piang hi. Amaute khempeuh in a lian mahmah Khrih hehpihna ngah ciat uh hi. Tu-in zong Topa in genthei-te leh kitasamte huhin, gim thuakte tawldamsak hi. Gimna, kitangsapna nei lo hi lehang, eite in Pasian hong itna leh hehpihna i phawk kei ding hi; Pasian in itna, hehpihna tawh kidim Pasian hi. Cimawh genthei-te, kuama phawk loh mite tungah hotkhiatna thu va genna sangin itna lian zaw om lo hi.” Ellen G. White, 7T., 226.

          Koi bangin mi huhna tungtawnin Pasian tawh kinai-zaw na hiam?

THURSDAY               July 25

Paunak: Cimawhte Hehpih

          Paunak Bu in pilna tawh kidim thuhilhna ahih manin nunzia ding leh thu manpha tampi hong hilh hi.  Tuate lakpanin hauhna, zawnna, lungkimna, thu maanna, thu maan lohna thu tawh kisai-in mite muhzia tuamtuam pulaak hi. Leitung nunna in hamsa hi; mihing deih bangin nate piang lo hi. Paunak in nunna hong huzaap thute, Pasian tungah a citak mite tuahkhak thute pulaak hi.

          Pau. 10:4; 13:23, 25; 14:31; 15:15, 16; 19: 15, 17 leh 30: 7-9 simkak in.  Hauhna, zawnna, huhna kisamte huhna tawh kisai bang thu hong hilh hiam?          ___________________________________________________          ___________________________________________________

                   Pasian in a zawng mite, cimawh genthei mite a panpihna thu limtak hong hilh hi. Mizawng kim khat amau gentheihnate kimlepaam, khentat khialhna, mite bawlsiatna hang hi thei hi. Ahi zongin bang thute hangin tua bangin nungta uh hi mah taleh Topa in amaute Piangsak Pa (Pau. 22:2) Huu Pa hi (Pau. 22: 22, 23). Kuamah nengniam ding hi lo hi; amaute khialhna hangin genthei uh hi mah taleh amaute simmawh ding hi lo hi.

          Paunak in Pasian deihna bangin nuntak ding, ama thu mang ding leh pilna a teel zaw mi nuntakna in a hoih zaw nuntakna hi, ci-in hong hilh hi. Hauhna khempeuh in Pasian kiang pan hi khin lo hi.  Pasian tungah cihtakna in a tawntungin thupi-in, a tawpkhakna-ah tua bang mi in neihlelamh hauhna sangin manpha zaw ngah ding hi. “Thu maan lo-in hauhna sangin tawmno khat bek nei-a thutakna hoih zaw hi” (Pau. 16: 8).

          Paunak in a hong hilh a dang khat in vanlei vanzuakna, gam sung ki-ukna leh thukhennate-ah thuman thutak tawh sem dingin hong hilh hi (Pau. 14:5, 25; 16:11 – 13; 17: 15; 20: 23; 21:28; 28: 14 – 16).  Paunak in mimal nunzia ding bek hong hilh hi lo-in khua khat, gam khat kalsuanzia ding, a diakdiakin cimawh genthei-te tungah tatzia ding zong hong hilh hi. Kumpi hoih mahmahte in zong Pasian makaihna tawh gam-uk hi-in, Ama hehpihna leh itna tawh kitangsamte huh ding hong hilh hi.

          A genthei mi khat i muh ciangin i hehpih hi. Koi bangin na gamtatna tungtawnin hehpihna   lungsim kimu thei hiam?

FRIDAY             JULY 26

Simbeh Ding: Ellen G. White, “The Last Years of David,” 746 – 755, in Patriarchs and Prophets; C.S. Lewis, “ Judgment in The Psalms,” 15 – 22 in Reflections on the Psalm.

          “David la phuahte in mawhna, khialhna kisikna a kipan nopsakna, dahna, gimna, mihing phutkhak khempeuh leh Pasian tawh kizopna khempeuh huam hi. Mawhna in maizumna, gimna hong tun hi. Ahi zongin Pasian hong itna leh hong hehpihna in a niam penpen dinmun panin hong domto-in Pasian tanu tapa suah theihna dingin hong lamsangto hi, ci-in David in pulaak hi. Pasian ii thu maanna, cihtakna leh a hehpihna hangin, David in lungmuanna lianpi nei ahihlam pulaak hi.” Ellen G. White, Patriarchs and Prophets, 754.

          Paunak in cihtakna, thu maan, hehpihna thute tawh kidim hi.  Hih thute in khua sung, gam sung kimakaihna, biakna hi taleh kipawlna khat peuhpeuh cidam lawhcingsak hi. Hih thute in nate hi taleh nuntakna susia thei lauhuai-nate panin hong dal hi. Mihing in Pasian thukham phawk lo-in thuman thutak awl mawh kei taleh, Lai Siangtho hong hilh mah bangin Pasian thukham in nuntak khuasakna nuamsak, bitsak hi.  Lai Siangtho in a hong hilh bang mahin, i tel khit zawh loh hang, mihingte  in Pasian thukham hangin lungmuanna nei hi.” Ellen G. White, Education, 137.

KIKUP DING DOTNATE

1.       Koi bangin makai khat na hihna, ahih keileh huzaap nei mi khat na hihlam na kiphawk thei hiam? Bangci bangin thu maan  thutak tawh kalsuan na hiam?

2.       Ngei-na, khua, beh leh phung sung thute ngaihsun in.  Cimawh genthei-te bangci huh na hiam?

3.       Bang hangin khua khat, gam khat a kip nadingin thu maanna, thutanna in thupi hiam?

4.      Paunak in nuntak hoih nadingin pilna pulaak hi. Tua in Pasian zia le tong bang hong hilh hiam?

TOMLAKNA:  Late leh Paunak in nisim nuntakna a kipan gimnate lakah cihtak ding hong lim hilh mahmah hi.  A nih in kimlepaam, khua sung nopsak nading Pasian hong geelsak thute hong hilh hi. A diakdiakin cimawh genthei-te a khualna thu pulaak hi. Pasian in nengniam thuakte, a gim mite, nawlkhin thuakte, paampaih thuakte’ kiko-na aw za-in amaute adingin thukhen ding hong hilh hi. Pasian in siatna deih lo hi. Tua hi-in eite in zong tua bang siatna nial a i do ding ahi hi.