LESSON
2 July
6 – 12
LEITUNG
A HOIH ZAW DING GEELNA
Sabbath Nitak
Tu Kaal Sung Sim
Ding: Pai. 3:7; 22: 21- 23; Matt. 22:37 – 40; Thkna.
14:22 -29; 26: 1-11; Siam. 25: 9-23.
KAMNGAH:
“Note in nomau’ mipihte tungah phu la lo-in, amau na lungsim neih kei ding uh
a, nomau na ki-it uh bangin na vengte uh na it ding uh hi; kei pen TOPA ka hi
hi” (Siampi Laibu 19: 18).
Pasian in Ama hehpihna siksanin mi
kimkhat tawh a tuam vilvel kizopna nei hi. Enoch, Noah, Abraham, Isaac leh
Jacob cihte a kipan mite tawh kizopna nei kik dingin Pasian in a lunggulhna
pulaak hi. Pasian in amaute bek tawh kizopna nei nuam hi lo hi. Amaute in
Pasian tawh kizopna nei-in, Pasian’ thupha piak mite hi-in, amaute tungtawnin minam
khempeuh tawh kizopna nei-in thupha ngah ding uh hi. Pasian in Abraham tungah a
gen bangin “Nang minam lian khatin kong bawl ding hi. Thupha kong pia ding hi.
Na min lianin ka bawl ding hi. Thupha kong pia ding a, minam khempeuh in nangma
tungtawnin thupha ngah ding uh hi” (Pian. 12: 2,3). Thupha kipia ahih manin
midangte tungah thupha hi ding hi.
Israel minam tungtawnin, a diakdiakin
Israel suan Messiah tungtawnin minam khempeuh in thupha ngah ding uh hi. Israel
minam a kipiansak a kipan Pasian in minam khempeuh tungah nasem hi. Tua ahih
manin Pasian in amaute zuih ding thukhamte, thukhunte, biakna pawi-te leh zuih
ding ngei-nate pia hi. Pasian’ thupiak bangin a nuntak uh ciangin minamte in
thupha a ngah dingin Pasian in Israel mite thupha pia hi. Tu dongin hih thuman
guipi kip hi.
SUNDAY July
7
A Za Pasian
“Tua ciangin TOPA in, “Egypt-ah a om
ka mite’ gimna mu khinin, amaute a uk nasem ukte’ hangin amau’ kikona ka za
khin hi. Amau’ thuaknate ka thei hi” (Pai. 3:7).
Kum 400 bei dong ngak ding pen hun
sawtpi hi. Hih hun sung tawntung saltangin bawlsiat thuak uh hi. Pasian in a
mite kiangah pai-in Egypt panin honkhia dingin kamciam hi. Ahi zongin khang
khat pan khang khatah amau a bawlsia milim bia mite nopsak nading leh vangliat
nadingin nasem uh a, Pasian in amaute nusia tawh kibang hi. Tua khit ciangin
lamdang takin Pasian in amah leh amah kilaak hi. Makai ding a ut lo, galtai, a
kiniamkhiat tuucing Moses tungah Topa in sawlbawk kuang bangin a muhna-ah
kilaak hi.
Moses in nialnial taleh Topa in a
nasep ding pia hi. Pasian in Israel mite thuakna mu-in, amaute kiko-na za a hih
manin, a masa-in Moses in a mipih Israel mite kiangah pai dingin kisawl hi.
Pasian in amaute nunzia kilamdangsak dingin a lamdang nasem ding hi ta hi.
Pai. 3: 16, 17 sim in. Bang hangin
Pasian in amaute adingin a sep ding thupi hiam? Bang thu in na lungsim hong
lawngkha hiam? ___________________________________________________ ___________________________________________________
Ahi zongin Pasian in tua
thupiak tawh khawl lo hi. Amaute adingin gam hoih zaw geelsak bek tham lo-in
genthei takin Egypt gam nusia dingin geel lo hi. Kum 400 sung tawntung Egypt
gam adingin nakpi-in nasem uh a, gam sung nopna khangsak uh hi. Pharaoh in
Israel mite suahtak ding phal lo ding hi, ci-in Pasian in mu khol a, ahi zongin
hamsapi takin nasep thaman Pharaoh tung pan ngah kik ding uh hi, cih theisak
hi. “Keimah in Egypt mite’ muhna-ah hih mihingte maipha ka pia ding hi. Note na
paikhiat uh ciangin, a hawm guakin na pai kei ding uh hi” (Pai. 3: 21).
Israel mite in kum 400 sung bawlsiat a
thuak khit uh ciangin Pasian in amaute tungtawnin nunna thak khat bawl hi.
Pasian in nunna thak tawh a nungta dingin deih hi. A kip tawntung gam nuam
sungah nungta dingin makaih hi. Abraham a thupha a kipiak mah bangin Israel
mite zong thupha kipia-in, namdang khempeuh adingin thupha hi ding uh hi.
Pasian in mite gimthuakna mu-in amaute
kiko-na aw za hi, cih thu bangci bangin thupi hiam? Hih in Pasian nunzia bang
hong hilh hiam? Pai. 4:31
MONDAY July
8
Thukham Sawmte
Matt.
22: 37 -40; Pai. 20: 1-17 sim in. Koibangin Jesuh in thukham khempeuh
tomkimcing takin apulaak thu in Thukham Sawmte na theitel hiam? ___________________________________________________ ___________________________________________________
Thukham Sawmte in ki-ukna thu guipi
tawh kibang hi. Pasian in a mite hotkhiatna siksanin amaute tungah tua
thukhamte pia hi. Tua thukhamte siksanin kimakaih ding uh hi. Tua thupiakte in
mihing in ahih theihzahin Pasian itzia hi taleh mite itzia ding lam hong lak
hi. Leitung gam tampi in hih thupiakte siksanin gam sung kimakaih uh hi. Hih
thukhamte in tomlakna hi-in, nunzia khempeuh huam ahih manin Thukham Sawmte neu
ngaihsut ding hi lo hi. Gentehna-in thupiak gukna-ah “Mi na that kei ding hi”
(Pai. 20: 13) cih thupiak in cimawh genthei mite awlmawh lohna, huaiham angsung
zonna, pumpi cidamna susia khempeuh zong huam hi” (Patriarchs and Prophets,
308).
Tua bang mahin gu kei in cih thupiak
in thuman lo nasepna khempeuh, sila nasemte a kipan gal zawhnate dongin huam
hi. Leiba loh kik lohna, thaman piak lohna a kipan zawhthawh thu tawh mi khat
nengniamna, simmawhnate pulaak hi.” Patriarchs and Prophets, 309. Ei le ei in
mi hoih mi-in i kingaihsun hi. Gentehna-in gu lo, mi that lo ihihteh mi hoih
mah-in i kingaihsun hi. Ahi zongin Jesuh in thukham a gen ciangin siatna bawl
loh manin mi hoih ci-in ciamteh lo hi. I lungsim in a hoih nate thei napi, i
sep i bawl kei leh, siatna i bawl loh hangin Pasian’ thukham palsat i hi veve
hi (Matt. 5: 21 – 30). Tua hi-in Thukham Sawmte limtakin nuntakpih mite
ngaihsun in. Tua bang mite’ teenna-ah Pasian itna leh khat le khat ki-itna tawh
kidim hi.
Bang hangin Thukham Sawmte tangzai-na
mahmah ahihlam phawk lo-in mu neu, tangzai ngaihsut lo i hiam? Bang hangin
Thukham Sawmte tua bangin mu neu-in thukham a zui mah kisa pahpah i hiam?
TUESDAY JULY 9
Sila-Te, Meigongte,
Tagahte Leh Khual Mite
Pai. 23:9 sim in. Pasian in Israel mite tungah bang pulaak
hiam?
________________________________________________________
___________________________________________________
Saltanna pan suahtakna ngah Israel
mite in nengniamna, bawlsiatna, simmawhna cihte theitel uh hi. Suahtakna hangin
lungdam kipaak uh hi mah taleh saltan phawkin, nenniam thuak nunna leh amaute
adingin Topa’ sep thute a phawk tawntung dingun Topa in deih hi. Tua thute
phawkin a pulaak kik theih nadingun Topa in Israel mite tungah Paisan Pawi pia
hi. “Mailam hunah na tapa in hong dot a, Hih bang cihnopna hiam? hong cihleh
ama kiangah Topa in khut thahat tawh Egypt-a sila suahna panin hong paikhiatpih
hi,” ci-in hilh un (Pai. 13:14).
Pai. 22: 21 – 23 sim in. Israel mite
in nenniamna thuak mite a hehpih thei dingin saltangin a thuak uh nengniamnate
a phawk kik theih ding uh bang zahin thupi hiam?
________________________________________________________
___________________________________________________
Thukham Sawmte a kipiak khit ciangin
Pasian tawh kizopna nei dingin Moses tungah thu pia-in, amaute nunzia ding
limtakin kihilh hi mah taleh Israel mite in saltan hunlai mangngilh uh hi. Biakbuk lamzia ding a hilhma-in zong sila
mite tungah gamtatzia ding, amaute thuak ngei tawh kibang lo-in mi tungah
gamtat hoih ding thupiak Paikhiatna 21 – 23 sungah kimu thei hi. Hih thupiakte
in tualthahna, neihlelamh tawh kisai, nisim nunzia tawh kisai zuih ding, pelh
ding thupiak vive hi. Thuman thutak tawh nuntak nading tua thupiakte in amaute
lakah peemta khat ahih kei dongtuak, meigong tagah mite tungah gamtatzia ding
kihel hi. Peemta mite nengniam ding hi lo hi. Tua bang mite’ kitangsapna huhin,
limtak kem ding banah ansaang kaikhawmsak dingin hilh hi. Nidangin tua bangin
peemta mite, khual mite tua bangin bawl lo uh hi. Tu-in zong mi tampi in mi tungah
gamtat hoih neih ding awlmawh lo uh hi.
Gim thuakte, nengniam thuaktee bangci
bangin panpihin hehpih na hiam?
WEDNESDAY July 10
Sawm-Ah Nih Piakna
Khristian tampi in Lai Siangtho’ hong
hilh bangin sawm-ah khat Topa tungah puak uh hi. Malachi 3:10 siksanin hotkhiat
nasepnate ah kizang dingin thu-um mite in ngahna khempeuh panin sawm-ah khat
pia hi. Pawlpi in sawm-ah khat zat nading sehkholsa-in nei hi. Hotkhiatna thu
tangko-na ah zat dingin kituam koih hi.
Thkna. 14: 22 – 29 sim in. Sawm-ah
khat deihna bulpi bang hong hilh hiam?
________________________________________________________
________________________________________________________
Sawm-ah khat i khiat ciangin Pasian
hong kalh a pia khin bangin kingaihsunin bang mah dang awlmawh nawn khak ding
zia-etna hong lut hi. Ahi zongin Israel mite tungah thupiak sawm-ah khat in
piakna kipatna hi hi. Nidang Israel mite in sehthum suahah seh khat leh kum
khat sung a ngah khempeuh seh thum lak pan seh khat cimawh huhna, Pasian
nasepna ding, biakbukah nasepna leh siampite adingin pia uh hi. Lai Siangtho
thuthukkan pawlkhat in hih pen khualmi, tagah, meigongte huh nadingin sawm-ah
nih hi, ci uh hi. Nasep thaman nuamsa-in anlak lungdam pulaakna-in ngaihsun uh
hi. Pasian in amaute teenna gam thakah thupha pia dingin kamciam hi. A ngah uh
thupha-te hangin lungdam-in cimawh genthei mite huh ding mangngilh lo dingin
thupia hi.
Anlak hun ciangin biakbukah Topa’
thupiak bangin hong paipih uh a, tua panin hawmkhia uh hi. Ahi zongin a kum
thumna ciangin a tuam vilvelin pia khia uh hi. Hih anlak hun sungin cimawh
genthei mite, nawlkhin tuak mite huh uh hi. “Levi-te, pemtate, pa nei lote leh
meigongte in no khua sungah ne-in a kham theih nadingun amaute na pia ding uh
hi” (Thkna. 26:12).
Israel mite in amau
neihsate lak panin pawl khat cimawh, huhna kisam mite huh dingin Pasian in
thupia hi. Tua bangin mite a huh uh ciangin Pasian in amaute tungah a piak
thupha-te phawkin hun khat lai-in a gentheihna panun hotkhiat ngah uh ahihlam a
phawk kik theih nading uh ahi hi.
Thkna. 26: 1-11 sim in. Topa in bang
thu pulaak hiam? Cimawh mite tungah koi bang lungsim puak kisam a, bangci
bangin amaute huh ding na hiam?
THURSDAY JULY 11
Jubilee Kum
Inn nei lo mite, Kamciam Gam sung lut
ding a ngaklah mite adingin Canaan in
gam nuam, gam thupi hi. Innkuan, beh, mimal tawh kizui-in amaute teen
nading mun a vaihawmsak dingin Pasian in Joshua makai dingin sawl hi. Ahi
zongin hun khat ciangin amaute lakah thuman lohna hangin leitang hauhna,
hamphatna, nopsaknate gam mite in ngah lo-in mi tawmno khat sung tung ding
ahihna thu zong mukhol hi. Mi pawlkhat in huaiham, angsung nasem uh a, amau
ading bek ngaihsunin mi simmawhna tawh kidimin, mun le mual zuak uh a, tua
hangin innkuan hamsatnate, damlohna tuamtuamte, khentat hoihlohnate leh
gentheihnate thuak uh hi.
Leitang a zuak uh ciangin hun ciangtan
nei dingin Pasian in thupia hi. Jubilee kum kik mateng zuak thei ding uh hi.
Leitang zuak innkuan in tankik thei ding hi. Ahi keileh a nai-huai beh leh
phung sung pan mi khat peuh in tankik thei ding hi. Mi tawh kizopna in Pasian
tawh a kizopna uh sukha ahihlam a phawk dingun Pasian in amaute hilh hi.
“Leitang pen keima-a’ ahih manin neihsuak dingin leitang kizuak lo ding hi; bang
hang hiam cihleh note pen kei tawh a om khawm khualmi leh peemtate na hi uh hi”
(Siam. 25:23).
Siam. 25: 8 – 23 sim in. Topa’ thupiak
bangin, a diakdiakin khat le khat kinengniam lo-in, Israel mite nunzia ngaihsun
in. ______________________________________________________________ ___________________________________________________________
“Topa in tua bangin thu a piakna a
hangin mimal kizopna-ah kideidanna cihte om lo-in mi khempeuh a kibangin et
ding ngimna hi. Sabbath kum leh jubilee kum a tun ciangin khat le khat kikal
khialhnate a kipan leiba-te kimaisak uh hi.” Ellen G. White, Patriarchs and
Prophets, 534. Lai Siangtho thukante in
tua bangin Topa thupiak bangin Israel mite in zui leh zui lo kitheician lo hi,
ci-in pulaak uh hi (2Khang. 36: 21). Topa’ thupiak zui takpi uh hileh khua sung
tual sung khat le khat a kizopzia uh i ngaihsun thei hi. Tham lo-in Pasian in
cimawh mite, nengniam thuak mite a lunghimawhna, thuman thutak tawh thukhen
ding kilang hi.
FRIDAY
JULY 12
Simbeh Ding:
Ellen G. White, “The Law Given to Israel,” 303 – 314; “God’s Care for the
Poor,” 530 – 536 in Patriarchs and Prophets.
“Pasian in Israel mite tung pan a
kalhkhiat thute thei-in, cimawh genthei mite tungah itsik lo-in pia-a huh ding
thupiak simloh Moses tungah kipia thupi zaw om lo hi. Pasian in a mite thupha
pia-in cithei-sak ding kamciam hi mah taleh amaute lakah mizawng om loding hilo
hi. Amaute lakah mizawng om tawntung ding hi. Tua bang mite hehpihin,
cinghpiakin, a pha bawl ding kisam hi. A dam lo mite, tuahsia mite, supna tuak
mite tawh kuamah kipelh lo hi. Ahi zongin Topa’ thupiak kizui hileh amaute
lakah cimawh genthei, gilkial daangtak kuamah om lo ding hi.” Ellen G. White,
Patriarchs and Prophets, 530, 531.
KIKUP DING DOTNATE:
1. Israel mite nuntak khuasakzia ding,
kimakaihzia ding Pasian in a piak thukham, thukhunte lak panin bang thupiak in
na lungsim hong lawng pen hiam?
2. Banghangin Pasian in cimawh genthei,
dongtuak mite tungah sepzia bawlzia ding limtakin hong hilh hi ding hiam?
3. Koi bangin tua thupiakte tuhun adingin
manpha hiam? Koi bangin tuhun adingin tua thupiakte khentel thei ding na hiam?
Israel mite nunzia, khua-sakzia
ding thupiakte sung panin na nuntakpih ding thumanpha bang na ngah hiam?
TOMKAIHNA:
Pasian in Egypt gam a Israel mite gimthuakna, amaute gimna aw za hi. Pasian in
amaute tawh a tuam vilvel a kip tawntung thuciam bawlin, cimawh, genthei mite
adingin thupha ahi dingun amaute teen nading leitang thak khat pia dingin
pulaak hi.
