LESSON 13 SEP. 21 – 27 MI ADING NASEM PAWLPI

LESSON 13       SEP. 21 – 27

MI ADING NASEM PAWLPI

Sabbath Nitak

Tu Kaal Sung Sim Ding: 2Kor. 2: 14 – 16; Pai. 32: 1-12; 1Pet. 2: 12; Phil. 2: 15; Eph. 2: 19; Heb. 10: 23 – 25

KAMNGAH: “Lametna thu tawh kipawl i man’nate sawisak lo-in lenkip ni. Bang hang hiam cihleh thuciamna a koihpa in thuman mi ahi hi. Tua tham lo-in, itna lungsim neih nading ahi zongin, a pha-a gamtat nadingin kihansuahna ding ahi zongin, khat leh khat kidom ni.” Heb.10:23,24.

     Hotkhiatna thu tangko nasep kizawh nadingin thu-um mite kipawlkhopna neu ngaihsut khak ding hi lo hi. A man lo-in nasepna, zawnna cihte tawh kisai thute kimkhat i pulaak khin hi.  Pawlpi in hih nasep-ah na lianpi sem thei hi; kim le paam tungah huzaap lianpi nei hi. Kipawlna thu tuamtuamte tawh buai-in kipawl khopna mungtup, ngimna cihte hangin Pasian in pawlpi a hong koihna a hang thute kiphawk kha lo thei hi.  Pawlpi in kimlepaam a om cimawh, dongtuakte kin ding kisam hi. Khrih in tua bang mite ading nasem ahihleh eite in zong i sep ding ahi hi. Pelh lo-in hotkhiatna thu pulaak ding hi a, tua kawm-in cimawh, gentheite, nek ding nei lote, silh ding nei lote huh ding kisam hi.

     Thu-um mite kipawlna pawlpi, Khrih pumpi in masuan nei hi (1Kor. 12: 12 – 20).  Jesuh ettehin a kalsuan ding pawlpi hi. Jesuh mah bangin thu-um mite in zong,  cimawhte kiangah va pai, huh, amau phattuam nading nasem ding kisam hi. Jesuh khut leh khe i hi hi.

SUNDAY             Sep. 22

Kikhelna Piangsakte

          Sawltak Bu sungah thu-um mi masate in minam, pau nam tuamtek ahih hangun, khat le khat kipanpih, kihuh uh hi. Namdangte kiangah hotkhiatna thu tangko khawm uh hi. Cimawhte huh ciat uh hi. Pawl sungah tua bangin nungta khawm uh hi.

          Jesuh thugentehna ci le khuavak banah Paul in pawlpi nasepzia thugentehna tuamtuam tawh pulaak hi. Thu-um mite a hing, a nungta biakpiakna tawh genteh hi (Rom. 12:1); Khrih pumpi (1Kor. 12:12 – 20); palaai/sawltak (2Kor. 5: 18 – 20);  gim namtui (2Kor. 2: 14 – 16). Leitung in siatna tawh kidim hi mah taleh, pawlpi kigentehnate in Pasian gam tawh kisai nunzia, nasepna khempeuh limcing hi.

          Pawlpi limciinnate lak pan in koi limciinna in na lungsim hong zo hiam? Bang limciinna in Pasian gam thu theihtelna hong neisak penpen hiam? Banghang hi ding hiam?    ___________________________________________________          ___________________________________________________

          Pawlpi limciinna khat ciat in khiatna nei tek hi. Amau hoihna siksanin Pasian in hong sang hi lo-in amaute adingin Khrih hong sihna Pasian in santhamcingsa-in a sanciangin, Pasian hong itna leh hong hehpihna kiplet a, sihna natna dim kimlepaamte adingin noptuamna, phattuamna a piangsak uh hi.     Tua banah Pasian hong itna sungah zungkha semsem ding kisam hi. Bang hang hiam cihleh Pasian hong itna leh a hong hehpihna in Pasian gam leh Ama deihna hi-in, tua bangin itna leh hehpihna i neih ciangin, tuhunin zong Pasian gam sung nuntak kipatna, Pasian gam ama lep-a a nungta i hi hi.

          Leitung gam khat le khat kizop nadingin gam palaai leh zum inn (embassy) a kisam thu hi. Tua bang mahin tawntung Pasian gam tawh kizom a, tua gam i muh, i ngaihsut nadingin tu-in tua tawntung gam, siatna omlohna gam in i sungah hong om thei hi. Mite tungah itna leh hehpihna i neih ciangin Khrih palaai, Ama tangin nasemte i hi ding a, Ama hong itna leh a hong hehpihna in mimal, pawl sung leh kimlepaamte tungah kilang ding hi.

          2Kor. 2: 16 sim in. Koi bangin sihna gimnam, hinna gimnamtui kibang lo hiam? Koi zaw manawhin i nunga hiam?

MONDAY       Sep. 23           

A Cianlai Nasem

     Mang. 12: 17 sungah Lai Siangtho genkholh bangin kua mi in a beibang, a cianlai mite hi ding hi, cih hong hilh hi. Numei suan a cianlai-te in Pasian thupiakte leh Jesuh Khrih teci panna lenkip uh hi (Mang. 14:12). Lai Siangtho sungah a khang a khangin a cianlai thuman a len Pasian mite kimu thei hi. A cianlai mite in hehpih itna tawh cimawh dongtuakte kitangsapna huh uh hi.

     Moses thu ngaihsun lehang (Pai. 32: 1-14), Moses leh Mang. 12: 17 sung a numei suan a omlaite (a cianlai) bang siksanin kibatna nei hiam?

__________________________________________________

__________________________________________________

    

Pasian in Israelte tungah a hehna a pulaak-in, Abraham tungah a piak kamciamte susia-in, amaute kisia maimang ding hi, ci-in vauhilh hi. Tua kamciam in Moses leh a innkuanpihte in nam lianpi, gam lianpi khatin a bawl ding kamciam hi (Pai. 32: 10).

     Ahi zongin Moses in Pasian in tua bangin a pulaak ciangin hangtakin Pasian tawh kinial a, tua bangin Pasian in a kamciam susia hileh mite in Pasian in thuman lo, ciampel hi ding hi, ci-in pulaak hi (Pai. 32: 11- 13). Moses in amah mah kipia-in a mipihte adingin Pasian mai-ah mawhthuum hi.

     Moses in a mipihte sehnel gam sungah a makaihna-ah hamsatna tampi thuak hi. Eygpt pan a paikhiat pih a kipan amaute in Moses tung phun tawntung uh hi. Tua bangin mipite mawhna, phunphunna hangun Moses in Pasian tungah “amaute mawhna na maisak kei dingleh nuntakna laibu sung pan ka min hemkhia in,” ci-in pulaak hi (Pai. 32: 32). Moses in ama tonpih mihonpite’n hotkhiatna ding ahih nakleh ama nuntakna a beimang zongin pha mawhsa lo hi. Eite etteh takcing kipumpiakna hi. Kilawmlo hi mah taleh uh, amaute adingin mawhthuumsak hi. Moses nunzia in hotkhiatna hong piankhiatna limcing hi.

     “Moses in Israelte ading a thuumsakna-in a meidawi-na khempeuh bei-in, Pasian a muanna, a itna in na lianpi tampi sem hi. Topa in Moses thuumna za-in, deihsakna tawh a mipihte ading a nget pia hi. Pasian in a nasem Moses thumanna pulaak hi; a cihtakna sittel a, a mawh, a khial, a lungdam thei lo Israelte a itna leh Moses in zia-et a thuakzawhna pulaak hi. Moses in ama nopsak nading sangin, Pasian teelsa a mipihte nopsak nading masak zaw hi. Eygpt gam makai minthang hih ding sangin a mipihte tawh nungta khawm ding manpha-sa zaw hi. Pasian in Moses a cihtakna, a thumanna, ngeentelna, lungsim siantho-nate tawh lungkim hi. Moses in a mipihte Kamciam Gamah makaih dingin, a citak tuucing leh makai dingin Pasian in muanna tawh sawl hi.”  Ellen G. White, Patriarchs and Prophets, 319.

     A khial, a lehtat mite tawh kizopzia ding, amaute tungah lungsim puakzia ding bang hong hilh hiam?

TUESDAY          Sep. 24    

A Mangthangte Honkhia

     Pawlpi nasep kikupnate ah khat veivei ciangin hotkhiat  nasep (gospel work) leh khua le tui puah nasep (social work), teci panna leh mi huh nasep, thuman leh Pasian thu hilhna (evangelism) tuamkhen ding kibuai-pih hi. Ahi zongin a thupai-zia theitel-in, Jesuh nasep ngaihsun hi lehang, tua bangin telkhialh, buaipih ding hi lo hi. Bang hang hiam cihleh hotkhiat nasep leh khua sung, kimlepaam puah nasep in a tonkhawm ding hi.

     Ellen G. White laigelhte sung pan a kithei mahmah khat in “Christ nasepzia bek in mite tungah hotkhiat nasep hong zawh pih ding hi. Honpa in mite hoih nading deihin mi tawh hong nungta-khawm hi. Khrih in mihing a hong itna hong lak hi; mihing kitangsapte hong pia hi; mihing in amah muangngam hi. Tua khitteh “ka nung hong zui in,” ci-in amaute sam hi.

     “Mizawngte panpih kul hi. Cinate koi-kul hi. A dahte hehnep ding kisam hi. A thei lo-te hilh kul hi; tuahkhak a hau nai lote makaih kisam hi. A kapte kappih kul a, a lungdamte tawh lungdamkhawm ding kisam hi.” Ellen G. White, The Ministry of Healing, 143.

     Vantung gam sung tatzia nihte in thuman thutak tawh nasepna leh Pasian thuhilhna (jusitice and evangelism) kikhen lo hi. Jesuh in a sep hi taleh a nungzuite tungah a thupiak in “Na pai uh ciangin, “Vantung kumpi gam hong naita hi,” ci-in tangko un. Cinate damsak unla, miphakte damsak un. Misite thosakin dawite hawlkhia un. Man piak loh a na ngah bangun mangen lo-in na pia un.” (Matt.10: 7, 8). Mite’n hotkhiana thu a zakkim nading a hoih penpen lampi in mite kitangsapna va huhna hi.

     1Pet. 2: 12; Phillipine 2: 15 sim in. Peter leh Paul in Pasian mite in hotkhiat nasepna-ah na hoih sep in muibun mahmah hi.  Cimawh dongtuakte panpih lo-in hotkhiatna thu i tangko hangin mite in i thu hong sang ding hamsa hi. 1Jn. 3: 16 – 18; James 2: 16, 22). Tua banah i hilh thu om bangin ei mahmah in i nuntakpih keileh, i thuhilh in a mawkna hi ding hi. Evangelism – Pasian nasepna in thuman pulaak hi. Hotkhiat lungdamna thu i cih in lametna, suahtakna, mawh kisikna, kikhelna leh Pasian hong itna sungah nuntakna hi.

     Pasian nasepna – evangelism leh thuman tawh sepna in, Pasian in a mangthangte, gim thuakte, a cimawhte a hong itna panin hong kipan hi. Tua itna in, Pasian in i sungah hong om a, i lungtang sung pan khangkhia itna hi. A mangthangte tungah hotkhiat nasep in, i deih, i ut zawk tawnin sem hi lo zaw-in, Pasian tawh semkhawm, amaute kitangsap huhin, Pasian hong piak thupha-te zatsiamna hi zaw hi.

    

 Bang hangin midangte ading na hoih sem kawmkawm-in, hotkhiat lungdamna thu zong hilh ding mangngilh loh ding thupi hiam?

WEDNESDAY              Sep. 25

Pawlpi Sungah Hehpihna

     Job Bu kipatnate ah Pasian in a nasem Job cihtakna in mawhneite tungah Pasian hoihna pulaak hi, cih kimu thei hi (Job 1:8).  Mihing nunzia in Pasian hoih na pulaak dingin Pasian in mihing a koih ngam pen lamdang mahmah hi. Hih thu mah Paul in Pasian misiangtho-te sungah om hi, ci-in hong hilh hi. “Vantung lama om a zalianpente leh a vangliante tungah tuhun a Pasian pilna tampite, pawlpi in a theihsak theih nading deihna ahi hi”(Eph. 3:10).

     Eph. 2: 19 sim in. Koi bangin pawlpi in “Pasian innkuanpih” cih kammal na theitel hiam? Innkuan in pawlpi kimakaihzia bang hong hilh hiam?

__________________________________________________

______________________________________________

    

     Kipawlna khatah kihel mite (member) in kipawlna thukipte kilangsak uh hi. Pasian innkuanpih na hihna zui-in, Khrih pumpi, Kha Siangtho tenna pawlpi in a sang pen nunzia, dinmunah nungta dingin a hong thupiak in: “ Bang hang hiam cihleh misiangthote pawlpi khempeuh ah a kimuh mah bangin Pasian in buai-na a piangsak Pasian hi lo-in, kilemna a piangsak Pasian ahi hi” (1Kor.14: 33).

     A man a gamtatna, hehpih itna, cihte in Pasian thumanna, hehpihna leh itna pulaak hi. Hih thukipte in pawlpi sungah a om ding hi a, pawlpi kimakaihna-ah bulphuh ding thu manpha hi. Khua-tual pawlpi panin mun tuamtuam a om pawlpi in, hih thukipte siksanin a kalsuan hi. Pawlpi makai khat in hih thukipte siksanin khentatna, a moi pen pan a ham pen dongin pawlpi a makaihna-ah lamlak thu manpha hi. Pawl sung buai-na tuamtuamte siansak nadingin zong a huh thu manpha hi. Pawl sung khat le khat kizopna-ah thuman, hehpihna siksan lo hi lehang, a pua mite tawh kizopna-ah bang i suak ding hiam?      

     Pawl sung a nasemte in piakkhiatna hanciam a, itsik lo-in a pia-te, na dangdang, thu dangdangte sangin mi, nasemte masak zaw ding kisam hi; tua bang hileh, a man lo-in sepnate hong bei ding hi.  Pawlpi in a bitna mun, pawlpi mite ading siatna pan a dang ding mun muanhuai hi ding hi. Pawlpi masa-te mah bangin a kisam mi huh a, khat le khat kipanpih, kidomsang ding kisam hi.

     Jesuh in pawlpi thupia a, tua thupiak in pawlpi a khel banah upna kip leh lametna hong hilh hi: “Khat le khat na ki-it un, cih thupiak thak kong pia hi. Note kong it bangin note zong khat le khat na ki-it un. Note khat le khat na ki-it uh leh, ka nungzuite na hihna uh mi khempeuh in a hong thei ding uh hi,” ci hi (Jn. 13: 34, 35).

THURSDAY                Sep. 26

Na Hoih Sem Ding Khat Le Khat Tha Kipia

     Thuman nasepna-ah Pasian tawh semkhawm a, Topa ading bek mah ci-in lawp mahmah leh lungsim siangtho tawh sem hi mah taleng hamsatna, lungkiatna om veve thei hi. Kuamah in dahna, gimna tawh kipelh thei lo hi. Tua hangin pawlpi kisam hi. Khat le khat kihuh, kipanpih dingin Jesuh in nungzuipite vaikhak hi. Jesuh in amaute a sawlkhiat ciangin zong amau ut thu dandanin sawlkhia ngei lo hi. Nasem khawm, mapang khawm a, khat le khat kipanpih dingin hilh hi.

     Heb. 10: 23 – 25 sim in. Aneu 25 in i zak mun mahmah khat hi. Koi bangin tua thu na tel ndingin aneu 23, 24 in hong huh hiam? Bangci bangin itna leh nasep hoih nei dingin khat le khat tha kipia i hiam?

____________________________________________________________________________________________________

     Koi koi ah nasepna khat peuh ah khat tang sep sangin sepkhopna-ah zawhna kimu zaw hi. Tua bang mahin Khrih pumpi – pawlpi nunzia zong sepkhopna-ah zawhna om hi (Rom. 12:3–8). Pawl sungah kibatlohna a tuamtuam om hi taleh tuate mapangkhawm ciat ding kisam hi. I siamna khempeuh sit lo-in, nasem khawm ciat hi lehang, i sepna, i upna in huzaap lianpi nei ding a, tawntung nuntakna sungah mi tampi kikhel ding hi.  Na hoih, na pha sepna khat peuh a gah kimu nuam pah hi. Ahi zongin khat veivei ciangin mi hong kikhel ding leh kikhel loh ding (sepna gah) pen Pasian muang a amah i ap ding kisam hi. Zawnna pan suahtak nading, nengniam thuakte tawldam ngah nading, a kipia hamphatna suplawhte ading nasepna khat peuh, tha khat thu-in a gah kimuh pah loh hangin, damdamin nasepna gah -kilamdanna, kikhelna kimu thei hi. Bang hang hiam cihleh a hoih zaw, a manpha zaw-ah kalsuan-in a manawh nasep hi. “Na hoih sep ding cimtak kei ni. Lungkia lo-in sem lehang a hun a tun ciangin a gah i at ding hi. Tua ahih manin hun hoih i ngah simin mi khempeuh tung leh a diakdiakin upna sunga i innkuanpihte tungah na hoih sem ni” (Gal. 6: 9, 10; Heb. 13: 16).

     Tua hang mahin lungkia lo-in, lawpna tawh nasem dingin eite hong kisawl hi. Cihtakna in nuamna hong pia thei hi mah taleh a hamsa khat hi. I Pasian in thuman hi; pawlpi zong thuman hi. Hotkhiat nasepna-ah eite hong huh, hong panpih a lian penpen in Pasian leh pawlpi hi.

     Cimawh dongtuak na huh a om hiam? Tua bang nasem mi na thei hiam? Koi bangin tua bang nasemte tha na pia hiam?

FRIDAY           Sep. 27

SIMBEH DING: Ellen G. White, “A Faithful Witness,” 546 – 556, in The Acts of the Apostles; “ Kindness  the Key to Hearts,” 81 – 86, in Welfare Ministry.

     “Nungzuipite nasep eite in zong i sep ding ahi hi. Khristian mimal khat ciat in gammial nasem (missionary) i hi hi. Min dawk ding, hamphat ngah ding zonna hi lo-in, hehpihna, lai-natna tawh gim thuakte suahtak nading, cimawhte huh ding i hi hi. Nek ding neilote an pia-in, silh ding neilote silh ding guan a, a dah, lunggimte tha guan dingin hong kisawl hi. Lamet bei-te lametna thu gen a, lungkia-te tha pia ding i masuan hi. Angsung huaihamna nusia-in sepna khat peuh in Khrih hong itna pulaak hi. Tua in thukhenmangpite thukhenna, zawhthawh tha zawhna sangin muibun zaw-in nunzia kikhelsak zaw hi. Khrih hong itna sungah suang bangin a sak, lungkhuah lungtang, lungsim in hong neem ding hi.” Ellen G. White, The Ministry of Healing, 104, 106.

     “Sila kikoihna, nampi namneu kidei-danna,   pau khat le khat kilangneihna, nektawm zongte nengniamna, cimawhte nawlkhinna cihte khempeuh in Khristian dinmun tawh kituak lo hi; mihing nopsak nading khaktan ahih manin Topa nasem pawlpi leh Amah a um khempeuh in hepkhiat ding ahi hi.” General Conference President A.G. Daniells, speaking of the work of Ellen G. White at her funeral, Life Sketches of Ellen G. White, 473.

KIKUP DING DOTNATE

1.   Khua leh tui, kimlepaam puah mimal hi taleh kipawlna tuamtuam tampi om hi. Tua bang nasepnate ah SDA pawlpi in bang tawh mapangkhawm-in nasem ding hiam?

2.  Pawlpi in tha hong pia-in, hong panpih ngei hiam?  Tua siksanin koi bangin midangte zong panpih, tha pia ding na hiam?

3.  Pawlpi panpihnate hi taleh na khat peuh peuh sepna-ah bang in “na hoih sem ding cimtakna tawh hong kipelhsak ding hiam?

4.  Seventh-day Adventist Pawlpi in cimawh, dongtuakte huh, panpih hiam? Koi bangin pawlpi nasepna-ah kihel ding na hiam?

TOMGENNA: Ei Khristiante in huhna kisamte huh a, gimthuakte, kinengniamte panpih dingin sapna ngah i hi hi. Mimal khat ciat in sep ding maban nei hi mah taleng, kipawl khawm a innkuan bangin pawlpi in semkhawm hileh muibun zaw hi.