LESSON 12 SEP. 14 – 20 HEHPIHNA IT DING

LESSON 12         SEP. 14 – 20

HEHPIHNA IT DING

SABBATH NITAK

Tu Kaal Sung Sim Ding: Matt. 6: 25 – 33; James 1: 5-8; 2: 15, 16; Isa. 52: 7; 58: 1-10;1John 3: 16 – 18.

KAMNGAH: “Lungsim thutangte adingin khuamial sung panin khuavak hong taangkhia hi; Topa dik a, hehpihna nei-in thuman hi. Cingh gamtatin mi tungah leitawi pia a, thutangin a gamta mipa tungah thu hoih hi.” Late 112: 4, 5.

      Pasian in a zawngte, nengniam thuakte a lainatna hangin tua bang mite adingin nasem dingin Pasian in a mite a hilhna, Lai Siangtho mun tampi in pulaak hi. Tua bangin na hoih, na pha sem dingin hong kihilh a, i sem i bawl zongin kicinna om thei lo ahih manin, Jesuh hong pai ciang bekin na khempeuh in hoihna tawh kidim ding hi. Tua hi-in Jesuh hong pai mateng leitung in khuamial ukpi pa leh a nungzuite in huzaap mahmah hi. Tua bang siatnate in zawnna, gitlohna, kinenniamna, sila bawlna,  siatsakna, angsung huaiham gamtat kampau-nate tungtawnin hong kilangh hi. 

      Hamsa taleh i pawlpi, i innkuan, i kim le paam in, thuman lo-in nasepna, siatnate langdo ding thupi mahmah hi. Pasian hong itna leh a thupiak bangin nuntakna, Jesuh nunzia leh a nasep bulphuhin, Kha Siangtho ompihna leh a vangliatna tawh eite in hehpihna nei-in, thuman itin,  Pasian mai-ah kiniamkhiat ding  (Mic. 6:8) kisam hi.

SUNDAY                     Sep. 15

A Gam Ading Masaknate

     Jesuh in a thuhilhte leh Thuciam Thak gelhte hong hilh thu in leitung mite tawh kibang lo-in leitung nate sangin masak zawk ding thu hong hilh uh hi.

     Matt.6: 25 – 33 sim in. Bang thu in khamuanna hong pia-in, tua khamuannate in, nadangte sangin vantung thuman thute i masak zawk ciangin i nunzia koi bangin hong huzaap hiam?

_________________________________________________________________     ______________________________________________________________

     Jesuh in, “An sangin nuntakna lianzaw hi. Puan sangin pumtak lianzaw hi” (Matt. 6: 25). Annek, puansilhte in manpha  thupi mah hi. Ahi zongin tua nate in Pasian gam bulphuhna tungtawnin thupi hi bek hi. Tua hi-in, na dangdangte sangin Ama gam masak zaw hi lehang, i nunzia, gamtat khuahek kilamdang ding hi.

     Lai Siangtho in midangte panpihin huh ding kisamte huh dingin hong hilh hi. Hih in Jesuh khekhap i zuihna-ah nadangte sangin i masak zawk ding hi. Tua bang hileh angsung huaihamna tawm semsem ding a, midangte huhna hong tam semsem ding hi. I nuntakna-ah tua bangin masakzawk i koih ciangin mi tawh kizopna, hong nengcipte leh i nuai-siahte tawh kizopna hong kikhel ding hi.

     Lai Siangtho in ukna nei hausa, upa makaite, kumpite thu a hihtheih laiteng amaute zahtak a, a thu uh mang dingin hong hilh hi ( Rom. 13: 1-7). Hi mah taleh Peter hong hilh bangin, mihing sangin Pasian thu i man zawk kul hi (Sawl. 5: 29).  Hih tawh kizui-in mawhsiat nopna tawh Jesuh thu a dot uh ciangin, Jesuh in “ Caesar neihsa Caesar pia un. Pasian neihsa Pasian pia un,” ci-in amaute dawngkik hi (Matt. 22: 21).

     Thuneihna nei gam makai hi taleh biakna makai khat peuh in zawhthawh thu leh thuneihna zangin mite uk uh hi. A thuman mi khat in, man lo-a nasepna khat pen a thei lo, kimuhloh bawl, awlmawh lo cihte a dik hi lo hi. Gentehna-in America gam a sal, sila-te tawh kisai Ellen G. White in hih bangin pulaak hi: “Pasian thupiak leh gam sung thukhun a kitukalh ciangin, bang bang thuak ding hi taleh, Pasian thupiak i zui zaw ding hi. Gam thukhun in sila khat a topa tungah ap kik ding, ci hi. Hih thupiak zuih lohna hangin i thuak ding om kha ding hi. Ahi zongin  gam thukhun zuih pelmawh ding hi lo hi.  Sila khat in van leh nate bangin mi khat ii neih hi lo hi. Pasian bek in mihing tungah To hi ding hi. Mihing in Piangsak Pa thuneihna bangin midang khat tungah thu nei lo hi.” Ellen G. White, 1T., 201, 202.

     Thukhun khat peuh zuih huai hiam? Langpan ding kisam hiam, cih thu bang tawh khentel ding i hiam?

MONDAY                   Sep. 16

Hehpihna Hangin Gimpih

          Siatna in hoihna khuhnelh khak ding phal lo-in nuntakzia kilamdangsak, nunzia kikhelsak na hoih sem mi tampi om hi. Ngaihsutna hoih leh a hoih nasep khat in cimawh, gimthuakte adingin kilamdanna lianpi hi thei hi.

Hehpih itna:  Genthei-te huh ding kalsuanna a masa pen in amaute thuak gimnate theihpih a hehpihna lungsim hi. A gim, a cimawhte thuakna theihpih a, amau tawh kizopna a kip ding kisam hi. Tuhun ciangin mi tampi in cimawh, genthei, dongtuakte hehpihin huh hi napi-in, sum le paai bei, pumpi tawlna hangin mi huh ding cimtaak uh hi. Jesuh in mihingin a hong nuntaklai-in a kim a paam a siatna, gimnate huh ding cimtaak ngei lo-in huh tawntung hi. Amah bangin eite in zong  mi huh ding i cimtaak kei ding hi.

Pilsinna:  Thu tuamtuam hangin zawnna, a man lo ki-ukna hong piang hi mah taleh khat ii gen khat in limtakin ngai-in, khat le khat tung panin pilna ngah ding thupi hi. Mi khat adingin thu hoih dingin lametna tawh i va huh khat pen amau adingin siatna peuh lehsuah kha thei hi. Tua bang tuahkhialhnate kinbawl a, kidawm leh limtak ngaihsutna tawh kalsuan ding kisam hi.

Thungetna:  Hamsatna khat i tuah ciangin tua hamsatna pan suahtak ding ei le ei-in i hanciam hi. Hamsat hun ciangin a masa penin thungen dingin Lai Siangtho in hong sawl hi. Nengniam thuakte ading, cimawhte adingin thungetsakna in tampi kilamdanna piangsak thei hi. Nengniam thuakte in suahtakna ngah thei hi (1Tim. 2: 1, 2). Dongtuakte huh nasepna-ah Pasian makaihna ngen lehang i nasep in tangzai zaw semsem ding hi (Pau. 2: 7, 8).

Lametna:  Dongtuakte huh nasepna-ah a kisam mahmah khat in amun a mual, khua sung gam sung ki-ukzia, mite khuasakzia cihte tawh kizui-in khantoh theihna ding lametna kisam hi. Mite suahtakna, amau deihtelna bangin mainawt a, a hun hoih ngahte uh limtakin a zangsiam dingin lametna kisam hi. Khat veivei ciangin amau deihtel bangin a sep uh ciangin hong lungkia-sak uh hi.  Ahi zongin tua bang ciangin amau deihtelna thupi-sim ding kisam hi. Cimawh, dongtuakte huh nasepna khat peuh ah “ nang tungah hong kibawl ding na deih bangin midangte tungah bawl in” cih bulphuh ding kisam hi (Matt. 7:12).

James 1: 5 -8 sim in.  Gamtatna tawh kisai-in thungetna in bang pansan nei hiam? Midangte ading i thunget ngah nadingin James 2: 15, 16 in bang hong hilh hiam?

TUESDAY               Sep. 17

Citpiakna

     “Pasian in piaknopna lungsim tawh a pia mi tungah lungdam hi” (2Kor. 9:7). Khristian nuntakna-ah piakkhiatna in a thupi mahmah khat hi. Lai Siangtho in piakkhiatna a kipan na khempeuh ah Pasian masak ding hong hilh hi.  Piakkhiatna in sum le paai banah tampi huam hi.  Piakkhiatna in Topa a zahtak mite sungah a kimu thei thuman thutak khat hi. “Cingh gamtatin mi tungah leitawi pia a, thutangin a gamta mipa tungah thu hoih hi” (Late 112: 5).

     Lai Siangtho in cimawhte tungah phaltakin piakna tawh kisai bang hong hilh hiam? Late 119: 36; 2Kor. 8: 12 – 15; 1Jn. 3: 16 – 18; 1Tim. 6: 17 – 19.     ________________________________________________________________     ______________________________________________________________

     Paul in a laikhakte-ah Pasian in phaltakin hong piak – Jesuh nunna leh eite ading a hong piak a nunna in Khristiante lametna zungpi hi. Khrih sihna in midangte tungah piakkhiatna hong taw-sawn hi. “Upna na zopna a vanglian-in, Khrih Jesuh sungah eite’ aa ahi, a hoih na a om khempeuhte midangte in a theih nadingun thu ka ngen hi”( Phile. 1:6). Phaltakin piakna in nuntak kalsuanna khempeuh tungah lungsim puak tawh kisai hi.  Mihing in nuntak khuasakna-ah ei ading bek mitsuanin i nungta hi. A tawntungin “kei,” “kei,” “kei,” cih tawh lungsim tawh kinungta hi.

     Upna in angsung ading nuntakna angsung lungsim si-sakin, mi adingin hong nungta-sak hi. Pasian in cimawhte a hehpih mah bangin upna tawh a nungta mi in zong mi hehpih a, ama hih theih bang bangin na hoih na pha sem hi. A manpha nuntak khuasakna ah citpiakna in mite ii deih, angtan pih khat hi. Citpiaknate a tam, a tawm, a piak bangbang kimu thei hi.  Ahi zongin tampi piakna in phaltakin piakna kici thei pah lo hi (Matt. 12: 41 – 44).  Phaltakin piakna in sum le paam piaknate sangin tangzai zaw hi. I sepna khempeuh ah lungsim takpi tawh sepna, piakna khansuah ding kisam hi. Mi tampi in phaltakin piakkhiatna a pianpih uh hi lo hi. Bangzahin siatna tawh kidim a, huaiham mi hi mah ta lehang, mihing in phaltakin piaknopna lungsim nei thei hi a, tua dingin a hong kipia hehpihna siksanin, khentatna, deihsakna kisam hi.

    

Sum le paai banah a dang bang tuamtuamte in phaltakin piakna kidawksak hiam?

WEDNESDAY           Sep. 18

Mi Kilemsak

     Matt. 5:9 sim in.  Koi bangin Jesuh gen thute nuntakpih ding i  hiam?  A tawpkhakna-ah tua deihna koici kicing ding hiam?

__________________________________________________________________     ______________________________________________________________

     Khat le khat kido-na, kigalneihna in gimna tampi piangsak hi. Gal in sihna, liamna piangsakin, nunna susia  hi. Galdo-na sum bei, vanzat tuamtuam tampite in khua sung, gam sung phattuam nading, khantoh nadingin kizang hileh cimawh genthei mi tawm ding hi. Gal lianpi banah buai-na tuamtuamte hangin innkuan, khua le tui kisia hi. Tua hi-in thukhun palsatte in thukhun om bangin a thuak mah ding uh thuman hi. Jesuh hong hilh lungdamna thupuak in Pasian hehpihna leh mihingte tawh kilemna hong bawlin, mawhneite in Piangsak Pa tawh kilemna i ngah thei hi (2Kor. 5: 18 – 21).  Pasian tawh kilemna i ngah theihna bulphuhin midangte tawh kilem ding hong deih hi.

     Koi bangin Isa. 52: 7 i nuntakpih hiam?

_________________________________________________________

________________________________________________________________      

     Mihing leh Pasian kikal kilemna lungdamna thupuak in a kisia mihing khat le khat kizopna hoihna dingin etteh ding, kilemna a hong taw-sawn, khat le khat a hong kilemsak thuman thutak hi. “Pasian tawh kizopna kip nei a, vantung tawh a kilem mi in a kim a paamte tungah huzaap nei-in, mite tungah vantung thupha luan ding hi. Kha Siangtho in vakhu bangin lunggim, hingimte sungah nopna dim ding hi.” Ellen G. White, Thoughts from the Mount of Blessing, 28.

     Mualtung pan a thuhilhna-ah Jesuh in “Mi kitawng kilemsak kik theite in thupha ngah ding uh hi. Bang hang hiam cihleh amaute in Pasian tate cihna ngah ding uh hi” (Matt. 5:9), ci hi. Hih tawh kizomin “that kei in,” cih thupiak om banah hehna, thangpaihnate ki-uksak lo-in, hong simmawh, hong bawlsia i galte adingin thungen in, ci-in hong hanthawn hi (Matt. 5: 21 – 26; 43 - 48).  Amau phattuampih ding na hoih khat sem, a bawl dingin khentat kisam masa hi. Buai-na tuamtuamte lakah khat le khat kilemsak thei mipil, misiam tampi om hi. Thuman thutak tawh nasemin, nengniam thuak khahkhia-in, a gimte a kipan khat le khat kilemna, kizopna hoih tungtawnin damna leh nopna om thei hi.

Bangci bangin na pawlpi in kimlepaam mite khat le khat kilemsak hiam?

THURSDAY                   Sep. 19

Nengniam Thuakte Adingin Thugen

          Solomon in, “Pau hun om a, daih hun om hi,” ci hi (Thu 3: 7).  Hi lua hi. Pau hun leh daih hun ding kithei theihsiam haksa hi. Ahi zongin nengniam thuakte ading, amau ngaihsutna pulaak ding a kiphalte ading pulaakna, siatna pen thu hoih tawh zawh nadingin, pawlpi in a pulaak ding kilawm napi a pulaak keileh siatna lianpi hong suak thei hi.

          Khristiante in Jesuh nungzui-in, mite adingin nasem dingin hong kisawl hi. Jesuh khut le khe i hi hi. Lai Siangtho hong hilh mah bangin gimna thuak Pasian thu-umte adingin a kisam bangin pulaakin, amaute adingin thu gensak dingin hong kisawl hi (Late 146: 6 -10).

          Isa. 58: 1-10 sim in. Tuhun nuntak khuasakzia ding bang thute pulaak hiam? Isaiah hun leh tuhun kikaal bangzah ciang bang kilamdanna om hiam?           ___________________________________________________________          ___________________________________________________________

          Isaiah in thuman a tangko ciangin ama minthan nading, a min kidawk nading a pulaak hi lo hi. Langpanna, lauhuai-nate lakah kamsang pa in hangtakin, Pasian sawl bangin, kinengniamte a hehpih Pasian, mizawng, cimawhte a lainat Pasian ahih manin, thuman takin nasem ding hilh kawikawi hi (1Pet. 3: 17).

          Hotkhiatna thu tangko-nate leh mun khempeuh ah Jesus kilangsak ding cih thu siksanin, SDA thu-um eite in siatna dim i kim, i paam ah na hoih, na pha sem ding, a gen dingin masuan i nei hi.

          SDA pawlpi in nektawm zongte huh a panpih, thuman lo-in kisemte thuman bangin sem ding hilh cihte in thuzuihna-ah a kisam mahmah thu hi, ci-in i pulaak hi. Genthei-te, nektawm zongte a hehpih, panpih dingin Pasian in hong deih hi. Mikim in Pasian mel le lim i suun ciat hi; Pasian in a thupha hong pia hi (Lk. 6: 20). Cimawh, genthei-te huh hi lehang, Jesuh ettehin nasem i hi hi (Matt. 25: 35, 36).

          SDA pawlpi in upna tawh a kalsuanna-ah kinengniamnate suutkhia-in, thuman, thutak tawh nasem a, mizawngte panpih ding thupisim mahmah hi (Pau. 31:8; Isa. 10:2).  Topa in a thuak mite’ thu a panpihna, cimawhte’ adingin thu a manin a khenna ka thei hi, ci-in David in pulaak hi (Late 140: 12). Cimawhte a hehpih Pasian tawh na hoih sem ding i hi hi. Seventh-day Adventist Official Statement on Global Poverty, June 24, 2010.

FRIDAY                Sep. 20  

SIMBEH DING: Ellen G. White, “ A Higher Experience,” 503 – 516, in The Ministry of Healing; “ Duty to the Unfortunate” and “ Man’s Duty to His Fellow Men,” 511 – 526, in 3T;  “ Doing for Christ,” 24 – 37, in 2T.

     “Lawhsamte, cimawhte, dongtuakte hehpih thei-in a lai-nat thuman thutak in vanglian mahmah a, vantung leitungah tua sangin a vanglian zaw thuman om lo hi. Hih thuman in Jesuh sungah kimu hi. Khrih a um khempeuh in, i tungah hong kibawl ding i deih bangin mite tungah bawl ding thupiak (kham thupiak) in sawltakte hun a muibun mah bangin tu-in zong vanglian, muibun hi.” Ellen G. White, Thoughts from the Mount of Blessing, 137.

     “Siit nei lo-in nuntakna buppi tawh Pasian leh mite itna in, vantung i Pa hong piak theih a manpha penpen thupha letsong hi. Hih itna in mihing sung pan hi lo-in a kip tawntung thuman sung pan a luangkhia itna hi. Topa tungah ki-ap lo lungsim in tua itna nei lo hi. Jesuh teenna lungtang bek in tua itna nei hi. Tua itna in nunzia nuamsak hi; nunzia namtui-sak hi; a kim a paam ah khempeuh tungah a deihhuai huzaap lian nei hi.” Ellen G. White, The Acts of the Apostles, 551.

KIKUP DING DOTNATE

1.      Tu kaal sung thusinnate bangin, Jesuh in mihingte a hong hotkhiatna dingin a nuntakna a piak mah bangin, hotkhiatna nasep in midangte ading sepna hi. Hih thu in koi bangin Pasian in eite ading a hong sepna leh a hong itna kilangsak hiam?

2.   Nengniam thuakte laptoh nasepte, khat le khat kilem nading    nasepte in kim le paam hoih nading nasep, gam ading nasep cihte ah hong manawh pih kha thei hi. Ahi zongin Seventh-day Adventist Pawlpi in gam le lei ading nasep leh biakna nasep tuamkhen hi.  Gam le minam ading nasepna leh kinengniamte suahtakna, khat le khat kilemna dong nasep, a kilamdanna in bang hi ding hiam?

3.  Tu kaal sung thusin thute lak pan nang ading hi taleh kim le paam adingin na hih theih ding khat ngaihsun inla, koi bangin na sem takpi ding hiam?

4. Siatna, kinengniamna leitung hi taleh a nuam leitung dingin thungen in.

TOMGENNA: Jesuh nung a zui mi khat in a nunzia kikhel lo-in om lo hi. Topa Pasian in cimawhte, nengniam thuakte lai-natin a hehpih mah bangin i sungah tua hehpihna a hong om kul hi. I kim le paam a om genthei, cimawhte huh ding hamsa hi; minphat pahtak ngahna zong hi lo hi. Ahi zongin tua bangin sepna in nuntak khuasakzia tampi hong khel ding hi.