LESSON 11 SEPT 7-13 KUMKIKNA LAMEN NUNTAKPIH

LESSON 11    SEPT    7-13

KUMKIKNA LAMEN NUNTAKPIH

Sabbath Nitak

Tu Kaal Sung Sim Ding: Lk. 18: 1-8; Matt. 24- 25; 1Kor. 15: 12 – 19; Thsia. 8:14; 12:13; Mang. 21: 1-5; 22: 1-5.

KAMNGAH: “Tua ahih manin kong it sanggamte aw, Topa sunga hanciamtakin na nasepna uh a mawkna suak lo cih thu thei na hih manun kiptakin ding un. A kilok zolo dingin om unla, Topa nasepna-ah hanciam tawntung un” 1Kor. 15: 58.

          Pasian gam in tu-in nuntakpih ding hi. Hih thuhilh dingin Jesuh in a Nungzuipite sawl hi. Thuhilhna, mi huhna tungtawnin Vantung gam hilh uh hi. A khawnkhongin a ngah mah bangun man ngen lo-in piakhia ding uh hi (Matt. 10: 5-8).

          Pasian gam in hih leitung kumpi gam tawh kibang lo hi. Pasian gam in hih leitung tawh kipawl lo hi (Jn. 18:36). Vantung gam in vangliatna tawh kidim a hong tung ding gam hi. Jesuh nunna, a nasep, a sihna leh sihna pan a hinkikna tawh Pasian gam hong kipan hi. Ahi zongin  Jesuh hong pai kik ciangin hih leitung in vangliatna tawh kidim ding a, Pasian in   leitungah Kumpi-in hong maangta ding hi. Tua hun ciangin Pasian gam kicinna hi ding hi.

          Adventist cih kammal in Pasian gam lamen-in lametna tawh a nungta mite hi, cih pulaak hi. Ahi zongin hih lametna in a hong tung ding leitung thak lametna bek hi lo hi. Tua lametna in a hong tung ding vanglian Pasian gam tawh kituakin tu-in nunzia hong khel hi.

SUNDAY           SEPT  8    

“Topa aw, Bang Tan Vei Sawtlai Ding?

     Lai Siangtho sungah a khang a khang a Pasian mite in gimthuak, sila, nengniamna, zawnna, thumanlohna thuak uh a, amaute gimthuakna sung pan suahtakna ngen tawntung uh hi. Egypt gam saltante, Babylon-ah sila-in om Israelte a kipan mi hon tampi in amau thuak gimnate hangin tawldamna, suahtakna ngah dingin Pasian tungah kiko uh hi. Pasian in amaute thuak gimna panin honkhia-in suahtakna pia-a, amau a nengniamte leh a galte uh tungah thukhen hi.

     Hih suahtakna in tawmvei hun sung hi. Ahi zongin kamsangte in Pasian in siatna khempeuh beisiangsakin, na khempeuh a tawpkhak hun pulaak uh hi. Tua bangin a pulaak kawm mah-un, amau thuak gimnate hangin “Topa aw, bang tanvei sawt lai ding hiam? ci-in Topa tungah kiko uh hi. “Amaute hehpih lo-in bang tanvei omlai ding na hi hiam? ci hi (Zech. 1: 12).

     Gitlohna, siatna tawh kidimte cithei-in, nopsakna tawh kidim uh a, Topa tung a thumante ahihleh nengniamna, zawngkhalna a thuakna uh hangin Topa tungah amaute ngetna, Late sungah tampi kimu thei hi. Late gelhpa in tua bangin a thuakte adingin Pasian in thu a khen ding pulaak hi. Amaute thuakna in tawmvei sung hi ding hi. Tua bangin leitung in siatna tawh kidim dingin Pasian in hih leitung a piansak hi lo hi. Kamsangte leh gim thuakte in “ Topa aw, bang tan vei sawt lai ding na hiam,” ci-in Topa tung kiko uh hi (Late 94: 3-7).

     Pasian in a mite adingin thuman tawh nasem tawntung a, Amah a umte in a man lo gimna a thuak uh ciangin, tua gimna thuaklah uh hi. Pasian mite in leitung siatna hangin lungduai zo nawn lo uh hi. Pasian in leitungah thuman lo-in sepna awlmawh lo tawh kibang ahih manin, hih in amau thuak gimna thuaklah sak hi. Tua hi-in khat vei vei ciangin kamsangte kampau, “Topa aw, ken nong huh ding bangtan vei hong ngenin, nang hong za lo lailai ding na hi hiam? Ahih kei leh, “ngongtatna” ci-in kong kiko hangin hong hon lo na hi hiam? (Hab. 1: 2), cih thute telhak hi.

     Thuciam Thak sungah zong Pasian in nate a thakin bawl pha ding deihluatna pulaak hi (Rom. 8: 19 – 22). Pasian sungah upna nei-in thahna thuakte aitangin thuman mite in Topa aw, bang tanvei gim thuaklai ding ka hi uh hiam, ci-in kiko uh hi (Mang. 6:10). Tua bangin gim thuakte honkhia-in, mi tatsia-te tungah thukhen dingin Pasian tungah pulaak uh hi.

     Lk. 18: 1-8 sim in. Pasian in a mite gimthuakna hangin amaute aitangin nasem ding ahihna thu, Jesuh in bang pulaak hiam? Hih in koi bangin upna tawh kizopna nei hiam?

MONDAY                    SEPT  9

A TUAM VILVEL LAMETNA KHAT

     Mi tampi in biakna pen leitung nuntak khuasakzia ding mitsuan lo-in, tua sangin a hoih zaw hih leitung khitteh nunna mitsuan hi. Hih thu in kimlepaam, i teenna leitung phattuam nading awlmawh lohna lungsim hong guan hi, ci uh hi. Khat veivei ciangin thu-um mite in zong tua bang nei a genin a pulaak ahih manun mawhsiatna thuak uh hi. Makai ulian kim  khat in mizawng, nengniam thuakte tungah lungduai takin gimthuak ding kisam a, Jesuh hong pai ciangin gimna khempeuh beimang ding hi, ci-in hehneem  uh hi.

     Leitung in siatna, gitlohna, gentheihna tawh kidim hi mah hi. Pasian in leitung hong phuahphat ding a, siatna, gitlohna mawhna khempeuh beimang ding a leitung in Pasian  vangliatna, thuman thutak tawh kidim ding hi. Tua hun lunggulh ngaklahna in khialhna hi lo hi.  Tua lametna leh kamciam om keileh lamet khat zong i nei kei hi. Jesuh in leitung bei ding tawh kisai thu a hilhna-ah (Matt. 24, 25), a thuhilhna a tamzaw in gimna hong tun ciang suahtak nading kihepkhiat ding hong hilh hi.  “Pasian in tua nite tomsak keileh kuamah a suakta zo kei ding hi. Ahih hangin a teelsa mite a khualna-in tua nite a tomsak ding hi” (Matt. 24: 22). Pasian kamciamte a thupitna i tel nadingin tua bangin hong hilh khol hi. Gimna tawh kipelh ding bekbek ngaihsun hi lehang, Khrih hong hilhnop taktak thu i mu tel zo kei ding hi.

     Matt. 24, 25 sim in. Jesuh thuhilhna sungah a thupi mahmah bang thu na mu hiam? Jesuh hong pai ding a ngak mite nunzia ding a hong hilh thute koi bangin a tomin na pulaak ding hiam?

________________________________________________________________________________________________________________________________

     Mailam thupiang dingte i upna in tu laitak i nunzia ding thu tampi hong hilh hi. Pasian kamciamte tungah limtak a kinga mi in Pasian tawh kizopna hoih nei-in, mite adingin khuavak leh mite nunzia kilamdangsak hi.

    

     Koi bangin Jesuh hong pai kik ding kamciam in  i nunzia hong huzaap hiam? A diakdiakin koi bangin cimawh genthei-te tungah na hoih sep ding hong hilh hiam?

TUESDAY      Sept  10

Thawhkikna Lamen

     Jesuh hong pai kik ding lametna in vangliatna tawh kidim lametna bek hi lo hi. Khristian masa-te in, sihna pan  pumpi-in a thokik Jesuh kamciam in Amah hong pai takpi ding hi, ci-in lamet uh hi. Jesuh in sihna pan nungta kik ahih manin mawhna hanga a hong sihna thu a mongdong tun ding leh leitung bawlpha dingin hong pai takpi ding a kamciam tangtung takpi ding hi (1Kor. 15:22, 23), ci-in hong hilh hi.

     Paul in Jesuh hong pai ding a lametna bulpi thawhkik lametna siksan hi. A thuhilhna khempeuh in nalamdang khempeuh lak pan a vanglian penpen sihna pan Jesuh thawhkikna thuman pulaak hi. “ Jesuh in sihna pan a thokik lo hileh i upna in a mawkna hi ding hi,” (1Kor. 15:17).  Hih thu in I lamet a om khempeuh adingin sihna pan Jesuh thokik-na in bangzahin manpha hi, cih ngaihsun in.

     1Kor. 15: 12 – 19 sim in. Koi bangin thu-um lote tungah Khristian upna thugil, bang hangin sihna pan thawhkikna thu na hilh ding hiam?       ______________________________________________________________     ______________________________________________________________

     Sihna pan Jesuh thawhkikna in Nungzuipite nunzia khel hi.  Jesuh in Pasian gam thu tangko dingin nungzuite sawlkhia hi (Matt. 10: 5 – 8).  Ahi zongin Jesuh a sih takteh lamet bei-in om uh a, thakia lungkia uh hi.  Sihna pan Jesuh a thawh khitteh amaute sawlkikin, Kha Siangtho vangliatna tawh amaute in Jesuh hong phut Pasian gam a tangko tak ciangun leitung in kikhelna lianpi nei hi.

     Nungzuite in lau-na, sih ding kihtaakna, kiliatsakna cihte pan suahtak uh a, hangsan takin Jesuh min tawh nungta-in thuhilh uh hi (1Cor. 15: 30, 31).  Sihna piangsak mawhna mah in gimna, gentheihna thuman lohna, nengniamna nam khempeuh zungpi hi. Tua hi mah taleh Jesuh nunna, sihna a zawhna hangin leitung mawhna, siatna khempeuh beimangsiang  hun hong tung ding hi. “A nunung pen a kisusia ding i gal in sihna hi ding hi” (1Kor. 15: 26).

     A tawpkhakna ah kua-kua hi taleh i huh mi khempeuh a si thei lo a om kei hi. Tua hi-in Jesuh sihna leh sihna pan a thawhkikna hangin i lamet thuman, mite thei-sak ding kisam hi.

Wednesday            Sep. 11

I LAMET THUKHENNA      

Thuhilhsia 8: 14 sim in. I thuak khak a vanglian thuman bang pulaak hiam?

________________________________________________________________     ______________________________________________________________

     Hamsatna, kinengniamna, thuahsiatnate in vangik, thuakham hi. Liamna, bai-na, hehna cihte in kuamah in hong thupi ngaihsutsak lo-in, a mawkna bangin a hong kingaihsutsak ciangin thuak hamsa semsem hi. Dahna khat in khiatna nei thei hi a, ahi zongin khiatna nei lo dahna in thuakham zaw semsem hi. Leitungah i nasepte kuamah in hong ciaptehsak lo-in, thumanna om lo hileh, tua in siatna taktak hi ding hi. Ahi zongin Thuhilhsia 8: 14 in na khempeuh ii mong, a tawpkhakna in tua bang hi lo hi. Tua bangin Solomon in a gimnate, na khempeuh amuhzia a pulaak khit ciangin, tha khat thu-in a  pulaak thu in Pasian in thukhen ding ahih manin na khempeuh in a mawkna suak lo ding hi cih kimu hi. Na khempeuh in khiatna nei, man nei ding hi.

     Thsia 12: 13, 14 sim in. Koi bangin i hihna khempeuh in thupi hi, ci-in hong hilh hiam?

_________________________________________________________

________________________________________________________________

     I lamet thukhenna i cih in Pasian zia le tong, i nunna leh hih leitung omzia ding hong hilh hi. I tenna leitung in Pasian bawlsa leh a piansak hi-in, tua banah hih leitung a it Pasian hi. Ahi zongin tu-in hih leitung  in mawhna, siatna tawh kidim ahih manin Jesuh nunna, a hong sihna tawh Pasian in na khempeuh bawl thak ding  hi. Na khempeuh kibawlphat ding hi, cih thu in Pasian thukhenna siksan hi. Leitung siatna, kinengniamna, gitlohna a thuakte adingin Pasian in thukhen ding hi, cih thu in thuman thudik lungdamna thu pulaak hi.

     Ni khat ni ciangin i telzawh loh thute kitel ding a, a tawpkhakna-ah hun sawtpi i ngak, na khempeuh in thuman tawh kidim ding hi, cih thu in na nuntakna-ah bang hong hilh hiam? Koi bangin thukhen ding kamciam tungtawnin lametna na nei hiam?

THURSDAY            SEP. 12

DAHNA, NATNA OM NAWN LO DING

     Mang. 21: 1- 5; 22: 1-5 sim inla tua hun ciang a misiangthote nunzia ding ngaihsun in. Bang hangin mawhna, sihna, gimna, natna tawh kipelh nunna ngaihsut telhak  hiam?     ______________________________________________________________     ______________________________________________________________

     Hih i leitung bei-in mawhna om lo leitung in vangliatna, minthanna tawh kidim leitung hi ding a, tua in eite hong ngak hi. Leithakah a om ding thute leh a om lo ding thute Mangmuhna 21, 22 in hong hilhkhol hi.  Mawhna, siatna dim leitung panin natna, dahna, gimna, thuman lohna, zawnna, sihna om lo leitungah i nunzia ding i thei zo kei hi. Tua bang nunna nuam banah Topa mahmah in ama khut tawh khitui-te hong nulsak ding hi, ci-in kamciam om hi (Mang. 21: 4). Tua bangin totkhiatna sungah kihel mi khempeuh in Pasian hong hehpihna a ngah ding uh hi. Topa in gimna khempeuh beimangsak ding hi banah Amah mah in khitui khempeuh hong nulsak ding hi.

     Mawhna hangin siatna, thuman lohna, gimna khempeuh bei-in na khempeuh in kibawlpha thak ding hi. Tua nunna singkungteh in minam khempeuh natna damna hi ding hi (Mang. 22: 2). Siatna tawh kidim leitungah nungta hi mah ta lehang mihing khat in i thuakna, mihing i hihna, Topa hong itna, a hong hehpihna pulaak tawntung hi. Leitung bawlpha ding sungah mihingte zong hong bawl thak ding hi. Tua hun hong tun masiah i sep theih bang bangin mapang a hotkhiat nasepna sungah kihel ding i hi hi.  Nasep lian pipi a kipan cihtham hi kei taleh na hih theih bang bang tawh mapanna-ah, kampau mukpau hoih, nek ding nei lote an pia, mi huhna, a kem a koih ding om lo cina, piteek puteek ading an huansak, puansawpsakin va huh cihte in kipiakna tawh nasepna hi-in, Jesuh hong itna a kilangkhia-sak hi-in angsung huaihamna zawhna hong suak hi.

     Mihing in siatna bei nadingin bangbangin a hanciam zongin i teenna leitung in siatna manawh hi. Jesuh in zong hih thu thei khin hi. Hi mah taleh mi huhna, na hoih sem cihte khawl ding hi lo hi.

FRIDAY                SEP. 13         

SIMBEH DING: Ellen G. White,  “Called to Reach a Higher Standard,” 309 – 322, in the Acts of the Apostles; “ Desolation of the Earth,” 653 – 661, in the Great Controversy sim in.

          Pasian in a mite hopihin a mite in Ama hopihna awging a zak uh ciangin mawhna hang a siatna khempeuh theihtelna nei uh hi. Hehpihna kong kihon sungin, Pasian in amaute mit humsak ahih manin a mawhna uh kiphawk lo uh hi. Mihaute in mizawngte tungah kiphatsakna tawh kidim uh hi. Pasian thukham palsatin hauhna ngah uh hi. Gilgialte an pia lo uh hi. Guaktangin a omte silh ding puan pia lo uh hi. Thuman nial uh hi; hehpihna it lo uh hi. Leitung hauh nadingin a nuntakna uh zang uh hi. Pasian lamah hauh ding ngaihsun lo uh hi. Tua hangin amaute in siatna tawh kidim uh hi. Amau nopsakna in amau sihna ding tun hi; amau hauhna in siatna suak hi.” Ellen G. White, The Great Controvery, 654.

          “Kido-na Lianpi a bei ciangin mawh nei mi hi taleh mawhna kici khempeuh beisiang ding hi. Tua ciangin na khempeuh in siantho-na tawh kidim hi. Na khempeuh in kilemna, nuamna tawh kidim hi. Nuntakna, nuamna, khuavak in Pasian tung pan hong pai hi-in, ciangtan om lo-in taangzai hi. A neu pen atom a kipan a lian penpen dongin, nuntakna nei hi taleh, nuntakna nei lo nate hi taleh piansak na khempeuh in a kicing, a hoih Pasian hong itna pulaak uh hi.” Ellen G. White, The Great Controvery, 678.

KIKUP DING DOTNATE

1.       Tu kaal sung thusinnate tungtawnin nuntakzia, annek tuidawn a kipan a manphatna leh nek ding, dawn ding, silh ding teen ding lunghimawh kul lo, bang hang hiam cihleh hih leitung in a sawt lo-in kisia ding a, tua khitteh kibawl pha htak ding hi, cih thu enkak in. Leitung kisusia-in athakin kibawl pha ding hi, cih thu siksanin kimlepaam nate kepsiam ding kin lohna, koi bangin nial ding na hiam? A thupi-in ah tua thu siksanin kimlepaam nate a susia mi khat na hih loh ding, bangci bangin kikem          ding na hiam?

2.       Matthew 24 hong hilh bangin, ei SDA thu-um te in Jesuh hong pai ding hun tawh a kinai semsem leitung in siatna khang semsem hi, ci-in i pulaak hi. Koi bangin Matthew 25 siksanin leitung siatna na mu hiam?

TOMKAIHNA:  Eite Pasian in bei hun om lo-in siatna a om ding phal lo ding hi. Lai Siangtho hong hilh lametna lian mahmah in Jesuh hong pai ciangin siatna khempeuh beimang ding, thuman lohna khempeuh thuman tawh kidim ding a, leitung in a thakin kibawl pha ding hi, ci-in a lamen i hi hi. A hong pai kik ding i ngak laitakin, sihna pan Jesuh thawhkikna siksanin hih lametna in i nunzia hong khel a, hotkhiat nasem ding lawpna, thupha bawl ding cimtaak lohna hong guan hi.