LESSON 10 AUGUST 31 – SEP. 6 HOTKHIATNA THU NUNTAKPIH

LESSON 10            AUGUST 31 – SEP. 6

HOTKHIATNA THU NUNTAKPIH

Sabbath Nitak

Tu Kaal Sung Sim Ding: Rom.8:20 -23; Jn. 3:16, 17; Matt.9:36; Eph.2:8-10; 1Jn.3:16,17; Mang.14:6,7.

KAMNGAH: “Note’upna hangin Pasian’ hong hehpihna tawh hotkhiatna a ngah na hi uh hi. Note’ thalawhna hangin a ngah hi lo-in Pasian’ hong piakkhong ahi hi. Note’hanciamna tawh a ngah hi lo na hih manun na kisialh nading uh a thu om lo hi. Eite a hong bawlpa pen Pasian hi a, Jesuh Khrih tawh i kipawl ciangin i nuntakna-ah gamtat hoih a nei dingin a hong bawl ihi hi. Hih pen eite’ omzia dingin a na ngaihsut kholhsa ahi hi.” Eph.2: 8-10.  

          Pasian thupiak i gen ciangin thukham zuihna tawh dikna, Pasian maipha kingah cih lungsim hong lut khak ding lauhuai hi. Ahi zongin Lai Siangtho in Jesuh tungtawnin Pasian hong hehpihna leh mawhnei-te ading a hong sihna tawh mawhna sung pan hotkhiat mite i hi hi,cih hong hilh hi.  Mihing in a behlap ding om ding hiam?  “Mihing in a gamtat hoih khempeuh, a siantho-na khempeuh, a ithuai-na khempeuh gawmkhawm-in Pasian leh vantungmite mai-ah hotkhiat ka ngah nading hi, ci-in paipih hi leh, Pasian in nial ding a, Pasian in Amah langpanna, thumaan lohna-in ngaihsun ding hi.” Faith and Works, 24.

          Cimawh, dongtuakte huhna in gamtat hoih tawh dikna ngahna ding hi lo hi. Ahi zongin hotkhiatna thu itna nei-in, Pasian hong itna leh hong lainatna tel semsem lehang, dongtuak, cihmawhte huh lo-in i om kei ding hi. Topa’ itna a ngahte in midangte it pelmawh hi. Itna ngah ihih manin itna nei-in midang hong itsak hi. Pasian’ hong itna phawk hi lehang, bangzahin Pasian in mihingte hong itna leh itna nei ding a hong sapna i phawk semsem zaw ding hi.

SUNDAY    September 1

“Pasian In Hong It Mahmah Ahih Manin”

     John 3: 16 “Pasian in leitung a hong it mahmah ahih manin….” Greek laimal ‘kosmos’ a khiatna in leitung kipiansakna, Ama thupiakna tawh a kip nate pulaak kammal hi. The SDA Bible Commentary, vol., 5, 929. Hih in mihingte hotkhiatna gen hi-in, Pasian in hotkhiatna a geel ciangin a piansak na khempeuh a huam khakloh om lo hi.

     Rom. 8: 20 – 23 sim in. Hotkhiatna in tangzai-in bangteng huam hong hilh hiam?

______________________________________________________________     _____________________________________________________________

     Hotkhiatna in mimal khat ciat in Topa tawh kizopna neih nading hotkhiatna hi. Ahi zongin hotkhiatna in tua sangin thukzaw, tampi huam zaw hi. Diktanna i cih in mawhmai ngahna bek hi lo hi. Hotkhiatna in, Jesuh leh Kha Siangtho vangliatna tungtawnin Pasian innkuan piangsakin, mawhmai-na leh, hotkhiatna hangin Ama sungah lungmuannate tungah lungdam-in, gamtat zia le tong hoih tawh leitung mite adingin teci hoih hihna pulaak hi.

     John 3: 16, 17 sim in. Koi bangin aneu 16 in a huamkhak thute aneu 17 in pulaak hiam?

_________________________________________________________

______________________________________________________________

    

     Pasian in nang le kei banah midangte zong it hi. Pasian in i it-te zong it hi; tua hangin i lungdam hi. Pasian in mi khempeuh it ahih manin mi khempeuh tungah hotkhiatna thu gen ding hong thadah lo-sak hi. Pasian in i thugen a za mite it ahih manin Ama thu gen ding hong lawpsak hi. Pasian in hotkhiatna thu a nialte zong it veve hi.  Pasian in i it mite bek it hi lo hi; mi khempeuh hong it hi. Piansak thu in hih thu hong hilh hi.

     Piansak nate khempeuh in Pasian’hoihna pulaak uh hi. “ Pasian in mihoih leh misiate tungah a kibangin ni taangsak khawm a, a gamtat phate leh a gamtat siate tungah zong a kibang mahin guah zusak khawm hi” (Matt. 5: 45). Mihing in Pasian tungah bangbang lungsim nei taleh, i nuntak theihna mahmah zong Pasian hong piakkhong hi. Mihing khempeuh in tua thupha piakkhong i ngah hi.

     Mihing in Pasian’ piaksak ahihna, na khempeuh in Ama khut sung ahihna thu phawk thei hi lehang mi tawh i kizopzia, nate i muhzia hong kilamdangin hong khel lo ding hiam?

MONDAY          Sep. 2

Hehpihna Leh Kisikna

     Hotkhiatna thute leh Kido-na Lianpi in i nuntakna, kimlepaam nate thu bulpi – mihing nunna, leitung, mawhna tawh kidim ihihna hong theitelsak hi.  Piaksak nuntakna nei khempeuh in mawhna tawh kidim dingin Pasian in a piansak hi lo-in, mawhna tawh kidim hi mah taleng Pasian’ limlemel i pua veve hi. I nuntakpih mawhna in gimna, natna, na khempeuh a susia mawhnahi.

     Tua hi-in leitung leh a sung nungta mihing in gimna, natna, sihna i tuah ding mah ahi hi. Milim (robot) bangin hong kibawl hileh tua bang gimnate i thei kei ding hi. Late sung dahna kipulaakte, Jeremiah leh kamsangte’ thuak dahnate, Jesuh khitui leh a hong hehpihnate in mawhna hangin gimna, mawhna leh sihna hang a piang ahi hi.

     Matt. 9: 36; 14: 14; Lk. 19: 41; John 11: 35 sim in. Jesuh lungsim a sukha nate leh thute bang pulaak ciat uh hiam? Koi bangin, mawhna leh siatnate hangin lungnemna nei ding i hiam?     ______________________________________________________________     ______________________________________________________________

     Mi khat hangin mawhna leh siatna hong piang hi-in, kei tawh bangmah kisai-na om kei, cih ding hi lo hi. “Mawhna ka nei kei hi, i cihleh eite a kineihkhem ihi a, eite a thutak lo ihi hi” (1Jn.1:8). Kamsangte’ thuhilhnate theitel hi lehang mawhna leh siatna bulpi in mi khat ii thupalsatna hi lo-in, Pasian leh a mite kizopna kitat-in, i mawhna in mite nasak hi, cih i thei ding hi. Siatna, mawhna in lian taleh neu-no khat hi taleh mawhna, siatna mah hi

     Huaihamna, hazatna, deihgawhna, hoihlohna, thulangkai-na, cihtaklohnate in leitung siatna, thumanlohna, zawnna, kinengniamna zungpi hi. I mawhnate pulaakin kisikna in leitung siatna i deihlohna a pulaak hi-in, Pasian’ hong itna in i lungtangah a hong teenna ding lamsial ihi hi. “Pasian kiangah i mawhnate va pulaak lehang, amah citakin thuman ahih manin, i mawhnate hong maisakin i hoih lohnate khempeuh hong siangsak ding hi” (1Jn. 1:9).      

  

     Nang le nang kisittel in. Bangci bangin siatna sungah na nungta hiam? Bang lampi bek in siatna sung pan hong suakta-sak  ding hiam?

TUESDAY          Sep. 3

Hehpihna Leh Na Hoih Sepna

    Eph. 2: 8-10 sung a thute nangma teldanin gelh in.  Hehpihna leh na hoih sep kizopzia bang hong hilh hiam?

    ______________________________________________________________

    ______________________________________________________________

    Lai Siangtho hong hilh thu tampite lakah, Pasian bia dingin mihing hong kipiangsakin, midangte phattuamna a pia thei nasem dingin hong hilh hi. Leitungah mawhna om lo-in tua bangin a nungta dingin ngaihsun in.  Tu-in mawhna hangin siatna, mawhna i thei hi. Ahi zongin Pasian hehpihna hong kilangin, leitung mawhna hangin Jesuh hong sihna in mawhmai-na leh tawntung damna lampi hong lak hi. Tua hi-in mawhna dim leitungah i nuntakna Pasian’ khut in hong bawlpha-in, Amah tawh nasem khawmin, hotkhiat puahphat nasepna ahi, mihing in Pasian’ limlemel bit i neih nading nang le kei hong zang hi (Eph. 2:10).

    Hehpihna ngah mi in midangte zong a hehpih dingin hehpihna hong kipia hi. Mi khempeuh in hotkhiat nasepna-ah kihel dingin sapna ngah hi. Lungdam kipakna tawh nasem dingin Pasian in hong sam hi.” Ellen G. White, The Ministry of Healing, 103.

    Hotkhiat ngah nading, Pasian maipha muh nadingin cimawh huhna, thupha bawl, nengniamte khahkhia, gilkialte anpia, na hoih cihte i sem kei ding hi. Khrih sungah upna tawh Pasian maipha ngah nading kitangsam khempeuh kicingin i ngah khin hi. Mawhna, siatna tawh kidim ihihna, mawhna sung pan Pasian’ hong itna leh hehpihna in hong honkhia hi, cih i phawk ding kisam hi. Zia-etnate phu-in, angsung huaihamna tawh kidimpi-mah vantung hehpihna in nunzia thak sungah nungta dingin hong kai-in, Pasian hong itna in hong khel hi.  Khrih hong sihna ngaihsun lehang a hong kipiakna, Pasian maipha i ngah nading i behlap theih khat zong a omlohlam i tel ding hi. Hih bang i cih ciangin Khrih hong itna thukkik lo ding cihna hi lo hi. Pasian in hong it ahih manin tua itna pen itna mah in thukkik hi. Mi itna tawh Pasian hong itna thukkikna hoih zaw bang om ding hiam?

    1Jn. 3: 16, 17 sim in. Khrih hong itna thukkikzia ding bang hong hilh hiam?

WEDNESDAY             Sep. 4

Mikim Neih I Mihing Hihna

     Jesuh nunzia leh a nasep in mite lamet bang hi lo-in nunzia kilamdangsak hi. Siatna tawh kidim numei, pasal, siahdongte, miphakte, Samaritan, Roman galkapbu, biakna makaite, naupangte hi taleh lungsim khempeuh tawh Jesuh kiang a zuante, Jesuh in kuamah deidan lo-in itna leh lungdamna tawh hong sang hi. Pawlpi masa-te in a khawnkhong a hong kipia hotkhiatna lampi zui-in nunzia thak tawh nungta uh hi.  Pawlpi masate in hotkhiatna in mi kuamah deidan lo hi, cih thu thei-in midangte in zong tua upna sung a tun nadingin nunzia hoih tawh midangte makaih uh hi. Tua in thu-umte nunzia ding hi. Tua in lungdamna thu laigil, Khrih nunzia, a nasep leh a hong sihna pulaak hi.

     Pawlpi makai masa Paul leh Peter a kipan Jerusalem council in pawlpi in a tuahkhak thu hamsa-te leh buai-na tuamtuamte siangsakin, Khrih’hong hotna sungah kuama deidanna om lo-in a hong hotkhiat ahihna thu limtak hilh uh hi ( Sawl. 10:9 – 20; 15). Lungdamna thu Pasian hong itna in kuamah deidan lo itna, Khrih nungzui khempeuh in itna tawh kidim ding ahihlam phawk thakna nei uh hi.

     Hih Lai Siangtho munte in mihing khempeuh kibatna bang pulaak hiam? Koi bangin tua thute in mi tawh kizopna hong huzaap ding kisam hiam?

     Mal. 2:10 _________________________________________________

     Sawl. 17: 26 _________________________________________________

     Rom. 3: 23 __________________________________________________

     Gal. 3: 28 ___________________________________________________

     Jesuh in Samaritan mi hoih a gen thute Gal. 3: 28 in a tom a pulaak hi. Kua-te tungah thupha bawl ding ci-in kinialnial lo-in, pai-in thupha bawl ding kisam hi. Hong thukkik thei lo dingte tungah thupha bawl ding kisam hi. Pasian hong hotkhiatna in minam khempeuh pum khat hong hisak-in, vantung tawh innkuan khat hong suaksak hi. “Jew mi ihi a, Gentail mi ihi zongin, sila ihi a, sila ahi lo ihi zongin, eite minam tuamtuam ihih hangin Kha Siangtho khat bek mah in Jesuh’pumpi a suak dingin ama sungah hong phum a, eite khempeuh tungah a hong kipia pen tua a kibang Kha Siangtho khat bek mah ahi hi” (1Kor. 12:13).

THURSDAY     Sep. 5

Tawntung Lungdamna Thu

     Lungdamna thu in “Minam khempeuh, pau namkim, mi khempeuh” (Mang. 14: 6) tungah a khang a khangin kipulaak thu hi. Hih thu in nunzia hong khel hi. Ahi zongin Mangmuhna Bu in Jesuh thu leh hotkhiatna thu leitung beidongin kigen ding hi, cih thu hong hilhpha hi.

     Mang. 14: 6, 7 sim in. Koi bangin hotkhaitna thu John 3: 16, vantungmi khatna thupuak hong hilhkik hiam?     ______________________________________________________________     ______________________________________________________________

     Mang. 14:7 in thu guipi thum pulaak hi. Hih thu thum in Pasian in cimawhte, nengniam thuakte a hehpihna leh siatna a langdo-na tawh kizopna nei hi.

     1.Thukhenna: Thukhen ding kitangsapna, na khempeuh thuman thutak tawh sep ding pulaak hi. Tua bangin a man lo gimthuakte’ thuumna aw khempeuh Pasian in za hi. Thuman lo nasepna a thuakte adingin thukhenna in lungdamna thu hi.

     2.Biakpiakna: Hebrew kamsangte in biakpiakna leh gamtat hoih              in tonkhawm ahihlam pulaak uh hi. Pasian mi kici-in siatna tawh kidim a nunzia uh leh amau biakpiaknate hangin, Pasian in biakpiakna sangin hehpihna nei-in, cimawhte, genthei-te huh ding ka deih zaw hi, ci hi (Isa. 58: 6, 7).

     3.Piansakna: Pasian in Ama’ lim le meel suun-in a hong piansak ahih        manin Ama mai-ah mimal khat ciat in manpha-in, khat le khat tungah thuman thutak ding, khat le khat kinengniamna, mi khat tungah huaiham angsung zat loh ding kisam hi. Hun nunung a hotkhiatna thu i pulaak in a mangthangte in Pasian tawh kizopkikna, mawhna sung pan suahtakna       thu hi. A man lo biakna, a man biakna, bawlsiatna om taleh, Pasian in thuman thutak tawh nungta-in, Pasian thukham leh Jesuh upna nei mi tawmno nei hi.

    

     Koi bangin kitasamte huh kawmin vantungmi thum thupuak hilhin lametna leh hilhkholhna pia ding na hiam?

FRIDAY             SEP. 6

Ngaihsutbeh Ding: Ellen G. White, “God with us,” 19 – 26, The Desire of Ages;  “Saved to Serve,” 95 – 107, in The Ministry of Healing.

     “Topa in leitung khempeuh Ama lenggahhuai hi, ci-in pulaak hi. Hih leitung in Satan ukna nuai-ah om hi mah taleh leitung in Pasian neihsa hi. Leitung in Pasian piansak ahih manin Ama a ahih zah mahin leitung a hong tatkhiatna Ama a ahihna khiam hi lo hi. Leitung adingin Khrih in a nunna hong pia hi. “Pasian in leitung it lua mahmah ahih manin a Tapa neihsun hong pia hi” (Jn. 3:16).  Ama Tapa tungtawnin mi khempeuh tungah vantung thupha khempeuh hong kipia hi.  Leitung in nisim-in Pasian kiang pan thupha ngah hi. Leitungmite in lungdam kei taleh, guahtui, nitang, kha tang, singkung, lopa, paakte, singgah a kipan na khempeuh in Pasian hong itna leh a lungduai-na pulaak tawntung uh hi.” Ellen G. White, Christ’s Object Lesson, 301, 302.

     “Mihing in biakna tuamtuam zui taleh hingimte vangik suahkhia-sak dingin hong kisawl hi. I kim i pam in cimawh mi tawh kidim hi. Amaute in hehpihna, itna kisam uh hi. Huhna, hehpihna kisam meigong tagah tampi om hi.  Amaute huh dingin Khrih in hong sawl hi. Ahi zongin mi tampi mi huh ding ngaihsun lo uh hi. Huh kisamte hehpih huai hi. Kuamah in amaute thudon lo hi. Cimawh, genthei taleh amaute in Pasian’ tate hi. Ciangtan theihloh man tawh amau-te kilei hi-in, Topa mai-ah amauti in manpha mahmah uh hi. Amaute in Pasian innkuan lianpi sungah kihel uh hi. Pasian neihsa kem Khristiante in amaute don ding uh hi.” Ellen G. White, Christ’s Object Lessons, 386, 387.

KIKUP DING DOTNATE

1.   Na hoih sem  mi huhte in midangte sangin Pasian maipha ngahzaw ding cih ngaihsut hoihlohna tawh koi bangin pelh ding hiam?

2. Na biakna leh pawlpi in kuamah deidan lo-in, mi khempeuh Khrih sungah khat hi, ci hiam? Koi bangin Khrih sungah pumkhat zaw semsem ding i hiam? Bangci bangin kuamah khentuam lo-in pawlpi in nasem hiam?

3. Ngimna nei lo-in huhna kisam khat va huhna leh hotkhiatna thuman pulaak nadingin mi huhna koi bangin khentel ding na hiam? Mi huhin Pasian thu genpih kei ta lecin huhna kisamte huh ding    mah hi a, bang hangin mi huhna tungtawnin Pasian thu genpih lehang hoih zaw hiam?

TOMLAKNA: Hotkhiatna in Pasian hong itna hong lak hi. Jesuh nunna, a hong sihna tungtawnin hotkhiatna i ngah a, mawhmai-na, lametna leh nunna hong pia hi. Hotkhiat hehpihna a ngah khempeuh in midangte tungah hotkhiat thuman hawmsawn hi. Tua in gamtatna tawh dikna ngah nading hi lo-in, hotkhiatna ngah dingin hong kipiangsak hi a, hotkhiatna thugen dingin honkhiatna ngah i  hi hi. Tua bangin hotkhiatna in Pasian tawh kizopna, mi tawh kizopna thak hong guan hi. Tua in genthei cimawhte huh dingin masuan hong guan hi.