2. PAWLPI PHUH DING PATAU
PARAGUAY |
April 13
Hugo Sanz,
64
Hugo Sanz patau pian hi. Ahangin,
a pastor pa-un Paraguay gam’ khuapi ahi, Asuncion khuapi ah pawlpi thak khat
phut dingin amah sawl hi. Asuncion Adventist Hospital-a director sem uhaam
samkang pa-in pawlpi mite tawh kum 20 val sung bang aki thuah ahi hi. Central
Seventh-day Adventist Pawlpi-ah pawlpi mi 300 bang om-in, agambup ah pawlpi
lian pen hi pah hi. Pawl pualam mite tawh, khat vei zong semkhawm ngei lo hi.
Hih bang munah pawlpi thak khat phuh ding pen Hugo in haksa samahmah hi. ADRA
ah, upna kibat pih loh, midangte tawh asem khawm ngei azi tawh hong kikum uh
hi. Azi-in ahih theih zah in apanpih dingin thukim hi.
Hugo in nipikaal tampi sung thu
ngen hi. Tua leh apawlpi thak phuhsawm na-uh ahi, Nueva Sajonia veng pen amau’
omna panin block nih khawng bek gamla ahih lam hong phawk khia hi. Tua pawlpi
phuh nading hanciamna-ah a Makai pi sepding thu kim hi. “A tuungin pen ka patau
mahmah a, ahi zongin midangte hong panpihna tawh ka gualzo uh hi” Hugo in ci
hi. “Hih munah kongpai uh ciangin amaute’ kisapnate mu-in na kasem thei uh hi”.
A kipatna tatak bel thupi het
lo hi. Hugo in mite tawh kizopnading, ki mai-ngap nadingin, inn khat saap hi.
Tua lai-ah An huandan sinsakna, zateep kidaamna, cihte khawng— Zato-a sem,
pawlpi mite tawh kithuah in va sem uh hi. Kilawmtatna vaneihpih phot uh hi.
Tu-in hih Community Center thak tawh kisai-in hong minthang pianpian ta hi.
Pawlpi mite khat in Facebook laimai khat hongg in maante post hi. Radio Nuevo
Tiempo ki ci, Adventist pawlpi’ neih ‘Lametna thugenna Radio’ panin zong pulaak
khia ziahziah uh hi.
Kum khat acin khit— 2015 kum
ciangin, hih Community Center ah mi tampite hong lunglut ta ahih manin, “One
Day Away From the World” akici “Leitung panin nikhat kihemkhia” cih kikhopna
mun Saturday ni-in hong nei thei ta uh hi. “Hih ni-in hongpai mite-in
alungkhamna uh mangngilh in Lai siangtho a mitsuan thei uh hi”. “La sakhawm in,
Lai siangtho sinkhawm ka hih manun hilai munah tentan hongpai mite-in, ‘Hih
pawlpi mite pen a lai siangtho zuih un, acidam sak hi’ hong ci uh hi,” Hugo in
ci hi.
Amaute zong
Pasian’ tungah thunget hong kipan ta uh hi. Tua bangin Lai Siangtho asin pih
kawmkawm un, pawlpi mite-in cidamna athupinate mahmah zong Facebook laimaite-ah
suaksak ziahziah uh hi. Cidamna tatak pen— an siangtho anhoih nekna, thungetna,
lungmuanna, leh Jesu sung bekah om hi, ci-in hong theitel mahmah ta uh hi.
Amaute’ Lai siangtho taang deih phatdiak uh mun nih te pen: Johan Thumna aneu 2
“Ka lawm Gaias aw, nang na ci damin navai khempeuh zong na maa pai ding hi,
ci-in ka lamen hi. Kha thu tawh kisai lamsangah zong bang mah lungkhamna omlo
ding ci-in ka thei hi”. cih leh Filippi 4:7 “Mihingte in atheihtel zawh loh
Pasian’ piak lungsim nopna in, Khrih Jesu tawh na kipawlna uh hangin note hong
lungnuamsak ding hi.” cih te ahi hi.
2016 kum sungin gutate in tua a
kikhopna uh li vei tak valuh uh a, vanzat tuamtuam a kipan tutphah sabuai
dongin gu zel uh ahih manin Hugo’ inn ah, a Center uh tuah uh hi. Tua kum mah
in Leitung bup Adventist pawlpi in Sabbath 13 na sumpi khenkhat tawh hih
Community Center lam nading ki huh hi. A mun ding kilei pah a, inn zong hoih
tak in ki lam in, vanzat te zong a hoih zaw ki lei hi. Hoih takin ki-uum a,
lungmuan huai tak in ki bawl hi.
2018 kum ciangin Nueva Sajonia
Seventh-day Adventist Biakinn thak leh Community Center akigawm khawm in tua
lai-aa Pastor sempa mah in hongg khawm hi. Hugo in pawlpi Makai mah sem suak a,
“Hih gualzawhna sang’in ka lungnop zawk hun ding thei nawn ke’ng” ci hi.
“Adventist pawlpi mite tawh kum 20 val bang na asemkhawm ngei khin ka hih
hangin, hih hun tomno sung a, pawlpua mi te tawh ka nasepna pen ka lungnop
penpen hun hi,” kum 64 apha ta, Hugo in ci hi. Tu ma-in ahih leh pawlpi sunga
om khinsa memberte a’ dingin na kasem hi. Ahi zongin tu-in kambek hi lo-in
sepkhiatna tawh Pasian’ itna lampi thak khat in kimu thei ta hi. Pasian in
sepding-a hongpiak ka mission nasep atangtung sak zo pan ka hi hi” Hugo in ci
hi.
2016 kum kuata masa lai-a,
Sabbath 13 na sumpi tawh nong huh manun zongh lungdam hongko phapha nuam ingh.
Tua tawh biakinn leh Center khat Paraguay gam Asuncion khuapi sungah kilam
ahihna zong kong pulaak khin hi. Leitung buptuam a, i pawlpi’ mission nasepna-a
zat dingin mission sumpi nong piak man un lungdam sawnsawn hi.
