1. Lai Siangtho atawi Khuapi-mi Pawlkhat
PERU | April
6
Alejandro
Qquerar, 52
Alejandro tanlang a kah in kum
18 pha ta hi. Mi pawlkhat te’n kah hak si ee, ci kha ding uh hi. Ahi zongin
1980 kum pawl in Ccacaccollo (Kakakula) khua ah mi khempeuh kum 18 a phak
ciangin sang kah kipan pan uh hi. Tua khua mite in a naupangte uh pilna sinsak
sangin lo lai-ah na sepsak ding thupi ngaihsut zaw uh hi. A khaanpihte khat in
sanginn ah a radio ong pua in hun nunung a thupiang dingte hongg uh a,
Alejandro in limtakin ngai hi. Tua thute in Alejandro patau mahmah sak hi. a
kicing zaw in thei tel nuam hi.
Tua zawh asawtlo in alunggulhna
hong tangtung hi. Radio aa thugen pa in amau’ sanghuang sung a kimawlna innpi
sungah nitak simin thugenna hong nei hi. thugen pa in Jesu hongpai kik baih
nading thu agen azak ciangin Alejandro alung naknop mahmah hi. akhuapihte
khempeuh in zong zaknop sa-in lawptek uh ahih manin tua thugen pa in amaute a’
dingin biakinn khat vaihawm sak hi. Alejandro leh alawmte in zong a lokuan loh
ni te un tua Sunday biakinn ah hong kikhawm zel uh hi.
Tua pawlpi-a makai mi li te in zong a khuapihte khalam ah a
lawpna uh a muh uh ciangin tha ngah mahmah uh a, Lai Siangtho bu khat ciat
letsong in piak dingin khensat uh hi. Tua ahih ciangin tua khua panin a nai
penpen khuapi, Cusco (kasku) khuapi ah minit 60 sung bus tuangin Lai Siangtho
lei dingin apai uh hi. Ahih hangin lemlo sese hi. Lungkia sa-in khuataw lam aa,
lam lianpi zui-in zingsang khat apai uh leh mihon khat lai siangtho khatciat
tawi kawmin innpi khat sung ah alut uh mukha uh hi. Hua innpi pen laibu saal hi
kha ding hi, cih upmawhna tawh a mau zong tua mipite’ nung zui-in innpi sungah
alut uh hi. Tua innpi bel –Seventh-day Adventist te’ biakinn na hi-a, Sabbath
School akah nahizaw uh hi. Tua pawlpi upate zong lut khin vet uh ahih manun
Sabbath School leh Divine Service kikhawm suak uh hi. Kikhop tuah ciangin
sun-an na nesak uh a, nitaak lam Lai siangtho na kikup pih uh hi. Tua upate in
a thusinte uh lamdang sa-in thupi sa-uh a, lawp mahmah uh hi. khatlekhat ki-en
in, “Hun nunung thute tawh kisai, ei’ theih pen alang khawngbek hi mawk ei! Hih
mite’n a cing takin thei mawk uh hi lo maw” kici hanhan uh hi. Tua lai mah ah
hih upate in Adventist suah ding khensat pah uh hi. Pastor pa kiangah, “ka khua
vuah hoih takin thu honggen in,” ci-in ngen uh hi. pawlpi mi nih in tua upate a
khua vuah va zui uh a, a zing ciangin Sunday ni-in a biakinn vuah thu vahilh uh
hi. Tua ni-in Alejandro kikhawm thei kha lo hi. Ahangin amah lo kuan kha hi.
Ahi zongin alawmte-in, “mai Sunday ciangin biakinn aa kikhop ding tawh buai
nawn vet kei oh. Ih biakinn pen Seventh-day Adventist Biakinn suak ta ei, mai
kaal ciangin Saturday ni-in ki khawm ta ni ei,” cih san uh hi. Bangthu
bangla hi peuhmah hiam, cih a-en dingin Alejandro zong Saturday ni-in biakinn
ah hong pai hi. Tua ni-a, athuzak thakte ahi, ‘Eden huan pan kipan in thukham
nambat lina tawh kisai—ni sagih Sabbath tan nadingin Pasian in hong hilhna te
azak ciangin Alejandro’ lungsim sukha mahmah hi. Amah zong Adventist hong suak
pah hi.
Tua hunin Alejandro kum 19
pha-a, sang tawpin hunbit in lo kho hi. A ngaihsak ding mi amuh nak leh Jesu
hong paibaih nading thu gengen hi. Tua bangin Jesu a itna-in na lianpi piangsak
hi. Atun tomin, pilna saang aneihloh hangin kum 30 val sungin pawlpi 6 phut hi.
Tui akiphum zawh asawt lo-in, amasa pen pawlpi 1985 kumin phut hi. Tua hun a
kipan in kum 3 pan kum 5 hal, cih bangin pawlpi thak khat phut toto zo hi. Khat
veivei aphuhsa pawlpite-ah nai 5 sung bang lamsiau-in va kikhawm thei zel hi.
Ama’ huzapna tawh mi 800 val bang ki tuiphum khinta uh hi.
Tu-in
Alejandro kum 52 pha ta-a, Pasian’ hehpihna phat hi. Ahi zongin atatak-a
lungdam koh ding dang khat in, Sabbath zingsang khat Cusco khuapi sung-a Lai
siangtho tawi kawmin biakinn pai, Seventh-day Adventist pawlpi mite tung ahi
hi. “Biakinn i pai ciangin Lai siangtho tawi hamtang ding thupi sa ing, tua hi
leh mite’n ong muh ciangin hih te Christian te ei-ve maw, hong ciding uh hi”
Alejandro in ci hi. “A zenzen in Cusco khuapi-a Adventist te-in lai siangtho na
tawi lo uh hi zenzen leh ka khua un thumaan mu nai lo kha ding hi” ci hi.
Tu-in
Alejandro te’ khua ah mi 500 bang a-om na lak ah, Adventist pen atamzaw hi pah
hi.
tuiphumsa mi
300 bang om hi.
Tu kuata Sabat 13 na mission
sumpi tawh ‘Cusco Kipawlna Phualpi’ ki lam ding hi. Tua lai-ah manglai leh
tumtheih tuamtuamte kisin ding a, khangnote a’ding kimawlna tuamtuam zong
kisinsak ding hi. Tua kipawlna phualpi i’ ngimna pen ‘tua kiimnai munkhat ah
pawlpi thak khat phuh zawh nading’ ahi hi. Mission sumpi nong piakkhiat manun
lungdam mahmah hi.
