LESSON
8 May 18
- 24
TA NEIHNA LEH KEPNA
Sabbath Nitak
Tu Kaal Sung Sim Ding:
Pian. 18: 11; Jer. 31: 25; Mat. 11: 28; Late 127; Pau. 22:6; 1Sam. 3: 10 -14;
Phil. 3: 13
KAMNGAH: “En un, tate pen TOPA tung pan i luah
gou-tanh hi a, tate pen nu sul gah thamanin a hong kipia ahi hi.” Late 127: 3.
Nausuah pen ngei-na
bangin kingaihsun kha zel a, nausuahna a lamdanzia ngaihsut khakin i nei kei
hi. Eve in a ang sungah naungek Cain a tawi, mitkha tawh ngaihsun in. Naupaai a kipan, a thuak gimnate, nausuahna,
naungek in amah le amah thu-in bangmah a tat theih lohzia cihte lamdangsa ding
hi. Kum 90 val khin Sarah in Isaac a neih ciangin lamdangsa-in a nuamzia ding
ngaihsun in. Isaac min a lawhsial-in
Sarah nui-nui kha ding hi. Ta nei dingin kha tampi sung thu a nget khit ciangin
Hannah in nawi pia-in Samuel tawi-in a pulaak, “Hih naupang ka ngen a, TOPA in
ka ngetna hong pia hi” (1Sam. 1: 27), cih thu ngaihsun in. Zuthawl kipia nungak
no Mary in lawp leh patau kawmin a neih tapa, Pasian Tapa a neih ngaihsun in.
Mi khempeuh in ta neih
theih hamphatna leh masuan ngah kim lo hi. Tu kaal sungin nupa kikaal buai-na
tuamtuamte, lau-na, lungkimna tawh kisai thute i kikum ding hi.
SUNDAY May 19
Ta Nei Lo Nupa
Pian. 18:11; 30: 1; 1Sam. 1: 1-8; Lk. 1:7
sim in. Tua mite in tatzia kibatna khat ciat a neih uh pulaak in. Koi bangin Pasian in amaute kitangsapna pia
hiam? _____________________________________________________________________ _______________________________________________________________________
Tate in thupha hi. Ahi
zongin Pasian in nupa khempeuh tungah tua thupha pia lo hi. Nupa kimkhat in ta
nei dingin thungen uh hi. Amau ngetna bangin Pasian in pia hi. Sarah bangin
lamdang takin ta nei nupa om hi. Nupa kimkhat in ta nei dingin thungen ngen uh
hi mah taleh ta nei lo uh hi. Midangte in ta nei-in Pasian minphat uh a, nupa
kikaal nuamsa uh hi. A thei lo mi khat in ta nei lo nupa tungah “ta bang zah na
nei hiam” ci-in a kidot ciangin, nuamsa lo-in maizum uh hi; tua hangin mi lakah
kihel ding maingal lo uh hi.
Pasian in tua bang mite
thuakna thei ahihlam a phawk ding uh hi, kisam hi. Late gelhpa in “Patauhna
hangin ka liinnate ciamteh inla, ka khituite na thawl sungah thun in” (Late
56:8). Pasian in amaute thuakna thei lo hi lo-in “Pate in a tate a hehpih bangin
TOPA in amah zahtakte hehpih hi” (Late 103:13).
Mi kimkhat in ahihleh ta
nei lo dingin khentat zaw uh hi. Gimna, natna, siatna, patauhna tawh kidim
leitungah ta neih huai ngam lo hi, ci-in ngaihsun uh hi. Mi kim khat in ta nei
lo dingin khentat uh a, ahi zongin midangte ta kem uh hi. Tagah ahi zongin, inn sung nuntak hamsa sung
pan a khangkhia naupangno-te hoih takin kepsak uh hi. Leitung i nuntakna in telzawh lohin lamdang
hi. Genthei naupangte i muh ciangin Pasian hong itna leh na khempeuh a hoihin a
bawl a sem Pasian i muan ding kisam hi. Ta nei lo mite lungsim ngaihsutna, a
thuaknate uh telsiam ding kisam hi.
Jesuh in taksa tanu tapa
nei lo hi. Hih in bang hong hilh hiam?
MONDAY MAY 20
Nu/Pa Bek Tawh A Khangkhia Tate (Single Parenting)
Tu hun ciangin nu bek hi
lo pa in zong tate kemin khansuah hi. A
tam zaw-in nupa kikhen, zawlgai ta hi. Nu in tate kem zaw hi. Hagar in Abraham
tawh ta nei dingin kisawl hi. Ta nei takpi uh a, a nuta-un inn pan hawlkhiat
thuak uh hi (Pian. 16:3, 4; 21: 17). Bathsheba in kumpi David tawh zawhthawh
thu-in ta nei hi (2Sam. 11: 4, 5).
Elijah in Zarephath khua-ah meigong nu kiangah pai dingin sawlna ngah hi
(1Kum. 17:9). Jesuh in nasep a kipan ciangin a khankhiatna Joseph in sikhin
ahih manin Mary bek tawh khangkhia hi. “Joseph in Mary sihsan hi; Mary
meigongsuak hi. Joseph in a lamdang Jesuh suah thu theitel hi. Mary in a lungkhamna, a nuamna kuppih ding
nei lo hi. Kha nih sung dahna tawh kidim hi.” Ellen G. White, The Desire of
Ages, 145.
Khat
kia in tate kemin khansuah ding hamsa hi. Mi tampi in tua bang cihmawhna, sum
hamsatna, mi tawh kizopna, nasep kitaaklahnate hangin Pasian adingin a hunte uh
zang manlo uh hi. Koppih ding zi, pasal ka mu zo kik ding hiam, cih
lunghimawhna nei mi tampi om hi. Tua bang mite adingin Jer. 31: 25; 29: 11; 32:
27;
Matt. 11: 28; Pau. 3: 5, 6; Isa.
43: 1, 2 in bang hong hilh hiam?
__________________________________________________\
Pawlpi in meigongte huhin panpih ding kisam hi. Jame in “I Pa
Pasian in a siangtho biakna citakin a ngaihsut thu in: tagahte le meigong
numeite a haksatna uhah hoihtakin kemin, leitung siatnate tawh kisawh kha lo-in
siangtho takin omna ahi hi” (James 1: 27). Tua banah khatkia-in tate khansuah
mite zong kihel hi. Tua bang mite sum tawh huhna banah a dang huh theih
tuamtuam om ding hi. Tawm vei sung naupangte kepsakna in a nu, ahih keileh a pa
in tawlngak hun, thunget hun, Lai Siangtho sim hun ngah thei ding hi. Naupangte
etteh ding (mentor) dinmun-ah na om thei hi. Ahih keileh innsung innpua-ah
nasep khat peuh tawh na huh thei hi. Lampi tuamtuam tawh Pasian khut zat na hi
thei hi.
Amaute dinmun, nunzia
mawhsak lo-in, koi bangin hamsat thuak nu/pa khat na huh thei ding hiam?
TUESDAY May 21
Nuamna Leh Tate Kep Ding Tavuan
Late 127 sim in. Bang thuguipi pulaak hiam? I nunzia ding leh
zuih ding thupi bang pulaak hiam?
__________________________________________________
__________________________________________________
Mehlim khat, anlim khat a
huan ding mi khat in tua tawh kisai a zuih ding thu om hi. Hel ding kisam
khempeuh helkim zo a, bawl dan ding bangin a kibawl ciangin tua an/meh lim hi.
Tate pantah khuasakna zia zong tua bang mah hi. Naupang khat le khat kibang lo
hi. Naupang khat le khat makaih, hilhzia kibang lo hi. Numei, pasal, a kum tawh
kizui-in makaih banah amau lungsim puakzia a kipan a tuamtuam zong om ding hi.
Tate in Pasian zahtakin a it nadingun nu le pa in makaihin pantah dingin Pasian
in thupia hi (Thkna. 6: 4-9; Late 78: 5-7). A neutung uh a kipan a pai nading
lampi hilh ding hi (Pau. 22: 6). Tate in lampial lo-in, khentatna hoih lo a
neih loh nadingun hilh ding kisam hi.
Naupangnote in hong
khangto semsemin mi picing suakin Khrih thei-in, itna nei-in Ama nasem a suah
ding uh kisam hi. Pasian hong makaihna bangin nu le pa in Thuhilhkikna 6 sung a
bangin nu le pa in Topa sungah tate khansuah ding kisam hi. Thkna. 6 sungah thu
guipi li kimu thei hi. Topa i Pasian phawk ding hi (Thkna. 6:4); lungsim
khempeuh tawh Topa it ding hi (6:5), a Kammal manpha-sa ding (6:6) leh tate
tungah Topa thu-te pulaak ding kisam hi (6: 20- 23).
Thuhilhkikna 6 in thu
guipi nih pulaak hi. Amasa-in hilh, pulaak” (6:7). Tate hilh kul hi. Nu le pa
in tate tawh kizopna tungtawnin vantung thuman thute hilh ding hi. Innkuan
biakpiakna, Lai Siangtho simkhopna-te ah Pasian kammal tawh pantah ding kisam hi.
Nisim a thuak khak uh thu le la-te tungtawnin thuman pha mu thei uh hi. Na khempeuh
in Pasian thuman pulaak hi (Pian. 18:19).
Nihna-ah khih inla, gelh in” (Thkna. 6: 8,9). I sepna, gamtatna khempeuh in vantung thuman
pulaak ding hi. I ngaihsutna khempeuh, gamtatna khempeuh in thuman kilangsak
ding hi. I lungsim pan innkuan sung zel ding a, innkuan panin kimleepmah dongah
kizel ding hi.
WEDNESDAY MAY 22
Ta Kepna In Nungzui Suaksak Nasep
Pian. 18:18,19; 1Sam.
3: 10-14 sim in. Pa nihte thu enkak
in. Inn sung a makaihzia panun a gah
bang at kik uh hiam? ________________________________________________ ________________________________________________
Tate nungzui suaksak dingin nu le pa in masuan lianpi nei hi. Tua hileh nu le pa in Jesuh nungzui hi pah uh
hi. Nu le pa kimkhat in tate satna, pumpi gim piakna tawh tate thuhilh uh hi.
Tua bang thuhilhna hoih zaw hi, ci-in ngaihsun uh hi. Pau. 22: 15; 23: 13; 29:
15 siksanin tate sat uh hi. Tua bangin gamh tatna, ngongtatna in tate lungsim
sia-sak thei a, tha zawhna tawh ki-ukna ahih manin tate in nu le pa langpan
banah Pasian tawh kigamla thei hi.
Lai Siangtho in tate
makaih hilhna-ah hehpihna bulphuhin makaih dingin hong hilh hi. Thuman, dikna
thu hilh ding kisam hi (Late78:5; Pau. 22:6; Isa.38:19; Joel 1:3). Pasian hong itna ngaihsunin, tate kisapnate
siik kul, vaihawmsakin, (2Kor.12:14); tate adingin etteh thamcingin,
(Pian.18:19; Pai.13:8; Titus 2:2), inn sung vai khempeuh makaih, vai-sai
(1Tim.3:4,5); tate sek kul, khaal kul hi (Pau.29:15,17).
Ahi zongin innkuan
kimakaih khilhna hangin innkuan tampi buai hi. Isaac leh Rebekah in Esau le
Jacoh unau maipha piaktuam zawk a neih manun (Pian.25:28), a nung ciang Jacob
in a tate lak pan Joseph a it tuam hangin innkuan sung buai hi (Pian.37: 3).
Eli in biakna makai khat hi napi-in a tate a hilh loh manin innkuan sung
kisiatna hong suak hi (1Sam. 8: 1- 14).
Samuel in Eli makaihna pan khangkhia-in a innkuan sung makaihna-ah
kisapna tampi om hi Kumpi David in mi
zi tawh a mawh khitteh mi that pa hong suak a, ama gamtat bangin a tate zong
gamta dingin a hilh pasal hong suak hi. Kumpi Ahaz bangin (2Kum. 16: 2-4),
kumpi Manasseh in dawibiakna dingin a tate pia hi (2Kum. 21: 1-9).
Ahi zongin Lai Siangtho
sungah etteh huai innkuan tampi kimu thei hi. Mordecai in pa hoih khat hi-in
Hadassah leh Kumpinu Esther ama khansuah hi (Esther 2:7). Job in a tate adingin
thungetsak tawntung hi (Job 1: 4,5).
Innkuan hoih hi taleh innkuan hoih lote tung panin lak theih ding thu
manpha tampi kimu thei hi.
Lai Siangtho sunga
innkuan tuamtuamte tung pan bang thu na mu hiam? Bangci bangin i tate a kipan i
ta a hi lo-te makaih khansuah ding na hiam?
THURSDAY MAY 23
A Mangthang Na Tate Ngah
Kik Nading
Pau. 22: 6 sim in. Bangci bangin na tel
hiam? Kamciam hiam, a piangthei thu
hiam, ahih keileh peel lo-in piang takpi ding thu hiam? ________________________________________________ ________________________________________________
Nu le pa in khat veivei ciangin sep ding a kilawm khempeuh sep kul
hun om hi. Tate tawh kithuahna, Pasian thu tawh pantahna, sang kahsak,
biakpiaknate-ah paipih, Pasian nasepna tuamtuamte-ah kihel hi napi, a
kipantahna bangun nung lo uh hi. Tua in lunggimna lianpi piangsakin, amaute
adingin tatsat lo-in lunghimawhna om tawntung hi. Tua-te in nu le pa khialhna
hi lo hi. Tate in zong amau deihtelna, khentatna tawh nungta ahih manun a vawh
bangun a gah at ding uh hi.
Mi kimkhat in “a teek
dongin lampial nawn lo ding hi,” cih thu pen kamciam leh pel lo tua bangin
nungta takpi ding uh hi, ci-in ngaihsun uh hi. Ahi zongin Paunak in thu guipi
hong hilh hi bek a, a tangtung ding leh a tangtung lo ding pen mimal khentatna
tungah kinga hi. A neutung a kipan limtak a kipantah a khantawn mangsuak thei
hi, cih thu hi. Naupang khat a kum hong tam semsem ciangin nu le pa hilhna mang
thei, nial thei hi. Limtak kipantah tate in nu le pa thuhilhna mang thei ding uh
a, tate tawh a kigamlat uh ciangin tate in tua thu-te phawk kik ding uh hi. Tua
in a po khia khaici tawh kibang ding hi. Tate limtak hilh ding na khentat thei
a, tate in a hoih a teel uhleh hoih ding uh a, a sia a teel uhleh siatna tawh
nungta ding uh hi.
Nu le pa in tate in lam a
pial uh ciangin bangci kalsuan huai hiam? Pasian ap in, thungetsak in. Na gim
na lungkhamna khempeuh a thei Pasian hi. Pasian in a cing penpen pa hi-in, mi
tampi in Pasian nunghei uh hi. A
mangthang tate adingin itna, thungetna in Pasian kiang a tung kik thei dingin
hanciam in.
Mi hong huh ding maizum
kei in. Hong huh thei ding mi, thu hong ngetsak thei ding mite tawh mapangkhawm
in. A mangthang ta hangin nupa kaal buai-na om thei hi. Limtak kikupna tawh
kalsuan ding kisam hi. Nu le pa in tate i itna sangin Pasian in amaute a itna
lianzaw hi. A kikhel ding uh lametna nei inla, Pasian nasepna mangngilh kei in.
Ei le ei kimawhsakna in
mihing ngei-na hi. Khial mahta lecin, bang hangin Pasian kamciam mitsuanin
lametna tawh kalsuan ding thupi hiam? Phil. 3: 13.
FRIDAY MAY 24
Ngaihsutbeh Ding:
Tate tawh thungetkhop hun, kikholh hun nei in. Pasian tawh na kizopna, tate tawh kizopna
bang mah khaktan sak kei in. Lengla khat hong pai lehzong, “Pasian in nasep ding
hong pia hi; mi gensiat hun ding ka nei kei hi,” ci in. Tawntung kimang ding
nasep a sem nahihlam kiphawk in. Thu dangdangte sangin tate masak zaw in.”
Ellen G. White, The Adventist Home, 266,267.
Nu le pa in tate nawi-ne
tung panmahin sek ding leh khal ding kisam hi.
Na thu hong man ding uh pantah in. Limtakin a khut uh len in. Nu le pa
in lungsim ki-uk zawhna kisam hi. Na thu
a hong mandong uh limtak hilh ding, pantah kul hi. Na heh laitakin thu hilh kei
in. Na hehna dam lo-in thu na hilhleh
naupangte in amau tha muangin lungkhuah tektek ding uh hi.” Ellen G. White,
1T., 218.
KIKUP DING DOTNATE
1. Pasian ta cih in a khiatna
bang hiam? Koi bangin na tel hiam? Ta hihna
hangin lungmuanna bang na nei hiam?
2. Papi khat in a ta suah a
muh ciangin “ka ta suah khit ciangin thuman nih ka mu thak hi. A masa-in
deihteel theihna leh a nihna-ah mawh dim mihing pianzia hi. Bangci bangin
naupang in tua bangin thuhilh hi ding hiam?
3. Naupangte in kum bangzah a
phak uhteh ngaihsutna pantah ding hoih
hiam? Koi bangin pantah ding? Nu le pa in Pasian tungah ki-ap keileh, bangci
bangin Pasian deihna tawh kituakin naupangte khansuah thei ding hiam?
4. Nupa kikhenna tawh kisai
ngaihsun in. Bangci bangin pawlpi in meigong,
tagahte, nu tawh nungta lo tate huh ding hiam?
5. Bangci bangin upna pan
lampial ta nei nu le pa-te huh thei ding na
hiam?
