LESSON 7 MAY 11- 17
INNKUAN KIPUMKHATNA
TAWHTANG
Sabbath Nitak:
Tu Kaal Sung Sim Ding:
Pian. 33: 12-14; Ruth 1: 16- 18; John 17: 21- 26; Gal. 3: 28; Eph. 2: 11- 22;
5:21, 6:9.
KAMNGAH:
“Nong sawlna thu leitung mite in a up nadingun Pa aw, ka sungah na om a, kei
zong na sungah ka om mah bangin, amaute zong i sungah omin pumkhat a suah
nadingun thu kong ngen hi” (John 17:21).
Innkuan sung nunzia in mihing nunzia
tuamtuam pulaak hi. Nupa-te in ta a hong
neih uh ciangin inn sung khuasakzia tampi hong kikhel hi. Tua kikhelna khantawn
dong kizom suak thei hi. A om nai lo in a hong pian ciangin kilamdanna lianpi
hi mah hi. Tate hong khang toto-in zi, pasal nei-in innkuan khatin hong
ding uh a, tanu tapa nei nupa-in hong om
uh hi.
Tua bangin innkuan sungah tanu, tapa
nei-in i om hangin, mawhna tawh kidim i hih manin a tawntungin innkuan
kipumkhat ding hanciam kul hi. Singlamteh in Khrih sungah minam khempeuh Pasian
tawh kizopna hong bawlsakin, tua banah mihingte khatlekhat kizopna hoih hong
nei thei-sak hi (Eph. 2: 13- 16; Kol. 1: 21
23). Nisimin Khrih hong hehpihna
ngah tawntung ding kisam a, tua in upna tawh a nungta mi khempeuh sungah
innkuan kipumkhatna piangsak hi. Tua bangin nisimin a nungta ding i hi hi.
Khrih hehpihna in tua bangin hong nungta sak hi.
SUNDAY May 12
Khrih A Bulpi
Paul in Khrih sungah a nungta mi
kipumkhatna bang tawh pulaak hiam? Koi bangin Khrih in nih pen pumkhat suaksak
hiam? Eph. 2: 11- 22; Gal. 3: 28. ___________________________________________________ ___________________________________________________
Singlamteh
in mihingte khatlekhat hong khenkham tuamtuamte hemkhia hi. Jew biakinn ah
numei leh pasal, Jew mi leh Gentile mi kituamkhenna dei-khat bawl uh hi. Paul
in Khrih sungah Jew mi leh Gentile mi pumkhat hihna a pulaak ciangin minam
khempeuh, numei le pasal, a hau, a zawng kidei danna khempeuh pum khatin a om
ding pulaak hi. “Khrih in a thak minam khat a hong bawl nadingin Ama sungah
minam nihte pumkhat hong suaksakin kilemna hong bawl hi” (Eph. 2: 15). Hih in a
nuamhuai nupa hong kipumkhat sak hi. Upna tawh Khrih sungah sawt vei kikhen a
kilem lo innkuante hong kilem, hong kipumkhatsak hi.
Lai Siangtho siksanin Khrih sungah
pumkhat suahna thu gengen napi-in a nuntakna sungah tua bang pumkhatna om nei
lo mi tampi om hi. Kipum khat nadingin Khrih in i nunzia bang hong khel hiam?
Rom. 6: 4-7; 2Kor. 5:17; Eph. 4:24-32. ___________________________________________________ ___________________________________________________
A beem vilvial a kigiit kual sungah a
nawl kimkot panin a beem laizangah kituah dingin giit lehang, a lai-zang tawh
kinai tektek, a kigiit khat le khat zong kinai zaw tektek hi. Tua bang mahin
“Khrih tawh kinai semsem mite in khat le khat kizopna-ah zong a kinai kizopna
nei uh hi” Ellen G. White, The Adventist Home, 179.
Tate kikaal, zi leh pasal kikaal kizopna-ah
amaute in phawkin a phawk kei zongun Khrih in amaute palaai hi. Khrih leh Ama
kammal zui lo-in kuamah in kipumkhatna nei thei lo hi. Dietrich Bonhoeffer, The
Cost of Discipleship (New York: The MacMillan, 1979), 108.
Na innkuan, na pawlpi in Khrih tawh
bangzahin kinai hiam? A kip kizopna a om dingin bang hemkhia ding na hiam?
MONDAY MAY 13
Ama Hong Itna Tawh
Pumkhat Hihna
“Tua ahih ciangin note in Pasian teel
mi, a siangtho mi, a it-te bangin hehpihna, thupha bawlna, lungsim kiniamsakna,
lungnemna leh lungduai-nate na silh un” (1Thess. 3: 12). Tapa in Pa tawh khat
ahih mah bangun Ama nungzui khempeuh in a kipumkhat nadingun Khrih in Pa tungah
thungen hi (John 17: 22). Jesuh thunget
tomkaih lehang, pumkhat nadingin itna kisam hi.
________________________________________________________ ___________________________________________________
Jesuh in a thungetin Ama nungzui-te in
pumkhat ding bulphuh hi. Jesuh thungetna leh Lai Siangtho Thak sungah Pasian
hong itna in agape itna hi. Agape itna in Pasian kiang pan hong kipan hi. Agape
itna in Pasian nunzia hi (1Jn. 4:8). Agape itna in Jesuh nungzui hihna pulaak
hi (Jn. 13: 35). Mawh dim mihing in agape itna a pianpih hi lo hi. Kha Siangtho
tungtawnin Khrih a nei mite bek in tua itna nei hi (Rom. 5:5; 8:9, 11).
“Note ka hong it bangin note zong khat
le khat na ki-it ding uh hi” (Jn. 15:12). Hih thu a gelh nungzui John in hun
khat lai-in ithuai lo, a kiphatsak, a kiliansak, lungtom, siatna tawh kidim mi
khat hi (Mk. 3: 17; Lk. 9: 54, 55; The Desire of Ages, 295). Hun khat khit
ciangin bangbangin siatna tawh kidim hi mah taleh Jesuh in a itna thu telthei
hi. Jesuh itna in John khel hi. John in Jesuh itna a neih a kipan midangte zong
it thei hi. Tua itna in Khristian hong pumkhatsak hi. “Amah i it hi. Bang hang
hiam cihleh Aman hong it masa hi” (1Jn. 4: 19).
“Pasian in hong it mahmah ahih manin, eite zong khat le khat a ki-it
ding kilawm hi” (1Jn. 4: 11).
1Kor.13: 4 -8 sim in. “Itna” cihna
munah na min kibulh in. Koi bangin na nunzia hong lawng hiam? Kha Siangtho in
tua itna hong guan dingin Jesuh ngen in. Koi bangin Kha Siangtho in Khristian
thu-um mite pumkhat dingin hong tawsawn hiam?
TUESDAY MAY 14
Aang Sung Khualna:
Innkuan A Susia
“Kiphatsakna, huaihamna hemkhia hi
lehang minutes nga sungin a tamzaw hamsatna khempeuh bei ding hi” Ellen G.
White, Early Writings, 119.
Mihing in a pian a kipan mawhna’
suksiatsa hi. A lian mahmah siatna in aang sung khualna hi. Aang sung khualna i
pianpih hi. Hih thu i naupanglai mahin kimu hi. Naupangnote in na khempeuh deih
uh hi. “Kei, kei, kei” cih bek thei uh hi. Piankum hong tam semsem ciangin aang
sung khualna hat semsemin innkuan sungah siatna lianpi hong piang hi. Ahi
zongin Jesuh in na khempeuh khel dingin hong pai hi (Eph. 4: 24). Amah tawh a kop mi in aang sung khualna zo
thei hi, ci-in kamciam om hi. Ama nunzia mahmah in eite etteh ding hi. Aang
sung khualna nei lo-in a nuntakna hong pia hi (1Jn. 2:6). Ei ading bekin
nuntakna hong zawh pih ding hi.
Phil. 2: 3-5; 1Jn. 3: 16- 18 in aang
sung khualna tawh kisai bang pulaak hiam? ___________________________________________________ ___________________________________________________
Ellen G. White hong hilh bangin
kiphatsakna, aang sung khualna hemkhia lehang buai-na tampi hong veeng pah ding
hi;siatna lianpi tawh hong kipelhsak ding hi. Innkuan sungah a moi pen pan a
ham pen dongin singlamteh phungah aang sung khualna nusiat ding kisam hi (Pau.
16:6). Singlamteh in a lian penpen aang
sung khual lo nunna hong lak hi. Khukdinin thungetna, upna, khitui luangin
thungenin, ki-ap mite in Singlamteh kiang zuan mite hi ding hi.
Jesuh kiang zuanin, aang sung khualna
do dingin na hun bangzah na zang hiam? Matt. 7: 16 in koi bangin na nunna zia
pulaak hiam?
WEDNESDAY MAY
15
Ki-Ap Kipiakna
Paul in kizopna-ah kiniamkhiatna leh nunzia ding bang hong
hilh hiam? Eph. 5: 21. Koi bangin ama hong hilhna in pawl sung kipumkhatsak
hiam? Bang hangin innkuan adingin thupi hiam? Eph. 5:22; 6:9.
_______________________________________________________
“Ki-ap cih kammal in sawl thu hi lo, mimal khentatna tawh
kiniamkhiat, midang sangin kiniamsak zaw nunzia pulaak hi. Hih thuguipi Khrih in hong pankhia hi (Matt.
20: 26-28; John 13: 4, 5; Phil. 2: 5-8). Kha Siangtho tawh kidim mi in tua
bangin nungta hi (Eph. 5:18). “Khrih a zahtak mi” lungsim in kiniamkhiatsak zo
a, ki-pia zo hi (Eph. 5: 21). Mi tawh
kizopna-ah tua bangin kipiakna, kiniamkhiatna in picinna hi. Tua in a dongkhak
bangmah omlo Khrih sungah hong kipumkhatsak hi.
Innkuan sung nunzia thu guipi:
Kipiakna in innkuan panin kipan ding hi. Innkuan sungah kipiakna a
omleh, pawl sungah kipiakna hong om ding hi. Paul in kipiakna bulphuhin innkuan
sung nunzia ding hong hilh hi.
Eph. 5:22, 6:9 sungah kizopna dawl thum kimu thei hi. Innkuan
sungah kipiakna a om ciangin pawl sungah zong kilamdanna lianpi hong om ding
hi. Mi khempeuh in tua thu theikim mah taleh mun khempeuh in kilangneihna tawh
kidim hi. Mihing ngeina kipsak ding deihna hi lo-in, Khrih lungsim bangin
nungta-in thu-um mite khat le khat tungah kiniamkhiatin, kipiakna om dingin
hong hanthawn hi.
Bang hangin Paul in a thaneem mite numei, naupangte leh sila
mite tawh kizopna pulaak masa hi ding hiam?
Eph. 5:22
___________________________________________________
Eph. 6:1 _____________________________________________________
Eph. 6:5 ____________________________________________________
Thaneem mite a hilh khit zomah pasal, nulepa leh ukna nei mite
tungah thuhilh hi. Khat ciat in amau theih ngei loh thuhilhna za uh hi. Tua
thuhilhnate in kum zalom khat sunga thu-um mite nunzia khel hi. A lian, a neu,
a hau, a zawng, deidanna khempeuh Singlamteh mai-ah beimangin thu-um mi
khempeuh hong kipumkhatsak hi.
THURSDAY May 16
I Kamciam Bangin Itna Tawh Nungta
Innkuan kipumkhatna,
kithuhualna in zi le pasal kikaal
kizopna-ah cihtakna panin innkuan sung khat le khat kizopna zong hong kip hi.
Ahi zongin Lai Siangtho sungah kamciam peel, nupa sung buai-na, nupa kaal
cihtak lohna tampi om hi. Tua bang a om hangin mi nunniam hi mah taleh etteh
taakcing, Pasian huhna tawh lawmte tungah a citak, innkuan hoih, innkuan nuam
tampi om hi.
A nuai-a innkuante
leh khat le khat tungah a cihtaknate uh ngaihsun in. Koi bangin cihtakin in innkuan kipsak hiam?
Bang thu hangin citak uh hiam?
Ta tawh kizopnazna: Pian.33:12-14; Pai.2:1-10
Unau kizopna: Pian. 37: 17-28
Innkuan sung kizopna: Ruth 1: 16-18; 2:11, 12, 20;
3: 9-13
Nupa kikaal kizopna: Hos. 1: 2,3, 6, 8; 3: 1-3
______________________________________________________
Midang khat tung hi
taleh nupa kaal a kipan tanei ding khentatna, vaihawmnate cihtakna leh khat le
khat tungah kiniamkhiatna, kipiakna kisam hi. Mimal deihna sangin mailam thu
ngaihsutna tawh cihtakna kisam hi. Thukham in a hoih lo gamtatna pan hong dal
thei hi. Ahi zongin nupa kikaal, innkuan sung a nop nadingin itna kisam hi.
A citak mite tungah
Khrih in bang kamciam hiam? (Heb. 13: 5). Topa in na tungah a cihtakna hangin
Ama tung, nupa kaal, innkuan leh pawl in citakna nei hi lo hiam?
FRIDAY MAY
17
Ngaihsutbeh Ding: Ellen G. White, “A Sacred
Circle,” 177-180, in The Adventist Home; 6T., 236-238.
Kipumkhatna- sep masak
ding: Khristian thu-um mi khat in a innkuan sung kipumkhat nading a nasep masak
pen ding kisam hi. Innkuan sungah
kiptakin kizopna a om ciangin nu le pa a kipan tate in kiimlepaam tungah a
lian, a hoih huzaap nei thei uh hi.” Ellen G. White, The Adventist Home, 37.
Innkuan kipumkhatna
Thusim: Innkuan sung, pawl sung hi taleh buai-na, kikhenna a piangsak bulpi in
Khrih tawh kizoplohna pan hong piang hi. Khrih tawh a kinai mi in midangte tawh
kizopna hoih nei hi. Pawl sung hi taleh innkuan sung kipumkhatna thusim in
leitung pilna, siamna, ki-ukdan siamna cihte thupi hi mah taleh hihte in hong
kipumkhatsak thei lo hi. Khrih tawh pumkhat hihna bek in innkuan sung, pawl
sungah hong kipumkhatsak hi.” The Adventist Home, 179.
KIKUP DING DOTNATE
1. Innkuan pumkhatna a susia
thu le late ngaihsun in. Koi bangin innkuan in tua bang thusia la-sia-te
zozo thei ding hiam?
2. Na pawl sungah innkuan
sungah buai-na, a kikhenkham innkuan a
om hiam? A omleh koi bangin amaute hamsatnate huhthei ding na hiam?
3. Ki-ap tawh kisai ngaihsun
in. Koi bangin Khristian khat in ki-ap ding
hiam? Bangci bangin ki-ap tawh kisai, a thu guipi kizang khial hiam?
4. Innkuan kipumkhat bangin
pawl sung kipumkhat nading bang thu guipi
kisam hiam?
