LESSON 5 April 27 – May 3 INNKUAN ADING PILNA KAMMALTE

LESSON 5             April 27 – May 3

INNKUAN ADING PILNA KAMMALTE

Sabbath Nitak

Tu Kaal Sung Sim Ding: Pau. 5:3 – 14; 13:22; 14: 26; 17:22; 23: 13; 31: 10-13;  Matt. 19:5; 1Kor. 7: 3, 4.

KAMNGAH: “Na lungsim khempeuh tawh TOPA muang inla, nangma theihna suang kei in. Na hihna khempeuhah Amah phawk in. Tua hileh lampi man hong lak ding hi” (Paunak 3: 5, 6).

          I suah khit ciangin innkuan sung kizopna kilamdang hi mah taleh, naungek, naupang, nungak, tangval a kipan uham dongin mi khempeuh in nulepa sung panin i piang hi. Mi kimkhat in ama innkuanpih sim loh sanggam, ulenau nei lo hi. Mihing in bang dinmun tawh a nungta zongin Paunak in nunna zia ding, thuhilhna, thudotna leh thu tampi hong hilh hi. Innkuan sung kizopna zia ding tampi hong hilh hi. Pasian zahtak nulepa in tate adingin etteh hoih hi. Nulepa in mundangah sangkah, nasem a tate tungah laikhakin thuhilh a neih zel theih mah bangun Paunak sungah pa in ta a thuhilhnate kimu hi. “Ka ta aw, na pa’ hong thuhilhna hoihtakin zui inla, na nu’hong thugente ngai in” (Pau. 1:8). Thuhilhkikna sungah zong nulepa in tate thuhilh ding thu pia hi. Pa in tate a hilhna tungtawnin vantung Pa Pasian in Amah a um mite a hong hilhna thu za thei hi.

SUNDAY                     April 28

A Thuman Numei It In

          Pau. 5: 3-14 sungah numei leh pasal mawhna hangin buai-na, gimnate kigelh hi.     ___________________________________________________          ___________________________________________________

         

Zi, pasal in midang tawh numei leh pasal mawhna bawl lo ding hi. Tangval, nungak in zong tua bang mawhna bawl lo ding hi. Paunak sungah pasal thuhilhna tam zaw a, Solomon sungah numei thuhilhna tam zaw hi (Solomon 4: 12- 15). Tua bang mawhna a bawl mite in siatna, gimna lianpi thuak ding hi. Tua bang numei pasal mawhna in itna taktak siksan hi lo ahih manin itna kip kici thei lo hi. Tua bangin mawhna sung a nungta mite in pumpi gimna thuakin, a neihsate bei ding a, lunggimna tawh kidim uh hi. Tua bangin a nungta dingin a khentat mite in Pasian thukhenna thuak ding uh hi.

          Zi leh pasal kikal nopsakna in mihingte tungah Pasian in a hong piak thupha lian mahmah khat hi. Tua bang nopna zi le pasal kikaal sung bekah zat dingin Pasian in a hong piak ahi hi (Matt. 19:5; 1Kor. 7: 3, 4; Heb. 13: 4).  Paunak sungah nunna pia tuiluang tawh gentehin tua bang nopna pulaak hi.  Zi le pasal kikaalah cihtaklohna a om ciangin siatna hong tung hi. “Na khangno lai na tenpih na zi” cih kammal in (Pau. 5:18), zi le pasal in teek khin uh hi mah taleh tatsat lo-in tua itna tawh nungta thei hi. “A it huai a ngaih baangin ngaihsun den inla, a ngaih banana tawh lungkim in” (Pau. 5:19), ci hi.

          Mawhna tawh kidim mihing in zi le pasal kikaal sungah Pasian’ deihna tawh kituak lo siatna sung a nungta mi tampi om hi. Pasian in mihing sungah ngaihsut theihna, thutheihna hong piak mah bangin mimal khat ciat in ama deihtelna bangin nungta hi. Numei pasal kikaal zia-etna khempeuh a do lo mi in tua bang siatna sung nungta hi. Pasian’ hong geelsak bangin a nungta dingin a khentat mi in tua bang siatna pelh ding hi. Pasian’ hong geelsak bangin a nungta zi le pasal in, siatna a pelh hi bek lo-in, thupha ngah zi le pasal suak uh hi.

          Bangci bangin zi leh pasal kikaal buai-na nei nupa-te in nupa nuam a suah nadingun huh thei ding na hiam?

MONDAY                  April 29

Pa-Te Tungah Thuhilhna

           A nuai-a Lai Siangtho munte in pa/pasal tawh kisai bang hong hilh hiam?

Pau. 13: 22; 27: 23, 24 ____________________________________

Pau. 14:26 _____________________________________________

Pau. 15:1, 18; 16: 32 ______________________________________

Pau. 15:27 _____________________________________________

Pau. 29: 17 ______________________________________________

          Pa/pasal in tate tungah huzaap lianpi nei hi. Ama nunna zui-in tate zong nungta hi. Tate in pa-te tungah lametna lianpi nei uh hi. Pa in tate makaihin, huh, panpih, etteh dingin tate in lamen uh hi. Paunak in innkuan sungah a pil, innkuan sung a kem pa/pasal manphatna pulaak hi. “Thuman lo tawh sum ngahna in innkuan lungkhamsak hi” (Pau. 15:27). Pa/pasal in nasep tuamtuamte sangin a innkuan masak pen ding hi. Pasian a zahtak pasal in lungduai kisin ding a, amah leh amah a ki-uk zo mi hi dingin a hanciam mi hi. Ama tungah tate kingakna thu theitel hi. Tate limtak makaih, pantah, seek thei hi. Ahi zongin tate’ deihtel theihna susia lo hi. Pasian tungah a ki-ap pasal in Pasian’ deih bangin nungta ding lunggulhna nei-in, Ama itna ki-uksak hi. Lai Siangtho siksanin tate makaih hi; thuman thutak sungah tate khansuah hi.

          A tawpkhakna-ah tate in nu a it dingun pa in a hilh ding thupi mahmah hi. Pasal in a zi tungah citakin, itna a neih tawntung ciangin, tua in tate in picing a suah dongin huzaap lianpi nei hi. Paunak hong hilh thute in – Pasian tungah cihtakna, zi le pasal/nupa, innkuan sungah cihtakna in mimal hi taleh kimlepaam khuasak nadingin kisam mahmah hi. Sepna khempeuh matutna in mimal tungah kinga hi. Mawh zolna – numei pasal omkhopna, thadahna, hauhna cihte om hi mah taleh a pil pasal leh zi in khentatna hoih a neih nadingun Pasian tungah kinga uh hi.

          Koi bangin nunna zia hoih thuguipite hong hilh hiam? Koi bangin tate a kipan mite tungah a hoih hi taleh a sia hi taleh huzaap om hiam? Bangci bangin gamtat lukhek kidawm siam ding na hiam?

TUESDAY                  April 30

Itna Tawh Puahpha

          Tate thuhilhna leh kiseekna in thupi hi (Pau. 10:17; 23:13, 14; 29:1. Nulepa in tate seek kul a, gamtat hoihlo zongsatna hoih lote kipuahphat ding kisam hi; gamtat hoih lo-te tai-in, thumang lote tai-hilh kul hi. Innkuan sungah tate tai-hilh tawh kisai Pasian deihna in bang hi ding hiam? Paunak sungah hong hilh bangin, tua bangin kihilhnate in mailamah tate in hoih tak a nuntak nadinguh deihna hi (Pau. 19:18). Pasian a zahtak nulepa in tate in siatna tawh kidim ahihna uh theitel uh hi.  Khrih vangliatna bek in siatna sung pan hong puahpha thei hi (Ellen G. White, Education, 29).  Khristian innkuan khempeuh in tate pantah ding banah Pasian kiangah tate tunpih ding nasep masuan nei hi.

          Singkungno khat zuun kul hi. Khrih in a nungzuite a taihilh ciangin, gim piak ding deihna leh ama thuneihna pulaak hi lo-in, a nunna uh kipuahin hotkhiatna sung a lut nading uh deihna hi.  Itna nei nulepa in siatna vangliatna thei-in Khrih kiangah tate makaih ding kisam hi. Itna tawh kidim nulepa in hehpihna siksanin khialhna, siatnate puahpha-in, tate a neu tung pan mahun zuun ding uh hi. Singkungno khat hoih takin puah a kul mah bangin tate zong picingin, khangto-in Pasian a muantheih matengun vantung huhna tawh mapangin tate pantah ding kisam hi.

          Pau. 13:24; 23: 13, 14 in nulepa bang hong hilh hiam?

          Lai Siangtho sungah tate thuhilhna dingin ciangduai tawh sat cih thupiak tampi kimu lo hi.  Ciangduai in kimakaihna limcing hi. Vantung Tuucing Pa in a Tuute a makaihna-ah ciang zang hi (Late 23: 4). Ciangduai in tate tawh kizopna-ah lungduai-na, tatsat lo-in makaihna, kizopna hoih, kilawmtatna limcing hi (Thkna. 11: 18, 19). Tate in nulepa thuhilhna, seekna a thuak uh ciangin amau hoih nading a nuntakna hotkhiat nading ahihlam a phawktheih nadingun tate in ka nu ka pa in hong it hi, hong deihsak hi, cih lungsim a neih ding uh kisam hi (Pau. 13:24).

          Tate in nulepa taihilhna, seekna a telkhialh uh ciangin koi bangin nulepa in tate tawh kizopna hoih nei thei kik ding hiam?

WEDNESDAY                  May 1

Khatguak Tangteen A Hoih Zaw Nuntakna Hiam?

          Paunak sungah nupa kikaal, innkuan sung lemlohna tuamtuam tawh kisai a pulaak thute khat veivei ciangin nuihzakna piangsak thei hi. Tua bang thute in bang sukha hiam? Pau. 21:9, 19; 27: 15, 16.

________________________________________________________          ___________________________________________________

         

Paunak in khatlekhat kizopna tampi hong hilh hi. Tua thute in muibun mahmah hi. Gentehna-in dahna in lungkham mite kiangah lasakna tawh kibang hi, ci hi (Pau. 25:20).  “mi khat in a vengpa zingkhangpi in aw ngaihtak tawh thupha a piakleh a hamsiatin kisang ding hi” (Pau. 27:14). Hihte siksanin hehna tawh kidim zi khat in pasal tungah bulh ding hi. Zi bek hi lo-in pasal in zong innkuan sung siatna tun hi. Caiaphas leh Annas innkuan sung ngaihsun in.

          A lungdam lungtang in inn sung nuamsak hi. Nuihna in mihing kizopna nuamsak hi. Nuihna in lungzinna, lunggimna tawldamsak hi. “Lungdamna in zatui hoih khat hi-in, ahih hangin lungkhamna in guhtui teepkang hi” (Pau. 17: 22). Nuihna in hehna, lungzinna thengsak thei hi. Ahi zongin thulian, vai thupi-ah ciamnuih hoih lo hi.

          Natna in damlohna khat pulaak hi. Kitot kiselna, lungdam theih lohna, phun phun cihte in innkuan sung hi taleh mihing khatlekhat kizopna susia hi. Tua bang hamsat thuak mi in midang tawh kizop ding hamsa-in ngaihsun hi.  Tua bang ngaihsutna kihemkhia hileh kizopna hoih om kik thei hi. Innkuan sung hi taleh mihing khatlekhat kizopna-ah Topa a itna uh siksan hileh, amaute kisapna huh thei-in kizopna hoih hong om ding a, hehna, thangpaihna cihte bei ding hi.

          Bang hangin innkuan sungah nuihna thupi hiam? Koi bangin nuihna in siatna piangsak thei-in, koi bangin a hoihlam a zang thei ding i hiam?

THURSDAY                         MAY 2

Hauhna Taktak Tawh Kidim Numei

          Paunak tawpna-ah a pil numei thu kigelh hi. A pil numei nunzia bang kigelh hiam? Pau. 31: 10-31.          ___________________________________________________          ___________________________________________________

         

Lakam tawh kigelh a pil numei thu ciapteh huai hi. Hebrew laimal 22 pha-in Pau. 31: 10   31 in laigual kipatna khat ciat in tua Hebrew laimal 22 khat ciat tawh kipan hi. Tua bangin numei pil kipulaak kammalte in mimal khat ading banah mi buppi adingin mannei hi. Nupa hoih tawh kisai Rabbi in “pasal adingin inn nuam in a zi hi” ci hi. “Zi hoih in a pasal minthanna leh lungdamna hi a, a pasal a maizumsak zi in a pasal adingin a dam theilo guh natna tawh kibang hi” (Pau. 12:4). Paunak a tawpna-ah a pil numei ii nunzia kigelh hi: puansilh bawl, inn le lo nei, lo kho, inn sung nasep, sum zeek siamna nei hi.  Innkuan sung limtak kem hi. A innkuanpihte in it-in pahtawi uh hi.

          Numei khempeuh in tua bang hoihna nei lo hi. Pasalte in tua bang hoihna siksanin zi-te tehna-in zang lo ding hi. Paunak in zi hi taleh pasal ading hi taleh nupa khat in neih ding a kilawm thute hong hilh hi zaw hi. Muanhuai-na, hehpihna, belhtaakcinna, cihtakna, hahkatna cihte nuntakpih ding hi. Tua bangin nuntak zawhna ding lampi in Topa kihtakna hi (Pau. 31:30).

          “Zi hoih, a nampi gamtat zi (Pau. 31:10) in hauhna, hatna, sepzawhna pulaak hi. “Zi hoih” cih kammal Late 62: 10 ah hauhna ci-in kizang a, Joshua in “galhangte” ci-in pulaak hi (Joshua 1:14). Boaz in Ruth pen numei gina ci-in pulaak hi (Ruth 3: 11). Pau. 31:10 in a zat hauhna cih kammal in thu tampi huam hi. Hauhna man in gamtat zia le tong, cihtakna, Topa zahtakna hi. Suangmanpha in tua hauhna lei zo lo hi.

          A pil numei kua-te in na nunna zia hong huzaap uh hiam? Koi bangin Pasian a zahtak numei, a manpha numei, numei hoih na pulaak ding hiam?

FRIDAY             MAY 3

Ngaihsutbeh Ding: Vantung mitsuan in. “Khristian thu-um mite in a lungsim limtakin a kep ding kisam hi. Pasian thu ngaihsutna nei-in biakpiakna-ah nuamsakna a neih ding uh kisam hi. Mi tampi in Pasian thu ngaihsun ding, thungen ding, Lai Siangtho sim ding thadah uh hi. Tua bangin Pasian tawh kizopna-in hun zat ding hunte a mawkbei-in ngaihsun uh hi. Pasian deihna bangin a nungta mi in na khempeuhah vantung gam masak hi. Tua bangin vantung mitsuan in a nungta mi in a sepna khempeuhah thupha om ding a, a masuan tangtun ding hi. Vantung thute ngaihsun dingin i lungsim kiseek kul a, tua dingin hanciamna, nuntakna khempeuh piak ding kisam hi….. Eite in vantung thu-ah i khangcing zo nai kei hi. Eph. 4:13. Ellen G. White, The SDA Bible Commentary, vol. 3., 1157.

KIKUP DING DOTNATE

1.      Khristian mi tampi in kipawl khopna tuamtuam (support group network) tungtawnin zia-etna zo thei uh hi. Hih bangin kipawlnate        in bangci-in thunget hun, Lai Siangtho sim hun, Kha Siangtho      tungah kinga ding a khangsak hiam? Khat veivei ciangin zongsatna      hoih lo a kipan zia-etna khat zawh nadingin makaihna, huhna (professional help) kisap hun om hi lo hiam?

2.      Wednesday ni-a dotna sim kik in. Na dawnkikna in bang pulaak hiam? Pasian in a lamdang thupha tampi hong pia-in, koi bangin nuihna, lungdamna cihte in siatna suak thei hiam?

3.      Pau. 31 sung a tawh kituak lo tuhun mihing nunna zia in numei liansak hiam? Koi bangin a hoih lo nate panin kidal ding na hiam?

4.      A huampi-in innkuan tawh kisai Lai Siangtho tawh kituak lo tulai mihing khuasakzia bangte hiam?  Lai Siangtho tawh kituak pupa ngei-na zuih huai a om hiam? Koi bangin tuate in innkuan kipsak hiam?