LESSON 4 April 20 – 26
KHATGUAK OM CIANGIN
Sabbath
Nitak
Tu Kaal Sung Sim Ding: Thna. 4: 9
– 12; Phil. 4:11-13; 1Kor. 7:25 – 34; Matt. 19:8; Pian. 37: 34; Isa. 54: 5.
KAMNGAH:
“Tua ciangin TOPA Pasian in, “Amah bekin mipa a om dingin hoih lo hi. Ama
adingin amah tawh kituak a huh dingin ka bawl sak ding hi,” ci hi (Pian. 2:
18).
A sawt nai lo hun khat lai-in a
lamdang mahmah thupiang khat om hi. Nungak khat a omna inn sungah si hi. Sihna
pen a lamdang hi lo hi. Ahi zongin hih
nungak nu a sih zawh kum 10 khitteh a sihlam kithei pan hi. Tua hi-in mi tampi
in hih bangin a ngaihsut uh pen thuman hi:
“Lampi-ah hi lo, inn sungah misi khat
kum tampi sung kiphawk lo, cih thu in mi tampi omna khuapi hi napi, khatlekhat
kizopna nei lo uh hi. Hih tawh kibang thupiang mun tuamtuamah om hi. Mi tampi
in gimna thuakin kithuahpih ding nei lo uh hi. 2016 kumin New York Times sungah
thupiang khat kipulaak hi: “Kuamah kikholh pih ding nei lo, khat guakin om mi
tam semsem ahihna thu pulaak hi.”
Leitung piancil a kipan mihing in khat
kia-in om dingin Pasian in a hong piansak hi lo hi. Eden a kipan midang tawh
kizopna, kikholhkhopna kisam hi. Ahi zongin mawhna hong lut a kipan nate hoihna
kisia hi. Tu kaal sungin lawmlegual kikholhzia thu leh khat veivei ciangin
lawmlegual neihloh hun kituak kha hi. Ahi zongin tua bang a tuak ngei lo mi na
hihleh mi hampha na hi hi.
SUNDAY April
21
Kilawm Taakna
Thna. 4: 9 -12 sim in. Bang thuguipi
kigelh hiam? A huampi-in bang thu laigil kipulaak hiam?
________________________________________________________
________________________________________________________
Mi
a tamzaw in khat guak om ding ki-ut lo hi. Kikholhpih ding om kei taleh
phamawhsa lo, khat guak om nuamsa mi om kha mah ding hi. Ahi zongin cimawh,
dongtuah, hamsatna khat hong tun ciangin lawmlegual kisam hi. Mi tawh kikhawl
ding, mi tawh kipawl dingin hong kipiangsak hi.
Hamsat hun ciangin innkuan sung hi taleh, mi khatlekhat a kihuh mite in
mi hampha hi.
Ahi zongin pawl sung, nasepna mun,
khua sung tuamtuamte sungah hamsat dongtuah hun hi ta keileh zingsang, nitakin
a hopih ding lawmlegual nei lo mi tampi om hi. Tua bang hun kituak thei hi.
Tangval khat in “hamsa ka sak penpen ni in Sunday ni hi,” ci hi. Kaal khat sung
lawmlegual tawh kithuahpih ding mi om hi. Sabbath ciangin biakinnah pai-in
kikhopna-ah mi tawh kimu thei hi. Ahi zongin Sunday niteh kuamah kikholhpih
ding om lo, ci-in pulaak hi.
Ahih a nuai-a Lai Siangtho munte in
khat guak om ciangin bang hong hilh hiam? Jn. 16: 32, 33; Phil. 4: 11 – 13.
________________________________________________________
________________________________________________________
Pasian
thei hi bek lo-in Amah tawh kikhawlkhawm thei mite i hi hi. Pasian hong ompihna
in hong lungmuangsak hi. Ahi zongin Eden huanah Adam in Pasian tawh
kikhawlkhawm uh hi mah taleh Pasian in “mipa in amah kia-in a om ding hoih lo
hi,” a cih khaktan lo hi (Pian. 2:18). Tua hi-in Pasian in Adam thei-in mawhna
suksiat loh leitungah Adam in Pasian tawh kikhawl hi mah taleh mihing
kikholhpih ding kisam veve hi. Tua ahihleh eite in mi kikholhpih ding i kisam
hi.
I
kim i pamah mi tampi om ahih ciangin kuamah in amah kia bek hi ngei lo ding hi,
ci-in ngaihsut khak ding i kidop ding kisam hi. Khuapi lian sung a om mi tampi
in lawmlegual kikholhpih nei uh hi mah taleh khattang kisa uh hi. Mi tampi
lakah khatkia om thei kenteh ci-in ngaihsun kha kei in. Mihon lakah kikholhpih
ding mi kisam om hi.
Khattang kisa mi, pampaih thuak mi va
theih ding hamsa hi; tua bang mite hopih ding hamsa hi. Bangbang mi hi taleh,
koi bangin amaute tawh kikhawl ding na hiam?
MONDAY April 22
Nungak, Tangval Lai-Te
Nungak khat in pasal nei lo-in a om
hampha a kisakna hih bangin pulaak hi: “Pasian nasepna-ah suakta takin kihel
thei banah hong nawngkai-sak ding bangmah om lo hi,” ci hi. Zi, pasal nei
innkuante ahihleh innkuan, tate ngaihsut kul ahih manin suakta takin nasem thei
lo hi.
Sawltak Paul in zi, pasal nei lo-in
nungak, tangval a om manphatna bang pulaak hiam? 1Kor. 7: 25 – 37.
________________________________________________________ ___________________________________________________________________________________________________________
Zi, pasal nei-in innkuan nei dingin
Pasian in a geel ahi hi. Pasian in, “Mipa in amah kia-in a om ding hoih lo hi,”
ci hi lo hiam? Tua hi mah taleh zi nei lo tangval, pasal nei lo nungak mi tampi
a om banah Jesuh mahmah in zi nei lo hi. Jeremiah in zi nei lo dingin thu kipia
hi (Jer. 16: 1-3). Hih in thukhenna limcing hi. A khua nungah tua thupiak
kikhel leh kikheh lo i thei kei hi. Ahi zongin Jeremiah in kamsang a sep laitakin
tangval hi. Ezekiel in a zi neih thupi hi, ci-in kiciamteh lo hi. A zi si-in kap lo-in a maban zom dingin thu
kipia hi (Eze. 24: 15 – 18). Kamsang Hosea in a zi nusia-in a nasep zom dingin
kisawl hi. Lamdang hi mah taleh a zi in nusia ding hi mah taleh Hosea in numei
kizuak khat tenpih dingin Pasian in sawl hi (Hosea 1-3). Pasian in Israel mite
leh eite a hong itluatna a hong hilhnopna hangin tua bangin thupia hi. Ahi
zongin Hosea adingin na mahmah ding hi.
Hihte in limciinna hi-in nupa thu hi
masa lo hi. Pasian in cihtakna,
thumanna, kipiakzawhna nei ding hong deih hi. Zi, pasal siksanin nunna mannei
kiciangtan lo hi. Tuhun ciangin mi tampi in zi, pasal nei lo mi in mannei lo
hi, ci-in ngaihsun uh hi. Tua bang mite tungah Paul in hih bangin pulaak hi:
“Tua ahih ciangin ute naute aw, a hing biak piakna leh a siangtho Pasian deihna
kituakin na pumpi uh Pasian kiangah na piakna dingun Pasian hehpihna tawh kong
thum hi” (Rom. 12: 1, 2).
Bangci bangin pawl sung pawl pua zi
nei lo, pasal nei lote tungah Pasian nasem ding na hiam?
TUESDAY April 23
Nupa A Kitapkhap Ciang
Gimna, sihna, mawhna hangin siatna
khempeuh lak pan innkuan sung siatna sangin a sia zaw bang om ding hiam? Innkuan
kisia tampi om hi. Buai-na nei lo innkuan a om diam? Nupa kikalah sihna lo
buang kimakna in hamsa pen hi. A kikhen nupa-te lunggim uh hi. Dahna thuak masa
uh hi. Mimal thuakna kibang lo-in, pawl khatte kha tampi, kum tampi lunggim uh
hi. Pawl khatte patauhna tawh kidim uh hi; sum le paai hamsatna, nuntak khuasak
nading lunghimawhna cihte tawh kidim uh hi. Mi pawl khatte khattang omna,
hehna, thangpaihna tawh kidimin mainawtzia ding thei lo uh hi.
A nuai-a Lai Siangthote in nupa kikhen
tawh kisai thuguipi bang pulaak hiam? Mal. 2: 16; Matt. 5:31, 32; 19:8; 1Kor.
7: 11 – 13. ___________________________________________________ ___________________________________________________
Pawlpi in Khrih adingin nasem ahih manin
pawl sung thu-um mite kitangsapnate huhin upna sungah a zungkha zo dingun
pantah ding hi. A diakdiakin innkuan sung buai-na, nupa buai-na hong om ciangin
upna thuman sungah a picing mite a hi dingun makaih kisam hi. Nupa kikal
buai-na, kilemlohna cihte a kipan a kikhen nupate, Pasian kammal siksanin nupa
hoih a suah kik nadingun pawlpi hi taleh pawlpi makaite in panpih ding kisam
hi(Hosea3:1-3;1Kor.7:10,11; 13:4-7; Gal. 6:1).
Tua bang buai-na tuamtuamte lemtuah
dingin pawlpi in hi taleh mimal a hong huh thei ding mite tawh nasepkhop kisam
hi. Tuate in (1). Nupa kiteeng dingte
thusinna (2). Pawlpi in nupa, innkuan kimakaihna thusinna tuamtuam kinei hi.
(3). Innkuansung buai-na neite, nupa kikhente adingin thusinna kinei hi. The
Seventh-day Adventist Church Manual, 19th edition (Nampa, Idaho: Pacific Press
Publishing Association, 2016),161.
Koi bangin nupa kikhente amau mawhna
pulaak lo-in a kilem kik dingun makaih ding na hiam?
WEDNESDAY April 24
Sihna Leh Lungzuanna
Mi khat in hih bangin pulaak hi: sihna
tawh kisai-in mihing sihna leh ganhing khat sihna bang kilamdang hiam? Ganhing
si, mihing zong si hi mah taleng, ganhingte bang lo-in mihing in si ding i
theikhol hi. Hih thu theihtelna in koi bangin nungta ding, i nunna zia huzaap
lianpi nei hi.
I theih mah bangin innkuan a kipan
mihingte khat le khat kizopna khempeuh hong kikhensak in sihna hi. Bang bangin
ki-it kingai-in nungta khawm nuam hi mah lehang, Jesuh hong pai nai keileh,
sihna in mihingte khat le khat hong khen hi. Mawhna om a kipan sihna hong om
hi-in, Jesuh hong pai mateng sihna khawl lo ding hi. Lai Siangtho in Adam maw,
Eve maw kua in si masa zaw hi, cih hong hilh lo hi. Khat nusiat khit nungah a
nungta lai zawzaw in nasa mahmah ding hi. Bang hang hiam cihleh sihna pen a
kipatcil a om hi lo hi. I pulaaksa om bangin Adamte nupa in singteh khat in a kung panin a khiat a muh uhteh dah
mahmah uh hi. Khat in a sihsan bang zahin nasa ding hiam?
Sihna pen a om mah ding hi, ci-in
kingaihsun kha hi. A taktakin sihna a thuak dingin kigeel hi lo hi. Ahi zongin
tuni dongin sihna hangin lunggimna tawh kuamah kipelh lo hi. A nuai-a Lai
Siangtho munte in sihna thu leh koi bangin mihing in sihna a muhzia pulaak
hiam? Isa. 57: 1; Mang. 21:4; 1Thess. 4: 17, 18; Matt. 5:4; 2Sam. 18:33; Pian.
37: 34.
________________________________________________________ ___________________________________________________
Midangte
thuak sihna banah i innkuan sungah sihna kituak ciat kha ding hi. I it penpen
in zong hong nusia khin om kha ding hi. A sawt lo-in sihna, lungzuan khua-ngaihna
i thuak ding hi. Tua bang hun ciangin Pasian kamciamte mitsuan ding kisam hi.
Mawhna dim leitungah a nungta mi i hih manin gimna, sihna simloh i tuah ding
bang dang om hiam?
Koi bangin pawlpi in sihna thuak mite,
lungleng khua-ngai mite huh ding hiam?
THURSDAY April 25
Pawl Sungah A Hong
Tangsuah Mite
Natalie in a pasal tawh a kiteen zawh
kum 7 khitteh a lawm khat in Seventh day Adventistte in Pasian thu tangko-na
mun khatah thungai dingin zawn hi. A zak thute hangin Nalalie kikhelin, a
nuntakna Khrih ap ding khentat hi. A pasal a kipan, a teeknu, veng le paamte in
phal lo hi mah taleh Natalie in Seventh day Adventist thu-um mi hong suak hi. A
upna zui-in a nunna zia zong kikhel hi. Natalie in SDA a suah manin a pasal
lungkim lo-in, “i kiteen dingin hih bang piang dingin ngaihsun lo ka hih manin,
na upna hong zuihpih lo ding hing,” ci hi. Kum tampi sung Natalia in a upna
tawh nungta hi. Pasal nei hi mah taleh upna kibang lo ahih manin pawlpi-ah hong
tangsuah hi (Spiritually single).
Upna thu-ah khatguak kisa mite in koi
bangin lungmuanna ngah ding hiam? Isa. 54: 5; Hosea 2:19, 20; Late 72: 12. ___________________________________________________ ___________________________________________________
Leitung
mun tuamtuamah om i pawlpi sungah Natalie bangin amah guak SDA tangsuah tampi
om hi. Tua bangin SDA a tangsuah mite zi nei khin pasal, pasal nei khin zi hi
kha ding a, tate tawh biakinn pai khawm thei om ding a, amah kia-in kikhawm om
ding hi. A kiteen tung a kipan upna kibang lo hi thei-a, kitencil upna kibang
hi napi kiteen nungah upna kibang nawn lo hi kha thei uh hi. SDA a tangsuah
numei ahi a, pasal a hi zongin amau guak kisa om thei ahih manin, pawlpi in tua
bang mite tawh kizopna, kikholhna hoih limtak a neih ding kisam hi. Innkuanbup
SDA thu-um mite bangin pawl sungah a kihel theih loh uh ciangin lungnuam lo uh
hi. Pawl sung sum donna khat ahi zongin, sep ding khat om ciangin a innkuanpihte
un phal lo, khaktan a thuak uh ciang lungnuam lo uh hi. Zi nei, pasal nei ahih
hangun meigong bangin khatguak kisa uh hi.
Pawl
sungah tua bang mi om kha thei ahih manin tua bang mite huhin panpih ding kisam
hi. Pawlpi in tua bang mite kha-lamah bangci-in huh thei ding hiam?
FRIDAY April 26
Ngaihsutbeh Ding:
Enoch in nisim nasepnate-ah citakin nasemin tatsat lo-in Pasian tawh kizom hi.
Nasep hamsa a tuah ciangin thunget hahkat semsem hi. Mite nuntak bangin nungta
lo-in amah kia-in a om hun zong nei hi. Mite lakah nasemin mite etteh taak cing
suakin, cimawh mite huhin, tawl khat khitteh vantung Pasian kiang pan thuman
thutakte a lunggulhna hangin amah kia gamdaih thungetna hun tampi zang hi.
Pasian tawh a kizopna hong tam ciangin, Pasian zia le tong kilangsak semsem hi.
Jesuh maitang bangin Enoch maitang in vantung khuavak kilangsak hi. Tua bangin
Pasian tawh kizopna nei-in a thungetna pan a hong pusuak ciangin Pasian thei lo
mite in a maitang a muh uh ciangin lamdangsa uh hi.” Ellen G. White, Gospel
Workers, 52.
Enoch ettehin gamdaih thungetna nei
mite in thangah mahmah uh hi. Ahi zongin mi tampi in khat guak gamdai ding a ut
loh uh hangun thu tuamtuam hangin khat guak hihna tawh kidim uh hi. Topa tawh
khatguak gamdai takin kizopna a nuamsa mi tampi in mi tawh kikholhna,
kilawmtatna lunggulh hi. Tua bang mite pawlpi ahih kei-leh mimal in va pak kul
hi. Sabbath kikhop ciangin a gei uhah va tu cihte a kipan va kikholh pihna khat
kisam hi. Ahih keileh nang mahmah in kikholhpih ding nei lo na hihleh nang tawh
hong kilawmta thei ding, hong kikhawl thei ding mite kiangah khatguak na hihna
thei sak in. Mi khat ii maitang suah i muhteh ama lungsim, a kitangsap i thei
zo kei hi. Lungsim sung om thute pua-tham kineihkhemna sel thei hi.
Kikup Ding Dotnate
1. Koi bangin pawlpi mite lakah om hi napi
khatguak kisa mite kisapna huh ding na hiam?
2. “Kisapna ngaihsunin agen ka hi kei hi. Ka
thuaknate-ah ka lungkim nadingin ka kisin khin hi” (Phil. 4:11). Paul in a huampi-in bang pulaak hiam? Koi bangin
lungkim ding na hiam? Ahizongin Phil. 4:
11 siksanin a thuak mi khat aa dingin a thuakna behlap hi lo ding, bang hangin
kidop kul hiam?
3. Khatguak om a khuangaih hunte ngaihsun
in. Bang in hong huh hiam? Bang in hong na-sak hiam? Mi a huh thei
dingin na thuakna in bang hong
huh thei ding hiam?
