LESSON 3 April 13 – 19 KIKHEL DINGIN KIGINKHOLHNA

LESSON 3          April 13 – 19

KIKHEL DINGIN KIGINKHOLHNA

Sabbath Nitak:

Tu Kaal  Sung Sim Ding: 1Kor. 10: 1-13; 13: 4 – 8; 15: 24 – 26; Pian. 2:24; 1Sam. 1:17; Late 71.

KAMNGAH: “Ama mai-a thumaanna pai-a a kalsuan nading lampi a sial kholhsak hi” Late 85:13.

          Nuntakna in kikhelna tawh kidim hi. Na khempeuh kikhel tawntung hi. A kikhel ngei lo khat bek om a, tua in kikhelna mah hi. Kikhelna in i nuntakpih hi. Nate khempeuh zong kikhelna tawh om uh hi. Lamet loh hunin kikhelna hong tung thei hi. I ngei-na bangin kalsuanin lametna loh, tha khatin kikhelna hong om ciangin lungmangin cih nading kithei lo hi.

          Khat veivei ciangin kikhelna hong tung ding i thei khol hi. Gentehna-in zi, pasal nei ding, ta nei ding, kum tam semsem cihte in i nunna sung kikhelna lianpi piangsak hi. Hih bang kikhelnate a hong tun ding i thei khol hi. Tua bangin kikhelna hong tung ding a ma-hial tuamtuamte kimu khol thei hi.  Mihing in khat guakin nungta lo ahih mah bangin tua bang kikhelnate hong tun ciangin innkuan sung huzaap hi. Tua mah bangin innkuan sung kikhelnate in innkuan sung mimal khat ciat hong huzaap hi.

          Tu kaal sungin kikhelna tuamtuamte in innkuan hong huzaap, sukkhakna tuamtuamte i kikum ding hi.

SUNDAY                   April 14

Kigingkhol Lo

          Lai Siangtho in mihing nunna zia awlmawh lo-in om lo hi. Mihing ginatlohna, siatna hong hilh hi. Tua in khat veivei ciangin lungkiatna, gimna hong thuaksak hi. Lai Siangtho patna pan a tawpna dong in mihing siatna hong lak hi. Paul in “mi khempeuh in mawh hi; Pasian tawh kigamla khin uh hi” (Rom. 3: 23) ci-in a pulaak uang lua hi lo hi.

1Kor. 10: 1-13 sim in. Bang vauhilhkholhna leh kamciam bang pulaak hiam?

________________________________________________________          ___________________________________________________

          I gamtatna, nunna zia a tam zaw in kikhelna tuamtuam hangin hong piang khia hi. Tatsat lo-in kikhelna i nawk hi. Khristian thu-um mi khat in upna tawh kalsuan a, bang bang zia-etna a tuak zongin, Topa thupiakte mantakin a pulaak upna tawh tua kikhelna zo thei hi.

          “Leitung in a kitangsap lian pen in, sum tawh kilei thei lo, kizuak thei lo mi, a lungsim tawng dongin thuman thutak tawh kidim mi, ahi bangin mawhna a pulaak ngam mi, a kipia nasepna khatah a lungsim ngaihsutna khempeuh tawh a citak mi, vantung a kia zongin bang bang piang taleh thuman thutak aa dingin a nungta ngam mi hi.” Ellen G. White, Education, 57. Hih thu in nidang Israelte hun a kipan Ellen G. White damlai hun leh tuhun dongin kipden hi.

          A nuai-a mite in kikhelna hangin bang khialhna nei uh hiam? Bangci bangin amau khialhnate pelh ding i hiam?

Sawl. 5: 1-10 __________________________________________________

Pian.16:1,2,5, 6 ________________________________________________

Matt.20: 20 – 22 _______________________________________________

         

          Kikhelna om tawntung hi. Kikhelna hong om ciangin zia-etna, hamsatna, khat veivei ciangin lau-na tawh hong ton hi.  Tua hi-in Kha Siangtho galvante tawh kidim ding thupi mahmah hi. Bang bang kikhelna hi taleh i thei khol a, i thei khol kei zongin tuate in i nuntakpih hi. Kimu thei hi taleh a kimu thei lo hi taleh a hong tung ding kikhelna khempeuh aa dingin kiginkholh tawntung ding kisam hi.

MONDAY                     April 15

Zi Nei, Pasal Nei Dingin Kiginkholhna

         

          Nuntakna sungah kikhelna lian mahmah khat in pasal neihna, zi neihna hi. Numei khempeuh in pasal nei hi lo hi. Pasal khempeuh zi nei hi lo hi. Etteh huai penpen Jesuh in zi nei lo hi. Tua bang mahin Lai Siangtho sung mi tampi in zi nei lo, pasal nei lo om hi. Ahi zongin mi tampi mah in zi nei, pasal nei hi. Lai Siangtho in zi neih, pasal neih tawh kisai limtak hong hilh hi.  Kigawm a nupa suahna a pulaak masa pen in Lai Siangtho hi. Pasian in nupa suahna in thupi-sa hi. Tua manin Lai Siangtho sungah Eden huan a nupa suahna kammal kibangin thum vei pulaak hi. “Pasal in a nu le a pa nusia-in a zi tawh kigawm a, amaute gel pum khat ahi uh hi’ (Pian. 2: 24; Matt. 19: 5; Mk. 10:7; Eph. 5: 31).

          Nupa suah khit ciangin zi le pasal in midang tawh kizopna sangin amaute kizopna thupi ngaihsut ding kisam hi. Zi leh pasal kipumkhatna in Pa Pasian, Jesuh leh pawlpi (mo) leh a mite kizopna limcing hi (Eph. 5: 32).

          Inn lam ding mi khat peuh in a beizah ding a ngaihsut masak ding kisam hi (Lk. 14: 28 – 30). Tua ahihleh innkuan kipatna dingin limtak geelkholh, ngaihsutna kisam mahmah lo ding hiam? Sing, suang, sik, leisek leh nate tawh inn kilam hi. Ahi zongin innkuan in nate kilam lo hi.

          I nuntakna-ah a manpha thute mah nupa suahna dingin kiginkholhna-ah kisam hi. Tua kiginkholhna-ah bang thupi hiam? 1Kor. 13: 4 – 8; Gal. 5: 22, 23.

________________________________________________________

          ___________________________________________________

          Zi nei, pasal nei dingin kiginkholhna-ah mimal kiginkholh ding thupi pen hi. Tua banah mailam hunah ka zi, ka pasal in ka kituahpih ahi ding hiam cihte ngaihsut ding kisam hi. Nasep a hahkat mi hiam? (Pau. 24: 30-34); a lungtom mi hiam? (Pau. 22: 24) Upna kibatpih mi hi hiam? (2Kor. 6: 14, 15). Ka innkuanpihte, lawmlegualte in bangci hong ngaihsutpih uh hiam (Pau. 11:14); upna siksan maw, lawpna siksan (Pau. 3: 5, 6) cihte ngaihsut ding kisam hi. Hih thute in nuamna maw, lunggimna hong khentel ding hi.

          Nupa nuam innkuan ngaihsun in. Khat le khat kizopna-ah bang thute siksan ding kisam hiam?

TUESDAY                            April 16

Ta Nei Ding Kiginkholhna

          Ta neihna simloh nunna zia hong kilamdangsak tam khol lo ding hi. Ta neih a kipan inn sung khua-sakna zia kibang thei nawn lo hi. “ Mi khat in a khangno lai-in a neih tate pen galhang pa’ khut sunga a om a thaltangte tawh kibang hi. A thallawng dimin tua bang thaltang a nei pa mi lungdam ahi hi. Amah guallel ngei lo ding a, zahhuai ngei lo ding hi” (Late 127: 4,5). Ahi zongin tate in Lai Siangtho hilh bangin gamta lo-in, nulepa zahtak lo-in, kem lo, don nuam lo, nuntak khua-sak a siam lo tanu tapa tampi om hi. Tate’ gamtat zia le tong, kampau leh a lungsim puak hangin picingkhin nulepa gimthuak tampi om hi. Zi nei, pasal nei ding kiginkholh a thupi mah bangin nulepa in tate makaih dingin vaipuak lianpi nei ahih manun kiginkholh kisam hi.

          Ahi zongin a nuai-a nausuak thute in tate pantah zia ding tawh kisai bang thuman guipi hong hilh hiam? 1Sam. 1: 27; Thkna. 13:7; Lk. 1:6, 13 – 17, 39 – 45, 46 – 55, 76 – 79.

________________________________________________________

          ___________________________________________________

          Nulepa in masuan lianpi leh hamphatna lianpi nei hi. Papi thum in Israel kamsangte leh makaipi pianna hong suak hi. Amaute lak pan khat in Messiah piankhiatna hong suak hi. A tate khat in Khrih hong suak hi. Hi mah taleh i tate in kamsang suak ding hi pah kei zongin, amau nunzia kikhel ding makaih kisam hi. “Tate a hong suah ma-in leitung siatna a zawh nadingin kiginkholh ding thupi mahmah hi. Naungek in a hong suahkhiatma-in a nu in si le sa deihna zui-in angsung khualna nei, lungtomin, zongsatna hoih lo tawh a kidim manin, naungek a hong suah ciangin siatna tawh hong suakkhawm hi. Tua hi-in a kizo thei lo siatna gamh bangin hong ngah hi.” Ellen G. White, The Adventist Home, 256.

Tate makaih ding masuan leh mi tawh kizopna ah masuan nei i hihleh Pasian deihna tawh kizui-in bangci kalsuan ding na hiam?

WEDNESDAY                     April 17

Khangham Hun Aa Ding Kiginkholhna

          “Kote’ nuntak sung kum sawmsagih bang hi a, cidam le-ung kum sawmgiat bang hithei hi. Ahih hangin tua hunsung nangawn gimna le haksatna hi a, tua hunte bei pakin kote ka maimang uh hi” (Late 90: 10). Hih Moses kammalte in a bei-lam manawh i nuntakna hong hilh hi. Kum cingto-in i kum hong tam semsemin pumpi zong kikhel hi. Samte hong kaangin, sampulh hong kipan pan hi. I pumpi hatna hong kiamkiam a, nisimin natna leh gimna hong kibehlap toto hi. Zi nei, pasal nei khinin tanu tapa nei na hihleh, tu nei-in, tu-sawn dong a mu thei ding na hi hi. Khangno thahatnate in uham aa dingin hong kigingkholsak thei hi.

          Late 71 sim in. Hih in teeknung guai-nung aa ding kiginkholh ding a hong hilh banah nunna zia ding bang hong hilh hiam?

________________________________________________________

________________________________________________________

          Late 71 in uham mi khat in a nuntakna-ah a phutkhak hamsatnate om taleh lungnuam thei hi. Bang hang hiam cihleh Pasian sungah muanna nei hi. Khangham khitteh khangcing takin i nuntak nadingin khangno hun a kipan kiginkholh ding kisam hi. Late 71 a gelhpa in a nuai-a thu thum pulaak hi.

          1.Pasian tawh mimal kizopna thuktakin nei ding kisam hi. Khangno hun a kipan (Late 71: 17), Pasian in ama bukna kulhpi hi (Late 71: 1, 7); Ama Honpa hi (Late 71:2). Pasian in Suangpi leh kulhpi (Late 71:3) leh ama lamet leh lungmuanna hi (Late 71:5). Tua banah a vanglian Pasian’ nasepnate zong pulaak hi (Late 71: 16, 17); Ama hatna leh a zawhna (Late 71:18) leh Pasian sep na lian khempeuh pulaak hi (Late 71:19). A tawpna-ah “Topa Pasian aw, Nang tawh kibang kuamah om lo hi,” (Late 71: 19). Nisim Pasian tawh kizopna, Ama Kammalte lungngai tawntungin, eite aa ding a sepnate khempeuh mitsuan hi lehang Amah tawh kizopna kip semsem ding hi.

          2.Gamtat zialetong hoih kisin in. Cidam nading annekna, exercise bawlna, tui dawnna, nitang, huih siangtho cihte a kipan tawlngakna in pumpi lungsim cidamsakin nuntak nuamsak hi. Topa muanna (Late 71: 3); phatna lasakna (Late 71: 6); leh lametna tawh nungta ding (Late 71:4) kisam mahmah hi.

          3.Pasian na sem ding vei-na nei in.  Late laigelhpa in teeknungah tawlngak ding bek lamen lo hi. A teek nungah tatsat lo-in Topa min phat ding lunggulh hi (Late 71:8); Ama hoihna pulaak tawntung nuam hi (Late 71: 15 – 18).

          Uham khinte in uhamna hangin hamphatna bang nei uh hiam?  Na khangno hun lai-a na phawk khakloh thute tu-in nang sangin a moi zaw-te tungah na pulaak ding a om hiam?

THURSDAY                           April 18

 Si Dingin Kiginkholhna

          Khrih hong pai ciang a nungta lai ding i hih keileh a si ding vive i hi hi. Nunna pan sihna zong kikhelna khat hi. Nupa suahna, ta neihnate in kikhelna hi mah taleh, sihna sangin kikhelna lianpi piangsak a dang bang om hiam?

          1Kor. 15: 24 – 26 sim in. Sihna thu bang hong hilh hiam?          ___________________________________________________          ___________________________________________________

         

Sihna tampi in upmawhloh laitakin hong tung hi. Pasal, numei, naupang in lupna pan zingsang tho-in nitum ma-in bangzah in sihna thuak hiam? Tatsat lo-in upna nei-in nisimin Topa’ dikna puan bangin silh tawntung lehang, tua sangin a hoih zaw sih ding kiginkholhna a dang om lo hi (Rom. 3: 22). Ahi zongin lamkhat panin nuntak hun tawm sung bek nei lai mi khat tawh kiho ding hi lecin bang na gen ding hiam? Sih hun ding a thei khol kuamah om lo hi. Ahi zongin a si ding mihing i hihlam i kithei hi. Tua hi-in a kiphel thei lo sihna aa dingin kiginkholh kisam mahmah hi lo hiam?

          David in a tapa Solomon tungah a pulaak thute 1Kum. 2: 1-4 sim in. Sihna ding kiginkholhna tawh kisai mimal aa ding leh innkuanpih aa ding bang thu na mu hiam?

________________________________________________________

          ___________________________________________________

         

          David in Uriah’ zi tawh a mawh khitteh Uriah sih ding vaihawm hi. Tua khitteh a tapa Solomon tungah Topa lampi zui dingin hilh hi. Tua bang mawhna hangin a thuak gimnate khitteh David kammalte in vanglian mahmah hi. A tapa Solomon in tua bang siatna sung a tun khak loh nadingin David in hilh khol hi kha ding hi. David in mawhna a siathuai-na teltakin thei hi. Tua hangin a tapa in tua bang gimnate a tuah khak loh ding deih hi.

FRIDAY            April 19

Ngaihsutbeh Ding: Sehnel gamah a khualzin Israel mite’ thuak gimnate ngaihsun lehang, bang bangin Pasian in a vangliatna kilangsakin, amaute makaih hi mah taleh, amaute in mawhna khat khit khat tawh kidim uh hi. Israelte in Kamciam Gam a lut ma-un Moses in amaute nunzia ding hih bangin hilh hi: “Na mit un Baalpeor-ah TOPA’ hihna mu khin hi; bang hang hiam cihleh na Pasian un note’ lak panin Peor- a Baal a zui mi khempeuh susia a, ahih hangin TOPA na Pasian uh a lenkipte khempeuh tuni-in na hinglai uh hi. En un, note in na luah dingin na lutna uh gam sungah na zuih dingun TOPA ka Pasian in kei hong thupiak bangin thukhamte le ngeina kipte kong hilh khinzo hi.

Tuate zui unla, sem un; bang hang hiam cihleh hih thukhamte khempeuh a zak uh ciangin, hih minam liante pen a pil thuthei taktak hi,” a ci ding uh mite’muhna –ah hih thu pen nomau’ pilna le nomau’ theihna hi ding hi. Bang hang hiam cihleh eite in TOPA i sap hun simin eite’ kiangah i Pasian hong nai zahin tua bang pasian a nei minam lian koi-ah om ahi hiam? Tuni-in note kong hilh thute bangin thukham le ngeina kip a man a nei minam lian koi-ah om ahi hiam? Na muhsa uh nate na nuntak sungun mangngilh kha-in na lungsim panun na paihkhiat khak ding uh limtakin ngaih sunin, pha takin kem un” (Thkna. 4: 3-9).

          Pasian in ei ading a sep khempeuh mangngilh loh ding thupi mahmah hi lo hiam? Tua thute mangngilh loh nadingin mite leh khangsawn tate tungah hilhna sangin hoih zaw lampi dang bang om ding hiam? Hih munah innkuan a thupi-na hong phawk sak hi. Peor munah Israel mite mawhna in innkuan sung kisiatna piangsak hi. “ Israel mite in kikhaalna nei lo-in amau ut bangin uangtatna hangin Pasian in amaute thukhen hi. Numeite maingalna in Baal-peor mun tawh bei lo hi” Ellen G. White, The Adventist Home, 326.

Kikup Ding Dotnate

1.      I nuntakna-ah kiginkholhna lianpi tawh kisai, gentehna-in zi nei ding, pasal nei ding, ta nei ding, piteek, puteek hun ding a kipan a tuamtuamte ngaihsun in. Koi bangin kikhelna tuamtuamte in innkuan huzaap, sukha hiam? Koi bangin nangma tuahkhak thute in midangte huh thei ding hiam?

2.      Solomon tungah David’ thuhilh ngaihsun in. David in Bethsheba tawh   a mawhna hangin a innkuan sungah siatna tung hi. Koi bangin siatnate lakah Pasian’ hehpihna in nasem hiam?