LESSON 2 April 6 – 12
I DEIHTEL THUTE
Sabbath Nitak
Tu Kaal Sung Sim Ding: Eph. 1: 1-4;
Matt. 22: 35 – 37; Pau. 18:24; 1Kor. 15: 33; Thna. 2: 1-11.
KAMNGAH:
“Topa’ na na sepnop kei uhleh Gun galkhat a a na nasepsak uh na pu na pate uh
pasian ahi a, note’tenna gam Amor mite’ pasian ahi zongin, a na na sepsak ding
peuhpeuh uh tuni-in teel un. Ahih hangin kei leh ka innkuanpihte in ahihleh
Topa’ na ka sem ding uh hi,” a ci hi (Joshua 24: 15).
I nuntakna in deihtelna tawh kidim hi
lo hiam? Zingsang i thawh a kipan nitak i lupkik dong i gamtatna khempeuh in
mimal khensatna bangin a gamta i hi hi. I khensat thu pawlkhatte deihtelna tawh
i khensat hi mah taleh ngaihsun kha lo-in kikhensat kha zel hi. Ei mimal aa
ding banah innkuanpihte aa dingin i khentatna pawlkhat thupi lua lo a om mah
bangin nunna hong kilamdangsak, tawntung kimang ding nunzia hong khel khentatna
i neih hun om hi. Khentatna khat peuh in mimal bek hi lo, innkuan sung zong
hong huzaap ahih manin khentatna in thupi mahmah hi.
Khentatna kisikkik na nei hiam? Hun
khatlai-a khentat khialhna hangin tu-in a gah na nuntakpih hiam? Bangbangin
khial kha mah lecin, lametna om lai hi; mawhmai-sakna om hi. Hotkhiatna omlai
hi. Damna omlai hi.
Tu kaal sungin khentatna tawh kisai
thute, mimal hi taleh innkuan hi taleh khentatna khat in huzaap lianpi nei hi.
SUNDAY April 7
Suakta Takin Deihteel
Theihna
Mi kimkhat in, “Pasian in mihingte a
suahma nangawnin tawntung nunna ngah ding leh tawntung siatna ngah ding mi khen
khin hi.” Tawntung siatna ngah ding mi khat in bang hangin siatna sung tung
ding hiam cihleh tua mi in siatna sung tung dingin Pasian in Ama pilna tawh
bawl khin hi, ci uh hi. A khiatna in mi khat in bang bang a khentat zongin
siatna tung vive ding hi, ci uh hi.
Ahi zongin Seventh-day Adventist in
tua bangin i um kei hi. Leitung kipiansakma-in Pasian in mi khempeuh honkhia
dingin hong teel khin hi. Amah tawh
tawntung nunna sungah nuamsa dingin hong bawl hi, ci-in i um hi.
Eph. 1: 1-4; Titus 1:1, 2; 2Tim. 1:
8,9 sim in. Pasian ii hong teel mi
ihihna bang pulaak hiam? Bang hunin Pasian in eite hong teel hiam?
________________________________________________________ ___________________________________________________
Mi
khempeuh in hotkhiat ngah thei dingin Pasian in hong bawl hi mah taleh mi
pawlkhat mangthang veve ding uh hi (Matt. 25: 41). Bang hang hiam cihleh Pasian in mi khempeuh
honkhia ding ama deihna hi mah taleh mihing a hong piak a manpha mahmah deihteel theihna hangin mi tampi in kisiatna
thuak ding uh hi.
Matt. 22: 35 – 37 in deihteel theihna
bang pulaak hiam? ___________________________________________________ ___________________________________________________
Topa
in Amah a it dingin thatang hatna tawh mihing hong sawl lo hi. Mite’ itna i
deihleh midangte it ding kisam hi. Lai Siangtho hong hilh thu bulpi in Pasian
in a mangthang ding mite hong zong, hong
honin, Ama hatna zang lo-in, Amah a it thei dingin mihing lungsim hong zo hi. Hih thu Jesuh nunna khempeuh in pulaak
hi. Mi tampi in amau deihteelna tawh Jesuh nung zui uh hi. Mimal deihteelna
tawh Ama nungzui ciat uh hi. Mi tampi in Ama kiang zuan uh hi. Mi tampi in a
sih ding deih uh hi.
Pasian in hotkhiatna sung a om dingin
hong teel hi. Ahi zongin a tawpkhakna-ah tua hotkhiatna deihin a teel lo mi in,
tawntung siatna sung tung ding hi. Hotkhiatna sungah a nungta dingin i khentat
ciangin mimal hi taleh innkuanpihte tungah tua deihteel khentatna in huzaap
lianpi nei hi.
MONDAY April 8
A Thuman Deihteelnate
Deihteel a thupi-na i thei kimciat hi.
Deihteel khialhna hangin eimah in hi taleh midang tungah gimna, siatnate kituak
hi, ci-in zong i thei hi. Tua hi-in i ngaihsut dingin koi bangin deihteelna
hoih nei ding i hiam? Hih a nuai-a thute in deihteelna maan a nei dingin hong
huh ding hi.
1Thess.
5: 17; James 1:5 ______________________________
______________________________________________________
Isa.
1:19; Matt. 7: 24, 25 ____________________________________
______________________________________________________
Late
119: 105; 2Tim. 3:16 ___________________________________
______________________________________________________
Pau.
3: 5, 6; Isa. 58: 11 _____________________________________
______________________________________________________
Pau. 15:22; 24:6 ________________________________________
______________________________________________________
A thupi khentatna khat i neihma-in
Topa tungah ki-ap a thunget ding kisam mahmah hi. Tua khentatnate in Topa
Thukham, Lai Siangtho tawh kituak lo, a langpan khentatna ahi lo ding thupi
mahmah hi. Topa i muan ding bangzahin thupi a, i deihnate khempeuh Ama i ap
ding kisam mahmah hi. I khentatna, deihteelna khempeuh in Ama min a than
nadingin thunget kisam hi. Tua lo-in mihing deihteel, khentatnate in Pasian
tawh kigamlatna suak thei hi. Khentatna khat i neih ma-in Pasian a zahtak mi
khat in hong huh thei ding hi. A tawpkhakna-ah Pasian muangin, Ama tungah ki-ap
lehang Pasian in ei aa dingin na khempeuh a hoihin sem hi, ci-in lungmuanna i
nei thei ding a, i khentatna tungtawnin Topa upna tawh i kalsuan thei hi.
A thupi khentatna khat na neih ciangin
koi bangin na khentat hiam? Tua bang khentatnate-ah Topa na kimakaihsak hiam?
TUESDAY April 9
Lawm Dingte Teelna
A thupi mahmah deihteelna tuamtuam
lakah kikholhpih ding lawm teelna zong kihel hi. A tamzaw lawm ding i teel khol
kei hi. Mi khat tawh nasepna kibangin, kiho, kithuahna tungtawnin lawmta bangin
kingaihsun hi.
Pau. 12: 26; 17:17; 18:24 in lawm
kikholhna tawh kisai bang thuguipi hong hilh hiam?
________________________________________________________
___________________________________________________
Lawm
i deihleh mi tawh kikhawl theih ding kisam hi (Pau. 18:24). Mi kimkhat in
kikholhlawm nei lo uh hi. Bang hang hiam cihleh mite ama kiang ut lo uh hi
lo-in, a gamtat, ngaihsutna in ama kiang pan mite hawlkhia hi. “Mi lungsim hoih
khatin i muhte in zong a deihhuai lo gamtat zia le tong tawh kipelh lo uh hi.
Kikholhpih ding lawm i teel ciangin i kicinlohnate hong theih uh ciangin, hong
taisan ding mite i teel loh ding thupi hi. Kikholhna-ah thuakzawhna, picinna
kisam hi. Kicinlohna tuamtuamte awlmawhlo hi lo-in khat le khat kizahtakin,
ki-it ding kisam mahmah hi. Tua in Khrih lungsim bang neihna hi. Kiniamkhiatna
nei-in, kiphatsakna hepkhiat ding kisam hi. Khat ii khialhna maisak ding kisam
hi. Tua bang lungsim in huaiham angsung zonna si-sakin, citna tawh nuntakna
hi.” Ellen G. White, Pastoral Ministry, 95.
Mi tampi in i theih lawmta kikholhna
David leh Jonathan kikholhna hi. Israel mite’ kumpi masa, Jonathan pa Saul in
thumanin gamta-in thumang hi lo hileh kum tampi sung kumpi hi ding hi. Ama
khitah a tapa Jonathan in a kumpi tokhom luah ding hi. Ahi zongin Saul in Pasian’ sapna bangin
nungta lo ahih manin Israel kumpi dingin David kiteel hi. A tapa Jonathan in
kumpi tokhom tung a tuttheih nading lampi om nawn lo hi. Saul in ama khentat
khialhna hangin a tapa Jonathan innkuan dong sukha hi. Deihteel khialhna hangin
innkuan sung huzaap lianpi nei ahihlam kimu hi.
Ahi zongin Jonathan in David tungah
heh lo hi; haza lo hi. A pa Saul’ hehna in David a suksiat loh nadingin David panpih
zaw hi. “David in Saul a hopih khit ciangin Jonathan leh David lungsim kikhat
uh a, amah zahin a it hi” (1Sam. 18:1). Bang zahin kilawmtatna in vanglian
hiam?
“Mi khemsa-in om kei un; kikholhpih
hoih lo-in tatzia hoih siasak hi” (1Kor. 15: 33). Lawmlegual tawh na kituahnate
ngaihsun in. Lawm hoih dingin na ngaihsut hi napi lawm hoih lo hong suak na
tuak ngei hiam? Koi bangin lawmteel khialhna in inn sung siatna tun hiam?
WEDNESDAY April
10
Nupa Khoppih Ding Teelsa
Limtak ngaihsutna tawh lawm ding teel
i hih ciangin zi/pasal ding teel ciangin limtak teel ding kisam mahmah hi. Adam
hampha mahmah hi. Bang hang hiam cihleh Ama sung panin Pasian in Ama khut
mahmah tawh a zi ding bawlsak hi. Eve in Adam aa dingin zi hi banah a kicing
numei hong suak hi. Amau nunga a nungta eite in kicin lohna tawh kidim hi mah
lehang, i teel ding mi tampi lakah i zi ding, i pasal ding i teel hi. Hih thu
hangin khentatna in thupi mahmah hi.
Pasian in i nunna zia ding lampi hong hilh lo-in a om kei hi. Khentatna
khat a om ding ciangin Monday ni a thusinna a om bangin limtak ngaihsut ding
kisam hi. (Zi, pasal teelna-ah ngaihsut ding thute Lesson 6 sungah i kikum ding
hi). Topa nasem dingin khentatna zomah
zi, pasal ding khentatna in a thupi pen hi.
A nuai-a Lai Siangthote in zi, pasal
ding teelna-ah bang hong hilh hiam? Late 37: 27; 119: 97; 1Kor. 15:33; James 1:
23- 25. ___________________________________________________ ___________________________________________________
Nuntakpih ding zi, pasal a thupi mah
bangin ei mahmah mi hoih ahi ding kisam masa hi. “Tua ahih ciangin midangte in
na tungah hong bawl ding na deih bangin mi tungah bawl in” (Matt. 7:12). Na zi,
na pasal in nang aa dingin mi hoih mah mah hi mah taleh nang mahmah mi hoih na
hih keileh nupa kaal buai-na hong om ding hi. Hih pen a lamdang hi lo hi. Nupa
kaal bek hi lo-in, mihing nunna a huampi-in en lehang buai-na tawh kidim hi.
Paul in Rome pawlpi a laikhakin ah mi a mawhsakte in mawhna bawl mi ahihlam uh
pulaak hi. Jesuh in zong “na mit a singluang hemkhia masa lo-in bang hangin
mite mit a om niin laksak ding hanciam na hi uh hiam? ci-in hong hilh hi (Matt.
7:3)
Nang mahmah in na neihloh zialetong,
na zi, na pasal a kipan midangte in nei dingin na lamen hiam? Ngaihsun in.
THURSDAY April 11
Pilsinna Teel
Bang sem ding, bang hih ding ci-in khentat hun
i nei hi. Mi a tamzaw in sum ngahna nasep kiteel zaw hi. Khat veivei ciangin
sep ding, bawl ding masuan ei deih bangin teel theih om lo thei hi. Ahi zongin
Jesuh sungah hotkhiat mi i suahna bulphuhin khentatna khempeuh in mannei,
khiatna nei hi. I nasep in Pasian min a thangsak ding nasep ahih ding kisam hi.
Solomon in bang teel khial hiam? Koi
bangin ama khentatnate pelh ding na hiam? Thna. 2: 1- 11.
________________________________________________________
________________________________________________________
Solomon
bangin hauhna, liatna nei kei taleng, ama khialh bangin i khial kha thei ding
hi. “ Sum deihluatna in siatna namkim piangsak hi. Mi pawlkhat in sum deihlua
liang uh ahih manin a upna panun pialkhia-in gimna lungkhamna tampi a thuaklawh
uh hi” (1Tim. 6: 10). Sumhau mi mah bangin mi zawng khat in zong sum itna tawh
kipelh lo hi.
Mi khempeuh in nuntak nading nasep
kisam hi. I nasep, sum ngahna tam, a tawm hi lo-in, hauhna pen a thupi penin
koih a, milim i suahsak loh ding kisam hi. Sum, hauhna bek mitsuanin nasep tawh
a hun bei-sakin a zi, a tate pantah lo, a innkuan sung thu a makaih lo pasal/pa
tampi om hi. Pa/pasal tawh kikholhkhopna nei lo zi a kipan tate bangzah in
hamsiatna thuak hiam? Mi tampi in hauhna sangin innkuan sung khat le khat
ki-it, kituahna manpha-sa zaw uh hi.
Pasian in leitung piancil a kipan
mihing in nasem dingin a na geelkholhsa hi (Pian. 2:15). Ahi zongin i
nuntakna-ah nasep a thupi pen, a bulpi penin ngaihsut khak ding lauhuai a,
kidop kul hi. Tua bangin nasep bulpi-in a koih mi in hauhna bek mitsuan hi. Hih
in Solomon khialhna lian pen hi. Solomon in hauhna, minthante in nuntak mannei
dingin ngaihsun hi. Tua-te in nopna a piak theih hangin a tawpkhakna-ah na
khempeuh in a mawkna hi, ci-in pulaak hi.
Mi khat in: “Mi bangzahin zi le tate
tawh hun beisak sangin nasepna-ah hun bei-sak ding lunggulh zaw uh hiam? ci-in
pulaak hi. Hih in bang hong hilh hiam?
FRIDAY April 12
Ngaihsutbeh
Ding: Mihing in dehteel theihna nei hi, ci-in Lai Siangtho in hong hilh hi.
Adam leh Eve in mawhna sung a tunma-in (Pian. 3) deihteel theihna nei uh hi.
Tua deihteelna zang khial uh ahih manun mimawh hong suak uh hi. Mawh nei lo
Adam a kipan vantungmite in deihteel na zangkhial uh ahihleh, mawhna tawh kidim
eite khempeuh in siatna teel ding baihzaw lo ding hiam? I phawk ding thu in
bang bang siatna tawh kidim hi phial mah lehang siatna teel ding hi tuan lo hi.
Vanglian Pasian hong makaihna tawh Ama hong piak deihteel theihna, a hoihlam na
zang thei hi. Tua hi-in khentatna khat in huzaap lianpi nei hi. Cain in ama
khentatna tawh a sanggam pa a thahna hangin a innkuan sung in siatna tawh hong
kidim hi. Sal a zuak dingin Joseph sanggamte’ khentatna in Joseph a kipan a
innkuan sung a kipan pa lunggimna lianpi hong suak hi. A pa in “Hih puan in ka
tapa puan hi lo hiam? Gamsa-te in petlum hi,” ci-in a dahna pulaak hi. Joseph in a nuntakna-ah balzanna thuak mah
hi.
Tua ciangin Jacob in a puan balkekin
tung-ip silh a, a tapa hangin ni tampi sung kap hi. A tate leh a tanu khempeuh
in Jacob hehnem uh hi. Ahi zongin a hehnep ding uh nialin, “ka thuum kawmkawmin
zan lam zuanin ka tapa kiang ka pai ding hi,” ci-in a kap hi (Pian. 38: 33-
35). Lai Siangtho sung mihing in
deihteel khialhna hangin innkuan sung buai-nate kimu thei hi. Korah, Dathan leh
Abiram a kipan siatna a teel mite in siatna ngahin, a hoih a teel mite in thu
hoih ngah uh hi (Gam. 16: 1- 32; Dan. 6: 23, 24; Pian. 18: 19).
Kikup
Ding Dotnate
1. Tu-in bang deihteel na nei hiam? Tua in na
nunna zia, Pasian leh mi tawh na kizopna bang pulaak hiam? Na khentatnate na
khelkik nop a om hiam?
2. Lai Siangtho sunga mi siangthote in zong
deihteelna zang khial kha uh hi. Amau tung panin bang thu na mu hiam? Koi
bangin amaute deihteel khialhna in a innkuan sung susia hiam?
3. Deihteel khialhna kimkhat i kisik om hi.
Bang hangin tua bang hun ciangin
hotkhiatna thu in eite lungdamna thu hong suak hiam? Deihteel khialhna hangin
gimna, gentheihnate lak pan bang Lai Siangtho kamciam na nuntakpih hiam?
4. Zi nei ding, pasal nei ding mi khat na kiangah
hong pai-in a makaih ding hi lecin, bang ci bangin na makaih diam? Bang
hang? Lai Siangtho sung pan bang thu
guipi siksanin khentatna lianpi a nei ding mi khat huh ding na hiam?
