LESSON 6 Feb. 2 – 8
Pasian’ Mite Kiciapteh
Sabbath Nitak:
Tu Kaal
Sung Sim Ding: Mang. 7: 2Pet. 3: 9 – 14; 14: 4, 5, 12; 17:5; Thkna. 8: 11- 17;
Rom. 3: 19 – 23.
KAMNGAH: “Tua mite in
gimna lianpi sung pan hong pusuakkhia mi ahi uh hi. Amau puante zong Tuuno’
sisan tawh kisawp siang a, a kipaaksak uh hi. Mang. 7: 14.
Ciaptehna sagihte in Khrih a um, Ama tung a citak mite in
thupha ngah ding a, Ama tung a citak lo mite in gimna thuak ding hi, ci-in
pulaak uh hi. Ciaptehna 1- 4 in Pasian in Amah
tawh kizopna gina lo mite gim a piakna panin gualzawhna ngahna thu
pulaak hi. Hih leitungah Pasian’ mite in hotkhiatna thu a nial mite’ nengnemna,
thuman lo-in gamtatnate thuak uh hi. Ciaptehna gukna a kihon ciangin Pasian in a
mite tungah gimna a pia mite thukkik dingin kigingkhol ahihna pulaak hi.
Ciaptehna gukna in Khrih hong pai kikna
pulaak hi. Mimawhte in thukhenna thuak ding uh hi. Mang. 7 in Khrih hong pai
ciangin Amah a dawn ding mite kiciapteh khin hi, cih hong hilh hi. A kiciamteh
khin mite’ nunna zia Mang. 14: 1-5 in pulaak hi. Pengkul gukna leh sagihna
kikaalah thupiang dingte leh Mang. 7 sunga thute kibang hi. Tua in hun nunung a
Pasian mite’ thuakkhak thute leh amaute nasep pulaak hi.
SUNDAY Feb 3
HUIHTE KILEN CIPLAI
Mang. 7: 1-3; 2Pet. 3: 9- 14 sim in. John in bang mu hiam?
Vantungmite in bang hun ciangdong huih lenciplai ding uh hiam? Ciaptehna kizawh
siang khit ciangin bang piang ding hiam?
____________________________________________________________
___________________________________________________________________
Thuciam Lui sungah huih in siatna, sihna limcing hi. Huih
in Pasian in Amah a langpang mite tungah gimna
limcing hi (Jer. 23: 19, 20). Huih in mawhna kisik lo mite in, Jesuh hong
pai madeuhin a thuak ding uh gimna nam sagihte limcing hi (Mang. 16). Ahi zongin Pasian’ mite kiciapteh kizo nai lo
ahih manin Pasian in hih siatnate tungsak nai lo uh hi.
Nidanglai-in ciaptehna a kigen ciangin neihsa tawh kisai
hi. Thuciam Thak sungah limciing ciaptehna in “Topa in Ama mite thei hi” cih
pulaak hi (2Tim. 2:19). Pasian in a mite thei-in Kha Siangtho tawh ciamteh hi
(Eph. 1: 13, 14; 4: 30). Pasian in a mite’ taltang tungah ciamtehna koih hi (
Mang. 14:1). Tua taltung a ciaptehna kimu thei lo hi. Ellen G. White in hih
bangin hong hilh hi: Amaute sung panin thuman theihtelna kihemkhia thei lo ding
hi.” Last Day Events, 220. Ahi zongin lungsim takpi-in Sapi tawh a kipawl mite
in Sapi ciaptehna ngah ding uh hi (Mang. 13: 16, 17).
Pasian’ ciaptehna ngah mite in tatsat lo-in sittelna thuak
uh hi. Leitung hun bei ding ciangin Pasian’ thukham tawh mi khempeuh in
sittelna thuak ding hi (Mang. 12: 17; 14:12).
A diakdiakin, Pasian’ thupiak mang maw, mang lo maw, cih thu Thukham
li-na tawh kisittel ding hi (Mang. 14:7).
Sabbath in Pasian’ mite ciaptehna ahih mah bangin (Pai. 31: 12- 17; Eze.
20: 12, 20), hun beikuan ciangin zong Topa tungah a citak leh citak lo Sabbath
tawh hong kisittel ding hi.
“Ciaptehna” in hun bei-ma Pasian’mite in gimna nam sagihte
panin a kem vangliatna limcing hi (Eze. 9: 1-11; Mang. 7:1 – 3). Tua hi-in Mang. 6:17 sung a dotna – Pasian’ thukhen
hehna tawh a kipelh ding mite in ciaptehna ngah mite hi ding uh hi, cih kitel
hi.Paul in eite hong ciapteh Kha Siangtho dahsak lo dingin hong hilh hi (Eph.
4:30). Hih in bang pulaak hiam? Koi bangin Kha Siangtho na dahsak hiam? Kha
Siangtho dahsak lo dingin, bang khensatna na nei ding hiam?
MONDAY Feb 4
Pasian in A Ciapteh Mite
Mang. 7: 4-8 sim in. Pasian’ ciaptehna a ngah mi bangzah
hiam? Tua mimal a khiatna bang hi ding hiam?
_________________________________________________________
_________________________________________________________________
Tua mi phazah in ciaptehna kizawh khitna pulaak hi. Mi
phazah vekpi 144000 in Israel minamte sung pan hi. Hih mi phazah in
limciinna nei hi. Mi vekpi 144000 in 12
x 12 x 1000 khansakna tawh kingah hi. Lai Siangtho sungah 12 in Pasian’ mite
limcing hi. Israel minam 12 leh Nungzui 12 tungtawnin pawlpi 12 kiphut limcing hi
(Eph. 2:20). Tua hi-in 144000 in hun nunung a Pasian’ mite limcing hi.
Mang. 7 sungah minam 12 minte kigelh hi. Tua minamte tu-in
kimu nawn lo hi. Tua hi-in tua minamte in limciinna nei hi. Minam 10 in
Assyrian khut sungah saltang khin uh a (2Kum. 17: 6 – 23), namdangte tawh
kigawm khin uh hi. Tua minam 12 in tuhun
Judaism sungah kihel lo uh hi. Tua banah
Mang. 7 sunga minam 12 in Israel minam gualngei-na tawh kibang lo hi. Judah
masak ding sangin Reuben masa zaw hi. Tua banah Dan leh Ephraim kihel lo hi.
Hih nihte tangin Josepeh leh Levi kiguang hi. Dan leh Ephraim a kikoih lohna a
hang in amaute nih in Pasian langpangin milim bia uh hi (Thukhente 18:27 – 32;
Hos. 4: 17).
Mang. 7 sunga kigelh Israel minam 12 in taksa Israel
minamte hi lo-in upna sungah Israel mite tawh kisai hi. Ephriam leh lamkhial
Dan minamte in Pasian’ ciaptehna ngah lo uh hi. Thuciam Thak sungah pawlpi
in Israel minamte pulaak hi (James 1:
1). Mang. 7 sunga kigelh Israel minam in
Jew hi taleh Gentile mi hi taleh, Pasian’ mi khempeuh limcing hi.
144000 in nidang Israel mi galdo ding mite siksan hi. Tua
hunlai-in galkap phualpi khatah galkap 221,000 om hi (Gam. 31: 3-6). Limciinna
144000 in thuman nasem pawlpi hi.
Phualpi khatah 1000, phualpi 144 ah 144000 hi (Mang. 17:14). Thuman langpang
200,000,000 tawh tehkahna-in 144000 in cihtham lo hi (Mang. 9: 16).
Lai Siangtho in gal kido-na limciing tuamtuam a pulaak hangin, gal kido deih i om kei hi.
Tua bang limciinnate zaknop lo hi. Koi bangin tua bang limciinna in Satan
in Pasian a langdo hong telsak hiam?
TUESDAY Feb 5
Mihonpi
Mang. 7: 9-14 sim in. John in kua mi siangtho-te mu hiam?
Koi bangin amaute thu hong hilh hiam? Koi panin hong pai uh hiam? Pasian’
tokhom mai-ah bang thu pulaak hiam?
_______________________________________________________________ _________________________________________________________________
John in “ Hih mite pen bawlsiatna lianpi thuakin a hong
suakta mite ahi uh hi.Amaute in a puan uh sawpsiangin Tuuno sisan tawh a
paaksak uh ahi hi” (Mang. 6: 14) cihna aw za hi. Hih mite in bangbang gimna thuak taleh Jesuh tungah a citak mite hi. Tua puanpaak in Jesuh’ dikna limcing hi. Hih
in vantung hehpihna thu hong hilh hi. Hun beikuanin a nungta totkhiatna ngah
mite hi taleh a khang a khang a om Topa’ mite in tawntung nunna a ngah theihna
uh, vanthak leh leithakah a om theihna uh in hehpihna hangin kipia Khrih’ dikna
hang bekin tua bangin nungta ding uh hi.
“Vantung tokhom tawh kinai penpenin a om mite in, hun
khatlai-in Satan’nasem mite hi. Ahi zongin meikhuk sung pan kitenkhia singkhuah
bangin mawhna sung pan hotkhiatna a ngah khit uhteh citakin Honpa nung a zui
mite hi. Amau khitteh thuman lo zui lote lakah Pasian’ thukham a zuihna uh
hangin thahna thuak mite hi. Tua khit ciangin Tuuno leh Tokhom mai-ah minamkim,
pau namkimte lak pan a kisim zo lo mi honpi om hi. Amaute in puankaang silh uh
a, a khut uhah nisuh tawi uh hi.” Mang. 7:9. Amaute in nasep ding khempeuh zo
khin hi. Zawhna ngah mite in tai
kidemna-ah zawhna ngah mite hi. Amaute tawi nisuh in zawhna limcing hi.
Puankaang in Khrih’ dikna limcing hi.” Ellen G. White, The Great Controversy,
665.
A khawnkhongin hong kipia Khrih’dikna in eite hong tuam
hi. Koi bangin gimna, hamsatna lakah tua
upna nei-in, upna ah citak ding i hiam? Koi bangin nopsak hun, lungdam hunin
upna tawh nungta-in Topa tungah citak ding na hiam? Thkna. 8: 11 – 17).
WEDNESDAY Feb 6
Tuuno A Zui Mite
Mang. 14: 1-5 sim in.144000 mite’ nunzia thum bang kipulaak
hiam? Koibangin Mang. 14: 12 sunga kigelh mi siangtho-te’ nunzia tawh kibatna
nei uh hiam?
_________________________________________________________________ _________________________________________________________________
Mang. 14: 4,5, 12 in 144000 mite in Pasian’ thukham leh Jesuh’
upna nei mite hi, ci-in pulaak hi. Amaute in Satan’ hehna lianpi thuak uh hi
taleh Jesuh tawh tatsat lo-in a kizom mite hi.
144000 mite in numei
tawh mawhna nei lo mite hi, ci-in Mang. 17:5 in pulaak hi. Koi bangin hih
thu leh a kihonkhia Pasian aa dingin a
gah masa mite hi, cih thu in kizopna nei hiam? Mang. 14:4. ____________________________________________________________________ ____________________________________________________________________
Numei tawh mawhna bawl cih thu in Pasian tungah cihtak
lohna limcing hi. Tua bang mite in hun nunung a Babylon leh a tanu-te tawh
mawhna bawl mi khempeuh limcing hi (Mang. 18:3). Ahi zongin 144000 in Khrih
tungah citak ahih manun, amaute in Babylon leh Pasian a langpang biakna zui lo
uh hi.Amaute in Tuuno pai-na peuhpeuh a zui mite hi (Mang. 14:4). Nidanghun
Israel mite in gah masa khempeuh Topa tungah biakpiakna-in pia masa uh hi. Gah
masa in leitung tawh kipawl lo-in Pasian’hotkhiat mite limcing hi (Jer. 2:3; James 1:18).
144000 mite in a tuamdiak hotna ngah
mite hi lo-in amaute in si lo-in Jesuh hong pai a dawn ding mite limcing uh hi.
Amaute in hotkhiatna ngah mi khempeuh lak pan gah masa hi, ci-in kiciamteh hi
(Mang. 14:14 – 16).
Phawkloh kalin upna man lo sung hong lutpih thei lampite
bang hi ding hiam? Tua bang thu in lauhuai lo hi, cih ngaihsutna in, bang
hangin ei le ei kikhemna suak thei hiam?
THURSDAY Feb 7
I Pasian leh Tuuno Tung Pan Hotkhiatna
Mang. 14: 5; 2Pet. 3: 14 sim in. Mangmuhna Bu in hun nunung
a Pasian’ mite in khialhna nei lo mite hi, ci-in pulaak hi. Koi bangin tua bang
nunna zia i nei ding hiam?
___________________________________________________________
__________________________________________________________
144000 mite kam sungah zuau thu kimu lo hi. Bang hang hiam
cihleh amaute in Pasian tokhom mai-ah ding uh a, khialhna nei lo uh hi (Mang.
14:5). Zuau gen mite in Satan tawh kipawl mite hi (Mang. 13:14). Mi tampi in Satan zuau khemna um ding uh hi.
Hun nunung a Pasian mite in a kihonkhia mite ahih manun thuman it uh hi
(2Thess. 2: 10, 11). Zuau gen lo (Greek amomos) cihteh paubaanna nei lo uh hi,
cihna hi. Pasian’ mite mi siangtho kici hi. Abraham leh Job in paubaan nei lo
hi,ci-in kiciamteh hi (Pian. 17: 1; Job 1:1). Tuma kum 2000 vallai-in Jesuh in
Pasian mai-ah siangtho-in, paubaanna nei lo hi (Eph. 5: 27; Phil. 2:15).
Romans 3: 19 – 23 sim in. Bang hangin hih thuman mitsuan
den ding kisam hiam?
__________________________________________________________-
__________________________________________________________________
Hun nunungteh 144000 mite in vanglian takin Khrih’ zia le
tong kilangsak uh hi. Amau gamtatna leh a siantho-na uh sangin Khrih sepna
khempeuh kilangsak zaw ding uh hi (Eph. 2:8,9). 144000 mite in a puansilhte uh
sawpsiang uh a, Tuuno sisan tawh kisawpsiang uh hi (Mang. 7:14). Amaute in
Pasian mai-ah paubaannna, khialhna nei lo mite hi (2Pet. 3: 14). Eite in Khrih zia le tong i neih
mateng leitung siatna panin kisiansuah ding i kisam hi. Tua hileh Pasian’
nunzia tawh a nungta mite i hi ding hi.
Mawhna bei-in mawhna do-na galvan khempeuh Khrih khe phungah i koih ni
mateng, mawh nei lo-in, hotkhiatna ngah i ci thei pan ding hi.” Ellen G. White,
3SM., 355, 356.
Koi bangin siantho-na
tawh tawntung nuntakna sung a nungta ding kigingkholin, ahi zongin, mihing tha
tawh kicinna leh siantho-na (perfectionism and fanatical holiness) pelh ding i
hiam? Bang hangin Romans 3: 19 – 23 sung a thute mitsuan den ding kisam hiam?
FRIDAY Feb. 8
Ngaihsutbeh Ding: Ellen
G. White, ‘Sinlessness and Salvation,” 353- 357 in 3SM.
144000
mite tawh kisai-in muhzia tuamtuam om hi. Mangmuhna Bu in 144000 mite in leitung bei-ma deuh a Pasian’
mite hi, cih kitel hi. Amaute in gimna nam sagihte thuak ding uh a (Mang. 7: 15
– 17), kuama thuak ngei loh sittelna thuak ding uh hi. Ahi zongin 144000 sungah a kihel ding mite
hong kihilh lo hi. Hih thusim in Pasian bek ii theih dingin a koih thusim hi
(Thkna. 29:29). Khrih hong pai ciangin
144000 sunga kihel mite i thei ding hi.
144000 tawh kisai-in a hong kihilhkhol thu in: “ Pasian in
thuman thutak hong hilh napi, pawl sungah zuau thu um mi honkhat hong om ding
hi. Mi tampi in amau ngaihsutna siksanin, mihing in theih ding a kul lo thu,
Lai Siangtho in a hong hilh loh thute,
pulaak ding uh hi. Tua bang thugente Pasian’makaihna tawh thugen uh hi
lo hi. 144000 mite in kua-te hi ding hiam cih a kipan Khrih tawh hong kinai-sak
lo ding thu tuamtuam, kitot kiselna a piangsak thei thute in Pasian kiang pan
hong pai hi lo hi. Tua bang thute genin nei kei un. Tawntung nunna sungah a
nungta ding mite in a sawt lo-in na khempeuh a theih hun uh hong tung ding hi.”
Ellen G. White, 1SM., 174.
Kikup Ding Dotnate
1. “144000 mite lakah kihel nadingin Pasian hong piak vangliatna
tawh hanciam in,’ cih thu
ngaihsun in (Ellen G. White Comments, The SDA Bible Commentary., Vol. 7, 970).
Koi bangin hih thu na nuntakpih thei ding hiam? Koi bangin tua bang hanciamna
in nisim nunzia hong huzaap hiam?
2. 144000 mite a thupitna khat in amaute in la thak sa uh hi. Na nunna zia kingaihsun lecin, Pasian
tawh na kizopna-ah na tuahkhak thute in hong
thaksuaksak den hiam? Ahih kei leh Pasian tawh na kizopna-ah ki-apna a kisam
lai mi na hi hiam?Koi bangin na nunna zia in na upna, na kaalsuanna, Khrih tawh
na kizopna zia pulaak hiam?
3. Khrih a thu-in theihna leh Khrih theihtelna bang kilamdang
hiam? “Khrih in bangci nunna zia nei hiam? ci-in hong kidong hi leh, bang na
dawng ding hiam, bang hangin tua bangin dawng ding na hiam?
