LESSON 4 Jan. 19 – 25
TUUNO IN KUMPI TOKHOM A
NGAHNA
Sabbath Nitak
Tu Kaal Sung Sim Ding:
Mang. 4, 5; Ezek. 1: 5 -14; Eph. 1: 20 – 23; Heb. 10: 12; Sawl 12: 32 – 36.
KAMNGAH: “Keimah in ka
zawh khit ciangin ka Pa tawh tokhom tungah ka tutkhawm bangin, a zo mi in kei
tawh ka tokhom tungah tutkhawm theihna thu ka pia ding hi.” Mang. 3: 21.
Mang. 4 , 5 sunga mangmuhnate in “Kido-na Lianpi” a
huampi-in pulaak hi. Mang. 12 sung bangin, Mang. 4 -5 in leitungah Khrih
nasepna a kipan hotkhiatna thu pulaak hi. A hong piang ding thute a pulaak
ma-in, Khrih in sihna pan a thawh khit vantung tokhomah vangliatna tawh kidimin
a omna thu pulaak masa hi. Tua bangin Mang. 4, 5 in a hong piang ding thute’
deihna pulaak hi. Pawlpi 7 tung a thupuakte bang lo-in, Mang. 4, 5 in limciinna kammal zang ahih
manin a thute telhak hi. Tua kammalte in Thuciam Lui sunga kammalte hi.
Mangmuhna Bu sunga limciinna kammalte i tel nadingin Thuciam Lui sunga kammalte
hoihtak i tel ding kisam hi.
SUNDAY Jan. 20
Vantung Thukhenna Inn
Sung
Mang. 4:1 in a pulaak mah bangin Jesuh in vantungah John
samto-in, Khrih hong pai kik mateng a piang ding thute mukhol-sak hi.
Mang. 4: 1-8; Eze. 1: 26 – 28 sim in. Mang. 5: 11- 14 sung a thute in bangci bangin
vantung vangliatna na ngaihsun thei hiam?
______________________________________________________________ _______________________________________________________________
Sawltak John in kongvang panin vantung biakbukpi sung leh
Pasian Tokhom mu hi. Tokhom in na khempeuh
tungah Pasian’ ukna leh a thuneihna limcing hi. Tokhom kim a om sakhi-tuihup
in Pasian in a mite tungah a cihtakna
leh a thumanna limcing hi. Ahi zongin Satan in langpangin Pasian’ ukna nial hi.
Satan ahih kei leh Pasian maw, kua in leitung uk dingin kilawm hiam cih thu hi.
Vantung tokhom tung panin a kipulaak khia thu in Pasian in na khempeuh tungah a
tawntungin ukna nei ding hi, ci-in pulaak hi.
Mang. 4: 8 – 11; Mang. 5: 9-14 sim in. Biakpiakna man tawh kisai bang thu hong hilh
hiam? Bang hangin Topa Pasian bek biak
takcing hiam? Bang hangin Tuuno bek
biak takcing hiam?
______________________________________________________________
______________________________________________________________
Mang. 4 in vantung biakbuk sung a om tokhom omzia leh
biakbuk sung a tatsat lo-in biakpiakna pulaak hi. Mang. 4 in na khempeuh a
piangsak Pasian’vangliatna hangin Ama minphatna pulaak a, Mang. 5 in Tuuno
sihna hangin tatkhiatna hangin lungdamna thu pulaak hi. Mang 4, 5 in biakpiakna
man in nate a piangsak Pasian’ vangliatna leh hotkhiatna pulaak hi. Pasian in a kipatcilin na khempeuh a piangsak
Pa hi; na khempeuh a ngei bangsak kik theihna, a kamciam om bangin Ama mite in
a tawntung om nading leithak bawl hi, cih hong hilh hi.
Hih leitung bek hi lo na khempeuh a piangsak Pa, eite aa
dingin thahna thuak Tuuno in a hong hotkhiatna thu ngaihsun in (Mang. 5:
12). Natna, gimna tawh kidim leitungah i
nuntak sungin thupha tawh kidim lametna nei hi lo i hiam?
MONDAY Jan. 21
Tokhom Kimah Kikaihkhopna
Tokhom kim a om upa
kimu-te in vantung mite hi lo hi (Mang. 4:4). Lai Siangtho sungah ‘upa’ cih kammal in mihing tungah kizang hi.
Pasian’ kim a om vantung mite bang lo-in hih upa a omte in tokhom tungah tu uh
hi. A silh uh puankang in a citak Pasian’ mite limcing hi (Mang. 3: 4, 5).
Zawhna kham lukhute (Greek: stephanoi)
in zawhna ngah misiangthote aa dingin kikoih hi (James 1: 2). Upa 24 in
vangliatna ngah misiangthote limcing hi.
Nambat 24 in limciinna nei hi. 12 + 12 kigawm ciangin 24
hi-in, Lai Siangtho sungah nambat 12 in Pasian’ mite limcing nambat hi. Nambat
24 in Thuciam Lui hi taleh Thuciam Thak sung a misiangtho-te limcing hi. Tua
banah biakbuk a nasem a pawlpawlin kikhen siampi-te limcing hi (1Khang. 24:
1-19).
Mangmuhna simloh upa 24 a kipulaakna mun om lo hi. Tua
hi-in hih upa 24 in vantung tokhom a om vangliatna neite pulaak hi. Amaute in
Khrih in sihna pan a thawhin sihna pan a tho mite hi kha ding uh hi (Matt. 27:
51 – 53). Eph. 4: 8 sungah Jesuh in van
a kahin mi siangtho pawlkhat tonpih hi. Tatkhiat ngah mi khempeuh limcing
dingin tua upa 24 in Khrih tawh vankah mite hi-in, amaute in Pasian in a
nasepna khempeuhah thuman thutak tawh nasem hi, cih mu uh hi. Vantung kumpi
sungah amaute kimuak a, amaute in vantung mihonpi tawh sihna a zo Jesu in
vangliatna tawh vantung kumpi tokhomah pahtawi-na ngah mu uh hi (Mang. 4).
Mang. 4: 6-8 sungah
ganhing li kipulaak hi. Hih ganhing li leh Eze. 1: 5- 14; 10: 20 – 22 leh
Isaiah 6: 2, 3 sunga seraphim enkak in.
_________________________________________________________
_________________________________________________________________
Tua ganhing li-te in vantungmite limcing hi. Hih
vantungmite in Pasian’ sawltakte, vantung Pasian tokhom a cing vantungmite hi
(Late 99:1). A kha-te un Pasian’ thupiak
bangin nasemin, amaute mit un na khempeuh a thei lungsim limcing hi. Amau
melpuak in humpi, bawngno, mihing leh muvanlai in piansakna khempeuh limcing
hi. Amaute in vantung tokhom mai-a om
Pasian’ piansak na khempeuh limcing hi.
TUESDAY Jan. 22
A Kihen Laizial
Mang. 5: 1 sim in. Isa. 29: 11, 12 bulphuhin a kihen
laizial in bang hi ding hiam?
___________________________________________________________
___________________________________________________________
Greek Lai Siangthote in tua a kihen laizial in Pa Pasian’
tokhom ziatlamah kikoih hi, ci-in pulaak hi. Vantung tokhom tungah a tu Pa sim
loh, tua laizial a hongkhia ding a kilawm kuamah om lo hi. Ellen G.White in a
pulaakna-ah tua laizial sungah Pasian’
kepna, hotkhiatna ngah minam khempeuh leh pawlpi tangthu kigelh hi. Pasian’
kammal, Ama thuneihna, a thukhamte, a thupiakte, tawntung nunna pulaak thute
leh leitungah ukna nei kumpite thu kigelh hi. Leitung piancil a kipan leitung a
bei dong minam khempeuh, pau nam khempeuh tungah huzaap nei thute zong kigelh
hi.” Ellen G.White, Manuscript Release, Vol. 3., 7. Tua laizial sungah Pasian
in mihingte mawhna sung pan a lamdang hong honkhiat thu kigelh hi. Khrih hong
kumkik hun ciangin tua thute i telsiang ding hi (Mang. 10:7).
Mang. 5: 2-7 sim in. Bang hangin Jesuh bek in tua kihen
laizial hongkhia thei hiam?
________________________________________________________________
________________________________________________________________
Satan in vantung Pasian tokhom panin langpanna pankhia hi.
Hih leitung in Pasian’ bawl hi mah taleh Satan in leitung uk hi. John in Adam a
kipan mihingte’ mawhna hangin a khitui luang hi. A kihen laizial in mawhna bei
ding Pasian’ geelkholhna pulaak hi. Ciangtan om lo Ama vangliatna bek in mawhna
beimangsak ding hi. A kihen tua laizial a phelkhia ding, mawhnei mite a hong
honkhia Jesuh bek om hi. Amah in na khempeuh uk hi. Amah in vantung biakbukah
eite palai siampi hi.
Koi bangin i nuntakna-ah Jesuh bek mah liansak penin, masak
ding i hiam?
WEDNESDAY Jan. 23
Tuuno in Tokhom Tungah
Mang. 5: 8 – 14; Eph. 1: 20 – 23; Heb. 10: 12 sim in.
Leitung gimna lakah lametna, lungmuanna thu hong hilh hi lo hiam?
_________________________________________________________________ _________________________________________________________________
Tuuno Khrih in tokhom kiang zuanin laizial hong la hi.
Vangliatna, ukzawhna khempeuh Ama tungah kipia hi (Eph. 1: 20 – 22). Tua
ciangin Jesuh in leitung uk nading thu nei hi, cih a bawlsa na khempeuh in
theitel uh hi. Adam in a sup na khempeuh Khrih in ngahkik hi. Khrih in tua
laizial a tawi ciangin, mi khempeuh tun nading mun in Ama khut sungah om hi.
Ganhing li leh upa 24 in Khrih mai-ah kunin, bia uh a, “ Nangmah in laibu la-in
ciamtehnate hong dingin na kilawm hi; bang hang hiam cihleh thahna na thuak hi”
ci-in a minphat uh hi (Mang. 5: 9).
Vantungmi khempeuh leh tatkhiat mihing khempeuh in Khrih in mawhnei mite aa dingin hong si hi,
cih pulaak uh hi. Ama sisan tawh hong lei-in mihing in a ngaihsut theih loh
nopna sungah hong tunpih ding hi.
Tu-in ganhing li leh upa 24 in simzawhloh vantungmite tawh
tokhom kimah hong kikhawm uh a, Kumpi
Jesuh min phat uh hi: “thahna a thuak Tuuno in, vangliatna, hauhna, pilna,
hatna, pahtawina leh phatna thuphate ngah dingin na kilawm hi,” ci uh hi (Mang.
5: 12). Vantung, leitung in Pa Pasian leh Khrih a phat uh hi: “vantung,
leitung, leinuai leh tui tungah a om a bawlsa ganhing khempeuhte a kipan, tua
vantung, leitung, leinuai leh tui tungah a om na khempeuh in zong, “ Tokhom
tungah a tu mi leh Tuuno tungah, phatna, pahtawina, minthanna, leh vangliatnate
a tawntung pan a tawntung dongin om ta hen. Amen, ci-in (Mang. 5: 13) ganhing 4
leh upa 24 in lukunin Topa a phat uh hi. Vantung tokhom in Pasian phatna tawh kidim
hi.
Leitung mipilte in ni khat niteh leitung na khempeuh
kangtum ding hi, ahih kei leh maimang ding hi, ci-in genkhol uh hi. Lai
Siangtho hong hilh tawh kilehbulh hi. Koi bangin a hong tung ding hun leh nate
hangin lungdam kipak ding na hiam?
THURSDAY Jan. 24
Pentecost A Thupitna
Mang. 5 in a thupi mahmah hotkhiatna thupiang ding khat gen
hi; tua in Khrih in vantung biakbukah Kumpi leh Siampi Lianpen nasep kipan hi,
cih pulaak hi. Jesuh in Pa Pasian’ taklam vantung tokhomah tu-in (Heb. 12: 2; Mang. 3: 21), hotkhiatna nasep a
zo siang hi ta hi. Amah in vantung biakbukah eite aa ding hong thumsak hi. Ama
hangin eite in mawhmai-na ngahin Pa Pasian tawh kizopna i nei hi.
Sawl. 2: 32 – 36; Jn 7: 39 sim in. Kha Siangtho a hong pai nadingin Khrih in
vantungah a kipahtawi-na thu in bang thupi pulaak hiam? Bang hangin Khrih in
vangliatna a ngahma-in nungzuite tungah Kha Siangtho hong pai lo hiam?
______________________________________________________________ ______________________________________________________________
Khrih in vantung tokhomah vangliatna tawh a om khit ciangin
nungzuite tungah Kha Siangtho hong tuaksuk hi. Mang. 5:6 in leitungah Kha 7 kisawl hi, ci-in pulaak hi. 7 in kicing cih
pulaak hi. Kha Siangtho nasepna khempeuh kicing hi. Kha Siangtho in vantung
tokhomah omin, Khrih van a kah ciangin leitungah Kha Siangtho hong kisawl
hi(Mang. 1:4; 4:5). Kha Siangtho hong
paisukna leh Calvary khit Khrih in vangliatna tawh kidimna thu in kizopna nei
hi. Jesuh in Pa kiangah va pai-in, mihingte aa dingin a hong sihna Pa Pasian in
sang hi.
“Khrih nungzuite in Pasian hong kamciamte ngah ding hi, cih
Khrih a vankah in pulaak hi. Khrih in vantung kongkhakah lutin vantungmi
khempeuh in Amah pahtawi uh hi. Tua bangin a kipahtawi khit ciangin Kha
Siangtho in nungzuite tungah hong tuaksukin, Khrih in vangliatna tawh kidim hi.
Tua vangliatna in tawntung panin ciangtan nei lo Pa Pasian tawh a ngah
vangliatna hi. Pentecost a Kha Siangtho in Honpa in hotkhiat nasep zo hi, cih
pulaak hi. Khrih’ kamciam bangin Kha Siangtho hong tuaksuk hi. Tua in Khrih in
kumpi, siampi, vangliatna khempeuh a nei Sathau Kinilh- Honpa hi, cih pulaak
hi.” Ellen G. White, The Acts of the Apostles, 38, 39.
Heb. 4: 16; 8:1 sim in. Jesuh in vantung tokhomah eite Kumpi leh Siampi-in om hi, cih thu in
lametna leh lawpna bang thu hong hilh hiam? Bangci bangin tua thu in nisim nuntak khuasakna zia leh mailam hun
aa ding hong huzaap hiam?
FRIDAY Jan 25
Ngaihsutbeh Ding:Ellen G.
White, “ To My Father, and your Father,” 829–835, in the Desire of Ages;“ The
Gift of the Spirit,”47-56, in The Acts of the Apostles.
Mang. 4-5 sunga thute in leitung hun beikuanin a nungta
Pasian’mite aa dingin thupi mahmah hi. Pentecost ni-a Kha Siangtho in
hotkhiatna kitangko kipat pulaak hi; tua
thupuak in Jesuh in vantung biakbukah
Kumpi leh Siampi-in om hi. Hih in Khristian masate’ upna zungpi (Heb.
8:1) leh hih thu mah bulphuhin thuhilh uh hi (Sawl. 2: 32 – 36; 5: 30, 31). Tua
thu in bawlsiatna leh hamsatna a thuak ciangun amaute lawpna, muanna, tha guan thute hi (Sawl. 7:55, 56;
Rom. 8: 34). Tua hangin mi tampi in
thu-um mi suak uh hi. Tua hun a kipan Jesuh ompihna leh Kha Siangtho’ nasepna
hangin Pasian’ gam hong kilangin, Ama gam zai semsem hi.
Khrih sungah hotkhiatna thu bek in mihing lungsim hong khel
hi. A kikhel mi in tawntung Lungdamna Thu um ahih manin Pasian kihta-in Ama
minthangsakin, Amah bek mah bia hi (Mang. 14:7). Amah bek mah in eite lamet hi.
Vantung biakbuk a om Khrih in eite Honpa Kumpi leh Siampi hi. Amah in leitung
bei dongin a mite tawh hong omkhawm ding hi (Matt. 28: 20). Ama khut sungah na khempeuh om hi. Tua hi-in
hotkhiatna thu in leitung mun khempeuhah kizel ding a, gimna thuak, a mangthang
mite tungah hotkhiatna thu kizel ding hi. Singlamteh leh Pasian a hong hilh thu
simloh, thudang thupi om lo hi.
Kikup Ding Dotnate
1. Ni khat niteh vantung i tung ding a,
Pasian’ hoihna, a vangliatna, ahong hehpih itna hangin, amah bia-in, a min i
phat tawntung ding hi. Tu-in zong tua bangin Pasian i phat theih nading lampite ngaihsun in. Ama nasepnate
hang leh mailam-ah a sep lai ding thute hangin, koi bangin lungdamna tawh
Pasian phat ding na hiam?
2. Mang. 4: 11;5: 9 sim in. Khrih in a nasep thunihte bang hi a, koi bangin
tua thute nihte in a hong kihotkhiat nading nasem hiam? Bang hangin Topa bek
mah i biak ding kilawm hiam? Koi bangin Sabbath thuman in Pasian’ thu bang hong hilh
hiam?
