LESSON 3 Jan. 12 – 18
Sabbath Nitak:
Tu Kaal
Sung Sim Ding: Mang. 2: 8 – 29; 3:7 – 11; 14: 12, 3: 1-6, 14 – 22; Isa. 61: 10
KAMNGAH: “Tua ahih manin
zak nading bel a neite in Kha Siangtho in pawlpite kiangah a gen thute na za
un, ci-in gen in,” a hong ci hi. Mangmuhna 3: 22
Jesuh in Patmos tuikulh a om John tungtawnin pawlpite Ama
thute pulaak hi. A masa-in tua thupuakte in John hunlai pawlpite tungah kizasak
hi-in, ahi zongin Khristian khempeuh aa dingin zong pulaak hi. Tua thupuak
khempeuh sungah thu 6 kimu hi. Jesuh in pawlpi a min ciat uh tawh hopih masa
hi. Tua khit ciangin “Jesuh’ thugente hih bang hi,” cih hopihna kammal leh Amah
leh amah kipulaak masa hi. Pawlpi khat
ii kitangsapna tawh kizui-in Jesuh in Ama hihna pulaak hi. Jesuh in pawlpi khat
ciat tuah hamsatnate panin honkhia thei ahihna thu pulaak hi. Tua zomah pawlpi
khat ciat ii hoihna a pulaak khit ciangin a kicinlohnate panun kicin theihna
lampi hilh hi.
A tawpna-ah Kha
Siangtho’hopihna zui-a zawhna ngah mite ngah ding thupha kamciamte kipulaak hi.
Bang bang dinmunah om uh hi mah taleh Jesuh in amaute kicinlohna khempeuh
kicingsak thei ahihna pulaak hi. Tua bang mahin tu-in zong eite kitangsapna
khempeuh hong kicingsak thei hi, cih hong hilh hi.
SUNDAY Jan. 13
Smyrna leh Philadelphia
Aa ding Khrih’ Thupuakte
A nihna leh a gukna Jesuh in a thupuak in Smyrna leh
Philadelphia pawlpi tungah thupuak hi. Hih pawlpi nihte in taai-thuhilhna ngah
lo uh hi. Smyrna in a hau khuapi leh a hoih khuapi khat hi. Ahi zongin emperor
( gam ukpi) biakna limzat mahmah hi. Hih thupiak a zui mite in bawlsiatna,
sihna dong thuak uh hi.
Mang. 2: 8-11 sim in. Koi bangin Jesuh Syrmna omzia tungtawnin bang thu pulaak hiam? Pawlpi
dinmun koi bang hiam? A thuak khak ding uh a lauhuai thu Jesuh in bang hilhkhol
hiam?
___________________________________________________________
______________________________________________________________
Smyrna tung a thupuak in Roman kumpi’ bawlsiatna a thuak,
Sawltakte khit pawlpi hun sung zong huam hi. Mang. 2: 10 sung “ ni 10” in
Diocletian makai-in pawlpi bawlsiat a kipat AD 303 – AD 313 dong limcingin,
Constantine the Great in Edict of Milan a piak ciangin bawlsiatna bei-in
Khristiante in suahtakna ngah uh hi.
A gukna pawlpi Philadelphia (sanggam ki-itna) hi. Hih
khuapi in vanzuak vanlei-na phualpi, nitumna gam khempeuh leh nisuahna gam
khempeuh kizopna khuapi hi. Greek pau
kizat mahmahna khuapi khat zui-in Lydia leh Phrygia ngei-na limtak a zui
khuapi khat hi.
Mang. 3: 7 – 13 sim in. Koi bangin Jesuh in hih pawlpi
omtawh kituakin bang hilh hiam? Jesuh in “Na thaneem hi” ci-in a pulaak ciangin
hih pawlpi’ dinmun bang pulaak hiam? Jesuh in bang kamciam pia hiam?
___________________________________________________________
______________________________________________________________
Philadelphia pawlpi aa dingin Jesuh thugente in AD 1800
-1900 huam sung a om pawlpi dinmun pulaak hi. Hih pawlpi in a pia khuavak,
Topa’ kammal bangin nungta uh hi (Mang. 3:8). Hih hun sung a om pawlpi in mun tuamtuamah
lawptakin hotkhiatna thu puak kawikawi uh hi. Tua bangin lungsim takpi tawh a
nasepna uh tungtawnin thu-um mite sungah Pentecost khit a om ngei nailo
khanlawhna hong tung hi.
MONDAY Jan. 14
Pergamum tungah Khrih
Thupuak
Pergamos (Pergamum) in pagan (milim) biakna phualpi khat
hi. Greek pasian Asclepius, damna pasian biakna phualpi hi. Gulpi in hih pasian
limcing hi. Mun tuamtuam panin damna ngah dingin hih khua zuanin kipai hi.
Smyrna mah bangin Pergamos zong emperor bia pelmawh uh hi. Hih khuapi “Satan
teenna mun” in a tokhom omna khuapi sungah Khristian mite zong teeng uh hi.
Mang. 2: 12 – 15 sim in. Koi bangin Jesuh in hih pawlpi
tungah Amah le mah kipulaak hiam? Pahtakna bang thu pulaak hiam?
__________________________________________________________________ _________________________________________________________________
Pagan biakna tawh kidim ahih mah bangin Pergamum pawlpi in
a pua pan hi taleh pawl sung pan hi taleh ze-etna thuak hi. A tam zaw in thuman
sungah kiptakin nungta uh hi taleh
Nicolaitans kici mi kimkhat in bawlsiatna tawh kipelh nadingin pagan (milim) biakna zui uh hi. Hih mite in
Balaam gamtatna zui-in, Kamciam Gam zuanin khualzin Israel mite lampialsak hi
(Gam. 31: 16). Hih mite in gimna,
bawlsiatna tawh kipelh nading lampi zui uh hi.
Mang. 2: 16, 17 sim in. Bang in amaute upna hatsak ding
hiam? Jesuh in kamciam bang pia hiam?
_________________________________________________________________ __________________________________________________________________
Pergamum tunga kipulaak thute in AD 313 khit pawlpi aa
dingin zong kipulaak hi. Khristian biakna in pagan biakna tungah zawhna nei hi
mah taleh pawl sungah pagan biakna tampi hong lut hi. Thu-um mi kimkhat in
lungkia lo-in hotkhiatna thu-ah citak uh hi mah taleh AD 400 – 500 sungin
thuman langpanna leh pawlpi upna kiam hun hi. Hih hun sungin pawlpi in thuman
leh thuman lo helhzau hi.
“Keima Thu” nial lo cih thu in bang pulaak hiam? (Mang.
2:13; 14: 12). Lauhuai-na, upna pan
lampialna a kipan sihna ding kawmkalah i upna phungpi leh tua upna sungah
mainawt ding bang hong hilh hiam?
TUESDAY Jan. 15
Thyatira tungah Khrih’
thupuak
Khua dangte bang lo-in Thyatira in khua thupi, khua lian hi
lo hi. Vanzuak, vanlei-na khua khat hi. Sumbawl sumzong ding, ahih keileh nasep
khat peuh a zong mi khat in, hih tawh kisai kipawlna-ah a kihel kul masa hi.
Hih kipawlna-ah a kihel ciangin, biakpiakna a kipan pawlmite sep bangbang a
zuih kul a, a tam zaw numei pasal paktatna tam hi. Tua bangin pawlmite tat bangin a zui lo mi
pen pawlmi hihna pan hemkhia uh hi. Thyatira sunga om Khristiante in hotkhiatna
thuman kiptakin zui ding maw, ahih keileh khua sung mite om bangin om ding maw,
cih thu deihtel thei uh hi.
Mang. 2: 18 – 29; Dan. 10:6 sim in. Koi bangin Jesuh in
Thyatira tungah kipulaak hiam? Thyatira pawlpi in phatna bang nei-a, bang
hamsatna nei uh hiam?
__________________________________________________________
________________________________________________________________
Pergamum tawh kibangin Thyatira zong pagan (milim) biakna tawh kihelhzau hi.
“Jezebel” in Ahab Kumpipa zi hi-in, Israel mite lampialpih hi (1Kum. 16: 31 –
33). Jezebel in upna lampialpih hi, ci-in Jesuh in pulaak hi. Jezebel’thuhilh a
zui mi in Jezebel tawh a mawh hi pah hi.
Thyatira pawlpi dinmun in Middle Ages – AD 600 - 1500 huam
sung a om pawlpi’ dinmun pulaak hi. Hih
hun sungin pawlpi a buai-sak thute in pawl pua pan hi lo-in, pawl sung panin Pasian’ sawlna ka ngah hi, kici mite in
pawlpi buai-sak hi. Hih hun sungin Lai Siangtho sangin ngei-na thupi-zaw sak uh
a, Khrih siampi sepna nialin, mihing tungah kinga uh hi. Sawltak, misiangtho-te’
guh leh na tuamtuam bia uh hi. Gamtat hoih tawh hotkhiat ngah dingin hanciam uh
hi. Hih bangin pawlpi’ thukhun a zui nuamlo thu-um mite in bawlsiatna leh
thahna thuak uh hi. Kum zalom tampi sung hotkhiatna thuman kithei lo hi (Dan.
7:25).
Mang. 2: 25 “Kong pai dongin na upna lenkip in”cih thu
ngaihsun in. Mimal hi taleh pawlpi aa
dingin nuntakpih ding thu bang hong hilh hiam? I letkip ding thu Jesuh kiang
pan bang i ngah hiam?
WEDNESDAY Jan. 16
Sardis tungah Khrih’
thupuak
Sardis in minphatna nei pawlpi hi. Ahi zongin Rome uksungin
Sardis in a vangliatna kiam hi. A beisa thute hangin Sardis khuapi in hauhna,
nopsaknate tawh kidim hi taleh tu-in a vangliatna bei hi. Hih khuapi in mual kentung khat a om hi-in,
kuamah pai mengmeng thei lo hi. Tua hangin Sardis khua mite lungmuang uh hi.
Khua-cing kuamah koih lo uh hi.
Mang. 3: 1-6; Matt. 24: 42- 44; 1Thess. 5: 1-8 sim in.
Sardis in Amah tawh a kizopna hoih a neih nadingun Jesuh in thu thum bang hilh
hiam? Sardis khua omzia tawh kizui-in koi bangin Jesuh in ‘pilvangin om
un”ci-in hilh hiam?
___________________________________________________________
______________________________________________________________
Jesuh in Sardis pawlpi sung a om thu-um mite in citak uh hi
mah taleh, amaute kimkhat in upna thu-ah si uh hi. Pergamum leh Thyatira mah
bangin, Sardis in kilangtangin siatna bawl lo-in, thuman langpang lo uh hi mah
taleh, upna thu-ah khangto lo uh hi.
Sardis tunga kipulaak thute in Reformation khit, Protestant
pawlpi dinmun pulaak hi. Khritian biakna sungah khanlawhna lianpi hong tun khit
ciangin upna thu, ngei-na bangin ngaihsutna hangin lawpna, pianthakna bei mang
hi. Leitung huzaap leh leitung pilna hong khan ciangin hehpihna tawh hotkhiatna
kingahna thu, Khrih tungah kipiakkhiatna cihte hong kiam semsem hi. Pawl sungah
upna sangin thutheihna in dinmun hong luah hi. Pawlpi in a nungta tawh kibang
hi bek a, a taktakin a a thuzuihna-ah a si hi gige hi.
Sardis pawlpi tung a laikhak in thu-um mi khempeuh tungah
laikhak hi. Khristian mi kimkhat in a bei-sa hun a Khrih tungah a cihtaknate uh
kisialhpih tawntung uh hi. Ahi zongin amaute in tua bangin nungta nawn lo uh
hi. A min bekin Khristian hi-in lungsim takpi leh lawpna tawh Pasian bia nawn
lo uh hi.
Khrih sungah upna bek in hotkhiatna lampi hi, cih thu
siksanin, koi bangin Pasian mai-ah mi kicing nai lo ihihlam kilang hiam?
Kicinna i cih in bang hi-a, koi bangin kicinna nei ding i hiam? Matt. 5: 44 –
48.
THURSDAY Jan. 17
Laodicea-a Khristiante
Jesuh in pawlpite a laikhak a nunung pen in Laodicea pawlpi
hi. Laodicea in sumbawlna lampi khatah om hi-in a hau mahmah khua khat hi.
Tuumul bawlna phualpi khat hi. Bank cihte a kipan khaam koihna mun thupi zong
om hi. Mitza kibawlna khua khat hi. Khua-mite hau uh ahih manun kuamah konlawh
lo uh hi. AD 60 kimpawl zinlingin Laodicea kisia gawp hi. Laodicea mite in ka
kitangsap khempeuh uh nei ung, ci-in Rome kumpi’ huh ding nial uh hi. Khua
sungah tui kingah lo ahih manin Hierapolis kici mun panin tui la-tawm uh hi.
Hih tuinak ah a tui in sa mahmah hi mah taleh, a naak gamla ahih man, khua sung
a tun ciangin lum milmial hi.
Mang. 3: 14 – 17; Hosea 12: 8 sim in. Kibatna bang nei uh
hiam? Khrih in pawlpi tungah bang pulaak hiam? Koi bangin khua sung mite
nopsakna in Laodicea Khristiante huzaap hiam?
___________________________________________________________________
___________________________________________________________________
Laodicea in mawhna lianpi, thuman langpanna, nei lo ahih
manin Khrih in mawhsakna thu pulaak lo hi. Amaute in upna sungah lawpna kisam
hi. A tui zat a lum milmial mah bangin a
upna uh in a si lah hi lo, a nungta lah hi lo-in, laklawh uh hi. Amau le amau
mihau-in kingaihsun uh a, ahi zong upna thu-ah a zawng, a hehpihhuai, mittaw
ahihlam kiphawk lo uh hi.
Laodicea in hun beikuan a pawlpi limcing hi. Mang. 16:15
sunga thuhilhna om bangin, hun nunung aa ding kiginkholh ding kitangsapna thu
Laodicea tungtawnin hong hilh hi. Leitung beikuan a pawlpi in biakna, gam
ki-ukna buai-na lianpi nawkkha ding a, a om ngei nai lo hamsatna thuak ding hi.
Ahi zongin hih pawlpi in amah le amah kimuang khat hi-in, ahihna taktak a kitel
ding kisam hi. Laodicea pawlpi tungah Khrih vau thuhilhna in hun nunung a
pawlpi aa dingin mannei hi.
Jesuh in Laodicea pawlpi a itna pulaak hi. Jesuh in amaute
nusia lo ding kamciam hi (Mang. 3: 19).
Khrih in Amah le amah zawlhel pa
in a lawmngaih nu innah kongkhak kiu (Solomon 5: 2-6) tawh kibangin,
kongkhakah dingin kongkhak hong kiu hi (Mang. 3: 20). Kongkhak honin, Amah a lutsak mi khempeuh in
Amah tawh nitak an ne khawm ding uh hi. Hih sapna tawh kipelh ding hi lo hi.
Mang. 3: 18 – 22 sim in. Jesuh in Laodicea pawlpi bang hilh
hiam? Kham, puankaang, mitza cihte in bang limcing hiam? 1Pet. 1:7; Isa. 61:10;
Eph. 1: 17, 18. Laodicea pawlpi i hi,
ci-in a gen ei SDA thu-umte aa dingin bang hong hilh hiam?
FRIDAY Jan 18
Ngaihsutbeh Ding:
Ellen G. White, “ The Revelation,” 578 – 592 in the Acts of the Apostles.
Pawlpi sagihte tungah thupuakte in pawlpi ciat ii upna
thaneemna pulaak hi. Ephesus pawlpi in thuman tawh nungta uh hi taleh a neih
masak itna nusia uh hi. Smyrna, Pergamum leh Philadelphia pawlpite zong thuman
sungah om uh a, mi tawmno khat in thuman nunghei uh hi. Thyatira pawlpi ahihleh Jesuh tungah citakna nei nawn lo a
kikhenthang pawlpi hi. Sardis pawlpi in a lauhuai dinmun tung hi. A tamzaw in
thuman lampi panin lampial khin uh hi. Tawmno khat bek in thuman zui uh hi.
Laodicea pawlpi ahihleh hoihna pulaak ding nei lo uh hi.
Jesuh in pawlpi khat ciat tungah kamciam pia hi. Upna
thuman tawh kigamla uh hi taleh pawlpi khat khit khat in Khrih’ kamciam tam
ngah zaw hi. Ephesus tungah kamciam khat bek kipia hi. Tua
lo pawlpi dangte in thaneemna khat leh kamciam ngah ciat uh hi. Laodicea in
ahihleh kamciam khat bek ngah a, ahi zongin tua kamciam in a lian mahmah
kamciam – Jesuh’ tokhom tungah tukhawm theihna ngah ding kamciam hi (Mang. 3:
21).
Kikup Ding Dotnate
1. Upna thaneem ciangin kamciam tam semsem a, mawhna a tam ciangin
hehpihna zong khang hi (Rom. 5: 20) cih thu in “pawlpi in paubaanna tawh
kidimin, thanem taleh, Pasian in leitungah pawlpi zahin maipha a piak bangmah
om lo hi. Pasian in tatsat lo-in pawlpi kem hi. Kha Siangtho vangliatna tawh
makaih tawntung hi.” Ellen G. White,
2SM., 396.
2. Khristian kimkhat in khuapi, sumbawlna khuapi lian cihte ah Khristian
nunzia tawh nuntak ding hamsa hi, ci uh hi. Asia gam sung khuapi liante, milim
biakna tawh kidim khuapite sungah koi bangin Khristian citak mi hi thei ding i
hiam? Jesuh thunget – John 17: 15 -19 siksanin tua bang mite nunzia ding
ngaihsun in. Leitungah om hi mah taleng koi bangin leitung mite bangin nungta lo ding i hiam?
3. Koi bangin SDA thu-um mi khat in Laodicea tung a thuhilhnate nuntakpih
ding i hiam?