LESSON 13 MARCH 23 – 29 “NA KHEMPEUH A THAKIN KA BAWL HI”

LESSON 13         MARCH 23 – 29

“NA KHEMPEUH A THAKIN KA BAWL HI”

Sabbath Nitak: 

Tu Kaal Sung Sim Ding: Mang. 19:  6- 19; 21: 1-21; Jn. 14: 1-3;2Thes.1: 8 – 10;Jer. 4: 23 -26; 1Kor. 6:2, 3.

KAMNGAH: “Tua ciangin tokhom tungah a tupa in, “ Tu-in na khempeuh a thakin ka bawl hi,” ci hi. Tua ciangin, “Hih thute thumanin muantaak ahih manin lai-ah gelh in,” hong ci lai hi (Mang. 21: 5).

          Hun nunung a Babylon kisiatna in amah tawh kipawl a lampial mite aa dingin kisiatna lianpi hi. Ahi zongin Pasian mite aa dingin tua kisiatna in lungdamna thu hi ding hi (Mang. 19: 1-7).  Babylon vaihawmna hangin Pasian mite in leitung kumpite’ bawlsiatna thuak uh hi (Mang. 18: 24).  A lauhuai Babylon kisiatna in Pasian’ mite aa dingin suahtakna leh hotkhiatna hi ding hi. Babylon kisiatna leh ciaptehna nga-na kihon ciangin a mite’ thungetna Pasian in dawng hi, cih kimu hi. Amaute in kinengniamna, bawlsiatna thuak uh a, Topa aw, bangtan vei gim thuaklai ding ka hi uh hiam, ci-in Topa tungah kiko uh hi. Amaute kiko-na in Abel panin leitung bei dong mi siangthote’ gimna limcing hi (Late 79: 5;  Hab. 1:2; Dan. 12: 6,7).  Ahi zongin Pasian’ mite thuak gimnate a bei hun hong tung ding hi ta hi. Khrih in Ama tawntung Gamah amaute lutpih ding hi ta hi.

          Mangmuhna Bu in hun nunung a Babylon kisiat ding banah Satan leh mawhna khempeuh beisiang ding hong hilh hi. Tua banah tawntung Pasian’ gam a kiphut ding thu zong hong hilh hi.

SUNDAY                                         MARCH 24

Tuuno’ Nitak Mopawi An

          Mang. 19: 6-9; Jn. 14: 1-3 sim in. Koi bangin mopawi in sawtpi tak kingak Khrih leh a mite kipumkhatna pulaak hiam?  _________________________________________________________________  _________________________________________________________________

          Topa in Jew mite kipi kiteenna siksanin thu hong hilh hi. Mopa in a zi dingte innah zuthawl va pia masa hi. Mo lei-na leh moken a kipiak khit uhteh amaute gel pen nupa-in kiciamteh hi. Ahi zongin lumkhawm nai lo uh hi. Mopa ii pa in nupa thakte om nadingin a bawlsak innah mopa va ciah phot hi. Monu zong a pa inn ah va ciah kik hi. Mopawi kiging a mansiang khit uhteh mopa in monu vapi-in mopawi bawl dingin, pasal ii pa in a bawl innah hong ciahkhawm uh hi.

          Monu silh dingin mopuan siangtho Khrih in pia-in silhsak ding hi (Mang. 19:8). Hih in Pasian’ mite in amau gamtat hoihna hangin Pasian’maipha ngah lo hi, cih hong hilh hi. Pasian mite’ puansilh in ‘mi siangtho-te’ dikna’ limcing hi-in, Khrih tawh pumkhat hi-in, amaute sungah Khrih nungta ahih manin dikna ngah uh hi. Amaute puansilh in  Tuuno’ sisan tawh kisawpsiang khin hi (Mang. 7:14). Jesuh in leitungah a hong nuntaklai-in  mopawi thugentehna tawh hih thu hong hilh hi. Ahi zongin mopawi siim mi khat in kumpi pa’piak mopawi puan silh lo-in, ama puan silh mipa in mopawi sung pan hawlkhiat thuak hi (Matt. 22:8 -14).

          Khrih hong piak puan in hun nunung a Pasian’ mite tangsap lianpen hi (Mang. 3:18). Jesuh tung kiang panin tua puan a lei dingin Laodicea pawlpi sawl hi. Tua puan i silh nadingin Jesuh in eite tung pan hong nget khat om hi. Kiphatsakna, ei le ei dik kisaknate paikhia-in nuntakna khempeuh tawh Ama thupiak mangin, eite nuntak tawntung nadingin Ama dikna bek mitsuan ding hong deih hi.

          I gamtat in hong honkhia thei lo hi. Ahi zongin bang in na nunna zia, na nuntakpih pulaak hiam?

MONDAY                            March 25

Armageddon A Bei-na

          Mang. 19: 11- 16 sim in.  Khrih’ min – Pasian kammal ( Mang. 19: 13), Ama kam pan teipi in a nunung pen kido-na thu bang pulaak hiam?       _______________________________________________________________       _______________________________________________________________

          Mang. 19 sungah Pasian’ mite lamet tawntung kamciam a tangtunnna – Khrih nihvei-na hong pai-na thu hong hilh hi. Na khempeuh kizawhsiangna thu hong hilh hi. Jesuh in vantungah Satan zo khin hi; Jesuh in sehhel gamah zong Satan zo khin hi; singlamteh tungah zong Satan zo khin hi; a hong pai kik ciangin zong zawhna tawh hong pai ding hi.

          “A sawt lo-in nisuahna lampan khuttum cia a pha ding meivom neu khat hong kilangh hi. Tua mei in Khrih kimkot a, a gamla panin a vomin kimu hi. Pasian’ mite in tua meivom in Mihing Tapa hong pai ta hi, cih thei uh hi. Amaute in daitakin tua meivom ento uh hi. Tua mei in leitung tawh hong kinai semsem a, a vangtang in lian semsem hi. Tua mei in meikuang bangin taang a, thuciamna sakhituihup in a kimkot teng umcih hi. Jesuh  in zawhna tawh hong paita hi. Tu-a a hong pai-na in maizumna, gimna thuak dingin “A Dah Mipa-in” hong pai lo a, vantung, leitungah zawhna tawh  hong pai-in mi khempeuh thukhen ding hi ta hi. “ A thuman mite, a citak mite thaman pia dingin vantung mihonpi tawh hong pai hi (Mang. 19:11, 14). Ama kimkot a om simzawh loh vantungmi honpi in aw kihualin phatna la sa uh hi. Ama vangtaang in mun khempeuh tuam hi. Ama vangliatna, hoihna mihing ngaihsut theih ding, pulaak theih ding hi lo hi.” Ellen G. White, The Great Controversy, 641.

          Paul in zong Khrih hong pai ciangin leitung kumpi khempeuh tungah gualzo-in Amah a langpang mi khempeuh kisia ding a, Ama mite in ahihleh kihonkhia ding hi (2Thess. 1: 8-10).

          Mang. 19: 9, 17, 18 in neekna tawh kisai thu nih pulaak hi. Aneu 9 pawipi sung a lut mite pulaakin, aneu 17, 18 sihna thuak ding mite’ sa kinekna pulaak hi.  Hih thu nih in Satan leh Khrih kikaalah mi khempeuh ii thuak ding pulaak hi. Upna sungah kiptakin om in, hotkhiatna thu-ah citak ding hong hilh hi lo hiam?

TUESDAY            March 26

KUM 1000

          Mang. 20: 1-3; Jer. 4: 23 – 26 sim in. Kum 1000 sung leitung in bangci om hiam? Koi bangin Satan kihencip hiam?

____________________________________________________________          ____________________________________________________________

          Khrih hong pai ciangin kum 1000 kipan ding hi. Hih hun sungin Satan leh a pawlte khempeuh kihencip ding hi. “Kihen” cih in limciinna hi; bang hang hiam cihleh Satan leh  dawite kimu thei lo hi. Gimna sagihte khitteh leitungah nuntakna nei khat zong om nawn lo hi; leitung in nate kipiansakma bangkik hi (Pian. 1:2). Kum 1000 sung tawntung Satan in thongkia bangin om hi. Bang hang hiam cihleh Satan leh a pawlte in mi a khem ding, a bawlsiat ding kuamah om nawn lo hi. Hih hun sungin Satan leh a pawlte in amau gamtatna khempeuh ngaihsun kik ding uh hi.

          Mang. 20: 4 – 15 sim in. Mi siangthote in kum 1000 sung koi ah om ding hiam?

___________________________________________________________________ ____________________________________________________________________

          Pasian’ mite in kum 1000 sung tawntung Khrih in a bawlkholhsak vantungah om ding uh hi. Amaute in kumpi leh siampi bang ding uh a, leitung thukhen ding uh hi, ci-in John in pulaak hi. Jesuh in a Nungzuite tungah a kamciam bangin amaute in minam sawmlehnihte tungah thukhen ding uh hi (Matt. 19: 28). Mi siangthote in leitung thukhen ding hi, ci-in Paul in zong pulaak hi (1Kor. 6: 2, 3).

          Kum 1000 sung thukhenna in Pasian’ sepna khempeuh in thuman thutak ahihna pulaak hi. Satan in  a tawntungin Pasian in a bawlsa na khempeuh tungah thuman lo hi, ci-in mawhsak tawntung hi.  Tua bangin kimawhsaknate a kipan, a mangthang mite in thaman a ngah uh kilawm kituak mah hi, ci-in a theih nadingin kum 1000 sung tawntung mi siangthote in thukhen dingin Pasian in phal hi. Kum 1000 a bei ciangin Pasian in thuman takpi mah hi ding hiam cih lunghimawhna khempeuh beisiang hi.  Satan leh a pawlte in tawntung kisiatna thuak ding mah hi, Pasian’ mite in ci ding uh hi. Amaute in Satan leh a pawlpi thuak ding a nunung pen Pasian’ thukhenna mu ding hi ta hi.

          I telzawh loh thu tampi tuak hi lo i hiam? Ni khat ni ciangin i theihloh loh khempeuh Pasian in hong theisak ding hi, cih thu in Ama zia le tong bang hong hilh hiam?

WEDNESDAY          March 27

“ VAN THAK LEH LEI THAK”

          Mawhna khempeuh a beisiang khit ciangin hih leitung in tatkhiat mi khempeuh om nadingin kibawlpha ding hi. A kibawlpha thak leitung in bang tawh kibang ding hiam?

          John in ‘van thak leh lei thak mu hi’ (Mang. 21:1). Jew mite in vantung khen thum suah uh hi.  Vasa-te lenna, aksite omna, leh  Pasian omna mun (2Kor. 12:2) ci-in khen uh hi. Mang. 21: 1 in lei thak thu hong hilh hi. Mawhna tawh kidim leitung a kipan na khempeuh in Pasian’ mai-ah beimang hi (Mang. 20:11).  Greek laimalin thak (kainos) cih a khiatna in kipatcilna pulaak hi lo-in, nate hoihna (new in quality) pulaak hi. Hih leitung mei tawh kihahsiang ding a, mawhna om ma nate kipiansakcil bang kik ding hi (2Pet. 3: 10 – 16).

          John in a lamdang mahmah a muhin-ah lei thakah tuipi om lo hi. John in Patmos tuikulhah a om laitak ahih manin, tuipi in gimna leh kikhenkhiatna limcing hi. Lei thakah tuipi om nawn lo ding cih thu in, tua munah natna leh gimna om lo ding hi.

          Mang. 21: 2 -8; 7: 15- 17 sim in. Lei thak leh Piancil sung a Eden huan in kibatna bang nei hiam?  _________________________________________________________________  _________________________________________________________________

         

          Natna leh sihna om nawn lohna munah Pasian in a mite tawh hong om ding hi, cih pen kician mahmah hi. Tua bangin Jerusalem Thak “ Pasian teenna biakinnpi” Pasian in a mite tawh a omna mun pulaak hi.  A kibawl pha lei thak in Pasian’ teenna mun biakinnpi tawh kibang hi. Pasian’ teenna munah mawhna hang a gimna, sihna, khitui luanna, kahna, leh natna cihte om nawn lo ding hi. Mawhna om nawn lo ahih manin a beisa nate kiphawk nawn lo ding hi (Mang. 21:4).

          Mary leh Martha in a sanggampa uh a sih takteh tua bang nopna mun pulaak uh hi: “ Topa aw, nang om hi lecin, ka sanggampa si lo ding hi” (John 11: 21).  Mary leh Martha in Khrih’ teenna-ah sihna om lo hi, cih thei uh hi. Tua bang mahin Pasian’ teenna lei thakah tu laitak a i thuak gimna, natna khempeuh om lo ding hi. Khrih sungah tua bang lametna i nei hi. Ama sisan hangin tua lametna tawh i nungta hi.

         

          Bang hangin lei thak thu in thupi mahmah hiam? Lei thak upna nei lo hi lehang deihhuai ding hiam?

 THURSDAY              March 28

Jerusalem Thak

          John in lei thakah mun lianpi Jerusalem Thak thu pulaak hi. Jerusalem Thak in a takpi leh mihingte’ teen nading mun hi-in, tua mun hoihna leh tawntung thute i pulaak thei kei hi (1Kor. 2:9).

          Mang. 21: 9 – 21 sim in. Jerusalem Thak tawh kisai bang thu kipulaak hiam?         ______________________________________________________________

         ______________________________________________________________

                  

          Jerusalem Thak in monu – Tuuno’ zi ci-in kipulaak hi.  Tua in Pasian’ mite limcing hi (Mang. 19: 7, 8).  Jerusalem Thak in Khrih in a mite tawh a tawntungin a teenkhopna mun hi ding hi. Jerusalem Thak in kongkhakpi sawmlenih kulh sangpi leh kiu li nei khuapi hi. Nihsuahna, nitumna, lei taw leh lei lu- kiu li nei-in, kongkhakpi thum kikoih ciat hi. Hih in Jerusalem Thak in minam khempeuh teen nading mun hi, cih limcing hi. Minam khempeuh in Pasian tawh kizopna nei uh hi. Hih khuapi pen kiu li nei a dung a vai kikim kilam hi. A vai leh a sanna stadia 14400 ( tai  144000) pha kim hi. Hih in a khang a khang a hotkhiatna ngah mite limcing hi (Mang. 7:4).

          Thuciam Lui biakbuka a siangtho bel mun in a dung, a vai kikim pang guk nei-a  kibawl hi (1Kum. 6:20).  Tua hi-in Jerusalem Thak in biakbiakna mun hi banah Siangtho Bel Mun hi ding hi. Jerualem biakbuk siangtho bel munah siampite bek va lut thei hi. Jerusalem Thak ah tatsa mi khempeuh lut ding hi.

          Mang. 21: 21 – 22:5 sim in.  Eden Huan tawh kibang thu bang kipulaak hiam? Hamsiatna om nawn lo ding hi, cih thu bang hong hilh hiam? Mang. 22: 3.

_________________________________________________________________-

__________________________________________________________________

          Jerusalem Thak a thupi-sak mahmah khat in Pasian’ tokhom pan a luangkhia nunna guntui hi (Pian. 2:10). Pasian’ mite in saltangin Jerusalem a phawkna mun Babylon a gun tawh tehkakna-in (Late 137), Jerusalem Thak a nunna gun gei-ah minam khempeuh kituahkhopna mun hi ding hi. Gun gei langtuahah minamte’ natna khempeuh a damsak nunna singkung po hi (Mang. 22: 2).  Damna cih thu in tua munah natna om ding, cihna hi lo a, tua munah natna om lo ding hi, cih hong hilhcianna hi zaw hi. Gimna, natna khempeuh kimu nawn lo ding hi. Tatsa minam khempeuh in a tawntungin Pasian tawh innkuan khat bang ding uh hi.

Friday                  March 29

Ngaihsutbeh Ding: “ Ellen G. White, “ Desolation of the Earth,” 653 – 661; “ The Controversy Ended,” 626 – 678, in The Great Controversy sim in.

          Mangmuhna Bu a tawpna-ah thupatna-a a pulaak thute pulaak kik hi. Khrih in vangliatna leh zawhna tawh hong pai ding a tawntung Pasian gam hong phut ding hi. Khrih hong pai kikna, a mite tawh hong teen khopna thute in Mangmuhna Bu mungtup lianbel hi. Hih bang thute in a piang thei lo ding hi lo hi. Jesuh hong pai takpi ding hi. Ama hong pai kik ding lamenna tawh i ngak hi.  Khrih, a hong pai kik ding a ngak mite in Mangmuhna Bu hong hilh thute i tel ding kisam hi. Tua dingin a pat panin a tawp dong sim kik kik ding kisam hi. Jesuh hong pai ding a ngak mite  in leitung nate mitsuan lo-in Amah bek mah i lamet ahih manin, Jesuh mitsuan tawntung ding kisam hi. Khrih in a hong pulaak khiat thu in lamet bei mi in lametna nei-in, gimna sung pan damna hong pia-in, lunghimawhna panin lungmuanna hong pia hi. Ama khut sungah na khempeuh om hi.

          Bei-na hong tunma-in Khrih a hong pai kik ding thu mun khempeuhah gen ding masuan muanna tawh hong kipia hi. Bangmah sem lo-in gum-ngak (passive) ding hi lo a, Pasian hong sawl bangin nuntakna (active) tawh ngak ding hong deih hi. Kha Siangtho leh Jesuh in “ hong pai in” ci-in hong sam hi (Mang. 22: 17). Tua sapna za-in Ama kiang zuan ding kisam hi. Tua in lungdamna, hotkhiatna thu hi. Hih thu mun khempeuhah kizelhsak ding kisam hi.

Kikup Ding Dotnate:

1.      Kum 1000 manna leh tua khit a thukhenna thu ngaihsun in. Tatsa              mite in a mangthang mite tawh kisai thu a theih nop khempeuh,                 Pasian in a lahtel ding hun kum 1000 sungin thei tel ding uh hi, cih                    thu in Pasian zia le tong bang hong hilh hiam?

2.      Mangmuhna Bu hong gen thute ngai-in, a zak bangin a nungta                   mite in thupha ngah ding uh hi (Mang. 1:3).  Mangbuhna Bu i                   sinna sung pan bang thute za-in nuntakpih ding na hiam?