LESSON 10 March 2 – 8
PASIAN’ TAWNTUNG
LUNGDAMNA THU
Sabbath Nitak:
Tu Kaal
Sung Sim Ding: Mang. 14: 6 – 12; Matt. 24: 14; Than. 12:13, 14; Pai. 20: 2-11;
Isa. 21:9; 34: 8 – 10.
KAMNGAH: “ Hih thu-ah
Pasian’ thukhamte leh Jesuh upna a zui mi siangthote thuakna a om hi.” (Mang.
14:12).
Hun nunungah Satan in a nasep lawhcing mahmah ding a, mi
tampi in sapi bia-in, ama ciaptehna ngah
ding uh hi. Ahi zongin Pasian tungah a citak mi tawmno khat om ding hi (Mang.
14: 1-5). Leitung in sapi nungzui taleh tua a cianlai Pasian’ mite in Topa
tungah citak ding uh hi. A tawpkhakna-ah
biakna tawh kisai-in mi khempeuh tungah kua bia ding cih sittelna hong tung
ding hi. Sapi a bia mite in taltung ahih kei leh taklam khutah ciaptehna ngah
ding hi. Tua in khentatna, gamtatna Pasian langpanna limcing hi.
Tua kawmkalah Pentecost ni khit a om ngei nai lo hotkhiatna
thu mi kimin za ding uh hi. Pasian in thuman langpan mite tungah thu a khen
ma-in, hilhkholhna thu pulaak dingin Ama sawltakte sawl hi. Satan in mun khempeuhah nasem hi. Lungdamna thu in
mun khempeuh zel ding hi. Pasian in leitung mite kisia ding phal lo hi; mi
khempeuh in nuntak tawntungna ngah dingin lampi hong bawlsak khin hi. Tua
hangin Khrih in mi khempeuh aa dingin hong si hi. A hong hotkhiatna a um mi in
tawntung siatna tawh kipelh ding a, a um lo mi in kisiatna thuak ding hi.
SUNDAY March 3
Vantungmi Thumte’ Thupuak
Pasian in leitung bei ma-in hilhkholh thupuak a tangko
dingin, a limcing vantungmi thum in van kimlai-ah leeng kawikawi uh hi. Greek
laimal ‘angelos’ kici hi. A khiatna in ‘sawl tangzang thupuak’ cihna hi. Lai Siangtho sungah vantungmite in Pasian’ nasem mite limcing
hi(Mal. 2:7; Matt. 11: 10). Mangmuhna Bu
sung a vantungmi thumte in hun nunung a mun khempeuhah vantung thupuak a tangko
Pasian’ mite limcing hi.
Mang. 14:6; Matt. 24: 14 sim in. Vantungmi khatna in tawntung lungdamna thu
puak nei hi (Mang. 14:6). Vantungmi khatna’ thupuak in bang hi-a, bang mungtup
nei hiam? Bang hangin tua thupuak in thu-um mi khempeuh aa dingin thu guipi hi,
kici hiam?
__________________________________________________________________
______________________________________________________________
Hun nunung a vantungmi’ thupuak in hotkhiatna thu hi. Khrih
in ei aa dingin a sep khempeuh siksanin Pasian in eite hong hon hi. Hih in
Lungdamna Thu hi. Lungdamna Thu in Pasian tawh kipawl hi. Vantungmi khatna
thupuak in tawntung lungdamna thu hi; bang hang hiam tatsat lo-in Pasian in
mawhnei mite honkhia dingin nasem tawntung hi.Pasian in tua hotkhiatna leitung
kipiansak ma-in a geelkholhsa-in koih hi (2Tim. 1:9; Titus 1:2). Lungdamna thu
i cih in hotkhiatna leh thukhenna kihel hi. Hotkhiatna thu a sang mite aa
dingin lungdamna hi ding a, ahi zongin tua thu a nial mite tungah thukhenna hi
ding hi.
Vantungmite in tua Lungdamna Thu awging lian mahmah tawh
tangko uh hi (Mang. 14: 7, 9). Tua
thupuak in thu himawh leh a thupi mahmah thupuak hi; mi khempeu in a zak ding
uh thupuak hi. Bang hang hiam cihleh tua thupuak in tawntung sihna leh tawntung
hinna thu hi. Tua hangin minam khempeuh, pau-nam khempeuh, mun khempeuhah
kitangko hi. Sapi in zong mun khempeuh, minam khempeuh tungah nasem hi (Mang.
13: 7). Satan in minam khempeuh, pau-nam khempeuh tungah nasem ahih manin,
hotkhiatna thu in zong mun khempeuhah kitangko ding hi.
Satan leh ama pawlte, gulpi – paganism/a si khin mite tawh
kiho-na; tui sung pan sapi – Roman Catholicism limcing; tuu melpua sapi/
kamsang zuau-te (thuman pan lampial Protestant limcing) khempeuh langah thuman
tangko dingin Pasian’ mite in vantungmi thumte’ thupuak tangko uh hi (Mang.
16:13, 14). Amaute in vantungmi thumte’ thupuak langdo-in thu hilh uh hi.Hun
nunungah thu nih kido ding a, a nih un leitung mite zo dingin hanciam uh hi.
Seventh-day Adventist thu-um mi na hihna tawh Lungdamna Thu
gen dingin sapna ngah na hi hi. Tua dingin bang na sem hiam? Nasepbeh ding dang
a om hiam?
MONDAY March 4
Vantungmi
Khatna Thupuak: Khen Masa
Mang. 14:7; Thna. 12: 13, 14 sim in. “Pasian kihta un” cih
thupiak a khiatna bang hi ding hiam? Koi bangin Pasian kihtaakna leh Lungdamna
Thu in kizopna nei hiam? Lungdamna Thu in Pasian’ thukhamte zuihna tawh
bangci-in kizom hiam? (Rom. 7: 7 – 13).
Pasian kihtaakna leh Ama minthansakna in bangci kizop hiam?
__________________________________________________________________
__________________________________________________________________
Tawntung Lungdamna Thu siksanin “Pasian kihta unla, Ama min
phat un” ci-in kitangko hi (Mang. 14:7). Khrih in mawhna sung pan eite a hong
hotkhiat nadingin a hong sepnate theitel hi lehang Ama um lo-in i om kei ding
hi. Pasian kihtakna leh Ama min phatna in tonkhawm hi (Mang. 11: 13; 15:4).
Pasian kihtaakna in Amah tawh kizopna man neihna hi-in (Job 1:8); Ama min
phatna in Ama thumanna hi.
Pasian kihta cih ciangin Pasian lau-na hi lo hi. Ahi zongin
Amah thupi ngaihsutin, i nuntakna-ah Amah mah masak tawntung cihna hi. Hun
nunung a Pasian’ mite in Pasian kihta uh hi (Mang. 11: 18; 19:5). Pasian a
kihta mi in a thupiakte zuihna tawh Ama min thangsak hi ( Thkna. 5: 29; 11: 18;
19:5); a gamtat in Pasian’ zia le tong kilangsak hi (Pian. 22: 12).
“ Pasian thukhenna hong tung ta ding hi, cih a thei mi in
Pasian zahtaakih Ama minthangsak hi (Mang. 14: 7, 10). Tua thukhenna in Khrih
hong pai ma-a thukhenna hi. Hih thukhen mungtup in Pasian a um mite in Ama
nasem takpi hiam, sem lo hiam, cih sittelna hi-in, nunna zia tungtawnin Pasian
nasem leh nasem lo kilang hi. A tawpkhakna-ah i tun nading mun, tawntung hinna
ahih kei leh tawntung sihna hong kikhen ding hi (Mang. 22: 11). Jesuh in mimal khat ciat thaman pia dingin
hong pai ding hi (Mang. 22: 12).
Mangmuhna Bu sungah thukhenna in Lungdamna Thu tawh kipawl
hi. Pasian tawh kizopna nei mite aa
dingin thukhenna in lungdamna hi ding hi. Amaute aa dingin Pasian thukhenna in
hotkhiatna, suahtakna leh midik ahihna uh kilang ding hi. Ahi zongin a thuman
lo mite aa dingin thukhenna in dahna hi ding hi. Thukhenna in mawhna kisikin Pasian kiang zuan
ding sapna hi. Bang hang hiam cihleh Pasian in kuama kisia ding deih lo hi; ahi
zongin mi khempeuh a mawhna uh kisik ding hong deih hi (2Pet. 3:9).
Koi bangin thukhenna-ah nang guak bek na om thei ding hiam?
Mawhsakna tawh bang in hong kipelhsak ding hiam? Hotkhiat na kisapna leh bang
hangin thukhenna in vantungmi khatna thupuak tawh kizom hiam?
TUESDAY March 5
Vantungmi Khatna Thupuak:
Khen Nihna
Leitung hun nunungah biakpiakna leh Pasian’ thupiak bangin
a thukhamte zui leh zui lo cih thu hong lian semsem ding hi (Mang. 14: 12).
Leitung mi khempeuh khennih hi ding hi. Pasian kihtakin, Amah a bia mite leh
sapi kihta-in sapi a bia mite hi ding hi.
Thukham 1- 4 sim in (Pai. 20: 2-11). Tua khitteh Mang. 13
sim in. Koi bangin sapi in amah kibia dingin thupia a, (Mang. 13: 15); a kibia
dingin sapi lim bawlin, (Mang. 13: 14, 15), Pasian leh Ama min langpang hiam?
(Mang. 13: 5, 6). Koi bangin sapi ciapteh ngahna in Satan in Pasian’ thukham 1-
4 a langdo kilangh hiam? _________________________________________________________________ __________________________________________________________________
Thukham 1-4 in biakpiakna tawh kipawl hi. Hun nunungah hih thukham in Pasian tungah
citak leh citak lo sittelna hong suak ding hi. Khrih leh Satan kilangpanna in
biakpiakna leh thukham 1-4 tawh thute hi. Vantungmi khatna’ thupuak hun
nunungah “ Tuipi a kipan na khempeuh a piangsak Pa bia un” cih thu in Thukham
li-na pulaak hi (Pai. 20:11). Piangsak Pa bia ding cih thu in Sabbath
tawlngakna hong hilh hi (Pai. 31:13;
Eze. 20:12). Vantungmi khatna thupuak in Piangsak Pa bek bia-in, i nuntakna-ah
Amah bek mah liansak pen ding hong hilh hi. Hih thupuak in Satan’ zuau khemna
khempeuh susia-in biakna man lo leh pasian man lo khempeuh kisiatna thu pulaak
hi. Thukham li-na thupiak Sabbath siksanin sittelna lianpi hi ding hi.
“Kumpi’ thupiak tawh kizui-in Thukham li-na zui lo-in
biakna man lo a zuih zawkna in Pasian langpanna, Piangsak Pa langpan mi hi.
Leitung thunei-te thupiak zuihzawkna in sapi tawh kipawlin, sapi ciaptehna
ngahna hi-in, Pasian thupiak a zui mi in, Pasian’ ciaptehna ngah hi.” Ellen G.
White, The Great Controversy, 605.
WEDNESDAY March 6
Vantungmi Nihna’ Thupuak
Vantungmi khatna thupuak in a nungta Pasian kihta-in Amah
bek bia dingin hong sawl hi. Vantungmi nihna thupuak in biakna man lo Babylon
kisiatna pulaak hi.
Mang. 14:8; 18: 2; Isa. 21:9 sim in. Babylon “kisiatna” cih kammal nihvei kigelh
hi. Bang hangin Babylon kisia khin hi napi mailam hun nunungah a kisiat ding
kipulaak hiam?
_________________________________________________________________
__________________________________________________________________ Babylon in khuapi lian khat
hi. Babylon in Pasian langpang banah ama mite a bawlsia khempeuh limcing hi.
Isa. 14: 12 – 15 Babylon in Satan hi. Satan in Pasian tawh kikim dingin hanciam
hi. Hun nunung a Babylon in (Mang. 17:5)
biakna man lo, Lai Siangtho pan lampial
Roman Catholicism leh Protestant limcing hi. Amaute in Satan tawh kipawlin
nasem uh a, Pasian’ mite langdo uh hi (Mang. 13: 11 – 18). Lai Siangtho panin
lampial biakna in nidang Babylon mah bangin Pasian tungah kiliansak, Ama ukna
nial uh hi. Nidang Babylon a kisiat mah bangin, vantungmi nihna thupuak in
biakna man lo Babylon kisiat ding pulaak hi.
Mang. 14:8; 17:2;
18: 3 sim in. Koi bangin Babylon in ama lenggahzu leitung mite
khaamsakin amaute paktat mawhna bawl hiam? Tua lenggahzu in bang hi ding hiam?
_________________________________________________________________
________________________________________________________________
Babylon in leitung minam khempeuh lenggahzu khamsakin
paktat mawhna bawl ahih manin thukhenna thuak hi. Jeremiah in Babylon in
leitung minamte tawh paktat mawhna bawl hi, ci-in pulaak hi (Jer. 51:7). Mang.
17 in hun nunung a Babylon in ama paktat mawhna tawh leitungmite lenggahzu khaamsak
hi (Mang. 17: 2). Leitung mite in sapi
bia dingin Satan in amah tawh kipawl ukna neite tawh hanciam hi (Mang. 13: 11-
18).
Babylon lenggahzu in Lai Siangtho tawh kituak lo biakna pan
thuhilhna man lo, hotkhiatna zuau thuhilhna limcing hi. Zukhaam mi in thu
hoihtakin ngaihsun thei lo hi. Babylon’
zu a khaam mi, a ngaihsutna khempeuh tua zu in ukcip ahih manin sapi bia-in
sapi ciaptehna ngah hi. A zu khaam a ven khit ciangin a khentat khialhna
kiphawk ding a, ahi zongin kikhel ding zekai khinta ding hi(Mang. 17:15 – 17).
Babylon zu dawn nadingin Babylon ah va ten kul hiam? Koi
bangin mi khat in Babylon zu khaam hiam?
THURSDAY March 7
Vantungmi Thumna Thupuak
Koi bangin Mang. 14: 12 in Pasian tung a citak mite pulaak
hiam?
______________________________________________________________ _____________________________________________________________
Pasian tungah a citak mite leh Pasian’ hehna a thuak ding
mite enkak in (Mang. 14: 9, 10). Thuciam
Lui sungah lenggahzu dawnna in Pasian’ hehna limcing hi (Jer. 25: 15, 16). Sapi a bia mite in, a lauhuai Pasian’ hehna
limcing lenggahzu ciik khaam uh hi. Nidanglai-a mite in lenggahzu sungah tui a hel uh ciangin tua in
ciik nawn lo hi. Tha za dingin lenggahzu
a zat nop uh ciangin tua sungah helpih tuamtuam nei uh hi. Lenggahzu ciik in
Pasian’ hehna, hehpihna om lo a thukhenna limcing hi (Late 75: 8).
Mang. 14: 10, 11; 20: 10 – 15 sim in. Koi bangin Isa. 34:
8- 10; Jude 7 in “ a tawntung meikuang” cih thu hong theitelsak hiam?
_______________________________________________________________ ______________________________________________________________
Tawntung meikuang leh kaat in na khempeuh kisiatna limcing
hi. Mei leh kaat in thukhenna-ah kizang hi (Pian. 19: 24; Isa. 34: 8-10). Lai
Siangtho sungah kisiatna meikhu kahto in limciinna nei hi. Isaiah in meikuang
leh kaat in Edom susia ding hi, ci-in genkhol hi. Edom kisiatna mei in a tawntung in kuang ding
hi (Isa. 34: 10). Jude in Sodom leh Gomorrah kisiatna mei kuang tawntung hi
(Jude 7). Hihte in a met ngei lo meikuang gen hi lo hi; tu-in hih munte
meikuang nawn lo hi. Tawntung meikuang cih in a mit ngei lo meikuang a gen hi
lo-in, tua meikuang hangin a tawntung kisiatna a pulaak hi zaw hi. Tawntung
meikuang in tawntung manthanna pulaak hi-in,
a kat ding khempeuh a bei siang dong meikuang ding hi.
Bei hun om lo, a tawntungin gim thuak ding hi lo cih thu in
thu hoih hi mahta leh amaute thuak ding
gimna in ngaihsut zawh hi lo hi. A lauhuai gimna tawh kipelh nadingin bang thu hilhkhol ding na hiam?
FRIDAY March 8
Ngaihsutbeh Ding: Ellen
G. White, “ The Final Warning,” 603 – 612, in The Great Controversy.
Hun nunungah Pasian’ mite
in midangte tungah hotkhiatna thuman hilh dingin kisawl hi. I mai-ah na
lianpi sep ding in hong ngak hi. Ahi zongin a sem zo lo ding i hi kei hi. Pasian in ama vangliatna hong pia dingin
kamciam hong pia khin hi. “Nasep kizawh nadingin Kha Siangtho in Pentecost ni-a
a nasepna khiam lo ding hi. Thu kinial zawhna in mite lungsim zo lo ding a, Kha
Siangtho bek in mihing hong khel hi. Thuman khaici kivawh khin a, tua khaici hong po khia-in gah nei
ding hi ta hi.” Ellen G. White, The Great Controversy, 611, 612.
Hotkhiatna thu kitangko kizawh ciangin leitung mi khempeuh
khennih suak ding hi: Pasian tawh kizopna nei mite leh sapi tawh kizopna nei
ding a khentat mite hi ding hi. Lokho pa thugentehna in hih thu mah hong hilh hi. Buhte ansal
kipuak ding hi (Mang. 14: 14 – 16); lenggahte kituancil ding hi (Mang. 14: 17 –
20). Hih thu Mang. 17 – 18 in limtak
hong hilh hi.
Kikup Ding Dotnate
1. Vantungmi thumte thupuak a tangko SDA pawlpi simloh bang pawlpi
om hiam? I nasep in bangzahin thupi hi, cih na phawk hiam?
2. Bang hangin Khristian biakna sungah thukhenna thu kiza nuam lo
hi ding hiam? Khrih hong pai-a thukhenna in bang thu tawh kisai hi ding hiam?
Koi bangin midang khat kiangah Khrih hongpaima thukhen (sittel
thukhenna)hilhcian ding na hiam?
3. Hun nunungah Sabbath thupiak a thupi-na ngaihsun in. Bang hangin
piansak Sabbath in hun nunung aa dingin thu lian mahmah suak hiam? ( Pian. 2:
2, 3). Kua bia zaw ding – vantung leh leitung a
Piangsak Pa maw, ahih kei leh sapi bia ding maw?Pasian in na khempeuh
piangsakin leitung piancil a kipan Sabbath om khin ahih leh, bang hangin hun
nunungah Sabbath hangin buai-na lianpi hong tung ding hiam?
