9March
2019
Voksa
hangin Buai-na
Gilson Neto, Kum 29
Kum 17 ka phakin ka vengte khat in
Adventist pawlpi tawh kisai thu hong gen hi.
A hong gengen hangin ka kin kei hi. Bang hang hiam cihleh voksa duh
mahmah khat ka hi a, Adventist pawlpi in voksa nek ding phal lo hi. Ni khat Sao Tome khua sung mun khatah Pasian
thugenna khatah thungai dingin mi khat in hong zawn hi. Kei zong thungai dingin
ka va pai hi. Nitaksial ka va pai hi.
Thungai dingin hong zawn ka veng nu in
hih pawlpi ah ka min na pia a, Sabbath ni ciangin pawlpi laihawm sungah ka min
na kigelh hi. Bangci bangin ka min kihel hiam, lamdang ka sa hi.
Sabbath kik ciangin ka nasepna munah
nasem dingin ka kuankhia hi. Ka veng nu in ka kikhoploh hong thei-in, nitak
ciangin Lai Siangtho sinpihna hong nei hi. Tawlkhat khit ciangin Sabbath ni
nasep khawlin kikhawm dingin ka ngaihsun hi.
Biakinn ah ka vengnu leh midang tampi
ka mu a,kikhop nop ka sa mahmah hi. Ahi
zongin Sabbath ni nasem lo ka hih manin, hamsatna hong tung hi.Tua hi-in
Sabbath nasem dingin ka zuankhia hi. Biakinn ah hong mu khin ngei-te in Sabbath
ni nasem dingin ka kuan ciangin, “ koi ah pai ding na hiam, ci-in hong dong
pahpah uh hi. Tua bangin hong dot uh ciangin, nuam ka sa het kei a, a hong muh
loh nadingun ka bu zelzel hi. Sabbath ni nasem dingin ka kuan ciangin a hong
mu-te in, koi-ah pai ding, ci-in hong dong uh a, sammet ding, ci-in ka dawng
zel hi.
Lungbuai-na lianpi ka tuak hi. Biakinn
ah kikhawm mite in bang hangin hong kikhawm lo na hiam, ci-in hong dong zel uh
hi. Nuamsa lo ka hih manin tua a kipan Sabbath ni nasep ka khawl phot hi. A
sawt lo-in nasep ka ngah nawn kei hi.
Ko innkuan sungah Adventist khat zong
om lo ka hih manun ka nu le ka pa heh mahmah uh hi. Ka nu in ka nek theih loh
ding meh bawl zel hi. A an huan peuhpeuh ah voksa thau na khahsak den hi.Tam
veipi anne lo –in ka ihmu hi.
Ka nu in ‘ Bang hangin voksa ne lo pawlpi-ah kikhawm
na hiam, ci-in hong dong hi. Ka dawng kei a, ka sanggamte in hong en gige uh
hi. Kha 9 khitteh SDA pawlpi ah ka kituiphum hi. Pastor pa in a pawlpi ah
maithak muakna zong hong nei hi. Pawlpi mi numei khat in hamsatna tampi na tuak
kha ding hi, ci-in hong gen hi. Hamsatna tampi thuak khin ka hih manin lamdang
ka sa kei hi.
Ka nute in tui ka kiphum a theih uh ciangin inn panin
hong hawlkhia uh hi. Ka pai nading thei lo ka hih manin ka kap hi. Kha 2
khitteh inn ka zuan kik a, ka nute thawhma-in inn ka tung hi. Ka tuiphum ni-a
kituiphum pih nu in a innah hong samin, amau inn ah ka om hi. Nasep ding lah om
lo, thungen tawntungin Topa tungah ka hamsatnate ka pulaak den hi.
Tawl khat khit ciangin Taiwan company
khatah na kasem hi. Ka ngah sumte lak pan pawl khat ka nulepa ka khak hi. Tua
in amaute tawh kizopna hong ngahsak kik hi. Pasian in ka nuntakna-ah nalamdang
lianpi hong musak hi. Ka sanggam 7 lakpan 5 in Adventist hong suak uh hi. Tua
banah ka sanggam dang 2 zong tui kiphum uh hi. Ka vekpi-un mi 10 bang Adventist
pawl sungah ka om uh hi. Ka pa zong a pumpi zawtma-in biakinn ah hong kikhawm
zelzel hi. Tu-in Sao Tome khua-a Adventist sangah nasemin ka om hi. Naupangte
huanbawl dan, mehteh mehgah bawl dan ka hilh hi.
Ka hamsat mahmah laitakin hong huh, ka
kituiphum pih nu’ sanggamnu tawh ka kiteeng hi.
Kum khat a pha tanu khat ka nei uh hi. Topa a muang mite Zion mual
bangin kip tawntung ding hi (Late 125: 1) siksanin nisim ka kalsuan hi.
Tu quarter Sabbath School 13 na sumpi in Sao Tome khua-a Adventist
sangah kipuak ding hi.
MUC in Kachin, Ngawng Chaung ah biakinn
lamna dingin kipuak ding hi.
