9Febraury
2019. Sabbath 6na
Thupha
Kepna leh zeekna Kipatna
Steward (neihsa kem) cih kammal in
nidanglai tanglai kammal hi. Tu hunin kizang nawn lo hi. Tuhunin manager kizang
zaw ta hi. Steward in van le nate nei pa hi lo-in, mite’ neihsa kem, a kisawl
bangbangin nasem mi hi.
Neihsa kem leh zeekna thu koi pan hong
kipan hiam? Hih thu tawh kisai-in Lai
Siangtho sungah thunih kimu thei hi. Mihing in mihing ahihna leh Pasian in Pasian ahihna in neihsa kep leh
zeekna hong hilh hi. Hih in Pasian mai-ah i dinmun pulaak hi.
Na khempeuh kipatna en lehang, Pasian
in na khempeuh piangsak hi. Nang le kei, kimlepaam nate, ni, kha, aksi a kipan
na khempeuh Pasian’ bawlsa hi. I neihsa khempeuh Pasian’ hong piak hi. Pasian’
tapa, tanu i hih manin masuan i nei hi. Bang hang hiam cihleh Ama bawlsa i hih
manin a bawlsa na khempeuh hoihtakin kem ding thu hong kipia hi. Hih thu Eden
Huan panin hong kipan hi. Pasian in a bawlsa na khempeuh kem ding leh puah
dingin thu hong pia hi. “Tua bangin Pasian in ama lim sunin mihing piangsak a,
Pasian lim sunin amah piangsakin numei le pasal piangsak hi. Pasian in amaute
thupha pia a, amaute tungah, “cipha unla pung un; leitung khempeuh dim unla
thuzawh un. Tuipi ngasate, huihlak vasate, leitungah nuntakna nei khempeuh
tungah ukna na nei ding uh hi,” ci-in thupha pia hi (Pian. 1: 27, 28 ).
Mi kimkhat in nate tungah ukna hong
kipia siksanin amau ut bangbangin gamtattheih dingin ngaihsun uh hi. Piansak
nate tungah ukna a hong kipiak hangin na khempeuh in Pasian’ ukna nuai-ah om
hi, cih pen phawk tawntung ding kisam hi. Leitung in mihing’ neihsa hi lo hi.
Nate kem ding, a puah dingin Pasian in hong sawl hi bek hi.
Thuumna:
Pasian in muanna tawh a hong kepsak thupha-te, nate hoih tak kemcing ding kisam
hi.
Thungetna:
Topa aw, leitung in nangma aa hi-in, mihing in a suksiat ding hi lo hi. Nangma
bawlsa ahih manin piansak nate ka it uh hi. A hoih, a etlawm, na vangliatna, na
ciitna kilangsak na bawlsa nate a kem, a puah siam dingin hong huh in. Amen.
