8
June 2019 Sabbath 23na
I
nuntakna Pasian pia masa
Sawltak Paul in, Macedonia khua mite
kipiakkhiatna siksanin, Korin khua thu-um mite in zong Jerusalem a om nungzuite panpih dingin
hanthawn den hi.
“Sanggamte aw, Masedonia gam
pawlpite-ah Pasian’ hehpihna hangin a piang thute ka hong theisak nuam uh hi.
Amaute in haksatna a tuamtuam phukha-in nakpitakin ze-etna thuakin, amaute
zawng mahmah hita se le-uh lungdam mahmah uh ahih manin piakna lamsangah cingh
thei mahmah uh hi. Amaute in amau ngahna tawh kituak bekin a pia hi lo-in, a
piak zawhzah dingun a kilawm sangin a tamzaw a piakna uh ka thei taktak uh hi.
Kuama sawl hi lo-in amau lungsimah a uttawmna uh tawh, Judea gam a Pasian mite,
ko zing hong huh sak un, ci-in hong thumthum uh hi. Hih bangin a gamtatna uh
kote’lamet sangin sangzaw pek hi. Amaute
pen Topa tungah kipia masa uh a, tua ciangin Pasian’ deihna bangin kote tungah
zong a hong kipia uh ahi hi.” 2 Kor. 8: 1-5.
Hih in thu nih hong lak hi. A masa-in
Macedonia thu-um mite in bang mah nei lo hi mah ta le-uh, piakkhiat hat uh hi,
cih thu hong hilh hi. Nihna-ah amaute
piaknopna neisak thusim kilangh hi. Amaute in Topa tungah kipia masa phot uh
hi. Tua khit ciangin a neih leh lamhte pia uh hi.
Huaihamna zawh nadingin Pasian hi
taleh midangte tungah pia hi. Topa pia masa uh hi. Topa’deih bangin a nungta
thei dingin ki-ap uh hi. Ama nunzia bangin i nuntak ciangin piakna thadah lo-in
piaknopna lungsim hat semsem ding hi. Ama zia le tong a nei mi in neihsa kepna leh zeeksiamna nei
ding hi. Tua bang mite in Macedonica mite bangin huhna piak ding thacial lo
ding uh hi.
Thuumna:
Nisim in Topa tungah ki-ap ding masak hamtang in. Ama zia le tong a nei dingin ki-ap in.
Thungetna:
Topa aw, nangma deih bangin hong nungta-sak in. Nangma zia le tong hong neisak
in. Nong piak thupha-te midangte tungah
a hawmsawn zo dingin hong makaih in. Amen.
