6April
2019. Sabbath 14na
Sawm-ah
khat leh Siahpiak Dingte
“Kaisar kumpipa’ sum Kaisar kumpipa na
pia un. Pasian’ sum Pasian na pia un,”a
ci hi (Matt. 22: 21).
Pharisee-te in Jesuh mawhmat dingin
encik uh hi. Caesar tungah siah piak ding kilawm hiam, ci-in Jesuh dong uh hi.
Jesuh in Roman ukpite tungah siah piak ding kilawm bangin pia kei le-uh kua
tungah pia nawn ding uh hiam? Jesuh in amaute kiangah Denarious, sum tang khat
hong lak dih un, ci-in sawl hi. Tua sumtang tungah emperor’ lim kisuang
hi. Jesuh in amaute kiangah kumpi tawh
kisai-te kumpi tungah piak ding hi-in, Pasian tawh kisai-te Pasian tungah piak
ding hi, ci hi. Tua khitteh bang mah dong ngam nawn lo uh hi.
Sawm-ah khat, sumpite leh siahpiak
kikim hi, ci-in na ngaihsun hiam? Sum ngahna, vanzuak, vanlei-na tung panin
siah kipia-beh hi. Siahpiak ding a om ciangin vangik bangin kingaihsun hi. Sawm-ah khat piak vangikin na ngaihsun hiam?
Koi bangin sawm-ah khat leh sumpi na khia hiam? Kumpi tungah siahpiakma maw,
ahih kei leh siahpiak khit, sum zat dingteng dawh khitteh, a cian lai tungah
sawm-ah khat maw? Tua bangin khat khit
khat dawk khia khia lehang, a tawpna-ah bang mah cian nawn kei leh, sawm-ah
khat leh sumpi ding om kei leh ee?
Sawm-ah khat leh sumpi khiat in
biakpiakna khat hi. Siahpiak danin ngaihsut ding hi lo hi. Sawm-ah khat leh sumpi khiatna in na
khempeuhah Pasian i masakna, Amah i muanna hi-in, sum le paai neihzah pulaakna
hi lo hi. Amah a muang mite in sawm-ah khat leh sumpi khia zo dingin amaute
tungah Pasian’ hehpihna thupha kicing tawntung hi (Mal. 3: 10). Zatna ding
khempeuh dawhkhiat khit ciangin a cianglai sung pan sawm-ah khat leh sumpi khia
pan ding maw, ahih keileh ngah vekpi sung pan na khia zaw diam? Koi tungah
Pasian’ thupha na sang zaw nuam hiam? Ngahna khempeuh tung pan maw, ahih kei
leh a cianlai teng pan maw? Pasian
tungah piakna in tamlua cih om lo ding hi. Pasian in na khempeuh hong pia hi.
Thuumna:
Sumpi khiatna a kipan na khempeuhah Topa masak ni.
Thungetna:
Topa aw, na khempeuhah nangmah kong masak zawh nadingun hong huh in. Amen.
