“ Jerikho khua-ah Jesuh lut a, a paisuak
dingin khuasung a nawk laitakin, Zakkhias a kici siahdong ukpa khat na om a,
amah mihau khat ahi hi. Amah in Jesuh kua hiam cih a muh nadingin hanciam hi;
ahi zongin amah mi tuntom khat ahih manin mihon lakah a mu zo kei hi. Tua ahih
manin amah na matai a, Jesuh a muhtheih nadingin a tot nading lampi gei-a
theithek kung tungah a na kah hi. Jesuh, tua mun a tun ciangin khuadak to-in
ama kiangah, “Zakkias aw, manlangin hong
kumsuk in. Na inn-ah tuzan kong taam ding hi,” a ci hi.
Tua ahih manin Zakkhias zong hong kum
mengmeng a, lungdam mahmahin a inn-ah Jesuh a tungsak hi. Hih thu a thei mi
khempeuh phun uh a, “ Mimawh pa’ inn-ah a giak dingin Jesuh a pai hi,” a ci uh
hi. Tua ciangin Zakkhias dingin Topa kiangah, ‘ Topa aw, “ ka neihsa a kimkhat
mizawngte tunga ka pia ding hi. Mi khatpeuh khemin a na ka laksak leh a zah
li-in ka lohkik ding hi,” a ci hi. Tua ciangin Jesuh in ama kiangah, “ Tuni-in
hih innkuan in hotkhiatna a ngah hi. Hih mipa pen Abraham’suante khat zong hi
lai hi. Bang hang hiam cihleh a mangthangte a zong ding le a honkhia dingin
Mihing Tapa a hong pai ahi hi,” a ci hi (Luke 19: 1-10).
Zakkhias’ nunzia in thu tampi hong
hilh hi. Bangci bangin Zakkhias kikhel
hiam? Thuman lopi-in a sepna panin, bang hangin a neihsa lak pan a zahli
mizawngte huh ding kamciam hiam? Leiba loh ding hi mah hi. Zakkhias in loh kik
banah a zah tampi-in behlap ding kamciam hi. Thuman lo-in a sepsa khempeuh
thuman tawh bawlpha kiknuam hi. Na kim na paamah nengniam thuak a om hiam?
Thuman lo-in nasem mi in Zakkhias bangin kikhel ding kisam hi.
Thuumna:
Thuman lohna hangin mitawh na kizopna kisia om hiam? Koi bangin kizopna hoih
nei ding na hiam?
Thungetna:
Topa aw, nong piak thupha-te cimawh mi huhin,
a zangsiam dingin hong makaih in. Amen.
