26
January 2019
Sabbath
Ni Kikhop Nading Biakinn Khat
Ivaldo
Da Conceicao Nazare, kum 23
Tan 10 a sinlai Ivaldo in phungzi suak
ding ngimna nei hi. Pawlpi kimakaihzia, pawlpi thu-let khempeuh hoih takin sin
hi. A sangkahkawmin Nampula khua-a biakinnah thuhilhsia semkhawm hi. Tua panin
phungzi suak dingin Maputo khuapi-ah kituah dingin hong geel hi. Tua bangin a
thusinte leh Thukham 10 enkak zel hi. Lai Siangtho sung thute leh ama sin thute
tampi kilamdang hong mu khia hi. Siampipa kiangah tua thute va dong zelzel hi.
Ahi zongin siampipa in dong thei tuan lo hi.
A sangkahna-ah Ivaldo in Lai Siangtho
leh amau pawlpi’ hilh thute kibatlohna kikum dingin a lawmte 30 val bang
kaikhawm hi.Tua bangin a nasepna uh hangin bishop in khawlsak a,tua bang
nasepna in mawhna hi, ci-in mawhmai-na ngen ding hilh hi. Tua hi keileh pawl
sung panin hawlkhiat thuak ding uh hi.
“Sangnaupangte in Topa Pasian tung
bekah mawhmai-na ngen ding,bishop tungpan mawhmai-na kingah lo hi,ci-in dawng
kik uh hi. Bishop in tua sangnaupang 30
a vekun sanghawlkhia hi.
Sangnaupangte in Lai Siangtho sinna
nei uh a,ni 7 ni in Sabbath,Pasian biakpiakna
ding ni hi,cih hong thei uh hi. Ahi zongin Nampula khua-ah Sabbath ni,biakpiakna nei
kuamah thei lo uh hi. Tua bang tengtawh amau zong kikhenthaang uh a,pawl khat
pawlpi dangah lut uh hi. Pawl khat
Muslim biakna zui uh hi. Ivaldo’nu le pa in
phungzi a ut nawn keileh zong
phamawh lo,ci-in inn ciah dingin sam uh hi.
Sunday ni khat a kikhopna-ah nupi khat
in Ivaldo kiangah Saturday ni-a kikhawm
pawlpi khat om hi, ci-in hilh hi. Ivaldo
in tua thu a lawmte zasak hi. Ahi zongin a lawmte’n lunglut nawn lo uh hi.
Ivaldo leh a lawmte 3 tua biakinn ah va kikhawm uh hi. Sabbath kik ciangin zong
Ivaldo leh a lawmte 3 va kikhawm kik uh hi.
Kha 5 khit ciangin Ivaldo in kituiphum
hi. A kituiphum ding a nu le pa kiangah zasak hi. A nu in tua thu na za khin uh
hi. Ivaldo’ nu in “na nunzia tampi
kikhel ka muh uh sawt mahmah khin hi; Lai Siangtho sinna zong na neihlam ka
thei uh hi, ci-in pulaak hi. Ahi zongin a pa in SDA a suahleh inn pan hawlkhia
ding, ci hi. Sabbath kik ciangin Ivaldo va kikhawm kik a, a pa in inn pan
paikhia in, ci hi. Ahi zongin a nu in tua bang ding hi kei, ci-in a pasal
zolbawl hi.
Ivaldo’ pa in tua ni a kipan sangsap
ding bang mah pia nawn lo hi. Na hankuang ding simloh bangmah vaihawm nawn kei
ning, ci-in a pa in hehsa-in pulaak hi. Ivaldo in daupai semsem a, a pa’ hehna
lian semsem hi. A pa in mite kiangah ka tapa in HIV, AIDS nei hi, ci-in pulaak
kawikawi a, kuamah in Ivaldo tawh kikhawl nuam nawn lo uh hi.
Ivaldo in a pi kiangah kum 1 val
khawng va om hi. A pa in ka mawhna hong
maisak in. Inn ah hong ciah in, ci-in a tapas am kik hi. A pa in sangsap ding
zonsakin, Ivaldo in college kahna-ah Sabbath ni leh a laivuan kituak ahih
manin, Ivaldo in tua ni laivuan lo hi. A pa heh mahmah hi. Na sangkah nadingin
sum kong zonsak a, laivuan lo, ci-in a pa hehsuak hi. A pa in nasep zonsak a, a
nasep in Sabbath ni zong nasep kuan kul ahih manin a nasep khawl hi. Hong huh
nawn kei ning, ci hi.
Ivaldo in amah leh amah in nasep zong
tawm hi. Lai tuamtuam gelh kawi kawi hi.Tu in kum 23 pha khin a, lungkia lo hi.
Ama teci panna hangin mi 10 val in Adventist hong suak uh hi. A sanggam 3 leh a
nu uh in zong Adventist suah ding pulaak uh a, ahi zongin a pasal in Adventist
na suahleh kikhen ding ci-in a kituiphum ding phal lo hi. Ivaldo in a pa zong
Adventist a suah nadingin thungen hi.
Tu quarter Sabbath School sumpi in Nampula
khua-a om HIV/AIDS natna tawh kinusia tagah kepna-ah kipuak ding hi. MUC in
Kachin, Ngawng Chaung ah biakinn lamna dingin kipuak ding hi.
