“Midian mite le Efah mite’kalaoh note,
kalaoh honpite in nang hong tuam ding uh a, Sheba gam sunga om khempeuh hong
pai ding uh hi. Amaute in kham le paknamtui hong paipih ding uh a, TOPA phatna
a taangko ding uh hi” (Isa. 60: 6).
Tusawngteng leitung in Jesuh hong
suahna thu tawh kidim hi. Jesuh hong suahna in nuamna leh lungdamna tawh kidim
hi. Pasian Tapa in mihingin hong piang
hi. Jesuh, naungekin a hong suahlai-in
Magi-te in, kham, saledi paknamtui leh myrrh paknamtuite, letsongin va puak uh hi. Hih nate in kumpite tungah kipia letsong hi.
Namdangte in a pasian biakna-in zong zang thei uh hi. Kumpi Seleucis Nihna
Callinicus in Miletus khua-ah, AD 243 kumin, Apollo pasian tungah pia hi, ci-in
kiciamteh hi. Isaih in zong namdang kumpite in Topa phat uh hi, cih pulaak hi.
Hih namdangte mite in Jesuh Kumpi thei uh hi.
Leitung mawhna hangin sihna thuak ding hi cih thu zong um uh hi. Bang hang hiam
cihleh siluang nuihna dingin myrrh paknamtui kizang hi. Jesuh sih ding thei-khol
uh hi.
Jesuh in Kumpi hi banah na khempeuh
hong pia Pasian hi. Romans 8: 32 “Ama Tapa nangawn siit lo-in eite khempeuh
a’dingin hong piakhia ahih manin, na dang khempeuh zong hong pia-zaw kan ding
hi lo ahi hiam?
Thuumna:
Jesuh in eite khempeuh aa ding a nunna hong piak manin lungdam lo ding na hiam?
Tuni-in Jesuh na Pasian aa dingin bang na pia hiam? Amah i piak khempeuh lak
pan i lungsim piakna in mannei pen hi.
Thungetna:
Topa, kote Kumpi, tuni-in ka lungsim uh hong sang in. A lian mahmah na nunna
nong piakna hangin ka lungdam uh hi. Amen.
