1Q2019 Sabbath School Lesson | Patmos Panin Lungdamna thu

Patmos Panin Lungdamna Thu

          Tuma kum 2000 val hunlai-in sawltak John in a up thu-ah cihtak ahih manin Aegean Tuipi-ah om tuikulh neu khatah hawlkhiat thuak hi. Uham khit nungah Roman kumpi bawlsiatna thuak hi. Sabbath nipi khat Jesuh Khrih tung pan mangmu hi. Jesuh Khrih in gimna thuak Ama nasem Johan thaguan hi. Pasian in John tungah, Mangmuhna  khat khit khat, a piak thute in pawlpi omzia leh Topa hong pai ding a ngak a mite thuak ding thute pulaak khol hi.

          John in ama tungah a kilaak thute laizial khatah  “Jesuh Khrih in a pulaak thute” ci-in ciapteh hi.  Tua thute in Jesuh in van a kahtoh a kipan vantungah a sep thute leh a hong pai kik ciangin a sep ding thute hi. Khang khat khit khang khat a Khristiante in nisimin a thuak gimnate panin Khrih’ ompihna leh Ama vangliatna sungah lungmuangin a om ding uh hong hilh hi. Tu quarter sungin Mangmuhna Bu sung thute i sin ding hi. A neng a tawngin i en zo kei ding a, ahi zongin a thuguipite leh a bulpi zaw deuhteng i en ding hi. Mangmuhna Bu in  a mite aa dingin Jesuh a nunna, a nasep, a sihna pulaak ahih manin limtak i sim ding kisam hi. A nuai a thute siksanin i sin ding hi.

1.      Lai Siangtho in Pasian humopna tawh kigelh hi. A kigelh a thute in Pasiankiang pan hong pai thu hi-in, mihing in ama kammal tawh tua thute pulaak hi. Thuciam Lui hunlai-in Pasian in a mite tungah limciinna tuamtuam tawh a thuhilh mah bangin John tungah zong tua bangin hilh hi.

2.      Mangmuhna Bu sunga genkholhnate in leitung pian a kipan leitung bei dongin a piang dingte hi. Mihing  ngaihsutna siksan lo-in, a kammal zat, limciinnate, a thupiangte siksanin Lai Siangtho in bang thu gen hiam cih siksan thusinna hi ding hi.

3.      Mangmuhna Bu a thuzuanna zia in genkholhnate i tel nadingin hong huh hi. Khenthum siksanin i sin ding hi.

          ( a). Mang. 1: 9 – 3:22, John hunlai-a pawlpite thu in tuhun pawlpi omzia pulaak hi.

          ( b). Mang. 4: 1- 11: 8, John hun a kipan leitung bei hun dong pawlpi omzia

          ( c). Mang. 11: 19 – 22: 5, hun bei ding a thupiang dingte hi.

4.      Mangmuhna Bu sunga genkholhnate in Khrih mitsuanin kigelh ahi hi. Khrih bulphuhna bek in limciinna, gentehnate hong theitelsak ding hi.  “Hih laibu a sim mite mi hampha hi a, hih thu kigente ngai-in, hih laibu sungah a kigelh thu a zuite zong mi hampha mah ahi uh hi. Banghang hiam cihleh hih thu kigente a tun ding hun hong naita hi” (Mang 1:3). Topa hong pai ding a ngak mite aa dingin Mangmuhna Bu in theihding, zuihding thute pulaak hi.

Translated by Dr. Mungpi

LESSON 1            Dec. 29 – Jan. 4

          Patmos panin Lungdamna Thu

Sabbath Nitak: 

Tu Kaal Sung Sim Ding: Mang. 1: 1-8;  Jn. 14: 1-3, 29; Thkna. 29: 29; Rom. 1:7; Phil. 3:20; Dan. 7: 13, 14.

KAMNGAH: “Hih laibu a sim mite mi hampha hi a, hih kigente ngai-in, hih laibu sungah a kigelh thu a zuite zong mi hampha mah ahi uh hi. Bang hang hiam cihleh hih thu a kigente a tun ding hun hong naita hi” (Mang. 1:3).

          Mangmuhna Bu sung a hilhkholhna thute in, Aegean Tuipi-a om suang tawh kidim tuikulh Patmos -ah tuma kum zalom 19 vallai-in nungzui John tungah Pasian in a lahkhiat thute hi ( Mang. 1:9).   Biakpiakna munte-ah a gingin simkhia un,”ci-in Mangmuhna Bu sungah sawlna  om hi (Mang. 1:3). Tua bangin a simkhia mi hi taleh a thungai mi tungah thupha om ding hi.  Tua banah Mangmuhna Bu sung thute a zui khempeuh tungah thupha om hi (Mang. 22:7).  Mangmuhna Bu in Pasian in a mite itna thu pulaak hi. Tua thute in nuntak hun tomin, mitphiat kalin a bei mang thei mihing’ nunna banah Jesuh sungah hotkhiatna leh hotkhiatna thu kizelhsak ding sapna ngah ihihlam hong hilh hi.

          Lai Siangtho genkholhnate in khuamial sungah meivak tawh kibang hi (2Pet. 1:19). Tua thute in i nuntakna hong makaihin lametna hong guan hi. Tawntung Pasian’ gam hong tunpih Khrih hong pai mateng tua thute i kisam hi.

SUNDAY                                                                       Dec. 30

A THULU

          Mang. 1: 1, 2 sim in. Mangmuhna Bu ii thulu in thupitna bang nei hiam? A thulu in Mangmuhna Bu kua thu kigelh hi, cih pulaak hiam?

__________________________________________________________________

__________________________________________________________________

          Mangmuhna Bu in “Khrih A Hong Kipulaakna” kici hi (Mang. 1:1). “Apocalypse” cih kammal a khiatna in “kilangkhia’ ‘pulaakkhia’ cih khiatna nei hi. Mangmuhna i cih in Jesuh Khrist a hong kipulaakna hi; Amah mah a hong kilaakna leh Ama thu hong genkhiatna hi.  Mangmuhna Bu in Pasian in Jesuh Khrih tungtawnin a hong pulaakkhiat thu hi-in, Jesuh thu bek a pulaak thu bulpi hi (Mang. 22: 16). A mite tungah Amah mah a hong kipulaakna leh a mite a hong itna hong hilh hi. Mangmuhna Bu sung thu bulpi  in Jesuh hi. A thupatna-ah Khrih pulaak masa-in (Mang. 1: 5-8), a pulaak nunung pen zong Khrih thu mah hi (Mang. 22: 12- 16).  Daniel a kipan Mangmuhna Bu in thuman pulaak hi. I gen khempeuh a kipan eite lamet khempeuh in Jesuh hi.  Amah in David Suan, David Tapa, Zingsol hi.” Ellen G. White, Testimonies to Ministers and Gospel Workers, 118.

          Mangmuhna Bu in Lungdamna Thubu 4 sunga thute mah pulaak hi. Gospel Bu sunga Khrih nunna, a mite aa dingin a nasep a pulaak thute tawh kizomin Mangmuhna Bu in zong pulaak hi. Mangmuhna Bu in Jesuh nunna zia leh a nasep a thakin pulaak hi. Gospel Bu in Jesuh sihna pan a thawhkikna leh vankahna thu pulaak nunung pen hi. Hebrew Laikhak sung a mah bangin Mangmuhna Bu in, Jesuh in vantung biakbukah Kumpi, Siampi nasep kipatna thu pulaak hi. Mangmuhna Bu leh Hebrew om kei leh, a mite aa dingin vantungah Jesuh nasep i thei kei ding hi. Hebrew leh Mangmuhna Bu in ei aa dingin Jesuh’nasep hong hilh hi.

          John 14: 1-3 sim in. Koi bangin tu laitak Jesuh vantungah a nasep leh a hong kamciamte hong telthei zaw-sak hiam? Tua kamciamte in lametna bang hong guan hiam?

MONDAY                                                             Dec. 31

A HONG HILH THU BULPI

          Mangmuhna Bu a kigelh a kipan thute leh a hong pai-lai ding thute pulaak hi (Mang. 1: 1).  Genkholhna kimkhat tangtung khin a, a tangtunglai ding zong om hi. Mangmuhna Bu 1- 11 in kum zalom khat pan leitung hun bei ciang huamin a piang dingte bulphuh hi. A lian 12 – 22 kikaal sunga a gen thute in Khrih a hong pai kik ding thute bulphuh hi. Genkholhna khempeuh in bang bang a piang zongin Pasian in na khempeuh uk hi, cih hong hilh hi. Lauhuai thu piangte lakah Jesuh Khrih in a mite tawh hong om khawm hi. Genkholhna thute in i nunzia ding leh  Khrih hong pai ding kiginkholh nading deihna bulpi hi.

          Thkna. 29: 29 sim  in.  Bang hangin thuthuk pawlkhat hong kihilh lo hi, ci-in hong telsak hiam? A hong kihilh thute in bang deihna nei hiam? Bang hangin tua thute hong kihilh hiam? Mang. 22: 7, 8.

____________________________________________________________________ ____________________________________________________________________

          Mailam thu ding theihnopna lungkim ngah nadingin genkholhna hong kipia hi lo hi. Mangmuhna Bu in theih dingin a thupi mailam thute hong hilhkhol hi. A hong piang ding thute thupi-sim ding kisam a kigenkholhna thute in Pasian tungah kinga-in, a thupiak bangin a nungta dingin hong hilh hi. Kum zalom tampi sung mihing in upmawh thu leh thutak kihel lo lawp upna siksanin Khrih hong pai ding hi, ci-in tangko hi. Leitung bei-ta ding hi, ci-in um ahih manun a neihsate uh zuakin Pasian nasemin mun khat pan mun khatah zin kawikawi uh hi. Ahi zongin amau lamet bangin leitung bei hun hong tung nai lo ahih manin tua mite in lungkia, thaneem uh a, lungmang uh hi. Pasian in a piang ding thute a hong hilhkholh pen eite aa dingin thupha hi. Ahi zongin genkholhna umkhial, kizangkhial kha thei hi.

          

          John 14: 29 sim in. Genkholhna ii ngimna tawh kisai-in bang thu laigil pulaak hiam?

TUESDAY                                                                    Jan. 1

Limciinna Nei Kammal

          Mang. 13: 1; Dan. 7: 1-3; Eze. 1: 1-14 sim in. Hih mun thumteng in bang pulaak ciat uh hiam?

___________________________________________________________________ ___________________________________________________________________

          “Khrih in ama vantungmi sawl a, a nasempa John kiangah hih thute a kilangsak hi” (Mang. 1:1). Greek tawh kigelh Lai Siangtho in ‘lak’ cihna munah ‘limciinna zangin lak’ cih khiatna nei hi. Greek tawh kigelh Thuciam Lui (Septuagint) sungah zong Daniel in Kumpi Nebuchadnezzar tungah a piang ding thute sumngo, ngun leh sik tawh kibawl milimpi tungtawnin pulaak hi (Dan. 2: 45). John in zong limciinna kammal mah zangin a piang ding thute pulaak hi. Kha Siangtho in makaihin, John in a muh tua limciinnate limtak ciamteh hi (Mang. 1:2).

          Tua ahih manin Mangmuhna Bu  in limciinna tuamtuam zangin a pulaak thute a kammal bang lianlian a, a khiatna gen ding hi lo hi. Lai Siangtho i sim ciangin i sim kammal in khiatna dang nei lo-in, tua bang mahin san ding hi mah taleh, genkholhnate ahihleh tua bang hi lo-in, limciinna nei ahih manin a khiatna nei ciat uh hi. Limciinna kammal zangin kigenkholte tangtung takpi hi.

          Mangmuhna Bu sunga limciinna tawh kipulaak genkholna thute  in thuman i theih nadingin hong huh hi.Tua limciinnate a khiatna i pulaak ciangin kidop ding kisam hi. Deihkaihna, mihing ngaihsutna siksan lo-in tua limciinnate i tel na dingin Lai Siangtho mah siksan ding kisam hi.

          Mangmuhna sunga limciinnate in Thuciam Lui sung panin kila hi. A bei-sa hun a thupiang pulaak kammalte zangin mailam thu piang ding hong hilh hi. Pasian in a beisa hunin a mite a hotkhiat mah bangin mailamah zong a mite hong honkhia ding hi. A mite aa ding a sep ngei bangin mailamah zong hong sem ding hi. Mangmuhna Bu sunga limciinnate i tel nadingin Thuciam Lui sunga kigen thute limtak i kankhiat ding kisam hi.

WEDNESDAY                                                           Jan. 2

THUMGAWM PASIAN

          Paul laikhakte sungah hopihna kammal a masak mah bangin Mangmuhna Bu sungah zong hopihna kammal kimu masa hi. Mangmuhna Bu in John in ama nuntaklai Asia Minor gamhuam sunga om pawlpi sagihte a laikhak hi (Mang.  1:11). Ahi zongin Mangmuhna Bu in tua mite aa ding bekin a kigelh hi  lo-in Khritian khempeuh aa dingin a kigelh ahi hi.

          Mang. 1: 4, 5; Rom. 1:7 sim in. Hopihna kammal a kibangte leh kua  in kua tungah hopihna kammal hi, cih kimu hiam?

__________________________________________________________________ __________________________________________________________________

          “Dikna leh nopsakna note tungah om ta hen” cih hopihna kammal in Greek laimal ‘charis’(hehpihna) leh Hebrew pau-in ‘shalom’ (lungnopna) kizang kammal hi. Hehpihna leh lungnopna hong PIA PA in thumgawm Pasian khat hi, ci-in limciinna tuamtuamte in thumgawm Pasian khat pulaak uh hi.

          Pa Pasian in ‘a beisa hun, tuhun, leh mailam hunah zong a om tawntung ding a Vanglian Topa Pasian hi’ (Mang. 1:8; 4:8).  Hih in Yahweh “Keimah in Keimah,” a khiatna in a tawntungin a om ka hi hi (Pai. 3:14)cih pulaak hi.

          Meivak 7 in Kha Siangtho limcing hi (Mang. 4:5; 5:6).  Sagih in kicing hi, cih limla hi. Meivak sagih in pawlpi 7 sunga nasem Kha Siangtho limcing hi.  Meivak sagih in, mun khempeuh a om Pasian’ mite in amau nasep a zawh nadingun amaute lakah nasem Kha Siangtho limcing hi.  Jesuh Khrih ahihleh min thum tawh kipulaak hi: Tuate in “Thuman takin teci pang,’ ‘ sihna pan a thokik Tapa upa,’ leh ‘leitung kumpite tungah ukna aana nei’ ci-in kipulaak hi (Mang. 1:5). Hih kammalte in Jesuh in singlamteh tunga a hong sihna, sihna pan a thawhkikna leh vantungah minthanna tawh a omna thu hong hilh hi. Tua khit ciangin John in Jesuh nasepte hih bangin gen hi.

          “Eite hong it a, ama sihna tawh i mawhna panin eite hong suaktasak a, Ama Pa Pasian’ na a sem dingin siampi leh kumpi za-ah a hong koih hi (Mang. 1: 5, 6). Greek kammalin “Eite hong it” cih kammal in a tawntungin Khrih hong itna – a beisa, tuhun leh mailam  thu pulaak hi. Jesuh in singlamteh tungah a nunna hong pia-in, tawntung sihna panin eite hong honkhia hi.

         

          Eph. 2:6; Phil. 3:20 in sihna pan thokikin Jesuh tawh a nungtakhawm ding mite hong hilh hi. Koi bangin siatna dim hih leitungah, Khrih sungah vangliatna tawh kidim tua nunna, kumpi leh siampi hihna sungah nopna na ngah hiam? Koi bangin hih thu in i nunna zia hong huzaap hiam?

THURSDAY                                                           Jan. 3

Mangmuhna Bu Thupatna

          Mangmuhna Bu thupatna in THUBU mungtup pupaak hi: Tua in Jesuh in vangliatna leh zawhna tawh hong pai ding hi. A thukhupna-ah zong a hong pai kik ding Khrih’ kamciam pulaak kik hi (Mang. 22: 7, 12, 20).

          Mang. 1: 7, 8 sim in.  Hih sunga thute in Dan. 7: 13, 14; Zechariah 12;10; Matt. 24: 30 sunga genkholhnate bulphuh hi. Jesuh hong pai kikna bang pulaak uh hiam?

__________________________________________________________________________________________________________________________

          
Na khempeuh, thu khempeuh in Khrih Nihvei-na a hong pai ding manawh hi. Tua in leitung siatna bei nading, tawntung vangliatna dim leitung a hong kipat nading, siatna, gimna leh sihna pan suahtak hun hi ding hi.

          Thuciam Thak Lai Siangtho’ pulaak mah bangin Mang. 1: 7 in  Khrih in Ama pumpi, vangliatna, minthanna tawh hong pai takpi ding hi, cih pulaak hi. Amah a thah mite a kipan mi khempeuh  in Ama hong pai mu ding hi. Khrih hong pai ding ciangin a tuam vilvel thawhkikna om ding a, tua sungah Amah a thah mite hong tho ding uh hi. Amah a ngak mite la dingin hong pai ding a, vantung hehpihna, itna a nial mite tungah thukhenna hong tung ding hi.

          “Amen, Hi takpi ding hi” (Mang. 1:7) cih thu in Khrih hong pai takpi ding hi, cih pulaak hi. Greek laimal ‘nai’ leh Hebrew pau-in Amen a khiatna kibang hi. Hih kammal nihte in a hi taktak thu pulaak hi. Mihing Tapa in meii tung tuangin a hong pai ding hun nai mah mah hi, cih thu upna in nisim nunna zia awlmawh lo-in hong omsak lo ding hi. I sepna khempeuhah thumanna, cihtakna leh lungsim siantho-na tawh hong  kidimsak hi. Ellen G. White, 4T., 309.

Mi khat in a kamciam a tangtunsak ciangin a thumanna kimu hi. A tangtung khin kamciamte hangin Pasian in Ama kamciam Nihveina tangtung takpi ding hi, ci-in lungmuanna na nei hiam?

FRIDAY                                         Jan. 4

Ngaihsutbeh Ding: Ellen G. White, “The Study of the Books of Daniel and the Revelation,” 112 – 119 in  Testimonies to Ministers and Gospel Workers.

          Pasian in a pawlpi a makaih ding leh hamsatna a om ciangin tha guan dingin Amah mah hong kilaak hi. Topa in Amah mah Daniel Bu sung leh Mangmuhna Bu sungah hong kilang hi. Mi khempeuh in tua thuthukte a theih dingun hong kilak hi. Tua thuthukte in John hunlai-a mite aa ding hi taleh tuhun mite aa dingin a  hong kipia thuman thu hi. Genkholhna kimkhat tangtung khin a, kim khat in tu laitakin tangtung laitak hi. Kim khat in a hihleh leitungbei nadinga a hong piang ding thute hi-in, leitung ukpa Satan in vantung Pasian a langdo-na khempeuh beisiangin, tatna ngah mite in leithakah nopna tawh nungta tawntung ding thute zong hong lak hi.

          Mangmuhna Bu sim kul lo hi. Bang hang hiamcih leh telhak lua hi,” kuamah in ci kei hen. Thuman theihnopna lungsim tawh  Mangmuhna Bu a sim mite tungah, John tungah thuthuk a lak Pasian in vantung nopna pia ding hi. Tua thuthuk theinuamin a kan mite tungah Pasian in a thuman hilh ding hi. Pasian in a kamciamsa om bangin, Mangmuhna limtak a simin, tua thuman a nuntakpih mite tungah thupha om ding hi.” Ellen G. White, The Acts of the Apostles, 583 – 585.

Kikup Ding Dotnate

1.      Mangmuhna Bu in Jesuh Khrih a hong kilaakna ahih leh bang hangin tuhunin mi tampi in thupi ngaihsut lo uh hi ding hiam? Khristian biakna sungah Mangmuhna Bu mite’ sanzia bang kimu thei hiam?Bang hangin Mangmuhna Bu sung genkholhnate in lau-na tawh kizom hiam?

2.      Kamsang zuau-te gen hun bei ding a thupiang ding a kigenkholh thute Jesuh hong pai ding cih a kipan a tuamtuam a tangtung lo genkholhnate ngaihsun in. Upna takpi tawh tua bangin gen uh hi mah taleh, a tangtung lo tua bang genkholhnate in bang siatna piangsak hiam? Koi bangin mite in tua thute um hi ding hiam? Tua thute hangin mite’n Khristian bangci muh hiam? Genkholhnate um-in, hun bei nadingin a piang thute  koi bangin genkholhnate mi tungah hilh ding i hiam?