19
January 2019
Khuamial
Sung Pan Suakta
Atija
Jamal Caminete, Kum 57
Atija in kum 8 a phakin Nampula khua
pan piteek khat tung panin Seventh-day Adventist cih min za hi. Nampula khua in
Mozambique gam a om khua khat hi. Hih khua-ah 80 % in Muslim biakna zui uh hi.
Atija in Adventist biakinn gei khat va
nawk kha-in, pawlpi upa khat in anne dingin sam hi. An a nek khit ciangin
thungai dingin upa pa in zawn hi. Tua thugenna-ah Atija zong va kikhawm hi. Tua
genpa in Matthew 24 sunga Jesuh hong pai kik ciangin misite tho kik ding hi,
cih thu gen hi. Tua thu hangin Atija omkhong thei lo hi. Tua ma kha 4 lai-in Atija in a u numei kha
kum 4 a pha khatin nusia hi. A zak thute
hangin a u nu mu kik ding cih a ngaihsut khak ciangin Jesuh hong ding kaal
ngaklah mahmah hi.
Tua zawh kum 7 khitteh Atija zong kum
15 hong cingin, tangval khat tawh hong kiteeng uh hi. A pasal pen Sunday
innkuan sung pan khangkhia hi-in, ahi zongin Adventist biakinn ah kikhawm den
hi.
Ni khat a pasal in Adventist biakinn
ah kikhawm dingin pulaak hi. Ama’n zong va zui hi. Sabbath School hun sung
hi-in, naupang kum 6 gual ding khat in “Min hong sap laitak kei zong ka om ding
hi,” cih la a sak hong za hi. Tua la in Atija lungsim sukha mahmah hi. Tua a kipan Adventist biakinnah kikhawm ding
khensat hi.
Khanglam Mozambique munte-ah
thukhensatna khat peuh a neih ding uhteh nu le pa, uham –te tawh kikum phot
lo-in bang mah sem lo uh hi. Atija in a neulai-a a kem a nuno kiangah a pasal tawh va hawh dingin Carmen ah va zin
uh hi. A nuno in dawi tawh kikopin na tuamtuam bawl thei hi.
Atija in a nu-no Adventist thu kuppih
hi. Tua bang ciangin a nu-no in na nu kiangah va gen in, ci-in za nuam lo hi.
Atija in a nu kiang a gen ciangin, kei na nu hi keng,na pa no kiangah va gen
in, ci-in za nuam tuan lo hi. A nu-no in Atija
kiangah na kituiphumleh hong hawh nawn ken, ci-in pulaak hi. Ahi zongin Atija in a pasal tawh kituiphum
veve uh hi. A kituiphum ni-un a innkuanpihte uh khat zong pai lo hi.
Atija in ta pasal khat hong nei hi. A
tapa Dionisio cina-in gim mahmah hi.
Atija in a nu-no kiang hi taleh siavuante kiang paipih nuam lo hi. Nitak
khat a pano Candido in teipi khat tawh Atija innah hong pai hi. “ Hih naupang
sih ding ka deih hi; a gawl panin sunlet ding hi, ci-in a pano ci-in genkhia
hi. Ni 2 bang sawt khin, a tapa noptuam tuan lo hi; an zong ne lo hi. A nupa-un
kapkawmin thungen uh hi. A ni 3 ciangin zato-ah paipih uh a, siavuante in hong
dam ding hi, ci-in ciahsak uh hi. A pano zong a teipi tawh a inn ah ciah kik
hi.
Atija le a pasal in dawi-te nasepna zo
zo hi hang, ci-in hong pulaak uh hi. A ta uh nungta dingin lamen lo uh hi taleh
Pasian’ kepna hangin hong dam kik hi. Tua bangin naupang hong dam kik, Atija’
sanggamnu khat in a zak ciangin lamdangsa-in Adventist hong suak hi. Kum khat
khit ciangin a sanggampa khat zong Adventist hong suak hi. Tua khitteh a nu
zong kituiphum hi. A nu-no Carmen zong
kituiphum hi. Pastor in Carmen tui sungah 3 vei phum hi. Tui sung pan a lu hong phottoh ciangin Carmen
kam sung pan pastor in kammal kitel lo aw ging khat za hi. Pastor in khat vei
phum kik ding ngaihsun hi. A 2 vei-na tui sungah phumsuk a, tui sung pan a lu
hong phottoh ciangin a masa-a bangin aw kitel lo awging khat Carmen kamsung pan
hong ging khia leuleu hi. A 3 vei-na tui sungah a kiphum khit ciangin dawi in
Carmen sung pan pusuak khia thei pan hi.
Tu-in Carmen in deaconess sem hi. A
pano in Atija a kituiphum peuhmahleh a innah hawh nawn lo ding, ci-in a khensat
hangin, a zi kituiphum khitteh a nupa-un Atija-te inn ah va hawh uh hi. Atija’
pano Candido zong kituiphum ding khensat a, a kituiphum khit kum 1 khatteh si
hi.
Atija-te’ innkuan in a vekun Adventist
sungah kituiphum khin ahih manun Atija lungkim mahmah hi. Hun khat lai-in
Adventist a suah ding a langpan khempeuh tu-in a vekun Adventist sungah
kituiphum khin uh hi.
Tu-in Atija in kum 57 cingkhin hi. A
pasal Lazaro in Lai Siangtho sangkah a zawh khit ciangin pastor sem hi.
Tu
quarter Sabbath School sumpi in Nampula khua-a om HIV/AIDS natna tawh kinusia
tagah kepna-ah kipuak ding hi.
MUC in Kachin, Ngawng Chaung ah biakinn
lamna dingin kipuak ding hi.
