Dec.
8
A
Telhak Lai Siangtho
Zelindo
Joado, 42
Zelindo in mi buaisak den mi khat hi.
East Timor ah teengin zu dawn, zatep, a pum tungah taatoo dimin, gitlohna tawh
a hun beisak hi. Sunday nisialin kikhawm hangin nopsa lo hi. Kum 21 a phak ciangin
Lai Siangtho simnopna lungsim hong nei hi. Lai Siangtho nei lo ahih manin a
sanggamnu Surabaya, ama omna pan tai 900
val bang gamla-in hopih hi. “ Lai Siangtho bu khat nong khak diam” ci-in ngen
hi.
Kaal nih khit ciangin Zelindo in Lai
Siangtho sim kipan hi. Kha khat sungin Piancil panin Mangmuhna dong sim khin
hi. A nihvei-na sim kipan kik hi. Lai Siangtho in bang gen hiam cih telzo lo
hi. A lungkia-in thungen hi. “ Topa
Pasian aw, Lai Siangtho hong telsak in. Kha Siangtho hong makaihsak in” ci-in thungen
hi.
A 4 vei-na sim ding kipan kik a, Lai
Siangtho a sim dingsial thungen hi. Kha Siangtho in makaihin, a sim thute hong
tel semsem hi. Paikhiatna 20: 4, 5 – Milim bia kei in, cih a sim khak ciangin,
sim suak nawn lo-in khawl vatin, “ bang hangin ka biakinn ah milim tampi kikoih
hiam” ci-in ngaihsutna hong nei hi.
Sunday nisial kikhawmin, nitaksial Lai
Siangtho a sim kum 3 sung bang hong cing hi. Zi nei-in vanzuakna sai lianpi nih
nei hi. Ni khat a vanzuakna munah Thomas Lopes, SDA thu-um mi khat hong hawh
hi. Tua mipa in Mark Finley’ gelh “ A Kimangngilh Nipi” cih laibu va pai hi.
Zelindo in tua laibu a sim a kipan Saturday ni in Sabbath hi, cih thu a theih
ciangin a lungsim hong kikhel hi. Thomas tawh hong kiho kik uh a, bang hangin
Sunday ni hi lo-in Saturday ni-in bang hangin tawlngak ni’ hi thei hiam ci-in
dong hi. Thomas in dawngpak lo-in, Lai
Siangtho sim in. Kha Siangtho in hong makaih ding hi, ci-in vaikhak hi.
Zelindo in Lai Siangtho simsim
hi.Thuciam Thak sungah Matt. 28: 1 sungah “ Sabbath ni khit, ni masa ni
zingsang khua hong vak kuan ciangin Magdala khuami Mary le adang Mary, daihawh
dingin a va pai uh hi” cih thu a sim ciangin, a theihnop thu hong thei hi. Lai
Siangtho sungah Sunday i cih pen ni masa hi, ahihlam hong thei semsem hi. Saturday
ni hong tunkik ciangin a vanzuakna sai khakin, biakinn ah kikhawm dingin hong
pai hi.
Tawl khat khit ciangin a pawlpi pan a
topa khat Zelindo kiangah vahawhin, “ Bang hangin Saturday ni-in pawl dangah
kikhawmin, a zi le tate bek hong kikhawm uh hiam,? ci-in dong hi. Zelindo in
zong, “ Saturday ni pen Sabbath hi. Sunday ni in Sabbath hi lo hi,” ci-in
dawngkik hi. A topa in hi lo hi, Sunday ni in Sabbath hi,” ci-in kinial uh hi.
Zelindo in a biakinn ah milim tuamtuam kikoih ahih manin kikhop pen nuamsa lo
hi. Pasian tungah zong thungenin, hih bangin biakinn sungah milim tuamtuam koih
ding kilawm mah ahi hiam?ci-in ngaihsun
hi. Ni khat Isaiah 42: 8, “Kei pen TOPA ka hi a, TOPA pen keima min ahi
hi. Pasian dang’ tungah keima a tawh a
kibang minthanna ka pia kei a, a kisui milimte zong keimah hong kiphatnate pawl
ka ngahsak kei hi,” cih hong sim hi.
Tua a kipan milim biakna in lauhuai-na
ahihlam phawkin milim bia nawn lo dingin khentat hi. A topa hopih in a topa
tawh thu tampi kikum uh hi. Zelindo in a topa kiangah “milim le Sabbath thu a
dot ciangin a topa in Zelindo’dotnate dawng kik thei lo hi. Zelindo in Lai
Siangtho a simna tungtawnin thuman hi, ci-in a up SDA pawl sungah kituiphum
ding khentat hi.
Kum 4 khit ciangin Zelindo in pawlpi
upa sem hi.
East
Timor khuapi Dili ah SDA biakinn lam nadingin 2015 kumin Sabbath 13 sumpi in
kipuak khin hi.
