LESSON 9 Nov. 24 – 30
A Taktak Thu
Sabbath Nitak
Tu Kaal Sung Sim Ding: Jn. 11: 51, 52; Eph. 2: 13 – 16; 4: 25 – 5:2; 2Kor. 5: 17 – 21; Rom. 14: 1-6; Sawl. 1: 14.
KAMNGAH: “ Hih bangin thu a gen ciangin ama lungsim a gen hi lo a, tua kumin siampi lianpen a sem ahihna tawh Jew mite’ tangin Jesuh a si ding ahihna thu a genkhol ahi hi. Jew mite a’ding bek hi lo-in a kithehthang Pasian’ mi khempeuh pumkhat a suah nadingin a kikaihkhop nading thu zong a genkhol ahi hi” (John 11: 51, 52).
Nung kaal sung i thusin in Jesuh in Honpa cih thu le hun nunung a i tangko Lai Siangtho thuman in pawlpi kipumkhatsak hi, cih thu hi. Seventh-day Adventist thu-um mi khat i hihna a thu in, Pasian in mun khempeuhah thu a tangko dingin sapna ngah mite i hi hi.
Tu kaal sungin kikup ding thu in nisim i nuntakna-ah a kimu thei pawlpi kipumkhatna thute le pawlpi nasep hi ding hi. Pawlpi in hotkhiatna thu leh Pasian tawh kilemna thu a tangko kipawlna mawkmawk hi lo hi. Pawlpi kipumkhatna tua hotkhiatna pulaak hi. Siatna, mawhna tawh kidim hih leitungah pawlpi in Khrih hong hotkhiatna le a vangliatna pulaak a kimu thei teci hi. Hotkhiatna nasepna-ah kipumkhatna om kei leh mite in thuman mu thei lo ding uh hi. Khrih tawh kipumkhatna in thu-um midangte tawh hong kipumkhatsak hi. Hih kipumkhatna in mawhna sungah hong honkhia Khrih vangliatna pulaak hi. Ellen G. White, The SDA Bible Commentary, vol.5., 1148.
Sunday Nov. 25
Jesuh’ Singlamteh Nuai-ah
Pasian in ama mite tungah a hong piak thupha-te lak panin pawlpi kipumkhatna zong Pasian hong piak letsong hi. Kipumkhatna in mihing hanciamna, gamtat hoihna le mihing’ngimna tungtawnin kingah hi lo hi. A bulpi in Jesuh in Ama sihna le sihna pan a thawhkikna tawh kipumkhatna hong piangsak hi. Ama sihna le sihna pan a thawhkikna eite in i up tak ciangin tui kiphumin mawhna, mawhmai-na ngahin pawlpi sungah kipawlkhawmin vantungmi thum thupuak a tangko i hi hi.
Jn. 11: 51, 52; Eph. 1: 7 – 10 sim in. Khrih nasepte lakah bang thu in Seventh-day Adventist pawlpi a hong kipumkhatsak hiam?
_________________________________________________________________
__________________________________________________________________
Caiphas in ama thuneihna tawh thugen hi lo hi. Ahi zongin siampi lian a sep tua kumin Jesuh in minam khempeuhte aa dingin sihna thuak ding hi, ci-in genkhol hi. Tua banah a kithehthaang Pasian mi khempeuh kaikhawm kik ding hi, ci-in pulaak hi (Jn. 11: 51, 52). Caiphas in bang dingin Jesuh in sihna thuak hi, cih a theih loh banah Jesuh mawhsakin thugen ahihlam a kitheih loh hangin, Jesuh hong sihna thu pulaak dingin Pasian in Caiphas zang hi. Ama genkhiat thu in bang deihna nei hiam cih zong thei lo hi. Jesuh in kumpi langpang hi, ci-in Caiaphas in ngaihsun hi. Mawhnei mite aa dingin a hong si Jesuh in, Pasian tungah a citak a tate khempeuh hong kipumkhatsak hi.
Seventh-day Adventist pawlpi in a tangko khempeuh, pawlpi a kipumkhatsak thu in mawhnei mite aa dingin Khrih a hong sihna thu hi. Tuiphumna tungtawnin Khrih sung i kipumkhatna a pulaak i hi hi. “Khrih Jesuh tawh na kipawl manun note khempeuh Pasian’ tate na suahtheihna uh pen na upna hang uh ahi hi. Khrih sungah a kiphum note in Khrih’pianzia a nei khinta na hi uh hi” (Gal. 3: 26, 27). Tuiphumna in Khrih sungah i upna kipumkhatna limcing hi. Pa khat i nei khawm hi. Tua ahih manin eite khempeuh in Pasian tanu, tapa i hi hi. Eite in Honpa khat i nei hi. Ama hong sihna le sihna pan a thawhkikna sungah eite in i kiphum hi (Rom. 6: 3, 4).
Ngeina, pau, tatzia kilamdanna tuamtuam nei mahta lehang bang hangin Jesuh sungah upna kikhat ding kisam hiam?
Monday Nov. 26
Pasian tawh Kizopkik Nasep
Leitung in siatna tawh kidim hi. Gal, kido-na, buai-na namkim om den hi. Hih thute in mimal a kipan kimlepam, gam sung sukha hi. Khat veivei ciangin i nuntakna in siatna tawh a bei ding bang zel hi. Ahi zongin siatna in a tawntungin a om ding hi lo hi. Leitung in daihna, nopna tawh kidim dingin Pasian in nasem hi. Siatna in kipumkhatna susia a, na khempeuh in nopna le kipumkhatna tawh kidim dingin Pasian in a geelkholhsa hi.
Thu-um mite in nopna, daihna tawh kidim dingin Khrih in nasem hi (Eph. 2: 13- 16). Singlamteh tungah Khrih in a hong sihna tawh Jew mi le Gentail mi pumkhat hong suaksakin, biakna, minam, pau siksanin kipawlkhenna khempeuh hemkhia hi. Kum zalom khat hunlai Gentail le Jew in kipumkhat thei ahih manin tuhun pawlpi in minam, pau, ngei-na bulphuhin kideidannate hepkhiat ding hi lo hiam? Kipumkhatna tawh leitung mite tungah hotkhiatna thu i pulaak thei ding hi.
Khrih sungah eite in mi thak hi-in, Pasian tawh i kipawl hi (2Kor. 5: 17 – 21). Tua ahih leh mite tungah bang thupuak i nei hiam? A kipumkhat pawlpi in kimlepaam mite tungah bang kilamdanna nei thei ding hiam?
Pasian sungah mi thak i hih manin thu-um mite in a tuam vilvel nasep kinei hi. Tua nasep khen thum kisuah thei hi. (1). Pawlpi i cih in Pasian tawh kigamla mite ahih hangun Khrih in a nunna a hong piakna tawh tu-in Kha Siangtho tungtawnin Pasian tawh pumkhat a suak mite hi. Eite in hun beikuan a leitung mite tungah thuman tangko dingin sapna ngah a cianlai mite i hi hi. I nasep in Pasian tawh kigamla mite Pasian tawh kipawl ding banah hih nasepna-ah amaute zong kihel dingin i samkhia hi. ( 2). Pawlpi in Pasian’ mite khatlekhat pumkhat suahna hi. Khrih sungah pumkhat i cih ciangin eite khatlekhat pumkhat i hi hi. A thu bekin pumkhat hi lo-in, pumkhat i suahna a kimuhtheih ding kisam hi. Khatlekhat kizopna nei-in kilemna, nopna tawh kidimin Jesuh Khrih in eite Honpa, le Tanpa hi, ci-in i pulaak hi. “Note khatlekhat na ki-it uh leh note in ka nungzui na hihna uh leitung mite in hong thei ding uh hi” (Jn. 13: 35). ( 3). Thu-um mite khatlekhat kipumkhatna le Pasian tawh pumkhat suahna in Pasian’ hotkhiatna thu in thuman thutak hi-in, vanglian hi, cih kilangsak hi. Satan in Khrih a do-na thu zong Pasian le a Nunzia do hi. Pawlpi in kipumkhatin, khatlekhat banah Pasian tawh pumkhat a suah uh ciangin mongnei lo Pasian’pilna pulaak hi (Eph. 3: 8 – 11).
Tuesday Nov. 27
A Kimu Thei Kipumkhatna
1902 kumin Ellen G. White in hih bangin gelh hi: “ Leitungah Khrih a hong nun bangin Khristian mite zong a nuntak ding uh kisam hi. Khrih in eite etteh ding hi. Mawhna a nei lo hi banah a lungduai-na, a dikna le a deihhuai-na khempeuh i etteh ding kisam hi.” Ellen G. White, Signs of the Times, July 16, 1902. Hih kammalte in Paul in Philippian pawlpi-te a laikhak hong phawksak hi. “Khrih lungsim bang note in zong na nei un” (Phil. 2:5).
Eph. 4: 25 – 5: 2; Kol. 3: 1-17 sim inla, hih dotnate dawng in. Bang thu-ah Jesuh tungah citak ding hong sawl hiam? Koi bangin leitung mite mai-ah hotkhiatna teci hi ding na hiam?
__________________________________________________________________
__________________________________________________________________
I nunna-ah Jesuh i etteh ding tampi om hi. Mite tungah Pasian’ hehpihna theisak dingin hong kisawl hi. Midangte tungah thupha bawl ding (Matt. 7:12) le khatlekhat vangik puakpih ding (Gal. 6:2); kiniamkhiat ding le gamtat hoih nei-in pumpi cidam dingin hong hilh hi (1Kor. 10:31).
“Ka itte aw, hih leitungah gamdang mi, a peempak bangin kingaihsun unla, na kha nuntakna uh tawh a kilehngat pumpi’ deihnate na kikham un. Gentail mite in note mi hoih lo hi, ci-in hong gensia nuamin mawhna hong zon ciangin, note’ hoihna bekbek mu-in Pasian a hong pai Ni ciangin a phattheih nadingun amaute lakah na gamtatna uh hoihsak tawntung un” (1Pet. 2:11). I gamtat hoihsakzia in mite tungah huzaap lianpi nei ahihlam i mangngilh kha hiam? Lungso-na kilangsak lo-in lungduai-na na kilangsak zaw hiam? Buai-na, hehna, thangpaihna munte-ah Jesuh lungsim dikna na nei hiam?
Leitung mite in Pasian zia le tong a telkhial laitakin Pasian hoihna le a vangliatna a kilangsak ding mite i hi hi. Khrih kilangsak dingin a nungta na hih manin gamtat hoih tawh nungta-in midangte tungah thupha bawl ding i hi hi. I up thuman thutak a nuntakpih hi lehang i kimlepaam tungah i huzaap lian mah mah ding hi. Thu-um mite kipumkhatin leitung mite lakah Khrih zia le tong a kilangsak lehang a vanglian teci hi ding hi.
Na nunzia in bang pulaak hiam? Mi khat in Jesuh nung a zui nuam dingin na nuntakzia panin bang in zui-sak nuam ding hiam?
Wednesday Nov. 28
Kilamdannate Sung Pan Kipumkhatna
Rome 14, 15 sungah Rome pawlpi kikhensak thute Paul in pulaak hi. Paul in thu-um mite a vaikhakna-ah khatlekhat kithuakin, lungduai ding hanthawn hi. Paul thuhilhna panin bang nuntakpih ding na hiam?
Rom. 14: 1-6 sim in. Koi bang ngaihsutnate in Rome pawlpi mite khenkhamin khatlekhat kipumkhat thei lo uh hiam?
____________________________________________________________
____________________________________________________________
Rome pawlpi a buai-sak thute in Jew biakna pawi tawh kisai thute hi. “Kiselna a piangsak thei thute” (Rom. 14:1) hangin Rome pawlpi buai hi. A buaipih uh thute in hotkhiatna tawh kisai thu hi lo hi. Mimal ngaihsutna kibatlohna tuamtuamte hangin buai uh hi zaw hi. Annek tawh kisai buaipih uh hi. Siam. 11 sungah sasiang le sasiang lo kigelh khin a, Paul in hih thu bang mah pulaak lo hi. Khristian masate in voksa a kipan sasiang lote ne uh hi, cih nading om lo hi. Peter in zong sasiang lo ne lo hi (Sawl. 10: 14). Upna neu mite bek in sa ngawl uh hi (Rom. 14: 2). Khamtheih lenggahzu tawh kisai buai uh hi (Rom. 14: 17, 21). Biakpiakna tawh kisai siantho lohnate buaipih uh hi. Rom. 14: 14 sungah ‘koinos’ ‘ a siang lo’ cih khiatna nei hi. Hih kammal in sa siang lote a pulaak kammal hi-in, Siam. 11 sunga sa siang lote a pulaak kammal hi lo hi.
Roman mite lak pan mi kimkhat in annekkhopna-te ah kihel lo, ne lo uh hi. Bang hang hiam cihleh tua bang an in siang lo hi; milim biakna-ah kizang khin hi, ci-in ngaihsun uh hi. Tua bang mahin biakpiak ni tawh kisai buaipih uh hi. Amau buaipih ni in piansak ni 7 Sabbath tawh a buai uh hi lo hi. Bang hang hiam cih leh Paul in Sabbath zang hi (Sawl. 13: 14; 16:13; 17:2). Amau buaipih ni in Jew pawi ni, ahih kei leh antan ni hi. Mi kim khat in hotkhiat ngah nading ngaihsutna hi lo-in thukhun tuamtuamte zui uh a, tua bang mite mawhsak lo-in, amaute tawh kizopna-ah lungduai ding kisam hi, ci-in Paul in hanthawn hi. Upna, hotkhiatna tawh kisai thu bulpi ahih kei nak leh, ngaihsutna, sanzia tuamtuam a kibat loh ciangin kithei siamin khatlekhat tungah lungduai ding kisam hi.
Seventh-day Adventist pawlpi in up le zuih ding thuguipi nei a, ahi zongin Adventist hi napi-in tua thute lak pan up kul lo, zuih kul lo a om ding hiam?
Thursday Nov. 29
Nasepna-ah Kipumkhatna
Topa Nitak An a nek laitakun thupiangte (Lk.22: 24) le Pentecost ma-a thupiangte
( Sawl. 1: 14; 2: 1, 46 ) enkak in. Bang in kilamdangsak hiam?
________________________________________________________________
________________________________________________________________
Sawl. 1:14; 2: 46 sungah ‘amaute pumkhat’ cih thu in ‘lungsim kikhat uh hi’ cihna hi. Mun khath biakpiakna neikhawm, thungen khawm ahih manun Jesuh kamciam bangin amaute tungah Kha Siangtho hong om hi. Tua bangin kikhopnate-ah khatlekhat kigensiat ding baih hi. Pulaak nuam uh hi leh Peter’ thanemna – Jesuh nial ahih manin a pulaak ding om hi (Jn. 18: 15 – 18, 25 – 27). Ka mit tawh ka muh mateng um kei ning a ci Thomas zong gensia nuam leh uh, uplahna a pulaak ding uh om hi (Jn. 20:25). John le James in vangliatna gam sungah dinmun ngah ding Jesuh kiang a nget uh ko-bawl nuam uh hi leh a gen ding uh om hi (Mk. 10: 35 – 41). Matthew zong siahdong ngei khat hi-in gensia nuam le-uh gensiat ding om hi (Matt. 9:9).
Ahi zongin Nungzuite in a lungsim uh kiniamkhiatin Pasian mai-ah ki-ap uh hi. Topa’ na sepna dingin Kha Siangtho a kisaplam uh kiphawkin Pasian tungah thungen uh hi. Amau hamphat nading ngen lo uh hi. Mite in hotkhiatna a ngah nadingun thungen uh hi. Mun tuamtuamah hotkhiatna thu gen ding kisam hi, cih phawk uh hi. Tua hangin Topa’ kamciam bangin Kha Siangtho ngen uh hi.” Ellen G. White, The Acts of the Apostles, 37.
Nungzuite khatlekhat tua bangin kipumkhatin thu a ngetkhop uh ciangin Pentecost ni-in a lamdang Pasian’ ompihna ngah uh hi. Pasian tawh kinai zaw semsem ahih manun amau mimal khatlekhat kibatlohna tuamtuamte hemkhia-in Kha Siangtho tawh kidim dingin kigingkhol uh a, hangtakin Jesuh sihna le sihna pan a thawhkikna thu tangko ngam uh hi. Jesuh in amaute’ mawhna khempeuh maisak hi, cih lungmuang uh hi. Tua manin lawpna tawh mainawt uh hi. Jesuh in amaute aa dingin nasem hi, cih lungkimna nei uh hi. Jesuh sungah hotkhiatna om hi, cih thu a up manun Ama zia le tong nei-in Ama gamzai nadingin nasem uh hi.” Ellen G. White, The Acts of the Apostles, 48. Topa in amaute zangin na lianpi sem hi. Tuhun pawlpi zong tua bangin nasem ding kisam hi.
Mite’ mawhna i muh pahpah hi. Koi bangin mite’ gitnatlohna hemkhia-in, kipumkhatin Pasian’ na semkhawm thei ding i hiam?
Friday Nov. 30
Ngaihsutbeh Ding: Ellen G. White, “ Unity in Diversity,” 98 – 103 in Evangelism.
Pawlpi masa sungah kipumkhatna, kibatlohna tuamtuam om taleh nasepkhop theihna cihte leitung mite mai-ah vanglian teci suak hi. “ Kha Siangtho in pawlpi makaihin, thukhensatnate-ah makaih hi. Kha Siangtho in hih bangin pawlpi makaih hi. Pasian in pulaak – nasep zia ding Kha Siangtho in hilh hi, Cornelius, Ananias, Philip makaih hi. Nihna-ah Lai Siangtho kimakaihsak uh hi. Khensatna khat peuh Lai Siangtho siksanin khensat uh hi. Thu-um mite kipumkhatin mi honpi’ pulaak thute zong Kha Siangtho’ makaihna hi, ci-in sang thei uh hi. Ngei-na tuamtuam, sanzia tuamtuam, thuzuihna kibatlohnate ah buai-na a hong ciangin Kha Siangtho in pawlpi’ khensatna khempeuh makaih hi.” Denis Fortin, “ The Holy Spirit and The Church, in Angel Manuel Rodriguez, ed., Message, Mission, and Unity of the Church, 321, 322.
Kikup Ding Dotnate
1. Na lawmte tawh Wednesday ni-a dotna kikum in. Koi bangin SDA pawlpi in up ding le zuih ding, nial ding hepkhiat ding thute khensat hiam?
2. Koi bangin Jesuh sihna le sihna pan thawhkikna a um pawldangte tawh kizopna nei ding i hiam?
Tomkaihna: Kipumkhatna kilangsak pipen in Jesuh hong it bangin khatlekhat ki-itna hi. Hotkhiatna sungah nungta-in khatlekhat mawhna kimai-sak ciangin kizopna kip, kipumkhatna om hi. Khrih sungah kipumkhatin i upna i pulaak dingin hong kisawl hi.
