LESSON 8 Nov. 17 – 23
UPNA-AH PUMKHAT
Sabbath Nitak
Tu Kaal Sung Sim Ding: Sawl. 4: 8 – 12; 1: 11, 14; Matt. 25: 1-13; Heb. 9: 11, 12; Pai. 20: 8 – 11; 1Kor.15: 51 – 54.
KAMNGAH: “ Ama hang bek tawh hotkhiatna kingah thei ding hi. Bang hang hiam cihleh eite in hotkhiatna i ngahtheih nadingin leitung khempeuhah Pasian in hong piak min dang khat zong om lo hi,” ci-in a gen hi (Sawl. 4: 12).
1888 kumin SDA pawlpi sungah upna tawh kisai buai-na lianpi hong tung hi. Pastor, makai tampite in Daniel 7 sunga kii 10 tawh kisai thu le Galatia 4 sunga thukham tawh kisai muhzia kibang lo-in kinialna lianpi om hi. Tua bang kinialna panin mimal kilangneihna, kimuhdahna hong om manin pawlpi in a nasepna-ah kipumkhat thei lo hi. Ellen G. White in hih buai-na limtakin kankhia-in, pawlpi mite in Jesuh tawh kizopna hoihtak kisittel kik dingin hanthawn hi. Ellen G. White in zong Lai Siangtho thuthuk muhzia kibangkim khin ding cih lamen lo hi. Ahi zongin Adventist pawlpi upna kipumkhat ding pulaak tawntung hi (Ellen G. White, Counsels to Writers and Editors, 28 – 32). Tu kaal sungin Adventist pawlpi upna hong kikhatsak thute i kikum ding hi.
SUNDAY Nov. 18
Jesuh Sungah Hotkhiatna
SDA pawlpi in pawldangte tawh upna kibang honkhat nei hi mah taleh i pawlpi upna thugui luanzia kuamah in nei lo hi. Hih thute in hun nununga a cianlai pawlpi i hihna pulaak hi.
Sawl. 4: 8 – 12; 10: 43 sim in. Peter in hotkhiatna thu a genna-ah Jesuh a thupitna bang pulaak hiam?
__________________________________________________________________
__________________________________________________________________
Paul in Korin pawlpi a laikhakna-ah Pasian in Khrih tungtawnin leitung mite tawh kizopna hong bawl hi, ci-in pulaak hi (2Kor. 5: 19). Khrih a hong sihna tawh eite khempeuh in Pa tawh kilemin, mawhna le sihna hangin Pasian tawh kikhenna pan kizopna hong bawlsak hi. Khristian sungah Khrih hong sihna, sihna pan a thawhkikna Pasian tawh kilemkiknate tawh kisai kum zalom tampi kibuaipih hi. Pasian tawh kilemna, pumkhat suahna i ngah thei hi. Pasian tawh kilemna panin pawlpi in kipumkhat thei hi.
A nuai-a Lai Siangthote sim inla Jesuh sihna le sihna pan a thawhkikna in bang a khiatna nei hiam?
Rom. 3: 24, 25 _______________________________________________________
________________________________________________________
1Jn. 2:2 ________________________________________________________
________________________________________________________
1Jn. 4: 9, 10 ________________________________________________________
_________________________________________________________
1Pet. 2: 21 – 24 ___________________________________________________
___________________________________________________
SDA pawlpi mah bangin pawl dangte in zong Khrih hong sihna le sihna pan a thawhkikna pulaak uh hi. Ahi zongin SDA pawlpi in ‘tawntung lungdamna thu’ ‘ vantungmi thumte’ thupuak’ siksanin (Mang. 14: 6 -12) a pulaak i hi hi. Hih thu pawl dangte in pulaak lo uh hi. SDA pawlpi in i pulaak hi.
Koi bangin Khrih’ sihna le sihna pan a thawhkikna mitsuanin lametna tawh mainawt ding na hiam?
MONDAY Nov. 19
Khrih A Nihvei-na Hong Pai Ding
Sawltakte le Khristian mi masate in Khrih hong kumkik ding thu in thupha tawh kidim lametna hi, ci-in um uh hi (Titus 2: 13). Khrih hong kumkik ciangin genkholhna, kamciam khempeuh tangtung ding hi, ci-in lamen uh hi. SDA pawlpi in hih thu limtak lenkip hi. A taktakin pawlpi min Adventist a khiatna in Khrih hong kumkik ding a pulaak kammal hi. Khrih a it mi khempeuh in Khrih tawh maitang kimu dingin lamen uh hi. Tua ni hong tun mateng Khrih a hong pai ding kamciam in Pasian’ mite hong kipumkhatsak hi.
A nuai-a Lai Siangtho in Khrih hong paizia bangci hong hilh hiam? Koi bangin laksim tawh kibang lo ding hiam? Sawl. 1: 11; Matt. 24: 26, 27; Mang. 1:7; 1Thess. 4: 13 -18; 19: 11 – 16.
__________________________________________________________________
__________________________________________________________________
Jesuh in a mite hong la ding leitungah hong pai ding hi. Hih thu in mite’ hoihsak thu mawk hi lo-in, Jesuh mahmah in a hong gen ahi hi. “Ahi zongin a ni le a nai hun ding pen kuamah in thei lo hi. Vantungah a om vantung mite ahi a, Tapa nangawn in ahi zongin thei lo a, Pa Pasian bek in thei hi” (Matt. 24: 36). Khrih hong pai ding hun a hong kigen loh mah bangin eite in a hun ding i thei kei hi.
A nasep a zawh ciangin Khrih in nihvei-na a hong pai kik ciangin thu-um mite tuah ding thu, nungak 10 thugentehna tungtawnin hong hilh khol hi. Nungak hai le nungak pil in Jesuh hong kumkik ding a lamen thu-um mi namnihte’ omzia pulaak khol hi. Mitmuhin amaute nih in kilamdanna nei lo hi. Ahi zongin Khrih hong pai nai lo ahih manin a sawt ciangin a kilamdanna uh hong kidawk hi. Khrih in a hong pai hak hangin khen khat in upna khahsuak lo-in, kiging tawntung uh hi. Hih thu gentehna tungtawnin Jesuh in a nungzuite tungah Khristian nuntakna in gualnopna, leitung nopsakna tungah kinga lo-in, Pasian’ hehpihna, bang bang gimna, lungkhamna tuah taleng Topa muan tintenna cihte tungah kinga hi. Tuni dongin Jesuh in vilin ngakin Ama hong pai ding kiging tawntung dingin hong deih hi.
Seventh-day Adventist cih pawlpi min in Jesuh nihvei-na hong pai kik ding hong hilh hi. Koi bangin Jesuh hong pai kik ding mimal kiging ding i hiam? Jesuh in Ama hong pai kik ding kigingkholh ding deihna tawh nungak sawm tungtawnin a hong hilh thu koi bangin kiging ding na hiam?
Tuesday Nov. 20
Vantung Biakbuk Sungah Jesuh’ Nasep
Pasian in a mite lakah a hong om theih nading biakbuk lam dingin Moses sawl hi (Pai. 25:8). Biaknate tuamtuamte, biakbuk sunga kisem khempeuh in hotkhiatna thu hong hilh hi. Kumpi Solomon hun ciangin a kituah kawikawi thei biakbuk pen Jerusalemah kipsuak dingin kilam hi (1Kum. 5-8). Puanbuk hi taleh biakbuk in vantung biakbuk limcingin kibawl hi. “Vantung biakbuk in a bawl mihing hi lo-in Topa hi” (Heb. 8:2; Pai. 25: 9, 40). Pasian’ teenna vantung biakbuk om takpi hi, ci-in Lai Siangtho in hong hilh hi. Leitung biakbuk in hotkhiatna kisepna, Jesuh in siampi a sepna vantung biakbuk pulaak hi.
Heb. 8: 6; 9:11, 12, 23 – 28; 1Jn. 1:9 – 2: 2 sim in. Vantung biakbukah Jesuh siampi nasep bang pulaak hiam?
______________________________________________________________
______________________________________________________________
Eite a hong kihotkhiatna dingin, Khrih in vankah a kipan vantung biakbukah siampi sem hi (Heb. 7: 25). Tua ahih manin eite khempeuh in hehpihna le huhna i ngah nadingin lau lo-in hehpihna tokhom i va zuan thei hi (Heb. 4: 16). Leitung biakbuk in dei nih nei hi. Dei masa siangtho mun sungah nisimin meihal biakna kinei a, dei nihna – siangtho bel munah kum khat in khat vei mawhsutna kinei hi. Hih in vantung biakbuk sung nasep nihte limcingkhol hi. Khrih in van a kah a kipan siangtho bel sungah lutin mawhthumsakna, mawhmai-sakna, kilemkikna, kipuahphat nasep sem hi. Mawhna kisik mi in Jesuh eite Palai tungtawnin Pa kiang tung thei, Pa tawh kizopna nei thei hi (1Jn. 2:1). 1844 kum ciangin Jesuh in vantung biakbuk siangtho bel sungah va lutin mawhna thukhenna le siansuah nasep hong kipan hi (Siam. 16). Biakbuk in Jesuh sisan tawh kisiansuah hi. Mawhsutpi Ni in Khrih in Ama siantho-na tawh mawhna khempeuh a siansak ding limcing khol hi. Pasian in a bawlsa na khempeuh bawlpha kikin Ama ukna nuai-ah a koih hun hong tung ding hi. Hotkhiatna tawh kisai Jesuh nasep khennihte in Adventist upna in Khristian dangte lakah a tuamdiakna hi. Jesuh sisan bulphuhin biakbuk kisiansuah hi. Mawhsutpi Ni-a biakpiakna in leitung vannuai panin mawhna kibeimangsak ding limcingkhol hi. Tua khit ciangin na khempeuh in Pasian ukna nuai-ah om ding hi. Biakbuk siangtho mun le siangtho bel muna kibawl biakpiakna in hotkhiatna tawh kisai Adventist pawlpi in pawldangte tawh a kibatlohna hi.
Wednesday Nov. 21
Sabbath
Seventh-day Adventist pawlpi in a thupi mahmah Lai Siantho thuman a tangko-te lak pan khat in piansak ni 7 ni Sabbath hi. Hih thu upna in pawlpi mite hong kipumkhatsak hi. Khristian thu-um tawmno khat bek in Sabbath thuman tangko uh hi. Sabbath in leitung piancil a kipan Pasian in mihingte tungah a hong piakkhong hi (Pian. 2: 1-3). Leitung piancil a kipan Sabbath a thupi-sak thu thum om hi. ( 1). Pasian in Sabbth ni-in tawlnga hi. ( 2) Pasian in Sabbath ni thupha pia hi. ( 3) Pasian in Sabbath ni siangthosak hi. Hih thu thum in Sabbath in Pasian hong piakkhong ahihna, mihing in leitungah vantung nopna i neih nading, Pasian in ni guk sungin na khempeuh piangsak hi, cih thute pulaak hi. Rabbi minthang mahmah Abraham Joshua Heshel in Sabbath pen ‘kumpi inn sung a om a nopna tawh kibang hi; Sabbath in Pasian in a mite tawh a tuamdiakin a hong kimuhna ni hi’ ci-in pulaak hi.
Pai. 20: 8 – 11; Thkna. 5: 12 – 15; Ezek. 20: 12, 20 cihte in mihingte aa dingin Sabbath in bang pulaak hiam?
_____________________________________________________________
_____________________________________________________________
Jesuh mah bangin Seventh-day Adventist pawlpi in zong piansak ni 7 ni Sabbath i zang hi (Lk. 4: 16). Sabbath ni-a Jesuh in biakpiakna nei ahih manin Sabbath ni in nasepna pan tawlngak ni le biakpiak ni hi, cih pulaak hi. Jesuh in Sabbath ni-a a bawl nalamdangte in Sabbath ni-in pumpi damna le upna damna kingah hi, cih hong hilh hi (Lk. 13: 10 – 17). Sawltakte le Khristian mi masate in zong Jesuh in Sabbath beisak lo hi, cih hilh uh hi. Amau mahmah in Sabbath ni-in biakpiakna nei uh hi (Sawl. 13: 14, 42, 44; 16:13; 17:2; 18:4).
Sabbath tawh kisai i gen thute khit banah Sabbath ni in mawhna pan suahtakna limcing hi. Sabbath in Egypt gam a saltang Israel mite in Canaan gamah nuamtakin a teen nadingin Pasian in a hotkhiatna limcing hi (Thkna. 5: 12- 15). Pasian’ thupiak bangin nungta lo-in, namdang pasiante bia uh hi mah taleh Pasian in a mite tawlngakna ding kamciam hong pia veve hi (Heb. 4:9). Tua tawlngakna sung a lut nuam mi khempeuh in a luttheih nadingin Jesuh a um mi khempeuh aa dingin lampi hong bawlkholhsak khin zo hi. Sabbath in Khrih sungah tua tawlngakna limcing hi. Khrih dikna bek in tua tawlngakna, mawhna pan hong honkhia-in tawntung nunna hong ngahsak hi; gamtatna, thukham zuihna in hong tunpih thei lo hi (Heb. 4:10; Matt.11: 28 – 30).
Khrih in a mite kipum khat ding a deih mah bangin koi bangin Sabbath in Khrih sungah thu-um mite hong kipumkhatsak hiam?
Thursday Nov. 22
Sihna le Sihna pan Thawhkikna
Nate a kipiansakin “TOPA Pasian in leilak pana leivui tawh mihing bawl a, a nak sungah nuntakna hu sang suk hi. Tua mi pen leitung nuntakna a nei mihing hong suak pah hi”(Pian. 2:7). Hih in nuntakna in Pasian hong piak hi, cih pulaak hi. A hong kipiansakin sih theih lohna tawh hong kipiangsak hiam? Lai Siangtho in Pasian bek in si thei lo hi, ci hi (1Tim. 6:16). I piankhiat a kipan a si thei lo ding i hi kei hi. Pasian bek in sih theih lohna nei a, mihing in nei lo hi. Mihing nunna in tuikhu bangin mitphiat sungin beimang thei hi (James 4: 14). Mihing nunna a bei ciangin khuaphawk theihna bang mah nei nawn lo hi (Thsia. 9:5,6, 10; Late 146: 4; 115: 17; Jn. 11: 11- 16).
Mihing in si thei hi; sihna nuai-ah a om hangin Jesuh Khrih in si lo nunna hi. Amah a um mi khempeuh in a si thei lo nunna tawh nungta ding hi, ci-in hong kamciam hi (Rom. 6:23). Jesuh in sihna nusia-in nunna, tawntung nunna hong pia hi (1Tim. 1:10). “Pasian in leitung mite hong it mahmah ahih manin ama Tapa a um mi khempeuh si nawn lo-in a hin tawntung theih nadingun a Tapa neihsun a hong piak dongin a hong itna a hong lak hi” (Jn. 3: 16). Tua hi-in sihna pan tho-in nungta kik ding lametna i nei hi.
1Kor. 15: 51 – 54; 1Thess. 4: 13 – 18 sim in. Sih khitteh nunna le bang hun ciangin sih nawn lohna tawh nungta tawntung ding i hiam?
________________________________________________________________
________________________________________________________________
Mihing in a sih ciangin tawntung nunna ngah pah lo hi. Sihna pan thawhkik ni, a nung pen pengkul a kitum ciangin a si thei lo nunna hong kipia pan ding hi. Khrih, Honpa-in i up ciangin tawntung nunna ngah ding kamciam i ngah thei a, a si thei lo nunna ahih leh Amah hong pai kik ciang bek in hong kipia ding hi. Lai Siangtho sungah sih ciangin sih nawn lohna kingah pah hi, cih hong hilh lo hi. Sih ciangin sih nawn lohna kingah pah hi, cih upna in dawi biakna le Greek mite kiang pan hong pai upna hi.Lai Siangtho sungah tua bang thuhilhna om lo hi.
Koi bangin sihna in Jesuh Khrih hong pai kik ding kamciam tawh hong kinai-sak hiam? Koi bangin hih upna in Seventh-day Adventist thu-um mite hong kipumkhatsak hiam?
Friday Nov. 23
Ngaihsutbeh Ding: Ellen G. White, “ The Foundations, Pillars, and Landmarks,” 28 – 32, in Counsels to Writers and Editors. “Doctrines, Importance of,”778, 779, in The Ellen G. White Encyclopedia.
Seventh-day Adventist pawlpi in pawldangte upna tawh kibang upna kimkhat i nei hi. Tuate lak pan a bulpi mahmah khat in upna tawh hotkhiatna - mawhnei mite aa dingin Jesuh Khrih a hong sihna thu hi. Khristian dangte mah bangin SDA pawlpi in zong mihing’ gamtat hoihna, thukham zuihna tawh diktanna kingah hi lo-in Khrih’ dikna bekin midik hong tangsak hi, cih i um hi. Tua dikna in hehpihna tawh a khawnkhongin hong kipia hi. Ellen G. White in hehpihna tawh kisai hih bangin pulaak hi: “Eite in Khrih tawh a nungta khawm thei dingin Khrih in eite thuak ding khempeuh hong thuak hi. Khrih’dikna i ngah nadingin, mawh nei lopi Khrih in eite mawhna hangin mimawh hong suak hi. Khrih nunna i ngah nadingin eite thuak ding sihna Amah mah in hong thuak hi.” The Desire of Ages, 25. SDA pawlpi’ upna thuguipi khempeuh in hih thu panin hong mengkhia hi. Tua hi Khristian dangte lak pan i tuampian zawknahi. Seventh-day Adventist pawlpi a omna hang hih thu mah hi. Jesuh i itna, i genkhiat thute in hong kipumkhatsak hi.
Kikup Ding Dotnate
1. Ellen G. White, “ In Faith and Works, 103 sungah Ellen G. White in mawhmai-sakna leh diktanna kibang hi, ci-in pulaak hi. Koi bangin Khrih sungah mawhmai-na le diktanna in SDA pawlpi hong kipumkhatsak hiam?
2. Pawlpi kipumkhatna siksanin upna thuguipite bangzahin thupia hiam? Mi namkim, pau namkim, ngei-na tuamtuam kigawmkhawm, mun tuamtuam a om SDA thu-um mite pawlpi khatin hong omkhawmsak in upna thuguipi hi lo hiam? Hih in bangzahin upna thuguipi-te in pawlpi nasepna banah kipumkhatna dingin thupi mahmah hi, cih hong hi lo hiam?
3. I pawlpi Seventh-day Adventist cih min a thupi mahmah thu nih pulaak hi. Piansak ni 7 ni Sabbath le Nihvei Kumkikna pulaak hi. Pawlpi min in nate kipiansakna thu le hotkhiatna thu pulaak hi. Koi bangin hih thu nih in kizopna nei hiam? Bangci bangin SDA thu-um mi i hihna taktak pulaak hiam?
Tomkaihna: Seventh-day Adventist pawlpi in upna thuguipi pawl khat nei hi. Tuate lakah pawldangte neih tawh kibang thuguipi om hi. Ahi zongin a huamin en lehang tua upna guipite in pawldangte tawh i kibang lo-in a tuam vilvel pawlpi i hihna le SDA pawlpi kipumkhat sak ahihna kimu thei hi.
