LESSON 13 Dec. 22 – 28
Pumkhat Ding A Nunung pen Kipuahphatna
Sabbath Nitak
Tu Kaal Sung Sim Ding: Jn. 14: 1-3; Isa. 11: 1-10; 35: 4 – 14; Mang. 21: 1-5; 22: 1-5; 1Thess. 4: 13 – 18.
KAMNGAH: “ Eite in Pasian’ hong ciamsa, thuman bekbek a kizat nading mun van thak le lei thak a ngak i hi hi” (2Peter 3: 13).
Lai Siangtho sungah a lian mahmah kamciamte lakah khat in Jesuh hong pai kik ding kamciam hi. Hih kamciam om kei leh i nuntakna in a mawkna taktak hi ding hi. Bang hang ham cihleh i lamet khempeuh Jesuh hong pai kik ding kamciam tungah kinga hi. A hong pai kik ding kamciam in ei aa dingin man nei mahmah hi. Jesuh in vangliatna tawh hong pai ciangin mihing’ bawl na khempeuh a kipan leitung in kisia mang ding a, na khempeuh beimang ding hi. Kum 1000 khat vantung i om ding a, tua khit ciangin gitlohna, sihna, siatna, gimna, kialtunna tawh kidim leitung in a thakin kibawl pha ding a, tatsa mi siangthote in Topa tawh a tawntungin nungta ding uh hi.
Khrih hong pai kik ding lametna in Thuciam Thak sungah thugui lian mahmah khat hi. Kum za tampi sung Khristiante in Jesuh hong kumkik ding kamciam tangtun ding ngaklah uh hi. Seventh-day Adventist thu-um mite in zong Jesuh hong kumkik ding i lamen hi. I pawlpi’ min mahmah in Jesuh hong kumkik ding pulaak hi. Tu kaal sungin hih kamciam le hih kamciam in pawlpi kipumkhatna tawh a kizopdan i kikum ding hi. Mihing’ thanemna le kicinlohnate in Khrih sungah kipumkhat ding hong buai-sak thei zel hi. Kilem loh manin pawl kikhen ding, kitamkhap ding kisam lo hi. Bang hang hiam cihleh SDA pawlpi sung pan pawlpi dang hong piangkhia lo ding hi. Jesuh hong pai ciangin eite khempeuh in Topa tawh pumkhat hi-in mi khempeuh in innkuan khatin kinungta ding hi.
Sunday Dec. 23
Khrih Hong Kumkik Takpi Ding Hi
John 14: 1- 3 in Jesuh hong pai kik takpi ding hi, cih kamciam kiciantakin pulaak hi. Hih kamciam in lei thakah tatsa mite’ nunzia ding, omdan ding bang pulaak hiam?
_________________________________________________________________
_________________________________________________________________
Khristian masate in Khrih hong kumkik ding pen ‘lametna thupha’ (Titus 2:13) ci uh hi. Amaute in genkholhna khempeuh, Lai Siangtho sunga kamciam a om khempeuh Jesuh hong pai ciangin tangtung ding hi, ci-in lamen uh hi. Khrih hong kum kik ding pen Khristian khempeuh ii lamet bulpi hi. Khrih a it mi khempeuh in tua ni ngakin, Amah tawh maitang kimu ding lametna lianpi nei uh hi. Jesuh hong kamciam (Jn. 14: 1-3) in Amah tawh kizopna, pumkhat suahna banah eite khatlekhat zong hong kipumkhatsak hi.
Khristiante in Jesuh hong kamciam (Jn. 14: 1-3) i um hi. Bang hang hiam cihleh Pasian kamciam tangtung takpi ding hi, cih Lai Siangtho in lungmuanna hong pia hi. Khrih a hong pai masak ding a kigenkholh mah bangin, Thuciam Lui in zong Jesuh nihvei a hong pai kik ding genkhol hi. Mawhna beisak dingin vangliatna tawh Messiah hong pai ding hi, tuicin tunma Enoch tungah zong kigenkhol khin hi. “Tanglai pekin Adam pan khang sagihna Enock in zong hih thu mah na genkhol a, a genna-ah, ‘ En un, Topa, a mi siangtho honpite tawh hong pai ding a, Pasian’ deihna bangin a gamtat lohna hang uhleh kam hoih lopipi zangin Pasian a gensiatna uh hangin Pasian’deihna bangin a gamta lo mite tungah thu khenin mawhsakna pia ding hi,” na ci hi (Jude 14, 15).
Jesuh hih leitungah mihingin a hong pianma kum 1000 laipekin kumpi David in zong Pasian’ mite a kaikhawm dingin Messiah hong pai ding na genkhol hi. “Eite’ Pasian hong pai a, amah dai om mawk lo hi. Ama mai-ah mei husia om a, a kimkotah huihpi om hi. A mite tungah thu a khen theih nadingin tunglam vantung le leitung a sam hi. Biakpiakna tawh, kei tungah thuciamna a bawlte, ka mi citakte ka kiangah hong khawm un,” a ci hi (Late 50: 3-5).
Jesuh a hong pai kik nading le a hong pai masak in kizopna nei hi. Mihingin a hong suah ding, a sep dingte kigenkholh bangin a tangtung khin thute siksanin, nihvei-na a hong pai kik ding kamciam lametna i nei thei hi (Pian. 3: 15; Mikah 5:2; Isa. 11: 1; Dan. 9: 25, 26). “Tua bang a kipiak thakthak ding a kisam hi leh leitung piancil a kipan tamveipi a si khinzo ding hi. Ahi zongin tu hun ciangin Khrih amahmah gangawh biakna banga a kipumpiakna tawh mawhna a lakhia dingin khatvei hong kilang zo hi. Tua ahih manin Khrih in mi tampite mawhnate a puakhia dingin khatvei a kipia khinzo hi. Mawhna tawh kisai hi nawnlo-in lawptakin amah a ngakte honkhia dingin a nihveina a hong kilang lai ding hi” (Heb. 9: 26, 28).
Khrih hong paikik ding kamciam hangin lametna, lungmuanna na nei hiam?
Monday Dec. 24
Na Khempeuh Bawlphat Ding Kamciam
Isa. 11: 1-10 sim in. Israel mite tungah bang kamciam kipia hiam? Tatsa mite in a tawntungin a teenna ding mun bang pulaak hiam?
___________________________________________________________________
____________________________________________________________________
Lai Siangtho in leitung kipiansakna thu pulaak masa hi (Pian. 1, 2) Leitung in hoihna tawh kidimin i nu le pa masa – Adam le Eve in leitung kemcing dingin sawlna ngah uh hi. Pasian in mihing om nadingin kicinna tawh kidim leitung hong bawl hi. Lai Siangtho sung a tawpkhakna-ah zong tatkhiat mite’ om nading kicinna tawh kidim lei thak thu kipulaak hi (Mang. 21:22). Hih hun hong tunteh siatna dim hih leitung kibawlpha thak ding hi.
Leitung thak in ngaihsutna mawkmawk hi lo-in a hong tung takpi ding lei thak hi. Tatkhiat mite in a muh ding, a zak ding, a tuah ding uh leitung thak hi ding hi. Isaiah 11 in na khempeuh a bawl pha dingin a hong pai ding Messiah thu pulaak khol hi. Amah in siatna khempeuh beisiangsak ding a, tawntung nopna hong pia ding hi. Lei thak in Pasian’ vangliatna tawh kidim ding a, na khempeuh in pumkhat hi ta ding hi.
Mang. 21: 1- 5 sim in. Na khempeuh a thakin kibawlin a kibawl pha na khempeuh pumkhatna in bang beimangsak ding hiam?
_________________________________________________________________
_________________________________________________________________
Ellen G. White in tatkhiat mite ngah ding hih bangin pulaak hi: “ A bei ngei lo ding tawntung hun sungah tatkhiat mite in vangliatna kidim Pasian theihtelna le Khrih theihna sungah khangtoto ding uh hi. Pasian a theihna uh tatsat lo ding a, itna, zahtakna le nuamna nei toto ding uh hi. Pasian a theihna uh khang semsem ding a, Ama zia le tong hoihna mu tektek ding uh hi. Jesuh in hotkhiatna le Satan a zawhna thu khempeuh pulaak ding a, tatkhiat mite in kham gua-semte tawi-in Amah phatin bia ding uh a, simzawh loh mi honpi le vantungmite in aw kikhatin phatna la sasa ding uh hi.” Ellen G. White, The Story of Redemption, 432, 433.
Tu-in bangci bangin Pasian’ zia le tong na tel hiam? Koi bangin thu-um mite tawh kipumkhatna in Pasian le Ama zia le tong pulaak hiam?
Tuesday Dec. 25
Sihna Tawh Hinkikna le A Kibawlpha Kizopna Thak
Pawlpi masa laipek a kipan Khrih hong pai kik ding hi, cih kamciam in thu-um mite in a thuak uh hamsatna khempeuh kantan zo-sak hi. Bangbang gimna, bawlsiatna thuak taleh Pasian tungah a citak mite in Kumkikna kamciam tawh nungta uh hi.
1Thess. 4: 13 – 18 sim in. Bang kamciam hong pia hiam? A kibawlpha ding kizopna thak tawh kisai bang pulaak hiam?
____________________________________________________________________
____________________________________________________________________
Khrih nihvei a hong pai ciangin na khempeuh kilamdang ding hi. Vangliatna dim Pasian’ gam hong tung ding a, Ama mi khempeuh hong kaikhawm ding hi. “Amah in a ngaih mahmah pengkul aw tawh ama vantungmite sawl ding a, amaute in lei kiuli le van mong khat pan mong khat donga om a teelsa mite a kaikhawm ding uh hi” (Matt. 24: 31). Tua kikaihkhop hun ciangin midik a si mite hong tho ding uh a, sih nawnlohna ngah ding uh hi ( 1Kor. 15: 52, 53). “Khrih sungah a si mite tho masa ding uh hi” (1Thess. 4: 16). Tua hun hong tun ding i ngak ciat hi. Hotkhiatna ngah a si mite hong tho ding uh a, a nungta lai tatna ngah mite tawh pumkhat suak ding uh hi. Tua hangin Paul in “Sihna aw, na gu koilai-ah om a hiam? Hankhuk aw, na gualzawhna koilai-ah om ahi hiam? cih tangtung ding hi (1Kor. 15:55).
A si tatkhiatsa mite a hong thawhkik uh ciangin natna, gimna a hankhuk sung a kivui lai bangun hong thokik ding uh hi lo hi. Sih nawnlohna, kicinna tawh kidim pumpi tawh hong tho ding uh a, mawhna hang a siatna kimu nawn lo ding hi. Sihna pan a hong tho mi siangthote in, Khrih tatkhiatna sung na khempeuh kibawlthakna sungah a kicingin nungta ding uh hi. Pasian’ limlemel kilangsak mawhna omma mihing nunna tawh nungta ding uh hi (Pian. 1: 26; 1Kor. 15: 46 – 49).
Tua hi-in sihna pan a tho mi siangthote le si lo-in a kikhel mi siangthote pumkhat suak ding uh a, Topa dawn dingin vanah laktohna ngahkhawm ding uh hi (1Thess. 4: 17)
Leitung pilna siksanin Khristian pawlkhat in nalamdang a kipan na khempeuh leitung ngei-na hi, ci-in pulaak uh hi. Banghangin sihna pan thawhkikna kamciam in a lamdang Pasian’nasepna, Amah bek in eite hong honkhia thei hiam?
Wednesday Dec. 26
Tatkhiat Mite aa Ding Lei Thak
“ En un, a thak vante le lei thak khat ka piangsak ding hi. A masa nate kiphawk nawn lo-in lungsimin zong a kingaihsun kha kei ding hi” (Isa. 65: 17). Isaiah le John in (Mang. 21:1) a hong tung ding lei thak mukhol uh hi.
Mang. 21: 2, 9 – 27, tatkhiat mite teen nading Jerusalem thak ngaihsun in. Tua khua sungah kipumkhatna, kilemna bang pulaak hiam?
_________________________________________________________________
_________________________________________________________________
Mang. 22: 1-5 sim in. Pasian tokhom panin a luangkhia nunna guntui le nunna singkung in tua khuapi thak omzia pulaak hi. Tua guntui le singkung in bang ngimna nei hiam?
___________________________________________________________________
___________________________________________________________________
Adam in a mawhna hangin nunna singkung mu kha nawnlo hi mah taleh Jerusalem Thakah Khrih in tua nunna singkung hong pia kik ding hi (Mang. 2:7). Tua singkung in gahnam 12 nei hi. Kha sialin gahnam khat gah hi. Hih in “Khadet khat pan khadet khat, Sabbath khat pan Sabbath khat, keimah bia dingin Jerusalemah mi khempeuh hong pai ding uh hi, TOPA in ci hi” (Isa. 66: 22). Minam khempeuhte damna pia tua singkung in kideidanna, kibatlohna namcin khempeuh bei-in, minam khempeuh, paunam khempeuh innkuan khat bangin kipumkhat, kilemin Pasian phatkhawm ding uh hi, cih hong hilh hi.
Minam khempeuhte’damna in minam, pau-nam kideidanna om lo hi, cih limcing hi. Nunna singkung in minam khempeuh damsak hi. Minam khempeuh in kikhennawn lo-in, Pasian innkuan, Ama mite pumkhat hi ta ding hi (Mang. 21; 24 – 26). Kum zatampi laipekin Mikah’ genkholhnate a tangtung hi ding hi: “Amah in minam tampite’ thu khensak ding a, Israel gam panin a gamla pekah a om, minam vangliante’ thu khensak ding hi. Amaute in a namsaute uh lokhawhna tu-in seek ding uh a, a teipite uh singhiang heuhna temkawi-in seek ding uh hi. Minam khatlekhat kido nawn lo ding uh a, galkido-na theikha nawn lo ding uh hi. A kuamah peuh lungnuamin a leenggui phung le a theikung nuai-ah tu hihiat ding a, kuamah in patau-sak nawn lo ding hi. Bang hang hiam cihleh Vanglian TOPA mahmah in hih thu hong gen khinta hi” (Mikah 4: 3, 4; Isa. 2:4 tawh enkak in).
Tua hun ciangin nunna gungei, nunna singkung nuai-ah minam khempeuh tukhawm ding uh hi (Zech. 3:10). Nunna singteh in khatlekhat hong kideidansak, hong na-sak, gim hong pia ngei-na, pau, minam, beh le phung cihte bei-sak ding hi.” Ranko Stefanovic, Revelation of Jesuh Christ: Commentary on The Book of Revelation, 593.
Thursday Dec. 27
Lei Thakah Nundan Ding
Isa. 35: 4 – 10; 65: 21 – 25 sim in. Koi bangin lei thakah i nundan ding in, tu-a i nundan tawh kilamdang ding hiam?
__________________________________________________________________
__________________________________________________________________
Isaiah sungah ‘a thak’ cih kammal tam veipi kimu thei hi. “a thak nate” (42: 9; 48: 6) “ la thak” (42:10), ‘a thak na khat” (43: 19), “ min thak” (62: 2). Hihte khempeuh in nate kilamdan, nate omdan pulaak hi. Pasian’ bawlsa na khempeuh in kilemna tawh kidim ding hi. Thuman lohna hangin samsiatna, gimna khempeuh beimangta ding hi (Siam. 26: 14 – 17; Thkna. 28: 30). Bang hang hiam cihleh mawhna om nawn lo ding hi. Na khempeuh thupha tawh kidim ding hi. Nuamna vive tawh kidim ding hi. Teen nading mun, nek theih khempeuh hoihna tawh kidim ding hi. Tua bang munah nunna in noplua ding hi.
Mikim khat in tua munah si thei nawnlo, Pasian’ limlemel a dimin nei hunah i sanggam, i innkuanpihte, lawmlegual i thei lai ding hiam, ci uh hi. Sihna pan Jesuh a thawh khitteh a Nungzuite in Jesuh ahihlam thei lai veve uh hi. Mary in Jesuh aw ciapteh theilai hi ( Jn. 20: 11 – 16). Thomos in Jesuh pumpi theithei hi (Jn. 20: 27, 28). Emmaus lampi-a pai lawmta nihte in zong annek sabuai-ah Jesuh tatzia-te pulaak thei uh hi ( Lk. 24: 30, 31, 35). Tua hi-in i pumpi in sihna pan a tho Jesuh’ pumpi tawh kibangin si nawn lo ding pumpi ahihleh khatlekhat kithei-in, tatsa mite in khatlekhat kizopna nei ding uh hi. Midangte zong thei-in ei mah le ei mah kitheihna i nei ding hi.
Tu-a khatlekhat i kitheih mah bangin lei thakah zong khatlekhat i kithei ding hi. Pasian in tatkhiatsate sungah a hong koih itna le hehpihna mah tawh i nungta ding hi. Tuuno si sungah a puan uh a sawp mi siangthote in puanpaak silhin mawhna nei lo Pasian’ bawlsa khempeuh, vantungmi siangtho khempeuh tawh innkuan khatin nungta khawm ding uh hi. Tatkhiatsate nuamna lian semsem ding hi” (Eph. 3: 15). Ellen G. White, The Great Controversy, 677.
“ Kote in ka lungkia tuan kei uh hi………….tuhun laitakin tomno sung lungkhamna ka thuakte uh in ka thuakna uh sangin nakpitakin a lianzaw tawntung minthanna sung hong tunpih ding hi. Bang hang hiam cihleh a kimuthei nate a mitsuan ka hi kei uh a, a kimu thei lo nate a mitsuan ka hi uh hi. A kimu thei nate tomno sung bek kimang a, a kimu thei lo nate a tawntungin a kip a hi hi” (2Kor. 4: 16 -18).
Koi bang tomno sung kimang leitung vai tuamtuamte lak pan a kimu thei lo, tawntung thute tawh nungta thei ding i hiam?
Friday Dec. 28
Ngaihsutbeh Ding: “ Behold, I Come Quickly,” 355 – 359, in Counsels for the Church.
“ Resurrection,” 1082 – 1084, “ Heaven and Earth,” 863 , 864 in The Ellen G. White Encylopedia.
Jesu in sihna pan a thawhkikna le van a kahtohna in Pasian’mi siangthote in sihna zo taktak ding a, Tunno sisan tawh a nunna puan sawpsiang mite aa dingin vantung kongkhak kihon ding hi, cih hong lakkhol hi. Jesuh in a tatsa mite aitangin Pa kiangah va pai hi. Pasian in Ama limlemel pua mite tungah vangliatna pia ding hi.
“Leitung khualzin mite aa dingin tunna inn om hi. Mi siangthote silh ding puan siangtho, kham lukhu le zawhna in ngak hi. I telzawhloh a lamdang Pasian’ nasem khempeuh tua hun ciangin i telsiang ding hi. I theihnop thute hong kihilh ding hi. A lamdang hehpihna thu hong kihilh ding hi. Ciangtan nei mihing ngaihsutna, lungkiatna khempeuh tua hun ciangin kicinna tawh kidim ding hi. Mongnei lo itna thu i telsiang ding hi. A mite aa dingin aa khempeuh a hoihin a sem tawntung Pasian’ hehpihna, itnate hangin a kigen zo lo nuamna, vangliatna tawh i nungta ding hi.” Ellen G. White, Counsels for the Church, 358.
Kikup Ding Dotnate
1. Khristian khempeuh in Jesuh hong pai takpi ding hi, cih a um kei zongin a tuam phadiak Khrih Nihvei a hong pai kik ding Adventist upna in bang hi ding hiam?
2. Nga nih tuipek kawmin khatlekhat kiho uh hi. “ Tui bangci na sa aa? A khat in “ bang tui maw, ci-in dawng kik hi. Cihnopna in i nuntakna-ah na khat peuh, thu khat peuh kingei-na sehlua-in a thupitna kiphawk kha lo hi. Gentehna-in mawhna sung pan suak, mawhna mah tawh nungta i hih manin vantung thak le lei thak thu a manphatna kiphawk kha lo zel hi. Ciangtanna tawh kidim hi taleng, bang hangin tawntung nuamna thu ngaihsut ding kisam hiam?
3. Lei thak nundan ding i pulaak theih loh hangin khatlekhat pumkhatin kilemna tawh kidim ding hi. Tua munah a nungta dingin tu-in bangci-in kigingkhol ding na hiam?
Tomkaihna
Lai Siangtho in hih leitung pan a tawntungin mawhna bei siangin leitung in a thakin kibawlpha kik ding hun kician takin hong hilh hi. A tawpkhakna-ah mawhna omma mihing nunna i ngah kik ding hi. Mi khempeuh in kilemtakin nungta khawm ding hi. Tu-in Khrih tawh pumkhat i hihna cingtak nai lo hi mah taleh tua hun ciangin a kicing tawntung nunna sungah i nungta ding hi.
