LESSON 11 Dec. 8-14
BIAKPIAKNA-AH KIPUMKHATNA
Sabbath Nitak
Tu Kaal Sung Sim Ding; Mang. 4: 8, 11; 14: 6, 7, 9; Matt. 4: 8 , 9; Dan. 3: 8-18; Sawl. 4: 23 – 31.
KAMNGAH: “ Leitungah a teeng mite a kipan gam khempeuh, nam khempeuh, pau khempeuh, pawl khempeuhte kiangah Pasian’ Lungdamna Thu hilh dingin vantungmi a dang khat in van kimlai-ah a leeng ka mu hi. Tua vantungmi in, ‘ Pasian kihta unla, a vangliatna phat un. Bang hang hiam cihleh a thukhen ding hun a tungzo hi. Vantung, leitung, tuipi le cikte a piangsakpa na bia un,” ci-in nakpi-in kiko-in a gen hi. (Mang. 14: 6, 7).
Pentecost khitteh Khristian masate in a hun uh biakpiakna-in zang uh hi. “Amaute in sawltakte tung panin thu sinin amaute tawh kikhawl uh a, amaute tawh an nekhawmin, thu zong a ngenkhawm uh hi” (Sawl. 2: 42). Jesuh in Messiah hi, cih a upna uh le Thuciam Lui genkholhnate a tangtunna tungtawnin nuamin, Pasian tungah a lungdamna uh pulaak uh hi. Hih thuman theihtelna in hamphatna lian mahmah hi lo hiam? Thu-um mi masate in Pasian bia khawm, thungenkhawm, thusinkhawm a kisaplam tel uh hi. Khrih a nunna, sihna pan a thawhkikna a kipan eite aa ding a nasepnate hangin lungdam kipaak uh hi.
Khrih pawlpi in Pasian a bia-khawm mite hi. “Siampi nam, a hingtangin Pasian bia dingin sapna ngah mite hi” (1Pet. 2:5). Pasian tungah lungdamkoh khopna in lungsim hong khel hi; Pasian’ zia le tong hong nei-sakin Ama nasem dingin hong kigingkholsak hi.
Tu kaal sung i kikup ding thu in biakpiakna, koi bangin Jesuh sungah kipumkhatna kip thei ding hiam cihte hi ding hi.
Sunday Dec. 9
Hong Honpa le Piangsakpa Biakpiakna
Biakpiakna tawh kisai-in biakpiakna sungah kihel thute, bangci bangin biakpiakna pia cihte i gen ding hi. Biakpiakna i cih in bang hiam? Pasian bia cih ciang a khiatna bang hiam? Bang hangin Pasian bia i hiam? Late 29: 2 “ Ama minthanna Topa’ tungah pia unla, a siangtho kizepna tawh TOPA bia un.” Hih in biakpiakna khiatna man hong hilh hi. Topa bia i cih ciangin Ama minthanna, vangliatna pahtawi cihna hi.
Mang. 4, 5 in Jesuh in vankahin vantung tokhomah pahtawi-na ngah hi, ci-in pulaak hi. Bang thu siksanin vantungmi khempeuh in Pasian Tuuno Jesuh le Pasian bia uh hi ding hiam? Mang. 4: 8, 11; 5: 9, 10, 12, 13.
____________________________________________________________________
____________________________________________________________________
Vantung tokhomah Jesuh in Pasian Tuuno ahihna kipulaakin leitung Honpa in vangliatna tawh kidimna thu kipulaak hi. Pasian’ piansak khempeuh in Ama nasepna hangin lungdamna, Amah pahtawi-na in biakpiakna hi. Pasian’ piansakna le hotkhiatna hangin lungdam pulaakna in biakpiakna hi. Hun nunung ciangin “Amaute in Pasian’nasem Moses la le Tuuno la sa uh a, A vanglian Topa Pasian aw, na nasepnate lamdangin lian mahmah hi. Khang tawntung a Kumpipa aw, na nasepnate-ah thumanin na thutang hi. Topa aw, nang, kua in hong kihta lo ding a, na liatna hong phat lo ding ahi hiam? Nang bek na siangtho hi. Thumanin na sepnate mi khempeuh in mu uh ahih manin minam khempeuh nang kiangah hong pai-in na mai-ah hong bia ding uh hi,” a ci uh hi” (Mang. 15: 3, 4).
Tua hi-in biakpiakna in upna tawh Pasian le Ama nasepna khempeuh i pulaakna hi. Pasian in eite hong piangsakin, mawhna pan hong honkhia hi. Biakpiakna in Pasian in a ngah ding a kilawm pahtawi-na, zahtakna, phatna, itna le a thupiak zuihnate hi. Lai Siangtho tungtawnin Pasian theihtelna, eite hong Piangsakpa le Honpa hi, cih i thei hi. Tua banah Jesuh nunna le a nasepte tungtawnin Pasian thu i thei hi (John 14: 8- 14). Tua hi-in biakpiakna in Jesuh a hong sihna, sihna pan a thawhkikna, eite Honpa le Tanpa hi, cih siksan hi. Khristian thu-um mite in lungdam khawmin, Pasian’ vangliatna ngaihsunkawmin biakna pia-khawm ding uh hi.
Khrih, Piangsakpa le Honpa sungah a hong kipia thute ngaihsun in. Tawntung sihna pan hong suakta-sakin tawntung nunna hong pia hi. Bang hang hiam cihleh eite dinmunah hong nungta hi. Bang hangin hih thute in biakpiakna bulpi hi thei hiam?
Monday Dec. 10
Biakpiakna Manlo
Matt. 4: 8, 9 sim in. Jesuh in gamlakah a vei-na ze-et a thuak in bang hiam?
______________________________________________________________
______________________________________________________________
Kiphatsakna le langpanna tawh Satan in hih leitung ama piansak bangin pulaakin, ka uk ding mahin kilawm hi; vanglatna, hauhna, zahtakna khempeuh keima ngah ding kilawm hi, ci-in pulaak hi. Hih in Jesuh Pa, Piangsakpa langpanna hi. Satan in biakpiakna tawh kisai thu khempeuh thei hi. Kua bia ding, kua zahtak ding cih a kipan leitung a neihpa zong thei hi.
Hebrew mi 3 (Dan. 3) le hun nunung ciangin a hong khang ding Pasian langpang vangliatna ukna nei (Mang. 13:4; 14: 9 -11) enkak in. Hun nunung ciang a lauhuai thu bang pulaak hiam? Bang thu kibuaipih ding hiam?
_______________________________________________________________
________________________________________________________________
Cain le Abel hun a kipan Babylon gam a Hebrew khangno thumte tuahkhak thute banah hun nunung a hong tung ding ‘sapi ciaptehna’ (Mang. 16:2) in Satan patkhiat biakna man lo in, a man Pasian kiang pan mite hong khenkhia ding hi. Mite in Satan a biak nadingin amah mah in hong khem hi. Eden huan sung pan mahin Satan in Pasian dinmun tuh hi (Isa. 14:14). Hebrew khangno 3 in ‘milim’ a biak loh manun bawlsiatna a thuak uh mah bangin hun nunung ciangin Pasian tungah a citak mite in ‘milim’ a biak kei uh leh bawlsiatna, sihna thuak ding uh hi. A nungta Pasian bia ding hong kisawl ahih manin bang hangin ‘milim’ bia laizang ding i hiam?
“Dura zangkuam a Hebrew khango 3 tungtawnin thuman nuntakpih ding kimu thei hi. Pasian’ mite in bawlsiatna a thuak uh ciangin a nungta Pasian nusia lo dingin thu kipia hi. A nungta Pasian khat bek biak ding ahihna thu pulaak ding kisam hi. Bawlsiatna, sihna tawh kipelh nadingin milim va biak ding hi lo hi. A upna thu-ah a citak mi aa dingin mawhna tawh kidim mannei lo thupiak a zuih ding uh sangin a kip tawntung Pasian’ thupiak zui zaw ding uh hi. Thongkiatna, thahna, gimna namcin thuak ding uh hi taleh Pasian tungah thuman veve ding uh hi.” Ellen G. White, Prophets and Kings, 512, 513.
Tu-in zong koi bangin a nungta Pasian biak ding sangin a dang tuamtuam bia dingin kihilh hiam? Koi bang lampi in a kilang lo-in biakna man lo zuihna hi ding hiam? Mi tampi in bang na, bang thu bia hiam?
Tuesday Dec. 11
Vantungmi Masa’ Thupuak
Seventh-day Adventist pawlpi in a nasep Vantungmi thumte’ thupuak Mang. 14: 6-12, a thupuak Mang. 14: 14 – 20 sungah kimu thei hi. Hih thute leitung mun khempeuh kizelh nading ‘aw ngaih’ mahmah tawh kigen ding hi.
Mang. 14: 6,7 sim in. Vantungmi khatna’ thupuak bang hiam? Pasian tawh kisai thu bang pulaak hiam? Bang hangin biakpiakna thu gen hi ding hiam?
_____________________________________________________________________
_____________________________________________________________________
Vantungmi khatna in leitungbup zak dingin pulaak hi. Hih in Jesuh genkholhna a tangtunna hi (Matt. 24:14). Manlang, nawhsa takin vantungmi thumte thupuak le amaute nasep kitangko ding kisam hi. Thupuak khatna in Pasian mitsuan ding hong hilh hi. Bang hang hiam cihleh ‘Ama thukhen hun hong tungta hi’ (Mang. 14:7). Jesuh nihvei-na a hong pai-na in leitung thukhenna hi ding hi.
Vantungmi in “Pasian kihta un” ci hi (Mang. 14:7). Pasian a kihta lo, a zahtak lo mite in lau-na, gimna thuak ding uh hi. Ahi zongin Jesuh a zui mite aa dingin tua thupiak in Pasian bia-in, Ama vangliatna hangin lamdangsakna tawh kidim ding uh hi. Amaute in Pasian bekmah mitsuan uh a, Ama kamciamte a tangtunna mu uh hi. Pasian tungah a lungdamna uh lian mahmah hi. “Vantung, leitung, tuipi le ciktui a bawlpa bia uh hi” (Mang. 14:7). Hih thupiak in piansakna pulaak Sabbath thupiak hi (Pai. 20: 8-11). Piangsak Pasian in Ama vangliatna tawh na khempeuh bawl a, tua Pasian bek mah i biak ding hong hilh hi. Hun nunungah mi khempeuh in biakna tawh sittelna thuak ding hi.
Tua sittelna in biakna nial ding hi lo-in, kua bia ding cih sittelna hi ding hi. Leitung bei ding ciangin mi khempeuh khen nih kisuah ding hi. Pasian zahtak-in a bia mite le thuman muhdahin ‘gulpi le sapi’ a bia mite hi ding hi (Mang. 13: 4-8; 14: 9 – 11). Hun nunungah thu lianpi in biakna tawh kisai thu ahih leh, hun bei kuan a lungdamna thupuak in, leitung mi khempeuh in a biaktaak Pasian, Piangsakpa biak ding a tangko dingin thu hong pia hi.” Ranko Stefanovic, Revelation of Jesus Christ: Commentary on the Book of Revelation (Berrien Springs: Andrews University Press, 2002), 444, 445.
Wednesday Dec. 12
Lai Siangtho Sinna le Biakna Pia-khawm
Sawl. 2: 42 sim in. Khristian masate’ biakpiakna-ah bang kihel hiam?
____________________________________________________________________
____________________________________________________________________
“Amaute in sawltakte tung panin thu sinin amaute tawh kikhawl uh a, amaute tawh an nekhawmin, thu zong a ngenkhawm uh hi”(Sawl. 2: 42). Pawlpi kipatcil a kipan biakpiakna le Pasian’ kammal thu sinna in a bulpi pen hi. Khristian masate in Jesuh Messiah thu a pulaak Lai Siangtho sinna-ah citak mahmah uh hi. Kipawlkhawm uh a, Pasian’ piak thupha-te khatlekhat kihawm uh a, khatlekhat tha kipia-in Topa lamah kalsuan khawm uh hi. Suangmanpha tawhkhiat bangin Pasian’ kammalte kalkhia uh a, mite kiangah gensawn uh hi.
A nuai-a Lai Siangtho munte in thu-um mite khatlekhat in Pasian’ kammal sinkhopna, biakpiakkhopna a thupitna bang hong hilh hiam?
2Kum. 22: 8 – 13 ___________________________________________________________
Sawl. 17: 10, 11 _____________________________________________________________
2Tim. 3: 14 – 17 _____________________________________________________________
Hotkhiatna thu gen mi, thuman tawh nuntak ding a lunggulh mi in Lai Siangtho thuman kantel hi. Leitung hun beikuan ciangin Berean khua mite bangin, a zak thute-uh thuman ahi hiam cih nisim Lai Siangtho tawh sittelin Pasian’ thupiak a zui mi tampi om ding hi napi, tu-in mi tawmno khat bek om hi.” Ellen G. White, The Acts of the Apostles, 232.
Eite in pumkhat i hi hi. Bang hang hiam cihleh Pasian’ kammal thuman a pulaak mite i hi hi. Hun masa lai-in zong Pasian’ pawlpi in thuman sungah nungta uh hi. Tu-in zong thuman sungah a nungta ding i hi hi. Pasian’ kammal sinna in biakpiakna ii thu bulpi pen hi. Tua banah Pasian’ kammal in leitung mun tuamtuamah vantungmi thumte’ thupuak a tangko ding sapna ngah mite hong kipumkhatsak hi. Innkuan khat bangin Pasian bia-khawmin i kipawlkhopna tungtawnin, Lai Siangtho in Jesuh nihvei-na hong pai kik ding hong kigingkholsakin nasepna hong makaih hi.
Lai Siangtho sungah na upna bangzahin kip hiam? Hebrew khangno 3 bangin sih ding dinmun nangawnah kiptakin a ding mi na hi hiam?
Thursday Dec. 13
Khomun Nekhawmin Thungenkhawm
Pawlpi masa sungah bangbang buai-na om taleh amaute in Khrih sungah upna kikhat uh hi. Thuman tangko-khawm uh hi. Peter in “ mite theih ding thuman thutak” tangko hi (2Pet. 1:12). Tua hi-in thuman thutak sungah pumkhat suakin lampi tuamtuam tawh a kipumkhatna pulaak uh hi. “ Sawltakte hilh upna thu le kikholhkhopna, anlum balkhapna le thungetnate ah kuhkaltakin a omsuak uh hi” (Sawl. 2: 42). Hih anlum balkhapna in mihon annekkhopna hi kha ding hi. Jesuh hong sihna, sihna pan a thawhkik phawk nading le a hong pai baih ding ding lametna nei-in thungetna a neih khit uhteh anne khawm uh hi. Khristian masate in Jesuh a hong sihna le a nasepna thute ngaihsunkhawm uh a, khatlekhat kipawlkhawmin annek khopna nuamsa uh hi. Tua bangin annek khopna uh in biakpiakna hong suak hi. Tua hih manin “nisimin biakinn-ah kikhawm uh a, a innte uhah an nekhawmin, lungdamna le kiniamkhiatna tawh a ne ciat uh hi. Pasian phat uh a, khatlekhat thupha kideihsakin a om uh hi. Pasian in nisimin hotkhiatna a ngah mi kibehlapsak tawntung hi” (Sawl. 2: 46, 47). Hih bangin a gamtatzia un Jesuh sungah amaute’ kipumkhatna khosak semsem hi.
Etteh dingin Khristian masate kipumkhatna bang hi-in, bang ngimna nei-in thungenkhawm uh hiam?
Sawl. 1: 14 _________________________________________________________________
Sawl. 4: 23 – 31 _____________________________________________________________
Sawl. 12: 12 ________________________________________________________________
Pawlpi masate in Pasian tawh kizopna nuamsa hi. Biakpiakna nei khawm uh a, thunget thadah lo uh hi. Paul in Timothy a laikhak masakna-ah Khristiante in kipawlin kingetkhopna in thupi hi, ci-in pulaak hi (1Tim. 2: 1). Paul in Ephesus pawlpi a laikhakna-ah “ Kha Siangtho tawh kikopin a tawntungin Pasian kiangah na kisapna khempeuh uh ngenin na thum unla, tatsat loin Pasian mi khempeuh a’dingin thu ngetsak un” ci hi (Eph. 6: 18, 19).
Koi bangin khatlekhat thu kingetsakna in hong kipumkhatsak le masuan hong kikhatsak hiam? Bangci-in thunget in pawlpi pumkhat nading hong huh hiam?
Friday Dec. 14
Ngaihsutbeh Ding: “ Prayer,” 1044 – 1446 and “Worship,” 1290 , 1291, in The Ellen G. White Encyclopedia.
Sabbath a thupitna in piansakna hong phawksak hi. Pasian bek biaktaakcing ahihna hong hilh hi. Bang hang hiam cihleh Amah in Piangsakpa hi. Eite in Ama piansak i hi hi. Tua hi-in Sabbath in biakpiakna guipi hi. Ni 7 ahihteh ci-a Pasian bia hi lo-in, Amah in Piangsakpa hi-in eite Ama piansakte i hi hi, cih bulpi-in Pasian bia i hi hi. Piangsakpa le piansak kilamdanna in tuul ngei lo ding a, cihmahin mangngilh ding hi lo hi.” J.N. Andrews, History of the Sabbath, chapter 27.
Pasian in Eden panin Sabbath piangsak hi. Pasian in Piangsakpa hi, cih bulphuhin Amah a bia i hih mah bangin Sabbath in piansakna phawk nading le piansakna limcing hi. Mi khempeuh in Sabbath zang hi-in, Piangsak Pasian bek mah zahtakin, Amah bek mah kibia hi leh milim bia om lo ding hi; Pasian om lo hi, a ci mi om lo ding hi. Sabbath zatna in vantung, leitung, tuipi, ciktui-te a bawl Pasian tungah cihtakna pulaakna hi. Pasian bia ding thupiak a zui mi in Pasian’ Thukham 4 a zui hi pah hi.” Ellen G. White, The Great Controversy, 437, 438.
Kikup Ding Dotnate
1. Biakpiakna, piansakna, hotkhiatna cihte in a kizom bilbial ahih manin, koi bangin Sabbath zatna in biakna manlo panin hong dal thei hiam? Mang. 14: 6, 7 sunga genkholhna sungah Sabbath in bang dinmun nei hiam? Bang hangin vantungmi khatna thupuak in Sabbath pulaak hi ding hiam?
2. Biakpiakna-ah zuih ding le pelh ding kigen mun mahmah hi. Biakpiakna in bang hi taktak hiam? Koi bangin na pawlpi in biakpiakna mannei-in nei hiam?
3. Mun khatkhatte-ah Adventist pawlpi in biakpiakna nei lo hi. Tua bang ahih loh nading na pawlpi in bangci kalsuan hiam?
Tomkaihna:
Biakpiakna i cih in Khristian thu-um mi in Pasian in a khawnkhongin a hong piak hotkhiatna sangin Ama tungah lungdamkohna hi. Khristian thu-um mite kipumkhatna, kipawlkhopna khat hi. Pasian thuman theihnopna lungsim tawh Lai Siangtho sinna, thungetna lo-in, thu-um mite in Khrih sungah kipumkhatna om thei lo ding hi.
