LESSON 10 Dec. 1-7
Kipumkhatna le Kizopna Kitat
Sabbath Nitak
Tu Kaal Sung Sim Ding: 2Tim. 4:11; Philem. 1-25; 2Kor. 10: 12 – 15; Rom. 5: 8 -11; Eph. 4: 26; Matt. 18: 15 – 17.
KAMNGAH: “Pasian tawh eite i kilangneih laitakin ama Tapa’sihna hangin amah tawh hong kilemsak ahihleh tu-in Pasian tawh kipawl khinta ihih manin Khrih nuntakna in eite hong honkhiazo zaw kan ding hi lo ahi hiam? (Rom 5: 10).
I gens amah bangin Pentecost khit ciangin thu-um mite sungah buai-na hong piang thei zel hi.Tua bang buai-nate a om ciangin pawlpi makaite le thu-um mite lemtuah uh hi. Tua thuman bulpite in tuni dongin mannei hi. Lai Siangtho hong hilh bang i zuih ciangin thu-um mite in Khrih sungah kipumkhat uh hi.
Tu kaal sungin thu-um mite khatlekhat kizopna in Khrih sungah hong kipumkhatsak hi, cih thu i kikum ding hi. Kha Siangtho in thu-um mite khatlekhat hong kipumkhatsak tham lo-in, Kha Siangtho in Pasian kiang hong tunpih hi. Thu-um mite kipumkhatna sungah kideidanna tuamtuamte om lo hi. Pasian tawh pumkhat suahna-ah zong Pasian tawh kizopna hong dalthei khempeuh khaktan kul hi. Pawlpi in bang thu-te tangko cih hi lo-in koi bangin pawlpi nungta cih thu in hotkhiat vangliatna kilangsak hi. “ Note khatlekhat na ki-it uh ciangin note in keima nungzui na hihna uh leitung mite in hong thei ding uh hi” (Jn. 13: 35).
SUNDAY Dec. 2
Kizopkikna Hoih
Paul le Barnabas in Jesuh aa dingin nasemkhawm lawmta hi. Ahi zongin nungzui John Mark tawh kisai-in nasemkhawm thei nawn lo uh hi (Sawl. 15: 36 – 39). Hotkhiatna thugenin a khualzinna uhah John Mark in Paul le Barnabas innciahsan hi (Sawl. 13:13). “ Nasepna-ah Mark in Paul a nusiat manin Paul in Mark tawh nasemkhawm dingin deihnawn lo hi. Barnabas in ahihleh Mark in picing zo nai lo ahih manin hamsatna a tuahteh a nasep nusia kha hi ding hi, ci-in Mark tawh nasemkhawm ding ngaihsun hi. Barnabas ngaihsutna-ah Mark in a nasep nusia kei leh deihsak hi. Bang hang hiam cihleh John Mark in Khrih aa ding a kizang thei nasem hoih khat suak thei ding hi, cih mukhol hi. Ellen G. White, The Acts of the Apostles, 170.
Pasian in kuamah deidan lo-in ama nasem dingin teel hi. Paul le Barnabas kikaal kitelkhialhna a sian kul hi. Hehpihna thu tangko Paul le Barnabas in picinna nei nai lo John Mark tungah hehpihna a lah ding uh kisam hi. A thanemna a maisak ding uh kisam hi. John Mark in Barnabas’ makaihna tawh a picing Pasian nasem mi khat hong suak hi (Sawl. 15: 39). A tawpkhakna-ah John Mark kikhelin Paul in nasepkhoppih dingin zawn kik hi.
Timothy le Kolose pawlpi tungah Paul laikhak in John Mark tawh kizom kik in muanna a neihzia bang pulaak hiam? Kol. 4: 10, 11; 2Tim. 4:11
____________________________________________________________
_____________________________________________________________
Paul le John Mark kizopkikna thu a neng a tawngin a kigelh loh hangin Lai Siangtho hong hilh amaute gel thu in kician mahmah hi. John Mark in Paul nasem khawm dingin mi muanhuai khat hong suak hi. Kolose pawlpi ah nasem dingin Paul in John Mark’ hoihna pulaak hi. Timothy in Rome khua-ah hong pai ciangin John Mark zong hong tonpih dingin Paul in vaikhak hi. Bang hang hiam cihleh “amah in nasep hong huh mahmah hi” ci-in pulaak hi (2Tim. 4: 11). John Mark tawh a nasepkhopna-ah Paul in tampi phattuampih hi. Amau kikaal kilemlohnate tu-in om nawn lo hi. Paul in John Mark thaneemnate maisak hi. Topa sungah nasem khawm thei uh hi. Paul in John Mark a telkhialhna khempeuh, a beisa thu hi-in, tua thute paisanin mainawt uh hi.
Koi bangin hong lungkia-sak mi khat, na lungsim hong nasak mi khat a mawhna maisak ding na hiam? Ahi zongin khat vei veiteh mawhmai-sakna sungah a bit kizopna kihel kul lo hi. Bang hang hi ding hiam? Kisam tawntung lo hi. Bang hang hiam?
Monday Dec. 3
Sila panin Tapa
Rome ah a thongkiat sungin Paul in Onesimus tawh kimu hi. Onesimus in a topa kiang Colossee khua panin Rome khua-ah a taikhia sila khat hi. Paul in Onesimus’ topa thei hi. Paul in Philemon tungah a laikhakna-ah a taikhia sila pa a sankik nading thu pulaak hi.
Paul in khatlekhat kizopna limgen mahmah hi. Mimal kizopna in upna thanemsak, pawlpi kipumkhatna susia hi, cih tel hi. Philemon in Kolose a pawlpi makai khat hi. Onesimus tungah hehna thuk hi leh a Khristian hihna khuavak mialsak suak ding a, thu-um lo mite muhna-ah pawlpi minsia ding hi.
Philemon 1-25 sim in. Bang in kizopna hoih kiksak ding hiam? A thuguipi ngaihsun in.
_______________________________________________________________
_______________________________________________________________
Thunung thu-ma en kei lehang Paul in sila neihna langpan lo tawh kibang hi. Ahi zongin Paul in thu tampi tak en a nasem hi. Hotkhiatna sungah kideidanna, kinengniamna cihte om lo hi (Gal. 3: 28; Kol. 3: 10, 11). Onesimus in a topa Philemon kiangah pai kik dingin Paul in sawl hi. Sila ding hi lo-in Jesuh sungah tapa bangin, Topa sungah Philemon sanggam khat bangin a nungta dingin hanthawn hi (Philemon 16).
Paul in a taikhia sila Onesimus’ mailam thu hoihsa lo hi. Mat le hen thuak thei hi. Gimna, kisiatna thuak kha thei ding hi, cih mu hi. Ahi zongin tu-in Khrih sungah Philemon’ sanggam khat bangin nungta-in lungsim takpi tawh a topa’ nasem mi hoih khat hi leh a mailam in thu hoih hi ding hi. Bang mah kitangsapna nei lo-in nuamtakin a topa ukna sungah om thei ding hi. A topa kiang pan taikhia hi mah taleh a topa kiang zuan kikin kizopna hoih nei kik thei hi. Onesimus in Paul in a it a nasepkhoppih, a citak nasem mi khat hong suak hi ( Kol. 4:9). Onesimus le Philemon in Khrih sungah nungta-in hoih tak a kizop kik nadingun Paul in vei mahmah a, sum le pai a kipan a huh theih bang bang tawh huh dingin pulaak hi.
Mi dang khat tawh na kizopna gina mel lo, kilangneihna khat na neih leh Onesimus le Philemon tungtawnin bang thuguipi in kizopna hoih hong neisak thei ding hiam? Koi bangin tua thuguipi in pawlpi kipumkhatna a susia thei nate panin hong dal ding hiam?
Tuesday Dec. 4
Kha Siangtho Silpiakte Kipumkhat Nading
I sinsa om bangin Korin pawlpi sungah buai-na tuamtuam om hi. 1Kor. 3: 5 – 11; 12: 1-11; 2Kor. 10: 12 – 15 in pawlpi kipumkhat nading, pawlpi cidam nading bang thuguipi pulaak hiam?
_________________________________________________________________
__________________________________________________________________
Paul in pawlpi kipumkhat nading limtak hong hilh hi. Pasian’ gam aa ding nasemkhawm, mungtup kibang hi mah taleh pawl sung nasep tuamtuam a sem ding mi zong kibang lo hi. Tua nasem mite in kidem lo-in khatlekhat kihuh, kipanpihin nasemkhawm hi. Thu-um mimal khat ciat in Pasian’ piakna tawh khatlekhat kihuhin mapangkhawmin Khrih pumpi aa ding nasemin, tua banah kimlepaam mite phattuam nading nasem uh hi. (1Kor. 12:11). Khatlekhat kitehkakin a lian zaw, a neu zaw nasep siamna cih bang om lo hi. A vekin pawl sungah a kisam vive hi (1Kor. 12: 18 – 23). Pasian’ hong piak siamnate kiphatsakna dingin a hong kipia hi lo hi. Hotkhiatna thu kizelh nadingin Kha Siangtho in nasep siamna a hong piak ahi hi.
Midang khat tawh kitehkakna in pilvai lo hi. Bang hang hiam cihleh tua bangin kitehkakna in lungkiatna, hehna piangsak hi. Ei sangin midangte hoih zaw leh mite tungah kingaknopna lungsim hong lut ding a , nasepna-ah lungkiatna hong dim ding hi. Lamkhat panin midangte sangin mi lawhcing zaw na hihleh kiphatsakna lungsim hong lut kha ding hi. Khristian mikim in kiphatsakna i do kul hi. Kiphatsakna le lungkiatna in Khrih aa ding nasepna mazang lo-sak hi. Khatlekhat kizopna zong susia hi. I septheihna ciangciang tawh mapangin Khrih hong piak thupha tawh nasem lehang Khrih aa ding teci panna-ah lungnopna, lungkimna i nei ding hi. Nasepna panin mi khat in phattuamna a na ngah theih mah bangin mi khat ii sepna tungtawnin nang mah in zong phattuamna na ngah thei hi. Tua bangin Topa gam zai semsem ding hi.
Midang khat ii nasep siamna hazatna na nei hiam? Midangte sangin na hoih zawkna hangin kiphatsakna lungsim na nei hiam? Hazatna, kiphatsakna cihte tawh a kidim mihing hi lo i hiam? Bangci-in Khrih sungah kipumkhatna dingin lungsim hoih lo khempeuh hemkhia ding na hiam?
Wednesday Dec. 5
Mawhmai-na
Mawhmai-na i cih in bang hiam? Mawhmai-sakna in gitlohna kitheihmawh bawlna hi ding hiam? Mawhmai-sakna in kisikin mawhmai ding ngetna tungah kinga hiam? Na tungah hong mawh hong khial khat mawhmai-sak huai lo a om diam?
Rom. 5:8 -11; Lk. 23:31- 34; 2Kor. 5:20, 21; Eph. 4: 26 in koi bangin mawhmai-na hong theitesak hiam?
___________________________________________________________________
___________________________________________________________________
Khrih tawh i kizopna dingin Amah mah in eite hong tankhia masa hi. Pasian’ hoihna in mawhna hong kisiksak hi (Rom. 2:4). Mimawh i hih laitak mahin Khrih in Pasian tawh kizopna hong bawlsak hi. Eite kisikna, eite mawhthumna in Pasian tawh hong kipawlsak thei lo hi. Singlamteh tunga Khrih hong sihna bek in Pasian tawh kizopna ding hong bawlsak hi. Eite aa dingin a sep khempeuh i san ding kisam hi.
I mawhnate i thuum mateng mawhmai-na kingah lo hi mah hi. Mawhthuum manin Pasian sungah mawhmai-sak nopna lungsim guan hi, cihna hi lo hi. Pasian in mawhmai-sak nuam den hi. Mawhthuumna i neih ciangin tua mawhmai-sakna i ngah hi (1Jn. 1:9). Mawhthuumna thupi mahmah hi. Pasian in eite a hong muhdan a kikhelna ding hi lo-in, mihing in Amah i muhdan a kikhel nading hi zaw hi. Kha Siangtho in i mawhna a hong phawksakin i mawhnate i thuum ciangin eite in a kikhel mite i hi hi.
Mawhmai-sakna in Pasian thu sungah cidamna, khantohna dingin kisam mahmah hi. I tungah a hong khial mite’ mawhna i maisak loh ciangin, a mawhmai ding kilawm kituak kei taleh, ama tungah siatna a tunsangin ei tungah siatna hong om zaw hi. Mi khat in na tungah hong khial kha-in a mawhna na maisak loh ciangin siatna in nang hong zo dingin lampi a honsak na hi zaw hi. Mawh kimai-sak zawh lohna, lungkimlohna tuamtuamte in pawl sung hong khenkham hi. Kilemna om kei leh Khrih pumpi kipumkhatna susia hi.
Mawhmai-sakna in mawhsakna panin suahtakna hi. Bang hang hiam cihleh Khrih in mawhsak thukhenna panin hong suakta-sak hi. Mawhmai-sakna in siatna ahi mah ding hi, hoih hi, ci-in thukimpihna hi lo hi. I tungah a hong khial mi khat tawh pumkhat i hi thei hi. Bang hang hiam cihleh Khrih tungah i khial laitak mahin eite tawh kilemna hong bawl hi. I mawhnate hong kimai-sak ahih manin mite’ mawhna i maisak ding kisam hi. Midang a it ding i hi hi. Bang hang hiam cihleh eite hong ki-it hi. Mawhmai-sakna pen nangma tungah kinga hi. Bangbang siatna hong kibawl taleh mawhmai-sak ding na khensat thei hi. Tua in Jesuh’ lungsim hi.
Koi bangin Khrih sungah mawhmai-sakna i ngahna tungtawnin midangte’ mawhna maisak thei ding na hiam? Bang hangin Khristian nuntakna-ah mawhmai-sakna in thupi mahmah hiam?
Thursday Dec. 6
Kipuahphatna le KipumkhatnaZZZ
Matt. 18: 15- 17 sim in. Pawl sungah khatlekhat tungah khialhna khat a om ciangin kilemtuah nading thu thum bang pulaak hiam? Koi bangin tuhun ciang buai-na khat a omteh i zang hiam?
_________________________________________________________________
__________________________________________________________________
Matthew 18 sunga Jesuh hong hilh thute in mimal khat le nih kikaal a buai-nate tawh kisai hi. Buai-na nei-te geel in amau le amau kilemtuah thei ding deihna hi. Tua manin Jesuh in “ Na sanggamte uh na tung uhah hong khialh leh pai-in note gel bek theihin a khialhna va gen un. Na thu uh a hong man’leh na sanggampa uh a ngahkik na hi uh hi. Leitungah note nih thukimin na nget uh na khat peuhpeuh, vantungah a om ka Pa in hong pia ding hi” (Matt. 18: 15, 19). Mi nih sangin a tamzaw kihel buai-na ahih leh midang tampi sukha ding ahih manin kilemna deihhuai zaw semsem hi. Mihing in ama deihna bek uultungsak hi. Midangte zong ngaihsut kul hi. Khristian thu-um khatlekhat kikaal a buai-nate itna tawh kitelsiamin, kilemkik thei hi. Kibatlohna tuamtuamte nunun zaw lehang Kha Siangtho in eite lakah na hong sem ding hi.
Khat veivei ciangin khatlekhat kilem ding hamsa hi. Tua bang ciangin Jesuh in midangte zawnin hong kuppih thei ding uh hi, ci-in hong hilh hi. A deihna bulpi in kilem nading, kithuhual nading hi. Kikhen nading, kilangneih nading hi lo hi. Khatlekhat mawhna kikawk nading, mawh kizon nading hi lo hi. Khristian itna, hehpihna lungsim bulphuh a a kilem lo mite a kilem ding uh deihna hi.
Hanciam taleng khat veivei ciangin buai-na siang zolo hi. Tua bang ciangin Jesuh in pawlpi mite theihin pulaak dingin hong hilh hi. Tua ding ciangin Sabbath ni biakpiakna hun sung khat la-in pulaak ding cihna hi masa lo hi. Pawlpi makai ( Church board) tungah pulaak ding cihna hi. A deihna bulpi in kilem nading, buai-na a sian nading hi. Khatlekhat kimawhsakna, mawh pholakna ding hi lo hi.
Muhdahna a piangsak thei ngaihsutna hoih lo khempeuh hemkhia in. Hehna a khangsak thei kampau, mi a nasak thei kammal zang kei in. Hehna, thangpaihna khempeuh nusia in. Na tung hong khial mi kiangah va pai inla, kiniamkhiatna le lungsim thutangin buai-nate lemtuah in.” Ellen G. White, Gospel Workers, 499.
Friday Dec. 7
Ngaihsutbeh Ding: “ Forgivenss,” 825, 826, in The Ellen G. White Encyclopedia.
“Hotkhiat nasem mite in Khrih tawh nasemkhawmin, angsung huai-hamna si-sakin, khatlekhat kihazatna, tungnung kituhna cihte om lo-in, kipumkhatin, mawhna pulaakin, khatlekhat a ki-it uh ciangin Pasian in a kamciam om bangin ciangtan om lo Kha Siangtho hehpihna hong kipia ding hi.” Ellen G. White, 3SM., 175.
Topa thukhenna Ni lianpi hong tun ciangin Khrih sungah bukna mun nei-in Amah in nangma tausang ahih nadingin hazatna, kilangneihna namcin khempeuh i hepkhiat kul hi. Siatna ki-uk sak lo-in a zung panin siatna khempeuh nusiat ding kisam hi. Topa tungah a tawntungin ki-ap ding kisam hi. Ellen G. White, Last Day Events, 190.
Kikup Ding Dotnate
1. Kol. 3: 12- 17 sim in. Kolose pawlpi in a kitangsap uh picing Khristian nunzia bang pulaak hiam? Bang hangin tua nunzia-te in buai-nate siangsak thei hiam? Koi bangin Jesuh hong vaikhak bangin (Matt. 18: 15 – 18) a nungta ding lam hong lak hiam?
2. Kol. 3: 12- 17 sim kik in. Bang hangin tua thute in pawlpi kipumkhat nadingin kisam mahmah hiam?
3. Leitung mun khempeuhah lungdamna thu puak nasepna-ah a huampi-in SDA pawlpi kipumkhat nading a hong dal bang thute hiam? Upna guite maw, ahih kei leh i thuhilhte in hong dal hiam? Hi lo hi. Upna thuguipite mah mite tungah i tangko ding thu hi. Pawl sung hong buai-sak thute in mimal kizopna, khatlekhat kilangneihna, tungnun kitutna, hazatna cihte in pawlpi hong khenkham hi. Bang hangin pawlpi hong kilemsak, kipumkhat sak ding Kha Siangtho nget ding kisam hiam?
Tomkaihna:
Jesuh Khrih hong piak lungdamna thu in kikhelna le khatlekhat kilemna thu hi. Kikhelna le kilemna in mi tawh kizopna kipsak semsem hi. Siatna tawh kidim leitung hi mah taleh Lai Siangtho in khatlekhat kizopna hoih, pumkhat suah nading thu guipite hong hilh hi.
