UIPHUK TANGTHU
Agelh: Tg Mungsan
(U.S.A)
Tuk hun hongbei in uiphuk hon khat gamsung
ah kimawl in tai ngeingai uh hi. Tua laitak dumthuk pi sung ah uiphuk nih ong
kia hi. Uiphuk dang teng in tua dumkhuk kiim teng hong et kawikawi uh leh thuk sa
lua uh ahih manin, dumsung kia lawm te kiang na suahtak kik nang uh lamet om
nawn kei in ciei ci uh hi. Tua bang a gen uh hang dumsung a uiphuk te zong suak
ta nuam veve uh ahih manin ong hanciam tantan uh hi.
Sawt vei pi ong hanciam
khit zawh ciang a tung a om lawmte in
dumsung aa te gim sa leh hehpih lua vet ta a hih manin bangbang hi leh a suak
ta lo veve ding no leh no ki gimbawl nawn dah vo, ong ci ci uh hi. Dumthuk lua
a hih man nong diang toh na tha bei in na si ding uh hi ong cih san uh hi.
Hun
te ong paipai in ongsawt pian ciang, uiphuk khat pen zong a lawmte gengen teng
zaza ahih manin ong lungkia aa, suah ta lo a gil kial dangtaak in a sawtloin a
si ding veve ci in ong kithat vet hi. A hih hang uiphut khat pen leuleu ong
diang to tantan in a lawm te in kigim bawl nawn kei in gim ong sa lua ta ung ci
in awt sansan mah ta leh hanciam veve hi. A lawm ten khawl in ci in awt san
tektek taleh ong nak dian to tektek ong hat tektek zaw hi. Tha ong san tektek
in a tawp na ah lamet loh pi in dumsung pan ong leng khia zo mawk in ong suah
ta hi. Tua ciang in a lawm uiphuk dang te in kong deih sak luat maninna thuak
luat ding deih lo aa khawl lel o kong cih uh ciang na tha a hat semsem bang
hang hiam ci in ong dot uh leh; Dumsung aa uiphuk in “ ken khua zapha lo ka hih
manin na awt awt te uh tha ong piapia ka sa hi” ong ci hi.
Tangthu deihna
kammal in mihing khat i nuntak ding leh sih
ding, thangah ding leh thaneem ding, hoih ding leh siat ding thu nei mahmah hi.
Nang kammal khat hang in mi dang te thaneem nang hi sak kei in.
A hoih,thangah
huai kammal gen khiat na in mi khat I thangah na leh mailam nuntaak khantoh na,
gualzawh na ngah na hi thei aa, nang kammal zat siam loh, mi khat peuhpeuh I thuak ding ngaih sut sak
lo aa na gen ziauh kammal in zong mi nuntak na bei lawh sak thei in, a mailam
nuntak na zong kisia sak thei hi. Mi thangah nang in gen siam lo a hih leh zong
a thaneem nang in zong paukhak loh ding thupi hi. Kammal hoih zat siam ding
kisin kul mahmah hi. Gual zawh nang, mi manpha suah nang lampi a baih om lo hi.
Haksa in thasan kul hamtang thei hi. A hih hang Haksat na tam tektek lungkiat
theihna ding tam tektek kawmkal pan I ngah gualzawh na i a gah te lim in khum
ngaungau zaw hi.
Na lunggulh na a liat nak leh na sepzawh
loh ding aa haksa na sak luat om lo ding hi. Sepna peuhpeuh ah ol no tak aa
ngah nop na lungsim te paai khiat hun ta hi. Tua bang in na hanciam lai tak in
ong mudah zong a hi tuan lo, ong deihsak veve na lungkiat nang, na thaneem nang
ong gen ding mi tampi hong om ding hi. Tua bang hun ciangin na lamet na, na
lunggullh na ong khak tan sak thei, ong suksiat sak thei kammal hoih lo, ong
tha neem sak thei kammal te za lo dingin bengngong mi hi in.
