Tan 8 Sangnaupang Khat in Khanlawhna
Piangsak | Sep 1
Tan 8 sangnaupang Bumchin in biakinn-ah
nuam mahmah hi taleh a innkuanun Mongolia gam khua-no mualtung khatah lal uh
hi. A omna khua-ah SDA biakinn om lo hi. Tua khua-ah mi 10000 val bang om uh a,
SDA khat zong om lo hi. Ahi zong sangsia inn khatah kikhawm Khristian biakinn khat mu hi. Tua kikhopna-ah pai nuam
mahmah napi, tua sangsia pa inn-ah pai ngam lo zel hi. Tua sangpa in sangah
math hilh hi-in, Bumchin in Maths siam lo hi. Tua hangin siapa inn kikhopna-ah
pai ngam lo hi.
Mongolia gam mi a tam zaw in Khristian
biakna thei kha ngei lo uh hi. A omna khua lui-ah Adventist biakinnah kikhawm
den ahih manin Bumchin in Pasian thuman thei hi. Pastor pa in Ulaanbaatar
khuapi-ah khangno khawmpi-ah va paipih hi. Mongolia gamah Pasian nasem ding mi
kisam hi, cih a theih ciangin Bumchin in bangci bangin missionary sem ding cih
ngaihsun sun hi. A omna khua gei-ah mual khat om a, tua mualtungah kahto-in a
dawn panin, “ Topa Pasian aw, kei hong zang in,” ci-in thungen zel hi.
Tua
bangin zingsang khat a thunget khitteh mualtung pan tuaksukin Sunday biakinn
khatah vakikhawm hi. Biakinn sung a tunteh nuamsa mel lo hi. Kum 20 nuai-siah
khangno amah bek hi. Tawmvei khitteh a
nopsak lohnateng hong bei-in thungai thei hi. Tua biakinnah kikhawm ding om
lo-in kikhakcip dektak hi.
Pawlpi mite lungkia-in kuamah kikhawm lo
uh hi. Bumchin in Lai Siangtho 1Kor 15: 58 simin “Tua ahih ciangin ka hong it
sanggamte aw, Topa’hangin na nasepnte uh a mawkna hi ngei het lo hi, ci-in na
theih uh mah bangin Topa a’dingin a tawntungin na sem unla, ling het lo-in
lungsim kiptakin na om ta un”(1Kor. 15: 58). Lai Siangtho siksanin lamet bei
lo-in mainawt ding pawlpi mite hanthawn hi.
Bumchin, khangno khat ahih hangin a thugente uhamte in ngai-in thangah
mahmah uh a, a thugen a zawh ciangin tu-a i kikhop pen a nunung pen hi lo ding
a, pawlpi thaksuak kipatna hi ding hi, ci-in lungdam mahmah uh hi.
Kaal khat khit bang ciangin mualtungah
thungen dingin pawlpi mite in Bumchin va zui uh hi. Bumchin in a theihngei SDA
pastor in Sunday kikhop ni-in Adventist upna thu gen dingin va sam hi. Pastor
pa in zong Bumchin in a huh ding nakleh kong pai ding hi, ci-in kithukim uh hi.
Kha khatin khat vei, kha 6 sung tua bangin Lai Siangtho sinna neihpih uh hi.
Adventist a suah nadingun kuamah sawl lo hi. Thungenkhawm, biakna pia khawm cih
bang bek hi lel hi.
Bumchin in mualtungah a thunget khel
hi. Pasian mi zat a suah nadingin
thungen nawn lo-in, a thusinpih mite Adventist a suah nadingin hong zang in, ci-in thungen hi. Tu-in pawlpi
mi 27 bangpha uh hi. Kum bei ciangin a vekun Adventist biakinn omna pastor pa
nasepna ah Lungdambawl zangkhawm dingin va zuan uh hi. Hong ciah kik uh ciangin
a pawlpi bup, a vekpi-un Adventist pawlpi hong suak uh hi. Hih bang thu pen Mongolia gamah kum 27 sungin
a masa penpen hi.
Hih pawlpi-ah tu-in mi 40 bang pha ta hi.
Bumchin zong Ulaanbaatar ah kituah hi. Bumchin in tu-in kum 27 cingkhin hi.
Pawlpi phut kawikawi khangno khat hi. Tu-in Mongolia gamah Global Mission pioneer makaipi khatin om hi.Tua
banah pathfinder makai hi. Khutul SDA biakinnah mi 60 bang om uh hi. SDA pawlpi
in Mongolia kumpi tung panin nasep theihna March 2017 kumin kumpi phalna ngah
pan hi. June 2017 sungin kituiphum mi 10 om hi. Bumchin’ Tan 8 kumin Maths hilh
sia-nu in tudong mah Maths laihilh hi.
Russian mi khat in 1926 kumin SDA thuman
na tangko hi. Ahi zongin kumpi in Khristian biakna khaam ahih manin kum tampi
sung suakta takin na kisem thei lo hi. Ahi zongin 1991 kum a kipan Adventisti
pawlpi in nasem hi.
Mongolia gamah mimal buppi 3000000 val om
hi. SDA thu-um mi 2177 bang om hi.
Leitungbup tu quarter Sabbath 13 sumpi in Mongolia gama sanginn puah nadingin
kizang ding hi. MUC in Cikha biakinn lam nadingin kizang ding hi.
