MUC

Print Friendly and PDF

Tuesday, July 3, 2018

Sabbath in Nunna Bucingsak | July 28



Sabbath in Nunna Bucingsak | July 28
Soon-Ae- Byun, 64

        Pasian in hong huhin Korea gam sungah kum tampi sung pawlpi kibehlap hi. Mi tam khollohna mi 40 kim bang kikhopna munte kikhawmin thu ka gen zel hi. Tua bangin mun tuamtuamah thu-um mite kaikhawmin biakpiakna ka neihpih zel hi.
        Pasian nasem khat ka hih hangin ka lungkimtak zo lo hi; ka nuntakna-ah a kisam khat om hi, cih ka lungsun kha den hi. Kikhopnate leh thugen ciangin nuamna ka ngah hi. Mun dangte ah ka om ciangin ka nuntakna a hawmpi-in ka kimu hi. Tua bangin a hawmpi nuntakna a bucingsak ding lametna nei-in, ka pasal mah bangin Lai Siangtho thuthuk sinna nei-in pastor sem ding ka khensat hi. Tua bang khit ciangin zong ka nuntakna in a hawmpi mah den hi.
        Ni khat SDA thu-um mi khat in laibu zuakin ka innah hong pai hi. Laibu honkhat hong pia-in, ka pasal zong SDA biakinnah va kikhawm zel hi. A masa-in Sunday ni mahin kikhawm hi dingin ka ngaihsun a, ahi zongin Saturday ni-in kikhawm ahihlam ka nungphawk hi. A nasepna mun ka hahsiangsak leh SDA pawlpi’ laihawm ka mu a, a omzia ka thei khia hi. Tua laibu-te ka muhtungin ka pasal kiangah bangmah ka gen kei hi. Sunday ni hong tungin bang mah ka dong tuan kei hi. Monday ni hong tun ciangin  ka pasal ka dong hi. “ Nang pastor khat hi ve cin, banghangin Saturday ni-in kikhawm na hiam? ci-in ka dong hi. Saturday ni kikhawmte upna lampial mite hi, ci-in ka gen hi.
        Ka pasal in, SDA in dawibia hi lo hi; amau zong Lai Siangtho thuman a zui mite hi, ci-in hong dawng hi. Tua a kipan ka pasal’ laibu-te khat khit khat ka simsak hi. Ellen G. White’gelh laibu tampi ka ngah uh hi. Sunday pastor khat in Saturday ni kikhawm cih pen ka ngaihsut khakteh ka thangpaai mahmah hi. Ahi zongin Sabbath thuman thei nuam ka hih manin ka pasal om loh kalin a laibute ka simzel hi. Ka pasal a vakna pan inn hong tung cih ka theih ciangin ka lakna munah laibu-te ka koih kik zel hi.
       
Theihnopna Khang Semsem
        SDA pawlpi thu ka theihnopna hong khang semsem hi. Ka innah  hong pai laibu zuakpa in cidamna tawh kisai thusinna-ah kihel dingin hong zawn hi. Kei zong ka zui-a SDA thu-um mite in upna lampial (cult) hi lo hi, cih ka mu hi. Tua bangin thusinna-ah ka kihel zawh ni 3 ciangin nupi khat in “ pastor aw, SDA pawlpi pen upna lampial (Cult) hi, ci-in hong gen hi. Nang bang na ci ngaihsut hiam, ci-in hong dong hi. Ke’n zong hi mah hi, ka ci nuamphial hi.  Ahi zongin SDA pawlpi in upna manpial (cult) hi lo hi; Lai Siangtho thuman zui uh hi. Sabbath ni zong Lai Siangtho sunga hong gen tawh kituak hi, ci-in ka dawngkik hi. Ahi zongin tua ka genkhiatlam kei le kei kithei lo, hih pen lamdang kasa hi. Hih numei nu in tanu tawh na biakinn-ah hong kikhawm nuam ing, hong ci hi. Ka biakinn uh gamla lua hi; a kisam bang pawlpi in hih na omna munah hong vaihawmsak ding hi, ci-in ka dawng hi. Hih nupi nu SDA sungah kituiphum hi. Ka kituiphum nai loh hangin hih nupi nu kitui phum hi.
        Cidam nading thusinna-ah ka pai zelzel a, Sabbath ni ka kikhop masak pen hong suak hi. Hih SDA pawlpi in bangci bang pawlpi hiam cih theihnopna hong khang semsem hi. SDA pawlpi in Lai Siangtho’ gen bang lianin thu zui hi, cih ka mu khia hi.

Jesuh Kiang Pan Thuman
        Kei zong SDA pawl sungah tui kiphum ding ka ngaihsun hi. Ahi zongin ka pasal tawh tui kiphum khin ka hih manun Pasian tungah thu ka ngen hi. Kituiphum khin ka hihteh kituiphum kik kul ding hiam ci-in Topa ka dong hi. A sawt ciangin kituiphum kik dingin ka khensat hi. Bang hang hiam cihleh Sabbath Nipi thuman a zui ding ka hih manin a beisa-a Sunday a zatnate mawhna lianpi ahih manin tui kiphum ding ka khensat hi.
        Sabbath kik nitak lamciangin pawlpi mite in ko innah kikhawm dingin hong pai uh hi. Ka pasal tawh kituiphum ding ka pulaak uh hi.  Ka pasal in tawlkhat ngak phot lai ning, ci-in hong dawng hi. Pasian kiangah tui ka kiphum uh diam, ci-in zong dong ding kisam ka sa nawn kei hi. Tua hi-in 2017 February kha sungin ka nupa-un ka kituiphum uh hi.
        Ka sanggam dang 7 teng zong SDA sungah kituiphum ding ka hanciam hi. SDA thuman a thei nai lo, khua neu tuamtuamte ah pai-in Sabbath thuman hilh ding ka hanciam hi.
SDA sungah a kituiphum a kipan lungnopna khat nei hi. Nidang bang nawn lo-in ka nuntakna sungah lungkimna ka nei hi.

      Korea gamah SDA thuman puak masa penpen 1904 kumin Japan gam pan Korea mi, Son Heung Cho hi. Korea gamah conference khen 5 om uh hi.
        Tu quarter leitungbup Sabbath 13-na  sumpi in Sejong Adventist pawlpi ah kipuak ding hi. Ei MUC conference in Cikha-ah biakinn lam nadingin kipuak ding hi.

To get the latest update of me and my works

>> <<