Pa
aw, Ka mawhna hong maisak in |
Horita
Risa, 24
Khristan biakna sung pan khangkhia lo ka
manin Pasian ka ngaihsun kha ngei kei hi. Ahi zongin ka pa ka ngaihsun kha den
hi. Ahi zongin pa itna ka nei kei hi. Japan gamah mi buppi 127000000 val om hi.
A tamte in kei mah bangin a nungta Pasian thei lo uh hi.
Ka neulai-in ka nu le pa kikhen uh hi.
Ka nu tawh ka om a, ka pa kiang ka hawh thei zelzel hi.Kum 14 ka phak ciangin
ka pa a cina-in natkoi-in ka om hi. Ka pa ka kem nuam kei hi. Khangno ka hih
manin ka sepnop ka bawlnop tampi omin, cina kep ding ka ut kei hi. Ka pa ka muh sialin huatna bek hong om hi. Ka
pa zong dah veve hi. Tu-in ka pa in hong nusia khin hi.
USA gamah pai-in laisin (animation-
computer tungtawnin video tuamtuam bawlna) dingin ka geel hi. Los Angeles ah
sangkahin ka om a, tua ma-in Chicago khuapi-ah ka sanggamte kiangah ka hawh hi.
Ka sanggamte pen SDA hi-in Sabbath ni ciangin kikhawmin biakinn ka pai uh hi.
Tua a kipan Khristian biakinn ka pai cilna hong suak hi.
Sangkah a kipat ciangin kikhop hun ding
ka ngah nawn kei hi. Kha 6 khit ciangin ka sanggampa in Los Angeles ah SDA
biakinn na mu hiam? na kikhawm hiam ci-in hong dong hi. Kikhawm dingin hong hanthawn den ahih manin a
sawtteh Phillipine mite kikhopna khatah ka kikhawm hi.
Kikhopna-ah thungai-in inn tun kik
ciangin ka nu tawh kiho ding bek ka ngaihsun hi. Ka kikhopna biakinnah khangno
tampi om a, kikhop man ciangin ciah ding ka sawm ciangin khawl lai dingin hong
kho uh hi. Suun-an ne dingin hong zawn uh hi.
Sunday ni ciangin vakkhawm dingin hong zong hong gen uh hi. Sunday hong
tungin pawlpi khangnote tawh ka vakkhawm uh hi.
Pawlpi khangnote tawh kikholh nuam kasa
hi. Pasian in amah thu-um mite tungtawnin a hong itna hong laak hi, cih ka mu
hi. Pasian thuman thei nuamin ka lawmte in hong hilh uh hi.Ka lawmte khat pen
Lai Siangtho hilh thei khat ahih manin Lai Siangtho sim ding khat hong pia hi.
Ka lawmte tawh kikholh nuamsa-in, Lai
Siangtho sinna ka neih khitteh kituiphum ding ka khensat hi. Ahi zongin ka pa
ka bawlzia ka mangngilh thei kei hi. Ka pa in ka mawhna hong maisak nadingin ka
pa kiangah mawhthuumna nei ding ka ngaihsun hi.
Zan khat mang ka nei hi. Ka mang sungah
ka pa pen sualtung khatah lum ka man hi. A mai pen kaanggawmin, a si tawh
kibang hi. Hong en bekin hong hopih lo hi. Ka pa in ka mawhna hong maisak zo lo
ding hi, cih ka ngaihsun hi.
A zan kik ciangin ka mangmatsa tawh
kibang ka man kik hi. Ahi zongin ka mangmat kik sungah ka pa in hong nuihsanin
hong hopih ahih manin ka lungdam mahmah hi. Ka pa in ka mawhna hong maisak hi,
ci-in ka ngaihsun hi. Tua bang mahin Pasian in i mawhnate hong maisak hi, cih
ka um hi.
Ka mangsungah ka pa in ‘lungdam ing’
ci-in hong hopih ciangin, ka lung hong nuam mahmah hi. Ka lunggimna khempeuh hong bei hi. Ka
khanlawh ciangin ka mang ahihlam ka phawk a, Topa tungah thungenin lungdam ka
ko hi. Pasian hong itna ka phawk thak hi.
Tua ka mangmat khit zawh tui kiphum ding
hamsa ka sak khempeuh hong bei hi. 1Jn. 4:12 sunga bangin khatlekhat mawh
kimai-sak hi leng, Pasian in eite mawhna hong maisak hi. Ka kituiphum ding
ciangin Chicago panin ka sanggampa hong pai hi. Ka mangmat khit kha 3 khit
ciangin tui ka kiphum hi.
Tu-in kum 24 ka cingkhin hi. Tokyo
khua-gei mun khatah NGO khatah nasemin ka om hi. Ka nasep animation nusia-in a
dang nasep khat ka zong hi. Naupang cidam nading kipantahna mun khatah nasemin
ka om hi. 2011 kum a zinlinna hangin a dam lo naupangte khoi-in pantahna munah
na ka sem hi.
Ka nu in zong SDA thuman a hong up
nadingin thu ka ngen hi. Setagaya Adventist Pawlpi in khangnote tungtawnin
thuman tangko uh hi.
Tu quarter leitungbup Sabbath 13 sumpi
in Japan gamah kipuak ding hi. MUC conference in Cikha biakinn lam nadingin
kipuak ding hi.
