Leitunga
Nasep Hoih Penpen |
Mandakh
Bold, 28
Mite’ thuaklah mahmah khat ka hi hi. Mi khat in khialhna nei leh, a
khialhna ka theisak pah hi. A khialhna hangin gim ka pia pah hi. Pasian in zong
mimawhte gimpia nuam pahpah dingin ka ngaihsun hi.
Kum hong bei toto ka lungkhamna tam
semsem hi. Pasian upna a mawkna hi, ci-in ka ngaihsun hi. Ka nuntakna-ah kisam
khat om hi, cih ka phawk hi. Sabbath ni-in ka ut bangin ka om hi. Sawma khat
cihte zong ka pia nawn kei hi. Tua bangin ka om pen ka zi lungkhamin kei aa
ding thu hong ngetsak hi.
Pasian in mihingte mawhna hong thuk
pahpah hi, ci-in ka ngaihsun tawntung hi. Pasian in kum 7 sung tawntung thupha
hong pia-in tu-in Amah phawk nawn lo ka hih manin gim hong pia hi, ci-in ka
ngaihsun hi.
Kum 1 hong bei kikin bang mah kilamdanna
ka mu kei hi. Pasian in gimna hong pia lo-in hong it ahih manin nidangsangin
thupha hong pia zaw hi. Ka nasepna Mongolian TV channel ah endikpi-in hong
kikoih a, kha sum tampi ka ngah hi. Hih pen lamdang ka sa hi. Pasian ka
lungngai kik hi. Sum tampi ngahin, ngahna tungtawnin zangkhia kik, nuntakna in
bang hi mawk hiam cih ka ngaihsun kik hi. TV channel neipa in sum tam ngah
semsem,ka nasep in bang hi mawk hiam, ci-in ngaihsutna ka nei hi.
A tawpkhakna-ah a hoih penpen, a manpha
penpen nasep in Pasian nasep, a mangthang mite honkhiat nasep hi, ci-in ka
phawk hi. Jesuh tungah ka nuntakna ka ap kik hi. Topa aw, na nasem dingin nong
deih leh hong zang in. Nasem dingin ka gingkhol hi, ci-in thu ka ngen hi.
Tawl khat khit ciangin Mongolia SDA
makaipi pa in Global Mission pioneer dingin hong sam hi.Mongolia’ khuapi-a om
inn khatah kikhawm pawlpi mite bei dektak ahih manun tua munah makai ding leh a
gei-a kumpi sang khatah manglai hilh dingin hong kisawl hi. Ka zi in Sabbath School ah naupangte
pantahin Sen pau zong hilh ding cih thu
khat ka ngah uh hi. Ka nupa-un thu kaal
khat sung thungenkhawmin, tua khitteh kha sum tampi ka ngahna uh TV nasep
nusia-in Pasian nasem ding ka khensat uh hi.
Pawlpi kemin ka om zawh kha 6 khitteh ka
nasep nuam ka sa hi. Pasian’ vangliatna tawh mite nuntakna kikhel ka muh
ciangin tua sangin ka nuamna lian zaw om lo hi. Sabbath masa pen ka kikhopna-ah
pawlpi pan a tawp zawh kum 3 bang a pha mi khat hong kikhawm kik hi. Tua pa
tawh ka nihun kithei lo tuak hi taleng amah ka hopih a, Sabbath kik ciangin
zong hong kikhawm kik dingin ka zawn hi. Tua bangin kikhawm ding kazot kik pen,
a maisuah in nuam pha kei leh kilawm hi. Gennop khat nei-in ama kiang va hawh
ding hong deih hi. Kei zong a nasepna munah va pai-in ka va hawh leh, a zi
tungah citak lo ahihlam ka thei hi. A zi
in a pasal tawh kikhen ding hong pulaak hi.
Tua bangin a zi in a vaihawm ciangin a pasal in a cih nading thei lo-in
“bang cih ding ka hiam” ci-in hong dong hi.
Ka dawng thei pak kei hi. Lai Siangtho
in nupa tawh kisai a gen thute ka pulaak a, nulepa mawhna simloh nupa kikhen
ding Lai Siangtho in hong khaam hi, cih ka gen hi. Pasian kiang pan mawhmai-na ngen in, ci-in ka gen hi. “ Na
zi tungah mawhmai-na ngen inla, tu a kipan kikhel ta ning. Na tungah citak ta
ning, ci-in kamciam pia in,” ci-in ka sawl hi.
Thungen khawmin tua khitteh ka ciahsan hi.
Kaal khat khitteh, tua pasal in a
lawmngaih nu tawh kikhenin Pasian tungah ki-ap pha hihlam hong gen hi. A zi in
zong a pasal mawhna maisak hi. Tu-in hihte nupa Sabbath sialin hong kikhawm uh
a, pawlpi mi kician mahmah hong suak uh hi.
A dang nalamdang khat in pumpi poi-na
nei a dam khol lo khat in kumpi huhna Kyats
70000 hong ngah hi. Sabbath ni khat na sum ngah lak panin sawmah khat
pia in. Topa’n thupha hong pia ding hi, ci-in ka gen leh tua pa in hong mang lo
hi. Tawl khat khitteh tua pa in hong hopih a, kha sum san ciangin khat vei san
ciangin kha nih ai kisang thei hi, ci-in hong gen ciangin, sawmah khat pia in,
ci-in ka gen kik hi. Pasian in a kamciam bangin thupha hong pia ding hi (Mal.
3: 10), ci-in ka hanthawn kik hi.
Sabbath kik ciangin tua pa in a khat
vei-na a sawmah khat hong khia hi. Kaal khat khitteh hong hopih kik a, nung
Sabbath kikhopin sawmah khat Topa ka pia a, tu-in kumpi in ka khasum 50% hong
khan hi, ci-in hong gen hi.
Amah a muang mite tungah Pasian’nasepzia
ka ngaihsut ciangin lamdang mahmah hi. Nunzia kikhelin a nungta Pasian um mi ka
muh ciangin tua sangin nuamna lian zaw om lo hi. Pasian nasep pen leitungah a
thupi pen nasep, a manpha pen nasep hi, ci-in ka thei hi.
Leitungbup tu quarter Sabbath 13 sumpi in Mongolia gama sanginn puah nadingin
kizang ding hi. MUC in Cikha biakinn lam nadingin kizang ding hi.
