Lai Kahilh Nuam Nawn Kei | Sep 15, 2018

Lai Kahilh Nuam Nawn Kei | Sep. 15

Tserenpil Ogie Otgontuya, 40

Mongolia university panin ka sin ding ka teel ciangin sangsia sem ding peuhmah ka ngaihsun kei hi. Cikmah hunin sangsia sem ngei kei ning, ka ci hi. Ka nu pen naupangte hilh sangsia khat hi-in, naupang gamlum ngeingai ka thuak zo kei hi.

Pawlpi-ah Sabbath School naupangnote makaih dingin pastor in hong sawl hi. Ka ut lohna thu ka gen hangin, pastor in hong hanthawn veve hi. Ka hilh ding tangthu  zong hong pia hi. Ahi zongin naupang makaih cih pen ka ut het kei hi.

University professor khat tawh ka kiteng uh hi. Tapa khat nei-in Mongolian khuano khatah missionary nasemin ka om uh hi. Ka pasal in “ hih khua-no ah bang sem nuam na hiam, ci-in hong dong hi. Ka sep ding ka thei tuan kei hi; naupang pantah ding ka ut lohlam ka gen hi.

Ka pasal in sangah laihilh a man ciangin sangnaupangte hong paipihin laihilh hi. Ken bel anhuan cih bangin na ka sem hi. Mongolia gamah sa pen lim nek mahmah uh hi. Sangnaupangte in annek sabuai a muh uhteh sa mu lo-in, singgah, anteh bek a muh uhteh lamdangsa mahmah uh hi. Bangci an hiam? Bang hangin sa ne lo na hi uh hiam, ci-in hong dong uh hi. Lai Siangtho in hong gen cidamna tawh kituak thute gentheihna hunpha ka nga hi.

Kimlepaam mite tawh  kitaatna nei-in hong hawh uh ciangin Lai Siangtho ka sinpih zel hi. Naupangte zong Lai Siangtho tangthu ka hilh hi. Cikmahin laihilh kei ning, ci-in hun khat lai-in ka ngaihsut hangin tu-in ka hun khempeuh laihilhna-in ka zang  hi. Ka pasal ka omna uhah pawlpi khat phuan a, tua khit ciangin University of Phillipine ah sangkah dingin kisawl hi. Phillipine ah bang ka hih diam, Topa aw hong makaih in, ci-in thu ka ngen hi.

Phililpine ka tun khit uh tawlkhat khit ciangin sangsiapiate hong hawh uh a, tu a kipan kum 2 leh a lang sung bang sem ding geelna nei na hiam, ci-in hong dong uh hi. Nursing ahih kei leh accounting lam ka sinnuam hi, ci-in ka dawng hi. Topa’n hong makaih hen ci-in ka kikhen uh hi.

Nursing kah ding ka dawp ciangin kum 5 sawt ding hi, cih hong gen uh hi. Business Department ka va dawp ciangin  kum 4 sawt ding hi, hong ci uh hi. Education Department panin ka mankhitteh accounting zom ding ka ngaihsun ngei hi.

Ka sangkahna tungtawnin ka sinkhiat thute Mongolia ka tun uhteh nasepna-ah tampi hong huh hi. Education Department siate tawh ka kimuh ciangin makaite in tanu nei na hihteh Elementary Education la in, ci-in hong sawl uh hi. Hih University of Phillipine ah zong nursery om ahihlam ka thei hi. Naupang makaih siate pen numei hi-in, naupangte ka muh ciang nopsak tuak mahmah uh a, siamahte zong maitai thei mahmah uh hi. Tua bang ka muh ciangin kei zong Elementary Education sin dingin ka ngaihsun hi. Ka pasal kiangah zong ka pulaak a, Mongolia ah sang om lo ahihteh bangcih mawk ding ci-in ka lungkham hi.

Ka pasal in Pasian’ deihna khat hinteh Education la in, ci-in hong sawl hi. Ka pasal sangman tawh kei sangman hong kituak thei bilbel hi. Sangman khit ciangin Mongolia-ah pai kikin Adventist sang khat ka kipan uh hi. Hih sangah kei sangsiapi ka sem pah hi.

Tu-in hih sangah sangnaupang 124 val bang  om hi. A tam zaw pen SDA hi lo innkuan pan hong kah uh hi.

Tu quarter  leitungbup Sababth 13 sumpi in Mongolia gama om Tusgal Adventist Sang puah nadingin kipuak ding hi. MUC in Cikha biakinn lam nadingin kipuak ding hi.