Jesuh
in Nga-beng Mite Nungzui Suaksak |
Kurihara
Kimiyoshi, 39
Kum 48 a pha ngabeng Sadayuki in Japan
gam tuikulh Tsushima-ah tui kiphum ka muh ciangin ka nuam mahmah hi. Kum 15 a
phak a kipan ngabeng khat hi-in Jesuh hong sang thei hi.
Sadayuki tawh ka kimuh masakna pen
Supermarket mawtaw koihna-ah zatep hong ngen a, tua pen amah tawh ka kitheih
masak penna hong suak hi. Ka numei nih ka nei uh a, ka innkuanun Tsushima
tuikulhah ka teeng uh hi. Hih tuikulhah mi 30000 val bang omin South Korea leh
Japan kikal ah om tuikulh khat hi.
Global Mission Pioners nasemte ka hi uh
a, kum khat sung nasemin, Lungdamna thu kigen ngei lohna munte-ah pai-in Pasian
thu genin thu-um mite kikhopna zong ka nei uh hi. Hih tuikulh ka tun zawh uh
kum 7 cingkhin hi. Ko beek SDA thu-um ka hi uh hi.
Sadayuki in mawtaw kongkhak hong kiu-in,
zatep hong ngen hi. Ko zep lo ka hih manun zatep nei kei ung, ci-in ka dawng
kik hi. Zatep ngah lo ahih manin maikhingsa-in pai khia hi. Sadayuki aa dingin
ka tanute tawh thu ka ngen uh hi. Thunget khitteh laisim ding khat pia dingin
ka ngaihsun hi. Ahi zongin tua dan laihawm khempeuh ka bei khin uh hi. Laihawm
ka ngahkik nading uh thungenin ka om laitakun, Amen ci-in ka thunget khit uhteh
ka mawtaw kimtengah laidal honkhat kia ka mu uh hi. Tua laidalte tawmin
Sadayuki nungdelhin ka pia uh hi.
Tua laidalte ka et leh Sawl. 3:6 kigelh
laidal na hi hi. “ Peter in ama kiangah “ Sum ke nei peuhmah kei hi.Ahi zongin
ka neih kong pia ding hi. Nazareth khuami Jesuh Khrih min tawh dingin, lam na
pai nadingin thu ka hong pia hi.” Sadayuki kiangah zatep nei keng,ka neih kong
pia hi, ci-in a sim dingin laidal ka pia hi.
Tua laidal ka piak ciangin hong sang
taam maw, ci-in ka lunghimawhsa-in ka piak leh, aman zong hong sang bilbel
hi. Tua leh Sadayuki in “ lamet bei-in
ka om a, kikhop nading mun zongin kikhawm ding ka ngaihsut laitak hi-in, kei ka
pai ma-in nang tawh kimu ka hih manin ka nuam mahmah hi,’ hong ci hi.
Tua bang thu ka zak ciangin lamdang ka
sa mahmah hi. Pasian’ hong geelsak hi ding hi, ci-in ka ngaihsun hi. Lai
Siangtho sinna nei dingin ka zawn pah hi. Tua bangin Lai Siangtho sinna ka neih
kawmun annek ding ka pia hi. Tua bangin tawl khat sung Lai Siangtho sinna kha 3
sung ka nei uh hi.
Sadayuki in lungkiatna leh zu tawh kidim
ahihlam ka mukhia hi. Amah le amah zong kithah ding a ngaihsun ngei mi khat hi.
Zatui ne-in nih vei, siavuante honkhia man hi. Jesuh hong itna thei lo-in, na
sih ding Pasian in deih lo hi, ci-in tha ka pia hi.
2015 kum sungin Sadayuki in kituiphum
hi. Hih tuikulh ka tun zawh uh amah tawh tui kiphum mi 3 hi ta hi. Zu dawn nawn
lo bek tham lo-in zu dawnte kikepna khat kipan dingin hanciam hi.
Buddhism leh Shinto biakna tawh kidim
hih tuikulhah nasepna-ah ka lungkiat hun uh om hi. Ahi zongin Sadayuki nunna
zia ka ngaihsun ciangin Pasian in hong nusia lo, hong ompih tawntung hi, cih ka
phawk hi.
Japan gamah pawlpi 97 om hi. SDA thu-um
mi 15151 om hi. Gam mi 8270 ciangin SDA
thu-um mi khat om hi.
Tu quarter leitungbup Sabbath 13 sumpi
in Japan gamah kipuak ding hi. MUC conference in Cikha biakinn lam nadingin
kipuak ding hi.
