Itna nei Pastor Nihte |
Hee-Sook Kim, 64
Biakna laibu zuak mi nih tawh Seoul khuapi sungah ka vak uh hi. Ka vakna lampi khatah Lai Siangtho sangnaupangte’ makaihna tawh kibawl ding thusinna (retreat ) khat om ding a, a kihel nuam peuhpeuh kihel thei hi, cih thu ka tuak kha uh hi.
Thusinna mun ka zong uh a, a mun ka muh uhteh Korea gamah pawlpi lian penpen khat a nasem pastor inn ka tung uh hi. “ Biakna laibu zuakin hong pai hi ung,” ci-in ka kipulaak uh a, innteekpa in Adventist pawlpi a thei mahmah khat na hi bilbel hi. Innteekpa in bang hangin Saturday ni-in kikhawm na hi uh hiam, ci-in hong dawng pah hi.
Ko zong Pasian in na khempeuhah piangsakin, a ni 7 ni-in tawlnga ahihna thu ka pulaak uh hi.Lai Siangtho thuman sinna laibu pawl khat ka pia uh a, kimu kik dingin ka nusia uh hi.
Innteekpa Ki-jo-moon tawh ka kiho-na tungtawnun, innteekpa in Lai Siangtho thei mahmah khat hi, cih ka mu uh hi. A pastor sepkhit zawh kum 30 val khin hi-in, a zi ahih leh kum 10 pha khin hi. Ka hawh kik uh ciangin Lai Siangtho sinna laibu keng nawn lo-in Ellen G. White gelh laibu Patriarchs and prophets, Prophets and Kings, The Desire of Ages, The Acts of the Apostles, leh The Great Controversy laibu bu 5 ka keng uh hi. Hih bu 5 in Korea sum (won) tawh 300,000 man hi ( Kawl gam sumin tengh 3 phial mah man ding hi). Ahi zongin a khawnkhongin ka pia uh hi.
Pastor Ki-Jo-Moon in Daniel Mangmuhna kanbeh nuam hi. Daniel thusinna laibu nei nai lo ahih manin laibu khak dingin ka kiho uh hi. Tawl khat khit ciangin pastor Ki-jo-Moon in, “ Lai Siangtho ka sinna dan pen a tungtham bek hi-in, Lai Siangtho thuthuk thei nuam ing. Na biakinn ah hong kikhawm ning, ci-in hong gen hi.
Pastor Ki-Jo-Moon zong hong kikhawm hi. Kikhopna dan pen nuamsa mahmah hi. Hun khat khitteh hong kikhawm nawn lo hi. Ke’n hopihin bangci bang hiam, bang hangin hong kikhawm nawn lo na hi hiam? ci-in ka dot ciangin, ka manlah, ka ci nuam kei, cih bangin hong dawng zel hi. Ka nungtheih ciangin pastor kikhop ding pen a zi in phal lo, kikhop na khaam den hi. A zi in ‘ na mai zum lo hiam, mi biakinn khawngah na kikhop, ci-in a kikhop ding phal lo hi. Ahi zongin hong kikhawm dingin ka zawn veve hi.
Kum 7 bang hong cin khit ciangin Adventist biakinn ah pumpi cidamna ding tawh kisai thusinna-a hong kihel dingin pastor Ki-jo-Moon ka zawn hi. Pumpi cidamna ding annek tuidawn a kipan, zatui zatzia tuamtuam kikupna, thugenna kinei hi. Pumpi puahna zatui kisut (detox) tawh kisai thugenna hun hong tun ding ciangin pastor Ki-Jo- Moon’ zi in hong gen dingin ka sam uh hi. Amah zong hong pai-in SDA biakinn ah a kikhop masak pen hong suak hi. A nupa un SDA pawlpi lut ding hong ngaihsun uh hi.
A nupa-un Pasian thugennate-ah zong hong kikhawm uh hi. Tua bangin ka kimuh zawh uh kum 8 a cinkhit, 2018 February kha sungin pastor Ki-Jo-Moon le a zi in SDA pawlpi ah tui kiphum uh hi.
Korea gambup mimal vekpi 75,916,000 lakah SDA thu-um mi 247,143 om a, pawlpi 715 om hi. Gammi 307 ciangin SDA thu-um mi khat cihna hi.
Tu quarter leitungbup Sabbath 13-na sumpi in Sejong Adventist pawlpi ah kipuak ding hi. Ei MUC conference in Cikha-ah biakinn lam nadingin kipuak ding hi.
