Dawi 20 in ukcip | July 7
Si-Woo Noh, 55
South Korea gam Daegu khuapi khatah teeng Si-Woo in luhingnat nei den hi. College sangkah man khin a, pasal nei-in tanu khat nei hi. Lutang natna nei den ahih manin nuntak hamsa hi. Siavuante in zong a cih nading uh thei zo lo hi. Si-Woo in Buddhist biakinnte ah pai-in damna ngah ding lamen hi. Phunggi-te in zong a cih nading uh thei tuan lo hi.
Si-Woo in dawi tawh kiho thei shaman khat kiangah va pai-in a lutang natna dam nading hanciam hi. Si-Woo in sanggam khat nei a, lutang liamna khat tawh si khin hi. Tua a sanggampa in lutang nasak hi, ci-in shaman in pulaak hi. Si-Woo in sanggam pasal khat nei a, ahi zongin a sanggampa mu kha lo hi. Ama suahma-in a sanggampa si khin hi. A pi tung panin a sanggampa in a lutang liamna hangin sihsan hi, ci-in gensawn hi.
Si-Woo in a lutang natna tawh kisai thudong dingin shaman kiangah vapai hi. Dawite in Si-Woo ukcip hi, ci-in shaman in pulaak hi. Tua bangin dawi tawh kidim leh amah zong shaman khat suak thei ding hi. Shaman suah ding a nial leh dawite in bawlsia ding, ci-in shaman in pulaak hi.
Si-Woo zong shaman khat hong suak hi. Dawi tawh kop a nasep nadingin ni khat in 100 vei bang thunget kul hi. Tua banah shaman pasal suahna mun mualtungah pai-in biakna piak kul hi. Zan khat in nai 3 sung bang thunget kul a, zingsang ciangin zong nai 2 bang thunget kul hi. Tua banah a pumpi siansuah nadingin tuivot tawh kisil kul hi. Tua bang hi leh dawi tawh kikop thei ding a, nalamdang tuamtuam bawl thei ding hi, ci-in Si-Woo in amah leh amah kilamen hi.
Si-Woo in dawi khat bek hi lo, 20 tawh kidim hi. Dawi 20 biakna ding biaktau khat bawlsak a, kum 20 sung natna tuamtuam damsakin, khut lamen cihte a kipan dawi tawh kopin nasem hi. Si-Woo in a nuntakna nuamsa mahmah hi leh kilawm hi. Gilna khat hong pai leh tua gilnatna damsak hi. Si-Woo in tua bangin dawi tawh kop ahih manin mite’ hamsatna tuamtuamte huh hi. Si-Woo in neihlehlamh zong kibehlap mahmah hi napi, lungnuam thei lo, lungdam ngei lo hi. A lutang nat pen dam napi, natna dang khat in hong bom kik zel hi. Si-Woo in amah leh amah kithahsawm ngei hi.
Ni khat a nung panin mawtaw khat in phu-kha hi. Tua hangin kha khat bang zato lum hi. A tuahsiatna hangin Si-Woo lungmang hi. Midangte’ mailam thu ding genkhol hi napi, ama mailam ding a theih loh ciangin a lungmang semsem hi. Kum 20 sung bang ama na ka sep ka biak pasian in bang hangin ka tuahsiat nading panin hong kem lo hi ding hiam? ci-in hong ngaihsun hi. Ka biak pasiante in hong kem zo lo ahih leh amau ka biak bang khiatna nei hiam, ci-in hong ngaihsun hi.
Si-Woo in thungen hi. Ahi zongin bang mah kilamdanna mu lo ahih manin a biakna tau khempeuh susia dingin hong ngaihsun hi. Dawi pasian a biakna nusia dingin hong khensat hi. Hun khat lai-in SDA thu-um nupi khat tawh a kiho-na khat uh hong phawk kik hi. A biak pasiante sangin a vanglian zaw Pasian khat om hi, cih hong phawkkik hi. A lawmnu pulaak Jesuh thu hong phawk kik hi.
Si-Woo in pastor khat tawh Lai Siangtho sinna hong nei hi. Tua bangin a thusinna panin a beisa-in Satan khut sungah omin Satan bia ahihlam hong thei hi. Satan ukna sung pan suakta-in Satan ki-uk sak nawn lo dingin hong khensat hi.
Si-Woo in Jesuh kammal “Mi khat peuh sung panin dawi a kihawlkhiat khit ciangin a ten nading mun keu-na zongin a vak kawikawi hi. A om nading mun a muh loh ciangin, “ Hong kihawlkhiatna inn mahah lukkik ning,” ci hi ( Lk. 11: 24). Si-Woo in zingsang sialin Lai Siangtho simin thungen hi. Tua a kipan Si-Woo in lungnopna leh khamuanna hong nei hi.
Jesuh in dawivei mipa sung pan dawihawlkhia-in “Na innkuanpih kiangah ciahkik inla, Topa in nang a hong hehpihna le nangma tunga na hong bawlnate va gen in,” ci-in sawl hi (Mark 5: 19). Si-Woo in zong Jesuh hangin a lungdamna pulaakin, South Korea gam sung mun tuamtuamah teci pang kawikawi hi.
Tu quarter leitungbup Sabbath 13-na sumpi in Sejong Adventist pawlpi ah kipuak ding hi. Ei MUC conference in Cikha-ah biakinn lam nadingin kipuak ding hi.
