A Kikhel Nunna | Sep 22
Peter, 40
Peter in a innkuanun Sen gam khuano khatah
teeng uh hi. A nu le pa huh dingin kum 24 sung tawntung Maths sia ding mungtup
nei hi. Ahi zongin damlohna hangin a ngimna khempeuh kipelh hi. A neih khempeuh
beimang hi. Tua bang dinmun tung kei leng, Pasian ka phawk kei ding hi, ci-in
Peter in pulaak hi. Tua bangin Pasian in Ama zuatna ding lampi hong bawlsak hi,
ci-in pulaak hi.
Peter in college sangkah a man khit
ciangin Tan 8 khatah Maths hilh sangsia sem dingin lai ngah hi. A mai lam ding
a ngaihsutteh lametna tawh kidim dingin ngaihsun hi. Laihilh sangsia a sep
ma-in pumpi cidamna cihte sittel phot kul a, tua a zote bek in sangsia sem ding
hi, cih thukhun om hi.
“ Basketball leh bawlung kimawl mawl ka
hihteh, medical check up bel ong ning, ci-in, Peter in ngaihsun hi. Medical check up nei uh a, Peter
leh mi dang khat in medical ong lo uh hi, kipulaak hi. Ahi zongin Peter in
nihvei sittel kik dingin ngen hi. Tua leh sit kik uh a, Peter pen ong zo veve
hi. Siavuante genna-ah Peter in sin tawh kisai natna lianpi khat nei-in tua pen
dampak lo ding hi, ci-in pulaak uh hi.
Tua a kipan ka nuntakna a mawkna hi, ci-in
Peter in ngaihsun hi. Ka nu ka pa huh nading kum tampi sung nakpi takin nasem
a, ka ngimna khempeuh bei mang hi; lametna nei nawn keng, ci-in lungneu mahmah
hi.
Tua zan ciangin Peter in khua sung vakin
lei kidawh mun khatah “Laotian” ci-in ngakpi-in awnggawp hi. A khiatna in
“Sangpen Vanglian” cihna hi. Tua munah Peter in nakpi-in kap hi. Amah le amah tua gunah tuahsawm hi.
Khuapi zato liante ah kilak zo lo uh ahih
manin khua-no zato khatah zato kilak uh hi. Ni 3 khit ciangin Peter’ nu pastor
kiangah pai-in Peter aa ding thungetsak ding gen hi. Peter nu in khat vei vei
bek kikhawm ahih manin, Saturday Sabbath ni khat biakinn-ah kikhawmin pai a,
tua ni pen Peter’ nu in Sunday ni mahsa kha hi. Hih SDA pawlpi in biakinn nei
zo nai lo ahih manun Sunday biakinn khatah kikhawm uh hi.
Peter’ nu in tua biakinnah a kikhopna-ah
nupi khat in hopih a, dahmai pua siteh, bang lungkhamna nein a hiam, ci-in na
dong hi. Dah kei in. Na tapa in Pasian muang ding gen in. Pasian in amah
honkhia ding hi, ci-in pulaak hi.
Tua nitak lamah tua nupi nu in zato-ah
Peter natveh dingin va pai-a, “tangval aw, Pasian muang in. Topa in damna hong
pia ding hi,” ci-in hanthawn hi. Tua bangin Peter in a zak ciangin um thei lo
hi. Tan 1 a sin a kipan a sia-te in Peter kiangah Pasian om lo hi, ci-in hilh
den ahih manun Peter in Pasian om takpi dingin ngaihsun thei lo hi.
Tua hi-in Peter in sum bei-in zatui,
zatang tawh a dam nading hanciam ding
maw, ahih kei leh Pasian muang ding cih a teel ding bek om hi. Peter in ka nu le ka pa tungah vangiksuan
nuam keng. Siavuante muan ding sangin Pasian muang zaw ning, ci-in pulaak hi.
Peter in Pasian om takpi ahih leh ka
natna pan damin zato tuak ding lunggulh hi. A nu in zatuite innah
ciahpih dingin gen a, Peter in tua zatui-te ciahpih nuam lo hi. Pasian muang
khin i hih manin, na khempeuh Topa in Ama deihna bangin hong sem ding hi.
Adventist upa khat in Peter kiangah
Adventist zato khatah kilak dingin gen hi. Peter zong tua zato-ah kilak dingin
vapai hi. “Natna ka neih laitakin,
cimawh lamet bei-in ka om laitakin hehnep ding, thapia ding mi ka kisam hi,”
ci-in Peter in pulaak hi. Ahi zongin Adventist zato ka tun a kipan zato
siamahte, nasemte in thu hong ngetpih uh, Topa tungah dam nading thu hong
ngetsak uh hi.
Peter in Adventist zato-ah kha nih bang om
hi. Hih hun sungin Lai Siangtho sinna,
cidamna ding tawh kisai thusinna zong nei hi. Zato a om sungin a cinatna lam
zong mangngilh hi. Kha 2 khit ciangin check up nei kik a, a natna khempeuh
damsianglam a muh uh ciangin siavuante zong lamdangsa hi. Cidamin zato pan tuak
thei ding hi ta hi. Peter in zatui ne lo-in, Pasian bek muang ing, ci-in pulaak
hi.
Peter in tuiphum ding khensat hi. A nu le
pa, a pu le pi a innkuanun tui kiphum uh hi. Tu-in Peter in kum 40 cingkhin a,
Sen gamah pawlpi nasemin om hi. “ Pasian in damna hong pia ahih manin ka
nuntaklaiteng Pasian na kasem ding hi,” ci-in khensat hi.
Tu quarter leitungbup Sabbath 13 sumpi in Sen gama pawlpi nasep nadingin kipuak ding
hi. MUC in Cikha biakinn lam nadingin kipuak ding hi.
Mai Sabbath in Sabbath 13-na hi. Sumpi
khiat ngei a zah 3 khiat ding kiging khol ciat ni.
