MUC

Print Friendly and PDF

Sunday, June 17, 2018

LESSON 8 Aug. 18 – 24 (2018) Jerusalem Council



LESSON 8            Aug. 18 – 24
Jerusalem Council

SABBATH NITAK

Tu Kaal Sung Sim Ding: Sawl. 15: Gal. 2: 11- 13; Pai. 12: 43 – 49; Rom.3:30; Siam. 18:30; Mang. 2:14, 20.

KAMNGAH: “ Amaute mah bangin eite in zong Topa Jesuh Khrih hehpihna tungtawnin hotkhiatna i ngah ding hi, cih i um hi,” ci-in a gen hi (Sawl. 15:11).

Kum 2 khit ciangin Paul leh Barnabas in Syrian Antioch-ah vazin kik uh  hi. Bang hang hiam cihleh pawlpi  in gammial nasepna-ah kihel kim ciat uh hi. Tua bangin nasepnate pawlpi tungah pulaak kik uh hi. Nasepna zaksak kikna-ah mihing’ sepna sangin Pasian in amaute tungtawnin nasem hi, cih cih pulaak uh hi. Gentile mite lakah hotkhiatna thu gen lawhcing mahmah hi. Jew mite lakah zong thu-um mi pawl khat om hi. Cornelius a kikhel a kipan vunat lo Gentile mite tawh kisai-in buai-na lianpi piang hi (Sawl. 11: 1-18).  Pawl sungah thu-um mi kibehlap semsemin pawl sungah buai-na zong khang semsem hi. Jerusalem pawlpi sung om maikai kim khat in Gentile mite in pawl sung a lut ding uh leh vunat masa phot uh hen, ci-in vunat lo-in pawl sung om ding lungkim lo uh hi. Pasian’ mi suah nadingin leh Jew mite tawh kipawl khop nadingin Jew mi suah masak kul hi, ci uh hi.
          Gentile thu-um mite tawh kisai buai-na lian semsem ahih manin pawlpi in hih buai-na a sian nading ngaihsun hi (Sawl. 15). Sawltakte hun sungin Jerusalem Council in Gentile tawh kisai buai-na nasem, thu vaihawmpi hong suak hi.


Sunday               Aug. 19
Pawlpi Buaipih Thu

          Antioch pawlpi kipat a kipan Antioch pawlpi sungah Greek kampau Jew mi leh vunat lo Gentile mi kigawmkhawm hi taleh buai-na bang mah om lo hi (Sawl. 11: 19 – 21; Gal. 2: 11-13).  Tua bangin kilemtakin a om kimlai Jerusalem pan thu-um mi honkhat hangin Antioch pawlpi sung hong buai hi.
          Sawl. 15: 1-5 sim in. Antioch pawlpi in bang buai-na tuak hiam?
          ______________________________________________________________________
        _______________________________________________________________________
Judaism thuzui mite leh Judea gam pan mi kim khatte’ thu Sawl. 15: 5 sungah kigelh a, tua mite in Pharisee mite hi. Pawl sungah Pharisee a om uh pen lamdang lo hi. Paul mahmah zong a kikhelma-in Pharisee khat hi (Phi. 3:5). Jerusalem pan makai honkhat Antioch-ah va pai uh hi (Sawl. 15: 24).  Pawl sungah Gentile mi a om uh, Jew mite a kipan sawltak kim khat lungkim lo uh hi ( Gal. 2:11- 13).
          Galatia pawlpi a laikhakna-ah Paul in Judaism thuzui mite pakta khol lo hi. Buai-na piangsak mite (Gal. 1: 7; 5:10), ‘a zuau sanggamte’ (Gal. 2:4) cisuk giap hi. Tua bang mite in hotkhiatna thusim lo-in Gentile mite in thukham zuihna tawh dikna ngah ding hanciam kisam hi. Gentile mi in Jew ngei-na khempeuh a zuih kei leh hotkhiatna ngah lo ding hi, ci uh hi. Pasian’ thupiakte zuihna bek in hong honkhia ding hi, ci-in ngaihsun uh hi. Pasian’ mite tawh a kipawl theih nadingun vunatna simloh lampi dang om lo hi, ci uh hi (Pian. 17: 9-14; Pai. 12: 48).  A tomin gen leng vunatna tawh Jew mi hihna nei-te bek kihonkhia ding hi, ci uh hi.
          Ahi zongin Paul leh Barnabas in tua bang upna nial uh hi. Hotkhiatna thu tawh zong kituak lo hi. Jerusalem pan Judah mite’ hangin buai-na lianpi hong piangin kideidanna, kikhenna hong piang hi (Sawl. 15:2). Ahi zongin tua buai-na in Jerusalem pawlpi sung bek a thupiang hi; mundang lawh lo hi. Pawlpi kipumkhatna a susia thei thute hangin Antioch pan Barnabas leh Paul a kipan tua buai-na lemtuah dingin makai pawl khat Jerusalem-ah vapai uh hi.

Judaism makaite dinmunah a om dingin kingaihsun in.  Bang siksanin thu na gen diam?


MONDAY                   Aug. 20
Vunatna

          Pawlpi sung buai-na lian mahmah khat in vunatna hi. Thupiak dangte bang lo-in (Matt. 15: 2, 9) vunatna in mihingte’ bawltawm hi lo hi. Pasian mahmah in Abraham suanlekhak tungah a thuciam limcing hi (Pian. 17: 9-14).
          Pai. 12: 43 – 49 sim in. Israel mite banah kuate in vunat ding kisam hiam?
          _________________________________________________________________
          __________________________________________________________________
Abraham tungah kipia thuciamna thupha-te Israel mite bek ii ngah ding hi lo hi. Vunat a hih nak leh namdang sila-te a kipan khualmite in zong ngah dingin Pasian in a geelsa hi. Khualmi khat in vun a at khit ciangin Pasian mai-ah Israel mite tawh kibang hi. Tua mi pen “Israel gammi khat mah hi ding hi” (Pai. 12: 48).   Tua hi-in vunatna in Pasian’ mite tawh kipawl nadingin kisam hi. Jesuh in Israel mite Messiah ahih manin, Gentile mi khat in Jew mi khat ii ngah ding thupha a ngah nadingin Jew mi a suah masak phot kul hi.
          Rom. 3:30; 1Kor. 7:18; Gal. 3: 28; 5:6 sim in. Vunatna tawh kisai Paul in bang pulaak hiam?
          _____________________________________________________________________
          ______________________________________________________________________
 Judaism biakna sung lut lohin hotkhiatna ngah lo ding a ci Jew mite in thuciam leh hotkhiatna gawmkhial uh hi. Pasian’ thuciam mite sungah kihelna in hotkhiat ngah hamtang ding cihna hi lo hi (Jer. 4:4; 9: 25). Tua banah Abraham mahmah in upna tawh dikna ngah hi. Dikna a ngahin vunat nai lo hi. Vunat manin dikna ngah hi lo hi (Rom. 4: 9-13). Hotkhiatna in upna tungtawnin kingah hi. Leitung mi khempeuh in Pasian thuciam a theih nading Amah mah in lampi hong bawlsak hi. Pasian in minam khempeuh tungah hotkhiatna thu pulaak dingin Israel mite teel hi (Pian. 12: 1-3). Ahi zongin Jew Khristian kimkhat in vunatna hangin Pasian’ maipha ngah dingin kilamen uh hi. Pasian’ hong hotkhiat hehpihna in mihing’ gamtatna leh hoihna tungtawnin kingah hi lo hi. Hotkhiat ngah nadingin Gentile mite’n vunat ding sawlna in hotkhiatna tawh kituak lo hi (Gal. 1:7; 2:3 -9); Pasian’ hehpihna a nial suak hi (Gal. 2:21);  Jesuh kisam lo cihna suak hi (Gal. 5:2). Tua banah mi khempeuh tungah hong kipia hotkhiatna a nial suak ding hi (Kol. 3:11; Titus 2:11).  Paul in hih bang thu nial hi.

Pawl sungah minlutna tungtawnin hotkhiatna kingah ding hi, cih ngaihsutna in bang zahin lauhuai hiam?


TUESDAY                   Aug. 21
Kinialna Thu Lianpi

Sawl. 15: 7-11 sim in. Buai-na a piangsak thei thu Peter in bang pulaak hiam?
          ___________________________________________________________________
          ____________________________________________________________________
Luke in Jerusalem Council sung a thu kikupna khempeuh pulaak lo hi.Judah makaite’ pulaak thute leh Paul, Barnabas in a dawnkikna uh cihte thei hi lehang zaknop mahmah ding hi (Sawl. 15:12). Peter leh James thugenna bek kimu thei ahih manin sawltakte lak  pan amaute geel thusun in thupi mahmah hi, cih kilang hi.
          Peter in Cornelius tawh kisai a tuah thute sawltakte leh upa-te tungah hoih takin pulaak, amaute thuhilh hi.Jerusalema a gen thute mah gen kik hi (Sawl. 11: 4-17). Pasian mahmah in Cornelius kikhelna sang hi. Pasian in Pentecost  ni- a nungzui, sawltakte Kha Siangtho letsong a piak mah bangin, vunat lo mi mah taleh Cornelius zong Kha Siangtho pia hi.  Thuciam Lui thukhamte, biakpiaknate a neih loh uh hangin Gentile mite a siang lo mi kici lo ding hi. Bang hang hiam cihleh Pasian in amaute lutang hahsiang khin hi. Peter in a thukhupna-a a gen thugen leh Paul gen thu kibang hi. “Amaute mah bangin eite in zong upna tawh Topa Jesuh hehpihna hangin hotkhiatna i ngah hi” (Sawl. 15: 11).
          Sawl. 15: 13-21 sim in. Gentile mite tawh kisai buai-na a venna ding James in bang pulaak hiam?
          _____________________________________________________________________
          _____________________________________________________________________
A thugendan James in pawl sungah thunei khat hi, cih kilang hi (Sawl. 12: 17; 21: 18; Gal. 2:9, 12 tawh enkak in). David’ biakinn lamkikna thu a telzia leh Amos’genkholh bangin David kumpi tokhom kipuahkik ding hi taleh (Amos 9: 11, 16) James ii deihna bulpi in  Gentile mite zong hotkhiatna ngah ding uh hi, cih Pasian in a geelkholhsa hi-a, amaute zong Pasian’ mite sungah kihel ding uh hi. Tua hi-in Gentile mite in Israel mite tawh kipawl ding uh hi. Hih thu hangin Israel gam sung a teng mite zuih ding gam thukhun simloh Gentile mite in vunat ding leh Moses thukham kisam nawn lo hi.


WEDNESDAY           Aug. 22
Sawltakte Thupiak

Sawl. 15:28, 29 sim in.  Gentile mite zuih nawnloh ding Jerusalem Council in bang pulaak hiam?
          _____________________________________________________________________
          _____________________________________________________________________

Jerusalem Council in thu lianpi 4 khensat uh hi. Hehpihna hangin hotkhiatna ngah i hih manin Gentile mite in vunat lo-in pawl sung lut thei uh hi. Ahi zongin amaute in a pelh ding uh 4 om hi. (1).  Milim biakna-ah kizang sa-te ne lo ding uh hi. ( 2 ). Sisan dawn/ne lo ding uh hi. ( 3 ). Ganhing si-te sa ne lo ding, a si luang khia lo ganhing ne lo ding uh hi. ( 4).  Numei pasal mawhna bawl lo ding uh hi.
          Khristian mi tampi in nek le dawn tawh kisai Jew mite aa ding bek hi. Tuhun aa dingin hong kipia hi lo hi. Jew leh Gentile kikaal kizopna ding bekin kikoih hi, ci uh hi.
Sawltakte in Thuciam Lui thupiak khempeuh a hemkhia-in, thukhun thak bawl tawm uh cih zong hi lo hi. Kha Siangtho’ makaihna tawh (Sawl. 15: 28) sawltakte leh upa-te in Siampi Laibu 17 -18 sung a omsa thukhun bulphuhin Israel gam sung a  om khual mite zuih ding bawl uh hi. Siampi Laibu siksanin pasian tuamtuam biakna (paganism) khaam uh hi. Khualmi/peemta khat in Israel mite lakah a ten nop leh milim biakna a nusiat kul hi (Siam. 18:30).
 Tua hi-in Gentile mi khat in pawl sung a lut nopleh milim biakna a nusiat kul hi. Hih in kalsuan kipatna hi. Moses thukham kipiakma-in a om khin Pasian’ thupiak 10 a zuih kul hi. Biakpiakna thukham tawh kisai hi lo Sabbath, sa tawh kisai nek ding leh nek loh ding thukhun a zuih kul hi (Pian. 2: 1-3; 7:2).
Mang. 2: 14, 20 siksan lehang hih thukhun Sabbath, sa siang leh sa niin tawh kisai mi tampi in telkhial uh hi. Ahi zongin Lai Siangtho mundangte tawh enkak lehang Sabbath thupiak, sa siang leh sa niin cihte tuni dongin Khristian thu zui mite zuih dingin kip lai hi.


Buai-na hong om ciangin, tukhawmin koi bangin khat le khat kizahtakna, kiniamkhiatna tawh tua buai-na nawktan zo ding i hiam?


THURSDAY     Aug. 23
Jerusalem panin Laikhak

Sawl. 15:22 – 29 sim in. Jerusalem Council ii khentatna banah pawlpi in koi bangin buai-na lemtuah hiam?
       ________________________________________________________________________    ________________________________________________________________________A masa penin Gentile mite tawh kisai pawlpi’ khensatna zasak dingin laikhak uh hi. Sawltakte leh upa-te min in tua laikhak gelh uh hi. Sawltakte makaihna Jerusalem pawlpi in thu-um mite tungah huzaap lianpi nei hi.  Tua laikhak in AD 49 pawl a kigelh ahih manin Khristian tawh kisai-in a masa penpen pawlpi’ lai hong suak hi. Antioch a va pha dingin Paul leh Barnabas tawh a paikhawm dingin Jerusalem Council in  Judas Barsabas sawl hi.
          Sawl. 15:  30 – 33 sim in. Koi bangin Antioch pawlpi in tua laikhak bangci muh hiam?
          __________________________________________________________________
          __________________________________________________________________
Antioch pawlpi ah tua laikhak a sim uh ciangin pawlpi mi khempeuh lungdam uh hi.  Bang hang hiam cihleh Gentile mite in vunat kul nawn lo hi. Sawltakte hilh zuih ding thukhun 4 cihte (1).  Milim biakna-ah kizang sa-te ne lo ding, ( 2 ). Sisan dawn/ne lo ding ( 3 ). Ganhing si-te sa ne lo ding, a si luang khia lo ganhing ne lo ding. ( 4).  Numei pasal mawhna bawl lo ding cihte zong nial lo uh hi. Jew leh Gentile, pawl nih kisuahin kikhenna panin kilem kik thei uh hi.
           Council thu kikhup a tawpkhakna-ah Paul in a tangko lungdamna thu thuman hi, ci-in thei uh a, Paul leh Barnabas in a maban uh zompai suak thei hi (Gal. 2:9).  Tua hi mah taleh Jew Khristian kimkhat in Jew thukham mah siksan lianbelin nei lai uh a, Gentile mite a sianglo mi dingin ngaihsun uh a, amau tawh kipawl nuam lo uh hi.
          Peter zong khat vei vei ciangin Gentile mite kiang panin kihemkhia zel hi (Gal. 2:11- 14).  “Nungzui kim khat in Jerusalem  Council ii khensatna pomzo taktak nai lo uh hi” (The Acts of the Apostles, 197).

Pawl dangte, namdang khat tawh kikholh ding hamsa na sa hiam? Koi bangin tua bang hamsatna kantan ding na hiam?


Friday       Aug. 24
Ngaihsutbeh Ding: “ Pasian in a makaihna bang bangin Jew Khristiante in mainawt lo uh hi. Gentile mite lakah nasepna hangin Jew Khristian sangin Gentile Khristian mimal hong khang zaw hi. Gentile Khristiante tungah thukhun khauktakin a kikoih kei leh Gentile mite in Jew gam hong uk ding  a, namdangte lak pan teltuam ahihna uh mangthang ding hi, ci-in Jew mite in ngaihsun uh hi.” Ellen G. White, The Acts of the Apostles, 189.
          “ Jerusalem khuapi sunga teng Jew Khristiante in Pasian teltuam minam ahihna uh mangngilh uh hi. Khristian biakna in biakpiakna thukhamte, Judah ngei-na tuamtuamte a zuih loh uhteh Jew mite in Pasian teeltuam mi ahihna uh a mangthang dingin kingaihsun ahih manin Paul tungah heh uh hi. Nungzuite kimkhat in Jerusalem Council khensatnate sang zo lo uh hi. Biakna thukham a ultungsak mahmah mite in Paul in Jew thukham manphatna neuseh hi, ci-in ama thugen deihlo uh hi.” Ellen G. White, The Acts of the Apostles, 197.

Kikup Ding Dotnate

1.     Monday ni-a dotna ngaihsun kik in. Koi bangin pawlpi man in hong honkhia thei lo hi, cih thu na tel hiam?Gentehna-in nidang Israel in pawlpi man hi-in Israel mi khempeuh in hotkhiatna ngah lo uh hi. Pawlpi manin hong honkhia thei lo ahih manin pawlpi man sunga omna in bang phattuamna hong pia hiam?
2.     Vunat lo Gentile mite pawl sungah a lut uh pawlpi masa sungah a thupi mahmah khat hi. Tuhunin pawlpi in bang buai-nate phu kha hiam? Sawl. 15 in koi bangin tua buai-nate hong zawhpih thei ding hiam?
3.     Mi kimkhat in Jew mite in pawl sung a lut ding uh leh Jew mi a suah masak uh kisam hi, ci uh hi. Israel mite tungah kipia namdangte in hong na upna uh hong pawm ding uh hi, cih a tangtunna hi, ci-in ngaihsun uh hi. Koi bangin hih thu na tel hiam? Pawlpi in a tuah khak buai-na tuamtuamte lemtuah zawh nading hamsa hi lo hiam?

To get the latest update of me and my works

>> <<