LESSON 6 August 4- 10
Peter Nasepna
SABBATH NITAK
Tu Kaal Sung Sim Ding: Sawl. 9: 32 – 42; 10: 9-16; 11: 1-26; 12: 1-18; Eph. 2: 11- 19
KAMNGAH: “Tua ciangin Peter zong thugen kipan a, “Pasian in kuamah a deidan loh lam ka thei taktak hi. Minam khempeuh lakah amah kihta-in a dik a gamta mite amah in a sang hi” (Sawl 10: 34, 35).
Tarsus ah Paul a paikhiat khit, pawlpi masate’ thu Luke in a pulaakna-ah Peter thu limgen pen hi. Peter in Judea gam leh tua kim a om khua-te ah zin kawikawi hi. Tua bangin a zinna-ah Luke in nalamdang nih pulaak hi. Aeneas a damna leh Tabitha (Dorca) a thawhkikna thu kipulaak hi. Tua khitteh Cornelius thu in zomto hi (Sawl. 7).
Gentile mite hong kikhelna hangin pawl sungah buai-na lianpi hong piang hi. Cornelius a kituiphumna tawh kisai makaite kikupna, Pentecost ni-in thu-um mite tungah Kha Siangtho kibua-in, Peter leh Jerusalem a makaite in hotkhiatna thu in Jew mite aa ding bek hi lo hi, ci-in pulaak uh hi mah taleh pawlpi in buai-na tawh kipelh lo hi. Tua bang buai-na om taleh Antioch pawlpi in Gentile mite lakah nasem hi.
Herod kumpi uksungin pawlpi in bawlsiatna thuak hi. Saul’ bawlsiatna pan a suakta sawltakte in bawlsiatna a thuakna tungtawnin thupiangte tu kaal sungin i en ding hi.
SUNDAY Aug. 5
Lydda leh Joppa-ah Nasepna
Peter in Judea tuigei a om thu-um mite kiang vahawh hi. Upna thute hilh dingin tua bangin khualzin hi (Sawl. 2: 42). Tua bangin a nasepnate ah Jesuh mah bangin Peter tungtawnin Pasian in nalamdang lianpi bawl hi.
Sawl. 9: 32 – 35 sim in. Aeneas a damsakna tawh kizui-in Jesuh nalamdang bawl (Lk. 5: 17 – 26) tawh a kibang thu na mu hiam?
___________________________________________________________________
____________________________________________________________________
Peter in Aeneas a damsakna tomtakin a pulaak thu in Capernaum a pumzaw mipa, Jesuh in a damsakna thu hong phawksak hi (Lk. 5: 17 – 26). A nihun lupna tungah lum uh hi. Aeneas in damna manin Lydda bek hi lo Sharon tuigei khua dongah kizel hi. Tua bang nalamdang tungtawnin mi tampi in Topa um uh hi.
Sawl. 9: 36 – 43 sim in. Sihna pan a nungta kik Tabitha ngaihsun in. Bang thu hangin kiphawk deuh hiam?
___________________________________________________________________
___________________________________________________________________
Tabitha min in Aramaic pau hi-in Greek in Dorca kici hi. A nasepna hangin a veng, a paam mite’n it mahmah uh hi. Tabitha a kithawhkiksakna thu, Peter mahmah in amuh, Jesuh in Jairus’tanu a thawhkiksak tawh kibang hi (Lk. 8: 41, 42, 49 – 56). Jesuh bang mahin Peter in inn sung a om mite inn pua-ah pusuak dingin sawl hi (Mark 5: 40). Tua khitteh khukdinin thungen hi. A thunget khitteh ‘Tabitha aw, tho in,’ ci-in sam hi (Sawl. 9: 40).
Sawltakte in nalamdang tuamtuam bawl uh hi. Ahi zongin sihna pan Tabitha a thawhsak nalamdang in sawltakte zangin Pasian’ nasepna kimu hi (Sawl. 5: 12). Peter in Jesuh bangin nalamdang bawl hi mah taleh, kua in nalamdang bawl cih thupi sangin, Pasian tungah a ki-apna uh thupi zaw hi(Jn. 14:12). Pasian in a hong zat dingin na ki-ap nak leh na lianpi pi na mu ding hi. Peter in Tabitha thokiksak hi bek lo-in, tua nalamdang tungtawnin Joppa khua-ah thu-um mi tampi kibehlap hi (Sawl. 9: 42).
Mi kimkhat in nalamdang ka muhteh ka um ding hi, ci uh hi. Khat veivei ciangin nalamdang hangin thu-um mi om mah hi. Ahi zongin nalamdang mu na pi-in a um lo mi tampi Lai Siangtho sungah kimu hi. Tua ahih leh bang tungah upna kinga ding hiam?
MONDAY Aug. 6
Cornelius’ Inn-ah
Peter in Joppa khua-ah savumnim nasem Simeon inn-ah vatung hi (Sawl. 9: 43). Tua panin Joppa khua pan tai 26 gamlatna Caesarea khua-ah Roman galkapmang Cornelius om hi. Cornelius leh a innkuanpihte in Judaism biakna zui ahih loh uh hangin Pasian a zahtak, Gentile innkuan khat hi. Joppa khua-ah mi sawlin Peter vasam dingin Pasian in mangin hopih hi (Sawl. 10: 1- 8).
Sawl. 10: 9 – 16, 28, 34, 35 sim in. Peter in bang tuak hiam? Koi bangin a tuah thu’ deihna pulaak hiam?
______________________________________________________________________
______________________________________________________________________
Peter’ mangmuhna in nek ding leh nek loh ding vai hi lo-in mihing tawh kisai thu hi. Tua hun in suun laitak hi-in Peter gilkial hi. A mai-a kikoih ganhingte thatin a sa ne dingin kisawl hi. Pasian in tua bangin mangmuhna a piak hangin sa siang leh sa siang lo kilamdanna a beisak hi lo-in hotkhiatna tawh kisai thu a hilhna hi zaw hi.
Peter tungah kilaak thu in Gentile mite a deidan nawn lo dingin thuhilhna hi zaw hi. Peter ngaihsutna-ah Cornelius innah va lut leh Peter in amah le amah kiniinsak ahih manin biakbukah Pasian bia dingin kilawm lo hi, cih ngaihsun hi. Kum zalom khat sung a om Jew mite in vunat lo Gentile mite tawh kizopna nei lo uh hi. Tua bangin kizopna nei uh hi leh amau le amau kiniinsak tawm hi, ci-in ngaihsun uh hi. Israel mite in Gentile mite tawh kizopna bawl lo uh hi. Israel mite tungtawnin Gentile mite in a nungta Pasian theihtelna nei dingin Pasian in amaute minam khatin a koih hi napi, Pasian’ geelna bangin Israel mite nungta lo uh hi.
Abraham tawh thuciam pulaak dingin vunatna kipia ahih manin vunat lo Gentile mite kituamkoih hi. Gentile mite in vunatin Jew a suah kei uhleh Abraham tungah kipia kamciam amaute in ngah lo ding uh hi, ci-in ngaihsun uh hi. Tua bang ngaihsutna in Jesuh hong sihna thu tawh kilangdo hi. A nungciangin damdamin thuman hong theitel uh hi.
Titus 2:11; Gal. 3: 26- 28; Eph. 2:11 – 19 sim in. Mi khempeuh tungah kipia hotkhiatna thu tawh kisai bang hong hilh hiam? Deidan neihna, kilangneihna cihte a hoihlohna bang hong hilh hiam?
TUESDAY Aug. 7
Kha Siangtho Letsong
Sawl. 10: 44 – 48 in pawlpi kipat masak hun sunga thute kigelh hi. Sawltak khat thugenna hangin Gentile mite lakah hotkhiatna thu hong kizel hi. Greek ngei-na a zui thu-um mite bang lo-in sawltakte leh Judah gam a thu-um mite in Gentile mite pawl sung a lut ding phal lo uh hi. Jesuh in Israel mite lamet Messiah ahih manin Jew mite tung bekah hotkhiatna thugen ding hi, ci-in ngaihsun uh hi. Gentile mite in Judaism sungah a om masak uh kul a, tua khit ciang bekin Jew mite lakah kihel thei pan ding hi, ci-in pulaak uh hi. Christian a suahma-un Jew mi a suah masak uh kisam hi, cihna hi. Jew thu-um mite hih bang ngaihsutna a khel ding kisam hi.
Cornelius leh a innkuanpihte tungah kipia namdang pau theihna Kha Siangtho letsong a kipiakna in Gentile leh Jew kideidanna in hotkhiatna tawh kituak lo ahihlam kilang hi. Pasian mai-ah Jew leh Gentile in kilamdanna nei lo hi, cih pulaak hi.
Sawl. 11: 1-18 sim in. Koi bangin Caesarea khua-a Peter’ tuah khak thu Jerusalem pawlpi in pulaak hiam?
_____________________________________________________________________
_____________________________________________________________________
Jew leh Gentile kikal kilangneihna hangin Jerusalem a thu-um mite in Gentile mite tawh anne-khawm Peter mawhsak uh hi. Cornelius leh a innkuanpihte in hotkhiatna a ngah uh ngaihsun lo-in amau Jew ngei-nate thupi ngaihsut zaw uh hi. Tua bangin Gentile mite tawh kipawl hi le-uh Israel’ upna nial, Pasian’ maipha ngah nawn lo-in, a Jew mipihte mawhsakna ngahin, Pasian’ thupiak langpan ci-in a ngawh uh Stephen a thah bangin thahna thuak dingin kingaihsun uh hi.
“Khrih pawlpi in a nasepzia a khel hun hong tungta hi. Gentile mite kikhel nading kongkhak kikhak khempeuh tu-in a kihong ding hi ta hi. Hotkhiatna thu a um Gentile mite in Khrih nungzui Jew mite mah bangin vunat kul lo-in pawlpi sungah om ta uh hi.” Ellen G. White, The Acts of the Apostles, 136.
Pentecost ni-a namdang pau a theih ciat mah bangin tu-in zong Gentile mite lakah namdang pau-in thu za thei uh hi. Sawltakte in hotkhiatna thugen nadingin namdang pau theihna kipia a, Cornelius tunga kipia namdang pau theihna in Gentile mite lakah Pasian’hehpihna hong tung hi, cih kiciantakin theihtelna hong suak hi.
WEDNESDAY Aug. 8
Antioh ah Pawlpi
Cornelius a kikhelna hangin Luke in tha-ngah ahih manin Gentile mite lakah nasem Peter thu hong pulaak kik hi.
Sawl. 11: 19 – 26 sim in. Bawlsiatna hangin Jerusalem pan hong paikhia thu-um mite in Antioh hong tun uhteh bang thu piang hiam?
________________________________________________________________________ _______________________________________________________________________
Sawl. 11 sunga thupiangte in Sawl. 8 sunga Paul’ bawlsiatna thu pulaak kik hi. Judea a Greek thu-um mite in Jerusalem nusia-in paikhia dingin kisawl a, bawlsiatna thuak tua mite hangin Judea gam pua-ah lungdamna thu hong kizel hi. Luke in Syria gam a Antioch-ah galtai mite in a mipih Jew mite leh Greek mite tungah hotkhiatna thu gen uh a, mi tampi mah in Jesuh um uh hi. Jesuh in a gen thu (Sawl. 1: 8) Greek gamsuak Jew Khristian mite tungtawnin tangtung hi. Amaute in Gentile mite lakah nasem taktakte hong suak uh hi. Antioch ah pawlpi nasep lawhcing mahmah ahih manin a va sittel dingin Jerusalem a om sawltakte in Barnabas sawl uh hi. Hotkhiatna thu in lawhcing mahmah ahih manin amah tawh khualzin khawm dingin Barnabas in Paul zawn hi.
Barnabas geelna pen hoih hi. Paul tawh nasem khawm uh a, Gentile tampi in hotkhiatna thu um uh hi. Tua bangin Jesuh Khrih’ thu a um mite Khristian ci-in kithei hi (Sawl. 11: 26). Pawl pua thu-um lo mite in Khrih’ thu-um mite a zahpihna uh siksanin Khristian ci-in min na vawh uh hi. Khristian thu-um mite ahih leh khat le khat ‘sanggam’ (Sawl. 1:16) ‘nungzui’ (Sawl. 6:1) ‘mi siangtho’ (Sawl. 9:13), kici uh hi. Sawltak Bu a kigelh ciangin Khrih thu-um mite kilawhna tangpi zat min hong suak hi (Sawl. 26:28). Luke in zong tua mah zang hi. Khristian cih a khiatna in Khrih nungzui cihna hi.
Khristian ci-in hong kilawh ciangin nang aa dingin bang khiatna nei hiam? Na nunzia in Khristian hi takpi hiam? Khristian hi lo mite tawh kilamdanna na nei hiam?
THURSDAY Aug. 9
Herod’ Bawlsiatna
Judea gama thupiang khat en kik lehang Herod kumpi pa in John’ sanggampa, Zebedee’ tapa James thahna thu kimu thei hi (Mk. 1:19). Peter zong thah dingin vaihawm hi.
Sawl. 12: 1-4 sim in. Pawlpi masate in hamsatna bang thuak uh hiam?
____________________________________________________________________
_____________________________________________________________________
Hih lai-ah Herod kumpi a kigen pen Agrippa I, Herod the Great ii tu hi ( Matt. 2:1). AD 40 – 44 sung Judea uk hi. Biakna mi khat ahih manin Jew mite lakah maipha ngahin Pharisee-te lakah gualhuai mahmah kumpi khat hi. Sawltakte langpanna tungtawnin Jew mite’ maipha ngah ding hanciam hi. Agrippa’ geelna bangin tangtungin James in thahna thuak hi. Peter zong thah ding geelna nei hi. Peter in mat leh hen thuak hi. Galkap 4 in zan tungtawn Peter cing uh hi. Galkap nih kikal ah kolbulh thuak hi. Galkap nih in thong kongkhak cing uh hi. A suahtak theih loh nadingun tua bangin hoih takin kicing hi (Sawl. 5: 17- 20).
Sawl. 12: 5- 18 sim in. Sanggamte’ thungetna hangin bang thu piang hiam?
__________________________________________________________________
___________________________________________________________________
Agrippa in Peter thusit ding a, tua khitteh thah dingin a kikoih kimlai a lamdang takin vantungmi in Peter honkhia hi. Hih thupiang banah Caesarea-ah Agrippa sihna thu zong kiciamteh hi (Sawl. 12: 20 – 23). Gu kipia maw, gilpi natna tawh si maw, a sihdan khat le khat pulaak kibang lo hi. Ahi zongin Agrippa in Pasian’ thukhenna thuakin si hi, ci-in Luke in pulaak hi.
James in thahna thuak hi. Peter in sihna ding panin suakta hi. Herod in Pasian’ thukhenna thuak hi. Thuman tawh thu kikhenna a om mah bangin thuman lo tawh kikhenna mun zong om hi. I theihnop thu khempeuh kithei zo lo ding a, bang hangin i tel zawhloh thute upna tawh kalsuan ding kisam hiam?
FRIDAY Aug. 10
Ngaihsutbeh Ding: Sawl. 10 sungah vantungmite’ nasepna hangin Cornelius leh a lawmte kikhawlna thu kimu thei hi. Sawl. 8- 10 limtak sim ding kisam hi. A mangthang mite honkhiat nasem mite a nasem lo mite sangin vantung tawh kinai zaw uh hi. Pasian in mimal khat ciat in hotna ngah ding deih a, leitungah Pasian nasepna kizawh nadingin mimal khat ciat kihel ding hong hilh hi.” Ellen G. White, The SDA Bible Commentary, vol.6., 1059.
“Pawlpi in thu a nget ciangin Pasian’ gam tangzai semsem hi. Ama nasem mite in bawlsiatna, thahna a thuak uh hangin, Pasian a langpang mite in kisia mang ding uh hi. Luke in a vanglian hotkhiatna thu um-in, Pasian’ nasem mite in gimna, sihna a thuak uh hangin, kuamah in Pasian’ kammal susia zo lo hi.” I Howard Marshall, The Acts of the Apostles (Grand Rapids: Eerdmans, 1980), 206.
Kikup Ding Dotnate
1. Cornelius leh a innkuanpihte in Pasian zahtakin, tatsat lo-in thungenin, cimawh mite huh hi (Sawl. 10: 2, 8). Peter tawh a kimuh ma-in zong Kha Siangtho in Cornelius sungah nasem khin hi. Biakna kin mi khat ahih manin Pasian in hotkhiatna thu pulaak thei dingin lampi nei hi lo hiam? Cornelius nunzia in bang hong hilh hiam?
2. Monday ni-a dotna en kik in. Khristian thu-um mi khat in ngei-na, mi tawh kizopna, gam uk makaite tawh kizopna, namdangte tawh kizopnate ah bang thute pelh ding kisam hiam? I pianzia, i ngei-nate sangin bang thupi zaw hiam?
3. Paul in thu-um mite bawlsia ding a geelna panin thu hoih hong piang thei hi. Bawlsiatna thuak mite in Antioch-ah a galtai mi ahih uh hangin a paipai-na munah hotkhiatna thu gen uh hi. Gimna, bawlsiatna pen Pasian in thupha-in hong heisak na phawk ngei hiam?
4. A nungzuite mite lak pan Jesuh in James it mahmah hi (Mk. 5: 37, 9: 2; 14: 33). Ahi zongin Nungzuite lak pan thahna a thuak masa pen hong suak hi. Lai Siangtho sungah thuman thutak hi napi bawlsiatna a thuak mite ngaihsun in. Gimna, bawlsiatna i thuak ciangin na nunzia ding bang hong hilh uh hiam?
