LESSON 2 July7-13
PENTECOST
Sabbath Nitak
Tu Kaal Sung Sim Ding: Sawl. 2: 1-4; 2:5 – 13, 22 – 39; Late 110: 1-3; John 14: 16; Joel 2: 28 – 32.
KAMNGAH: “ Pasian in sihna panin hih Jesuh hingkiksak a, kote khempeuh pen hih thu a thei teci vive ka hi uh hi. Amah in Pasian taklamah omna dongin liatna ngah a, ama tungah Pasian in a ciamsa Kha Siangtho zong a ngahkhin hi. Tu laitak a na muh na zak uh nate pen kote tungah a hong piak tua Kha Siangtho ahi hi” (Sawl. 2: 32, 33).
Pentecost kammal in “pentekoste” kammal pan hi-in Greek laimalin Jew mite Nipikaal Pawi cihna hi (Pai. 34: 22). Anpal Pawi zong kici hi (Gam. 28: 26). Ni 50 cih thu in Paisan Pawi khit mangbuh tawh biakpiak kipat ni a kipan ni 50 a cin ni-in pawi nei uh hi. Hih ni in lungdam ni leh lungdamkoh ni hi. Hih ni-in Israel mite in khaigahte tawh Topa Pasian tungah biakna pia uh hi (Pai. 34: 22).
Tua pawi pen limciinna pawi hong suak hi. Khristian pawlpi tungah Kha Siangtho hong tunni hi-in hih ni-in mihing 3000 kituiphum uh hi (Sawl. 2:41). Jesuh in vankahin vangliatna tawh kidimin a om khitteh Kha Siangtho hong kumsukin a lamdangtakin Sawltakte hong khel hi. A meidawi Galilee mite tu-in upna tawh kikhelna lianpi piangsak uh hi.
Pentecost in pawlpi hong kipatkhiatna kici hi. Khrih nungzui – Jew, Gentile mite in leitungah Pasian innkuan thak hong suahna uh hi, ci-in kiciamteh hi.
SUNDAY JULY 8
Kha Siangtho A Hong Pai-na
Jesuh thupiak a zui thu-um mite in Kha Siangtho hong kum ding Jerusalemah ngak uh hi. Thungetna, mawhna kisikna leh Pasian minphatna tawh Kha Siangtho kipia ding kamciam a tangtung ding ngak uh hi. A ni hong cin ciangin amaute in inntung mun gol khatah kikaikhawm uh hi (Sawl. 2: 1). A sawt lo-in mun tuamtuamah kithehthang ding uh hi ( Sawl. 2:6- 13).
Sawl. 2: 1-3 sim in. Kha Siangtho hong pai tawh kitonin bang nalamdang kimu hiam?
_____________________________________________________________
_____________________________________________________________
Lauhuai phial leh kilawm hi. A masa-in van panin a ginngaih mahmah thawmging lianpi khat, huihpi-nung tawh kibang khat kiza hi. Amaute tungah meikuang bangin a vangtaang mahmah khat hong tung hi.
Lai Siangtho sungah huihpi leh meikuang in Pasian kilaakna, a vangliatna pulaak hi (Pai. 3:2; 19: 18; Thkna. 4:15). Tua banah huihpi leh meikuang in Kha Siangtho limcing hi (John 3: 8; Matt. 3:11). Pentecost ni-a nalamdang in Kha Siangtho kibua ding kamciam a tangtunna leh hotkhiatna thu kizelh nadingin a piang nalamdang hi.
Leitung kipat a kipan Kha Siangtho in tatsat lo-in nasem hi. Thuciam Lui hun sungin Kha Siangtho in mite tungah a tuamtuamin kilang hi. Ahi zongin a hong kilaak ding zahin kilangkhia nai lo hi. “Abrahamte hun lai-in zong Kha Siangtho in nasem hi; ahi zongin a hong kilang ding zahin kilangkhia nai lo hi. Tu-in Honpa thupiak bangin a nungta thu-um mite in Kha Siangtho tawh kidim dingin thungen uh a, Khrih in vankahin a kamciam bangin a mite tungah Kha Siangtho hong pia khong hi.” Ellen G. White, The Acts of the Apostles, 37.
Tuiphum John in a hong tung ding Messiah in Kha Siangtho tawh kidim ding hi, ci-in genkhol hi(Lk. 3:16 leh Sawl. 11: 16 enkak in). Khrih in zong Messiah ahihna pulaak hi (Lk. 24: 49; Sawl. 1:8). Kha Siangtho a hong kibuah ciangin Khrih in Pa Pasian mai-ah mawhthuumna kipan hi (John 14: 16, 26; 15: 26). Pentecost ciangin tua kamciam tangtung hi.
Jesuh in singlamteh tung pan gualzo-in van a kah khitteh Pentecost ni-in thu-um mite in Kha Siangtho tawh kidim uh hi mah taleh thu-um mi khempeuh in tatsat lo-in Kha Siangtho tawh kidim ding hi (Sawl. 4:8, 31; 11: 24; 13: 9, 52; Eph. 5:18)
Kha Siangtho tawh kidim mi na hihlam bang in pulaak hiam?
MONDAY July 9
Pau Tuamtuam Pau-Siamna Letsong
Sawl. 2:4 Kha Siangtho in Nungzuite tungah namdangte’ pau tuamtuam siamna pia hi. Hih siamna in Kha Siangtho piak siamna tuamtuamte lak pan khat hi (Sawl. 10: 45, 46; 19:6). Kha Siangtho piak siamnate lakah a piang ding thute genkholhna (Sawl. 11: 28), vantung nopna muhtheihna (Sawl. 7: 55), vangliatna tawh kidim kampau siamna (Sawl. 2:8; 28: 25), damsakna (Sawl. 3: 6, 12; 5:12, 16), nasem ding mi picingsak hi ( Sawl. 6: 3, 5)
Pentecost ni-a pau Kha Siangtho’ piak pau nam tuamtuam teltheihna in Kha Siangtho’ nasep a thupi pen hi lo hi. Pau tuamtuam theihna in pawlpi nasepna mazangsak hi. Gammial nasepna-ah a kisap hun om hi (Sawl. 1:8). Nungzuite in pau kibang lo namdangte lak leh leitung mun tuamtuamah hotkhiatna thugen nadingin pau tuamtuam siamna kisam hi. Pau kitheihna om kei leh thugen in a gen mite hi taleh thungai mite aa dingin a mawkna suak ding hi.
Sawl. 2: 5 – 12 sim in. Pentecost ni-in sawltakte in namdang pau tawh thugen uh hi, kicih theihna bang pulaak hiam?
____________________________________________________________________
____________________________________________________________________
Kum zalom masa sungin Jew minam 8000000 – 10000000 bang om ding uh hi. Tuate lakah 60% pen Judea gam pua-ah om uh hi. Tua hun lai-in Judean Jew mite pau Aramaic hi.Mundang pan Jerusalemah pawisiim a hong pai Jew mite in Aramaic thei lo uh hi. Pentecost ni-a mun tuamtuam pan hong pai Jew mite in sawltakte gen thute amau pau ciat tawh za thei uh hi. Sawltakte in kuama theihloh kampau, kamtuam pau tawh thugen uh hi lo-in, amau pianpih kampau tawh a thugente uh mipi in amau pianpih kampau mah tawh za uh hi.
Dialektos (Sawl. 2:6, 8) cih kammal in gam khat ahih kei leh mun khata kizang kampau-te cihna hi (Sawl. 21: 40; 22:2; 26: 14 zong sim in). Pentecost ni-a mihonpi in pau namkim kigawm mihonpi hi-in, sawltakte in mihonpi teltheih dingin kampau-in thugen uh a, mipi in zong amau pau tekin za uh hi. Galilee gam mite tungah nalamdang hong tungin a theih ngei loh kampau tawh thuhilh uh hi.
Jerusalem a om Jew mite in Sawltakte kampau thei lo uh ahih manin zukhamin ngaihsun uh hi. Amau zakna-ah sawltakte kampau in khiatna nei lo hi. Mi kimkhat in ciamnuih bawl uh a, “zu tampi dawn uh hi,” ci-in zahpih uh hi (Sawl. 2:13).
Amaute mai-ah Pasian in nalamdang bawl taleh mite in zukhamin ngaihsun uh hi. Koi bangin Pasian mai-ah mittaw i suah loh nading kikem ding i hiam?
TUESDAY July 10
Peter Thugen
Zukham ci-in mite’n a kingaihsut laitakun Peter in a thupiang thuhilh hi. Peter in Lai Siangtho siksanin thugen a, Kha Siangtho kibua ding hi, cih genkholhna tangtung hi, ci-in thuhilh hi (Sawl. 2: 16 – 21).
Sawl. 2: 17 leh Joel 2: 28 enkak in. Koi bangin Peter in Joel genkholh bangin tangtung hi, ci-in pulaak hiam?
_________________________________________________________________
__________________________________________________________________
Joel genkholhna a hong tung ding hotkhiatna thu hi (Joel 2: 32). Tua genkholhna a hong tun ciangin nalamdang tuamtuam leh Kha Siangtho hong kumsuk ding hi (Joel 2: 28 – 31). Joel genkholh bangin a piang thute Peter in pulaakin thuhilh hi. Ahi zongin Peter in Joel genkholhna tawh kisai a pulaak i phawk ding thupi om hi: Peter in ‘tua khit ciangin’ ci-in Joel genkholhna tangtung hi, ci-in pulaak sangin, ‘ hun nunung ciangin’ (Sawl. 2:17), ci-in pulaak zaw hi. A deihna in leitung mite kihotkhiat ding hun kipan ta hi, cih hong hilh hi. Ahi zongin hun nunungah hih bek a piang ding hi lo hi. Pawlpi masa omzia a tuamdiakin kipulaakna hi zaw hi. Sawltakte in zong hun bei ding ni thei lo uh hi. Ahi zongin tua ni hong nai mahmah hi, cih pulaak uh hi.
Sawl. 2: 22- 23 sim in. Peter in hotkhiatna thu bang thu lianpi pulaak hiam?
________________________________________________________________
________________________________________________________________
Pentecost a thupitna in genkholhna bangin a tangtung ahihlam Peter in a pulaak khitteh Peter in Jesuh nasep, a sihna leh sihna pan a thawhna thute pulaak hi. Ahi zongin thawhkikna in hotkhiatna thu aa dingin thupi penpen hi. Peter aa dingin Jesuh in sihna pan thawhkikna thu in a lian penpen hi. Peter in Lai Siangtho siksanin sihna pan Jesuh a thawhkik a deihna pulaak hi (Sawl. 2: 22, 27). Bang hang hiam cihleh Jesuh in Messiah hi; sihna in Amah lencip zo lo hi. Tua hi-in Peter a kipan Thuciam Thak gelhte khempeuh in sihna pan a tho Jesuh in Messiah taktak hi, mawhnei mite a hong hotkhiatna ding hong lak a lian bel Ama vangliatna hi, ci-in pulaak uh hi.
Sihna tawh kipelh ding kuamah i om kei hi. Sihna hong lau-sak hong patau-sak hi. Bang hangin sihna pan Jesuh thawhna in thupi mahmah hiam?
WEDNESDAY July 11
Vangliatna A Ngah Jesuh Kipahtawi-na
“ Amah in Pasian’ taklamah omna dongin liatna ngah a, ama tungah Pasian in a ciamsa Kha Siangtho zong a ngahkhin hi. Tu laitak a na muh na zak uh nate pen kote tungah a hong piak tua Kha Siangtho ahi hi” (Sawl. 2:33).
Peter in a thuhilh khen thumna-ah thu-um mite in a lunglut uh namdang pau pulaak kik hi. Thu-um mite in zingsang nai 9 pawl, tua hunin zukham uh hi lo-in vantung pan Kha Siangtho tawh kidim uh ahih manin namdang pau-in thugen uh hi zaw hi.
Sawl. 2: 33 – 36 sim in. Jesuh in Pasian taklamah a kipahtawi-na thu le Kha Siangtho kibua suk thu in bang kizopna nei hiam?
______________________________________________________________
________________________________________________________________
Pasian taklam khut in na khempeuh a ukna pulaak hi (Late 110: 1-3). Peter gen thu in Lai Siangtho siksanin a gen hi-in, a mite tungah Kha Siangtho a piak theih nadingin Jesuh in Pasian taklam khutah kipahtawi hi. Hih bangin i gen ciangin Jesuh in a ngah ngei nailo dinmun a ngah hi lo-in (John 1: 1-3; 17: 5), Pa Pasian in Topa leh Honpa-in a ciaptehna thu a pulaak i hi zaw hi (Sawl. 2: 36).
Hih thu in Lai Siangtho sunga a thupi mahmah a sia leh a pha kilangneihna thu hong phawksak hi. Jesuh in vangliatna ngah lo hi leh Kha Siangtho in mihingte tawh hong om thei lo ding a (John 7: 39), singlamteh tungah zawhna ngah lo hi leh Jesuh in vantungah liatna tawh kidim lo ding hi (John 17: 4, 5). Cihnopna-ah Kha Siangtho a hong pai nadingin Jesuh in vantungah liatna tawh a om kul hi. Bang hang hiam cihleh Pasian in singlamteh tungah Jesuh zawhna leh hih leitungah a uk Satan tungah zawhna a ngahna thu pulaak hi (John 12: 31).
Leitungah mawhna hong lutna ciangin Pasian maitang kimu lo hi. Mihingte a hong hotkhiat nading banah Satan in Pasian a mawhsakna khempeuh thuman lo hi, ci-in pulaak dingin Jesuh a hong sih kul hi. Jesuh nasep in hotkhiatna dingin kicing hi (Lk. 4: 18-21). Jesuh in dawivei-te hawlkhia-in, Satan hencipna panin honkhia hi. Singlamteh tungah a sihna in tua vangliatna nei hi. Vantung in Khrih a hong sihna ciamtehin Satan in siatna thuak ding hi ta hi. Khrih hong pai ding kigingkholsak dingin Kha Siangtho hong kibua-suk hi.
THURSDAY July 12
Gah Masa
Peter’ thugen a ngai mipi in a zak thute uh hangin a lungsim uh lawngkha hi.Tua thungai mite lakah Jesuh thah dingin a ngen mite zong kihel uh hi (Lk. 23: 13 – 25). Ahi zongin tu-in Nazareth khua-mi Jesuh in Messiah taktak hi, ci-in tel uh ahih manin “bangci bangin hotkhiatna ngah ding ka hi uh hiam? ci-in dahin thuum uh hi (Sawl. 2: 37).
Sawl. 2: 38 sim in. Mawhmai nadingin bang kisam hiam?
___________________________________________________________________
___________________________________________________________________
Mawhna kisik i cih ciangin ngaihsutna leh nunzia khempeuh kikhelin mawhna pan kihemkhia cihna hi-in, (Sawl. 3: 19; 26: 20), mawhna hangin thuak ding gimna hang lau-na hi lo hi. Upna mah bangin kisikna man taktakin Pasian hong piakkhong hi. Ahi zongin Pasian hong piak na nial nopleh na nial thei hi (Sawl. 5: 31- 33; 26: 19 – 21; Rom. 2:4). Tuiphum John a kipan kisikna in tuiphumna tawh kizom hi (Mk. 1:4). Tuiphumna in mawhna kisik pulaakna hi. Tuiphumna in mawhna pan siantho-na leh Kha Siangtho tawh kidim thaksuakna limcing hi (Sawl. 2: 38; 22: 16; Titus 3: 5-7).
Sawl. 2: 38, 39 sim in. Mawhna kisik mite le a kituiphum mite bang kamciam kipia hiam?
_________________________________________________________________
_________________________________________________________________
Pentecost a mite in mawhmai-na ngah uh hi. Tua banah amaute’ upna a khangto thei ding, pawlpi leh mite aa ding nasem dingin Kha Siangtho kipia hi. Tua in thupha khempeuhah a lian pen thupha hi. Mite tungah hotkhiatna thu hawmsawn ding pen pawlpi’ ngimna lian pen hi (1Pet. 2:9). Tua bangin a nungta mi in hotkhiatna ngah lungmuanna nei ding hi. Kha Siangtho’ vangliatna ngah ding uh a, hotkhiat nasepna-ah kihel ding uh hi. Tua dingin amaute in sapna ngah uh hi.
Hotkhiatna thu taangko mi aa dingin “na mawhna mai hi” cih thu in bang hangin thupi mahmah hiam? A taktakin mi khat in lametna nei kei leh bangci bangin mi dangte tungah lametna hawm thei ding hiam?
FRIDAY July 13
Ngaihsutbeh Ding: Pentecost ni-a Kha Siangtho in a thupi mahmah vantung a thupiang hong hilh hi. Tua banah leitung mawhna hangin Khrih hong sihna Pasian in a lungdamna pulaak hi. Pentecost ni-a Kha Siangtho in eite aa dingin Jesuh in vantung biakbukah mawhthuumna kipan hi, cih thu zong pulaak hi. Tua hotkhiatna thu – vantung leh leitung kizop theihna thuthuk i tel zo kei hi.
“Khrih’ vankahna in nungzuite tungah kipia Kha Siangtho tawh na kidim ding uh hi, cih kamciam tangtung ta ding hi, ci-in pulaak hi….. Khrih in vantung kongkhakpi sung lutin vantungmite khempeuh in Ama kimah pahtawi-na pia uh hi. Tua bangin pahtawi-na kipia a zawh madeuhun Kha Siangtho in nungzuite tungah hong tuaksuk hi. Khrih in vangliatna khempeuh tawh kidimin mongnei lo vangliatna khempeuh tawh kidim vantung Pa Pasian tawh mangkhawm hi. Pentecost ni-a Kha Siangtho in Honpa in vantung biakbukah a nasep kipan khin hi, cih pulaak hi. Ama kamciam bangin Kha Siangtho hong paisuk a, vantung leh leitungah a neih siampi leh kumpi ahihna vangliatna khempeuh a mite tungah hong pia hi.” Ellen G. White, The Acts of the Apostles, 38, 39.
Kikup Ding Dotnate
1. Koi bangin Pentecost ni-a Kha Siangtho tuhunin zong ngah ding i hiam? A kingah kik thei bang hi ding a, a kingah kik thei nawn lo bang hi ding hiam?
2. Peter in a thupi mahmah sihna pan Jesuh thawhkikna thu Pentecost ni-a a gen thute ngaihsun in. Sihna pan Jesuh a thawhna in Messiah in sihna pan thokik lo ding hi, ci-in tua hun lai-a Jew mi tampite upna tawh kilamdangsak hi. Jew mite lamet bang hi lo-in Messiah in sihna pan thokik dingin lamen hi. Koi bangin mihing hoihsak thu zui lo zaw-in Lai Siangtho hong hilh thute zui zaw ding i hiam?
3. Sawl. 2: 38 sim in. Tuiphum tawh kisai-in Zeisu a um mi khat a kisam mahmah kituiphum ma-in a nuntakna bei leh mangthang veve ding hiam? Siksan nei-in dawng in.
