LESSON 13 Sep. 22 – 28
ROME-AH KHUALZINNA
SABBATH NITAK
Tu Kaal Sung Sim Ding: Sawl. 27, 28; Rom. 1: 18- 20
KAMNGAH: Paul aw, lunghimawh kei in. Gam uk kumpipa mai-ah na ding ding a, Pasian in nang hong hehpih ahih manin nang le na khualzinpihte khempeuh na suakta ding uh hi,” hong ci hi (Sawl. 27: 24).
Paul in Rome ah a hawhnopna sawt khin mahmah hi. Ahi zongin Jerusalem-ah a thongkiatna in a geelna khempeuh kipelhsak hi. Jerusalem biakna makaite thukhenna tawh Paul in tuipi tungah Italy zuanin a pai hun bei tawh kigawmin Rome-ah kum nga sung khumcipna thuak hi. Paul thongkiat in gammial nasep a geelna khempeuh sem thei nawn lo hi. Hamsatna thuak taleh Jesuh in Rome khua-ah teci pang thei dingin kamciam hi (Sawl. 23: 11). Amah i taisan hangin Pasian in hun hoih hong pia hi. I mawhna hangin gimna tawh hong kipelhsak lo hangin Pasian in i kisik ding hun hoih hong pia tawntung hi. Paul in kolbulh thuakin Rome-ah va tung hi, cih Lai Siangtho sungah a kimuh loh bangin, ama lamet bangin Spain ah va zin hi, ci-in zong a kigelhna kimu lo hi (Rom. 15: 24). Roman thongkiatna pan khat vei suakta khin a, kiman kik hi. Nero uk sungin thongkia kik a, thahna thuak hi (2Tim. 4: 6-8).
Paul in Rome va tung mah hi. Gam ukpi Agrippa thusitna ngakin thonginn sungah om hi mah taleh (Eph. 6: 20; Phil. 1:13) Caesar’ innkuanpihte a kipan amah tawh kimu mi khempeuh tungah hotkhiatna thugen hi (Phil. 4: 22).
SUNDAY Sep. 23
Gunkuang Tuangin Rome Zuan
Caesarea-ah kum 2 a kikhum khitteh Rome ah kipaipih hi (Sawl. 24: 27). Italy gam zuanin tuipi tungah ni tampi bei hi. Luke in Paul tawh a kituah banah Aristarchus min nei Khristian khat tawh zong tonkhawm uh hi (Sawl. 27:2). Amaute banah thongkia dangte zong a uk Roman galkapmang Julius zong kihel hi (Sawl. 27: 1). Khuakhal beikuanin dingkhia uh hi. Sawl. 27:9 sunga Mawhmaisak Ni in October kha bei kuanlam hi ding hi. Khuadam hun, November pan March kikaal Mediterrarean tuipi tungah kuamah khualzin khol lo hi. A dingkhiat uh a kipan hamsatna thuak uh ahih manin Crete tuikulh gei Khawl Munnuam tuikulh va tung uh hi (Sawl. 28:8).
Sawl. 27: 9-12 sim in. Khawl Munnuam-ah a om sungun koi bangin lamet loh thupiang Paul in pulaak hiam?
__________________________________________________________________
__________________________________________________________________
Paul’ hilhkholhna kuamah in thupisim lo hi. Nitumna lam zuanin gunkuang tawh pai uh a, tai 40 gamlatna Phoenix tembaw khawlna manawh uh hi. Huihpi nung thuak kha ahih manin vanpuakte pawl khat suahkhia uh hi. Huih in tembaw nitumna saklam ah paipih ahih manin khua tawh kigam semsem hi. Huih hat lua ahih manin tembaw sungah tui lut hi. Lauhuai dinmun hong tung uh hi. Ni tampi sung ni kimu lo, huihpi nungin guahpi tuak uh hi. Koi mun tung cih kithei lo-in lungmangin, lamet bei uh hi (Sawl. 27:20).
Sawl. 27: 21- 26 sim in. Paul in a nih vei-na bang pulaak hiam?
_________________________________________________________________
_________________________________________________________________
Paul in tembaw nasem tungah a gen thute Pasian’ pulaak hi, ci-in pulaak hi. Lamet bei-in lungmang lo dingin thapia hi. Lauhuai-na tuamtuam leh supna thuak ding hi taleh mi khempeuh suakta ding hi, ci-in pulaak hi.
Bang hangin citakin Pasian’ nasem Paul gimna thuak hi ding hiam? Ama thuakna tungtawnin bang thumanpha na mu hiam?
MONDAY Sep. 24
Tembaw Kisia
A nih vei-na tuahsiatna-ah Paul in tembaw sunga tuang mi 276 tungah (Sawl. 27:3) tembaw tum ding a, ahi zongin mi vekpi suakta ding hi, ci-in pulaak hi (Sawl. 27:22). Ni 14 khitteh Paul gen bangin tangtung takpi hi. Huihpi nungin tembaw kihawl thei nawn lo a lungkham mahmah laitakun, tembaw hawlte in tuihual dalnate a muh uhteh leitang tawh kinai-ta hi, cih thei uh hi (Sawl. 27: 27). Lau-na leh patauhna awging tuamtuamte khitteh tembaw in suang tung tawh kisuk khak loh nadingin sikkip 4 khia sukpahin tembaw kilekgawp phatuam zaw deuh hi. Tua kawm mahin khuavak ding ngakin a pasian ciat tungah thungen uh hi (Sawl. 27: 28, 29).
Sawl. 27: 30-44 sim in. Bang thu nuntakpih ding na hiam?
_________________________________________________________________
__________________________________________________________________
A khualzin masakna panin tuitung khualzinna tawh kisai Paul theih thute muanhuai lo hi mah taleh, a kipatkhiat uh a kipan galkapmangpa in Paul thupi ngaihsut hi. Ahi zongin kaal ni khitteh galkapmangpa upmawh bang lo hi. Tembaw tuahsia ding a, mi vekpi suakta ding hi, ci-in a genkholh bangin a tuahkhak uhteh galkapmangpa in Paul zahtak semsem hi (Sawl. 27: 21- 26).
Tembaw tung tuang mi kiangah anne dingin Paul in sawl hi. Tua hi kei leh thabei-in tuipek zo lo-in tuigal kah zo lo ding uh hi. Pasian hong huhna in i sep ding nate tawh hong kipelhsak lo hi. “ Hih thu-ah tuipi tung a khualzinna lamtawntungah Pasian in amaute kemcing ding hi, ci-in Pasian in a kamciam bangin amaute in tua kamciam mitsuanin a kalsuan ding uh kisam hi.” David J. Williams, Acts (Grand Rapids: Baker, 1990), 438.
Zingsang khua hong vakin tembaw hawlte in leitang galmuh thei uh hi. Gungei mahmah nehta ahihlam uh mu uh hi. Ahi zongin tembaw in gungei tung lo hi. Sehnel lompi phu-kha banah tuihual lianpite hangin tembaw kisia hi. Galkapte in thongkia mite a suahtak theih loh nadingin a thahsawm uhteh, galkapmangpa in Paul a khualna-in, thah lo dingin khaam hi. A tawpna-ah Pasian in a kamciam bangin mi khempeuh suakta uh hi.
Paul’ nunzia, leh ama teci panna hangin Paul in suahtakna a ngah banah, thongkia mite in sihna ding panin suahtakna a ngah cih thu in, bangzahin Paul nunzia in vanglian hiam?
TUESDAY Sep. 25
Malta Tuikulh-ah
Gungei a tun uhteh Malta tuikulh ahihlam phawk uh hi. Malta in Sicily saklam, Mediterrarean sunga om tuikulh neu khat hi. Kaal 2 sung bang tuipi tungah tembaw hoih tak hawl thei lo-in huih hat lua ahih manin, huihmutna lam zui-in tembaw kihei ahih manin tai 475 val bang a pai khitteh Crete gam, Khawl Munnuam vatung uh hi. Hih munah phalbi hun ngakin kha 3 sung taam uh a, tua khitteh khualzin zom kik uh hi (Sawl. 28: 11)
Sawl. 28: 1-10 sim in. Malta tuikulhah Paul tungah bang thupiang hiam? Koi bangin Pasian in Paul zang hiam?
__________________________________________________________________
_________________________________________________________________
Malta khua mite in thunuamin, hoih tak zindo uh hi. Khuavot khuadam ahih manin Paul leh mite awi ding meicihsak uh hi. Tua hun laitakin Malta khuahun a votna 50F bang hi ding hi. Gul khat in Paul khut tu hi. Mite lungsimah Paul bek om hi. Tua khua mite in milim bia pagan ahih manun pasian in Paul mawhna thuk hi, ci-in ngaihsun uh hi. Paul in mithat mawhna nei-in tuipi pan a suahtak hangin Greek nusian Dike in khahkhong lo-in gu in tu hi dingin ngaihsun uh hi. Dike nusian in thukhen leh mawhna thuk nusian hi, ci-in um uh hi. Gultukin Paul a sih loh ciangin, hun khat lai-a Lystra khua mite mah bangin, Malta khua mite in pasian bangin ngaihsun leuleu uh hi (Sawl. 14: 8-18). Luke in hih thu a gen loh hangin Paul in hih thupiang tungtawnin hotkhiatna teci pang hi.
Publius in Malta khua-a Roman ukna nei ahih kei leh mite zahtak ulian khat hi ding hi. Paul leh a lawmte hoih na muakin om nading a muh mateng ni 3 sung ama innah Paulte sam hi. Hih mipa in a natna pan damna ngahna tungtawnin Malta khua cinate in zong Paul in damsak hi. Paul leh a lawmte Malta tuikulh pan a zinkhiat khit uhteh mi khat beek in Pasian thu-um suak lo uh hi. Hotkhiat nasepna-ah deihsakna, huhna cihte tuiphumna, pawlpi phuatna cihte sangin a thupi zaw om hi, cih hong hilh hi. Hih in hotkhiatna nuntakpihna hi (Sawl. 20: 35; Titus 3:14).
Malta tuikulh mite in Pasian in thukhen hi, cih theihna a neih uh lamdang hi. A taktakin tua bang theihna koi pan hong pai hiam? Rom. 1: 18 – 20
WEDNESDAY Sept 26
Rome Ah Paul, A Hun Nunung Pen
Malta ah kha 3 a om khit uhteh Paul leh a khualzinpihte in khualzin zom kik uh a, Puteoli va tung uh hi (Sawl. 28:11, 13). Tu-in Pozzuoli kici-in Bay of Naples, Rome khuapi panin khe-lam tawh kitung thei hi (Sawl. 28: 11- 16). Rome khua-ah Paul a va tun ding thu kizel pah hi. Thu-um mi hon khat in Rome panin tai tampi mun khat pan Paul va dawn uh hi. Rome pai ngei lo hi mah taleh Paul in Rome ah meltheih tampi nei hi. A naseppihte, thu-um mi thakte, sanggam tanau cihte a kipan amah a it mi tampi om hi (Rom. 16: 3-16).
Tembaw kisia-in gimna lianpi a thuak khit Paul in thongkia mi khat hi mah taleh tua bangin Rome panin thu-um mite a vadawnna uh ngaihsun lehang lungsim hong sukha hi. Tua bangin thu-um mite’ itna leh ngaihna a ngah manin Paul in Pasian tungah lungdamko hi. Paul in a sawtlo-in gam-uk mangpipa mai-ah thusitna thuak ding a ngaihsut ciangin a lunggim hi.
Festus in Roman thukhun siksanin Paul thusit a, thongkiat theihna dingin Paul in mawhna nei lo hi, ci-in pulaak hi (Sawl. 25: 26, 27; 26: 31, 32). Tua hangin Paul in thongkia mite lakah om lo-in, amah kia muntuam khatah om theihna ngah hi (Sawl. 28: 30). Kolbulh thuak lo-in ama kitangsap a sik thei dingin amah leh amahin naseptheihna ngah hi (Sawl. 18:3).
Sawl. 28: 17-22 sim in. Khualzinna pan a khawl khitteh Paul in bang sem hiam?
________________________________________________________________
_________________________________________________________________
Paul in Jew biakinn synagogue-ah a pai loh hangin mite’n amah hong zuan uh hi. Rome a va tun ciangin zong a ngei-na bangin Jew mite tawh kimu masa-in (Rom. 1:16), thuman lo-in a kimawhsakna, thongkiat thuak dingin siatna a neih lohna, Jesuh in sihna pan thokik hi, cih thu hangin kimat a thuakna cihte Jew makaite kiangah pulaak hi (Sawl. 23: 6; 24: 15; 26: 6-8). Mi muanhuai mi khatin mite’n a muh nadingin Paul in amah leh amah a khialhlohna pulaak hi lo zaw-in, Israel mite lametna a tangtungsak sihna pan a nungta kik Jesuh a tangko manin mawhsakna thuak ahihlam pulaak hi. Rome khua mite in Jerusalem makaite tung pan bang mah zakna nai lo bilbel ahih manin Jew mite in Paul thugente ngai uh hi.
Sawl. 28: 22 sim in. Thu-um mite kilangpanna bangci bangin pulaak hiam? I upna hong kilangpan hi mah taleh koi bangin kiptakin ding ding na hiam?
THURSDAY Sep. 27
Lungdamna Thu A Gualzawhna
A kipatin hotkhiatna thugen ngai dingin Jew mite in Paul kiang kikhawm uh hi (Sawl. 28:23).
Sawl. 28: 24-31 sim in. Paul in bang ngimna tawh Isaiah siksan hi ding hiam?
____________________________________________________________
____________________________________________________________
Mite in Pasian thupiak a nial uh ciangin a piang thute Isa. 6:9 in pulaak hi. Jew mi kimkhat in um uh a, kim khat in um lo hi. Tua bangin Jew mite sungah buai-na a om manin Paul in Gentile mite kiangah thugen dingin khensat hi (Sawl. 13: 46, 47; 18:6). Emperor Festus thusitna thuak dingin Paul in kum 2 sung ngak hi. Khua sungah paikhia thei lo-in inn sung a omna munah hong pai mi khempeuhte kiangah Paul in hotkhiatna thu pulaak hi. Sawltak Bu nunung lamah kipulaak mah bangin Jew hi taleh Roman kumpi in hi taleh kuamah in hotkhiatna thu khaktan zo lo hi. Bang hangin Luke in hih bansiah bang mah pulaak nawn lo hi ding hiam cih pen kithei lo hi. Ahi zongin Pau in tua khit nasem lai hi, cih kimu hi. Thongkhiatna thuak dingin Paul in khialhna nei lo ahih manin Paul in kikhahkhia hi. Paul a suahtak khitteh hotkhiatna thu gen dingin khualzin kik hi. A khualzinna panin Rome khua-ah kipaipihin thahna thuak hi (2Tim. 4: 6-8). Luke ii laigelhna tungtawnin ngaihsun lehang Rome ah hotkhiatna thu kigen khin ahih manin leitung mun khempeuhah hotkhiatna thu kizel khin hi, ci-in Luke in ngaihsun hi ding hi (Sawl. 1:8).
“A man lopi mawhsakna thuakin thongkiatna thuak mah taleh Paul in lungduai-in, lungnuam takin a om theihna pen ei aa dingin thuhilhna sermon manpha mahmah khat hi. Leitung mite bang hi lo-in ama lungsim in leitung nate sangin a sang zaw nate ngaihsun hi. Ama nunzia ettehin Khristian thu-um mite in leitung nate nopsakna nusia uh hi. Tua bangin Paul in huzaap liannei hi. Na tampi sem zo ding hi mah taleh, sepzawhna, a hihtheihna khempeuh a kikhaktansak ciangin, a nawlkhin mite kiangah nasemin Topa aa ding buhlom kaikhawm mi hong suak hi.” Ellen G. White, The Acts of the Apostles, 464.
Pawlpi’ nasepna panin ngaihsun lehang Sawltakte Thubu in a kizo siang nai lo hotkhiatna tangko-na hi-in, nang leh kei in hih tangko-na-ah kihel i hi hi. Pawlpi tangthu ah Pasian nasepna lamdang tampi kimu thei hi. Pasian tungah a citak mite sihna thuak zong tampi om hi. Jesuh hong piak nasep nungzuite leh sawltakte maban a sem ding, nasepna a zo ding i hi hi. Tua khit ciangin beina hong tung ding hi (Matt. 24: 14).
FRIDAY Sep. 28
Ngaihsutbeh Ding: “Khrih in pawlpi tungah siangtho nasep guan hi. Pawlpi mimal khat ciat in a manpha Khrih hong hehpihna, a man kiciang tan thei lo Ama hauhna khempeuh leitung mite thei dingsak kisam hi. Honpa in Ama zia le tong a kilangsak ding, Ama lungsim a nei ding mi sangin a deihzawk dang bang mah om lo hi. Leitung in Honpa hong itna nei ding mi sim loh a kitangsap dang om lo hi. Pasian in Khristian thuman vangliatna kilangsak ding mi lamen tawntung hi.” Ellen G. White, The Acts of the Apostles, 600.
“Pasian in Ama nasem dingin thu-um mimal khat ciat in a hihtheihna bang ciat tawh nasem dingin a hong ngak tawntung hi. Pawlpi mi khat ciat in a nasep ding kisehna ciatah, inn phual hi taleh a gamla mundang-ah hi taleh citakin nasem hileh hotkhiatna thu in leitung mun khempeuh zelkhin ta ding a, a hong thupiak tangtung khinin, a kamciam bangin Topa Jesuh in vangliatna leh minthanna tawh leitungah hong pai khin ta ding hi.” Ellen G. White, The Book of Acts, Wilson Paroschi, 280.
Kikup Ding Dotnate:
1. Koi bangin Paul in Rome zuanin a pai-na khempeuhah Pasian tungah a citakna Luke in pulaak hiam?
2. Bang bang gimna thuak taleh Paul in a upna leh a nasep nusia lo hi. Rome ah suahta kei taleh ahih theih bangin hotkhiatna thu gen hi.Mi khat tungah hotkhiatna thu genin i lungkiat ciangin koi bangin mainawt thei ding i hiam?
3. Rom. 1: 14, 15 sim in. Bang hangin Paul in mi khempeuh tungah hotkhiatna thu hilh ding leiba, ahih kei leh sep loh phamawh hi, ci-in ngaihsun hi ding hiam? Hih thu ngaihsun in: “ Khrih a um mimal khat ciat in hotkhiatna nasep pen i nuntak laiteng a sem ing ahi hi. Pasian in a hehpihna, a thuman khuavak hong pia-in, thuman vangliatna, a thuman a hoihna hong musak ahih manin leitung mite tungah hehpihna thu gen ding leiba nei i hi hi.” Ellen G. White, 4T., 53.
4. Isa. 6:9 sim kik in. Koi bangin i nuntakzia hong sukha hiam? Thuman khuavak tampi hong kipia hi napi i lungkhuahsak leh thuman langpangte i suak ding a, i thuak ding gimna bang zahin lauhuai-in lian ding hiam?
5. Paul a cing galkapte bangin kingaihsun in. Paul sungah bang na mu ding hiam?
